Donostia

Kultur bizitza berrartzeko eta indartzeko ekintza plana

1) Bertan behera geratutako emanaldiak: %30 aldez aurretik ordaintzea eta gainontzeko % 70a emanaldia egitean 2) Kaleko kultur eskaintza berrartu: auzo guztietan egitea etxeetako balkoi eta leihoetatik ikusteko moduko ikuskizunak 3) Aurtengo Jazzaldia, Hamabostaldia, zinemaldiak, Gazteszena..., horiek berrartzeko modua eginez gero, bertako sortzaileen sorkuntzak eta emanaldiak lehenestea

| 2020-04-22 13:42:00

Euskal kulturgintzaren prekaritatea egiturazko arazoa da, baina Covid19ak eragindako pandemiak arazoa izugarri larriagotu du, eta horrek erantzun azkarrak ematera behartzen gaitu: batetik, uneari erantzuteko premiazko neurriak behar dira, normaltasunera itzultzen azkenak izango direlako aisialdia eta kultura, errestaurazioarekin batera; asko luzatuko zaio egoera hau kultur arloari. Eta neurri horiekin batera, sektorea eta kultur bizitza bera ere indartuko dituzten egiturazko neurriak behar dira.

Gure hiriak kultur bizitza zabala du, sortzaile ugari ditu eta, modu batean edo bestean, kulturan parte hartu edota berarekin gozatzen dugu herritar gehienok. Orain, etxeko babesean egotera behartuta gauden honetan, gure sortzaileak kinka larrian geratu dira, babesgabe: hitzartuta zituzten emanaldiak bertan behera geratu dira, argitaratu asmo zituzten lanak ezin plazaratu daude, iturri ekonomikoen emaria etenda… Egoera hori are zailagoa da euskaraz sortzen duten kulturgileentzat, gure ekosistema zaurgarria baita lehendik ere.

Covid19ak eragindako krisiaren lehen unetik, Udal Gobernuarekin harremanetan jarri zen Donostiako EH Bilduren Udal taldea, kulturaren esparruan aurreikusten genuen egoera arazotsuari aurrea hartzeko. Besteren artean, kezka adierazi genion Donostia Kulturako langileen egoeraren inguruan (behin behinekoak bereziki), galdetu genion harremanik izan ote zuen hiriko kultur eragileekin beraien egoeraz jakiteko, itaundu genion zer asmo zuten programatuta edota hitzartuta egonik bertan behera geratutako emanaldi eta egitasmoekin, eta eskatu genion, kulturako aurrekontuan aldaketarik egin behar izatekotan, Administrazio Kontseiluari eskatzeko irizpide batzuk, erabakiak adostuak izateko, ahal zen heinean.

Ordutik hilabete igarota, eta Udal Gobernuak ez duenez gainerako Udal taldeekiko harremana berrartu, honako neurriok proposatzen ditugu:

Kultur mahaia sortzea. Urte honen hasiera, EH Bilduk proposatu zuen Kultura Sektore Kontseilua berrartzea. Orain, are beharrezkoagoa ikusten dugu krisi honen ondorioei adostasunetik eta modu koordinatuan erantzuteko, eta etorkizuneko bide orri berri bat finkatzeko.

Udal zergak ordaintzeko erraztasunak ematea edota zergak ordaintzetik salbuestea. Kultur eragileek beraiek eta beren jarduerak izaera berezia dute (prekaritatea, behin behinekotasuna...), eta osasun krisiaren ondorioz pairatu dituzten galerak era berean ulertu behar dira. Horregatik, premiazko neurri gisa, proposatzen dugu 2020ko tasak ordaintzeaz salbuetsita uztea, edo bestelako onurak eta konpentsazioak aplikatzea.

Bertan behera geratutako emanaldiei eutsi. Osasun krisiak eragindako kalteez gain areago ez kaltetzeko, kultur arloko profesionalekin eta eragileekin hitzartuta zeuden konpromiso ekonomikoei eutsi behar zaie, bereziki auzoetako festa batzordeak eta bestelako irabazi asmorik gabeko entitateak direlarik. Alde horretatik, proposatzen dugu hitzartutako ekarpenaren % 30, gutxienez, aldez aurretik ordaintzea, aurreikusita zegoen epean; gainontzeko % 70a ikuskizuna edo emanaldia egitean jasoko du. Formula hori, beti ere, malgua litzateke, kultur eragileak bigarren aurrerapen bat behar izanez gero, profesionalarekin edota kultur eragilearekin berarekin adosteko modua egongo litzateke. Egoki ikusiko genuke horiek bermatzeko legezko aldaketak egitea, baldin eta aldaketa horiek sektorearekin eta Udal talde guztiekin aztertu eta adosten badira.

Udalaren kultur eskaintzari eustea, eta beste eragileena ere bultzatzea. Oraingoz, online eskaintza indartu da, baina herritar asko geratu da aukera horretatik kanpo. Horregatik, iruditzen zaigu funtsezkoa dela sentigarria den kultura berreskuratu eta bultzatzea, birtualtasunetik harago (RESET plataformak proposatu bezala). Beste neurrien artean, honakoak proposatzen ditugu:

Kaleko kultur eskaintza berrartzeko modua egitea, eta auzo guztietan egitea etxeetako balkoi eta leihoetatik ikusteko moduko ikuskizunak. Horrekin batera, auzoetako ekonomia berreskuratzeko, funtsezkoa izango da, hurrengo hilabeteetan, animazio kulturala indartzea kalean, ikusle eta parte hartzaileekin, beti ere, osasun agintariek aldiro ezarritako mugen baldintzapenak kontuan izanik: musika, dantza, antzerki edota kaleko beste ikuskizunez gain, auzoetan liburu eta diska azokak antolatzea proposatzen dugu, tokiko eragileen eta saltegien laguntzarekin.

Herritarrek kultura gozatzen jarraitzeko eta kultur sorkuntzan parte hartzea ahalbidetuko duten proposamenak egitea. Alde horretatik, premiazkoa da liburutegi ibiltariak abian jartzea, udal sareko liburuen mailegua etxeetara iristeko. Gogoan izan behar ditugu, bereziki, egoera zaurgarrian dauden familiak. Kultur sortak prestatu (eskulanetako materiala, mahai jolasak, ipuinak…) eta familia horiei helaraztea proposatzen dugu, Ibarrako udalak egin duen moduan. Era berean, ekimenak proposatu behar dira, herritarrek sor dezaten: ikastaro kolektiboak, bizipenak bilduko dituzten idazlanak, balkoietako performanceak...

DKren ikastaroetan izena emanda dauden herritarrei eskaini zaie ikastaroak online jarraitzea. Modu telematikoan aritzeko modurik ez duten herritarrei, edota modu horretara nahi ez dutenei eskaini behar zaie matrikula saria itzultzea, eta presentzialki egin ahal izatean, beherapena izateko aukera, izena berriz ematea errazteko.

Liburutegi publikoen funtsak handitzea, bereziki, euskarazko produktuei dagokienez.

Profesionalen kultur sorkuntzara eta irabazi asmorik gabeko eragileen (dantza taldeak, festa batzordeak, inauteri konpartsak, danborradak...) kultur eragiletza indartzera bideratutako dirulaguntza lerroak % 100 indartzea, 2021. urtean.

Bertako sortzaileen sorkuntzak lehenetsi. Udalak antolatzen, parte den edo laguntzen dituen emanaldi eta jaialdietan, bereziki, handienetan (Jazzaldia, Hamabostaldia, zinemaldiak, Gazteszena...), horiek berrartzeko modua eginez gero, bertako sortzaileen sorkuntzak eta emanaldiak lehenetsiko dira. Areago, euskarazko sorkuntza bultzatu eta lehenetsiko da, kultur sorkuntzaren kanala mintzatua edo idatzizkoa denean.

Auzoetako festak berrartzea. Senide eta lagunak kaltetu, eta etxeetan isolatuarazi gaituen egoera latz honek inoiz baino beharrezkoagoa egiten du auzotarron arteko harremanak indartzea, bizipozari eusteko, komunitatea egiteko. Uda sasoia auzoetako jaien garaia izaten da gure hirian, eta aurreikusita zeuden ekimen asko bere horretan egin ezingo diren arren, horiek berformulatzeko moduak proposatu eta bultzatu behar dira. Festa batzordeei lagundu behar zaie eginkizun horretan, horretarako prest baleude.

Neurri horiek beharrezkoak iruditzen zaizkigu, gure ustez kultura entretenimendu hutsa baino gehiago delako. Apirilaren 21erako eta 22rako greba digitala deitu duten kultur eragileek adierazi duten bezala, “kultur sorkuntzak bestelako balioak partekatzen dituzte: Kultur esperientziek eta kultur imajinarioek munduan leku bat egiten laguntzen digute, barne-mundua elikatzen digute, zentzuaren eraikuntzan laguntzen digute, geure buruaren eraikuntzan laguntzen digute, baita mundua ulertzen ere, trukea sustatzen dute, jolaserako espazioa sortzen dute, arakatzera gonbidatzen gaituzte, eta batez ere, komunitate bateko kide sentiarazten gaituzte”. Horregatik guztiagatik, Donostiako Udalak garaiak eta egoerak eskatzen duen kulturarekiko konpromisoa hartu behar duelakoan gaude.

Helburua Donostiako ekonomia birbideratzea izan behar da, ez krisi aurreko egoerara itzultzea

Langabeziak gora egin du eta %11,5-ean dago dagoeneko // Merkataritza txikiaren kasuan, laguntza 681 eurokoa izango da establezimendu bakoitzeko

| 2020-04-21 14:19:00

Donostiako Sustapena elkartearen Kontseiluak hiriko sektore ekonomikoei eman beharreko laguntzak aztertzeko bilera egin du gaur. Informazio zehatzagoaren zain, EH Bilduk bere kezka adierazi nahi du, ez delako inolako aipamenik egin hiriko hazkunde ekonomikorako beste eredu baten beharraz. Izan ere, Donostian beste inon baino gehiago sufrituko dugu krisi hau, hain zuzen ere, gure egitura ekonomikoa turismoarekiko duen mendekotasunagatik.

Langabeziaren datua adierazgarria da zentzu honetan: lehen aldiz, Donostiak Gipuzkoako eta EAEko langabezia tasa gainditu du. Dagoeneko% 11,5ean gaude, eta Udal Gobernuak are gehiago igotzea espero du. Sektorerik kaltetuena emakumeak eta 45 urtetik gorakoak izango dira; eta langabetuen % 56 ostalaritzakoa da.

Eneko Goia alkatea denetik, turismoa Donostiako ekonomiaren motorra izatearen aldeko apustua argia egin da. Aitzitik, sektore desberdinetatik ohartarazi izan den bezala, apustu arriskutsua zen, bai arlo ekonomikoan, bai sozialean. Pandemia honek agerian utzi du sektore hau oso lurrunkorra dela eta kontuan hartu behar dugu, adituen arabera, etorkizunean horrelakoak errepikatzeko aukera asko daudela. Eta. Zentzu honetan, gauza bera esan genezake EAJ-PSE Gobernuak Garbera handitzeko eta merkataritza-gune handietako beste proiektu batzuk bultzatzeko emandako babesa..

Hori dela eta, EH Bilduren iritziz, galdera ez da hiria noiz eta zein laguntzarekin itzuliko den krisi aurreko egoerara, baizik eta egoera berera itzuli behar duen. Donostiako EH Bilduk argi dauka beharrezkoa dela gauzak beste modu batera egitea eta akats berberak ez errepikatzea. Zoritxarrez, gaur ikusi dugu Udal Gobernuak, autokritika egin beharrean, hiri-eredu berarekin jarraitu nahi duela.

Bestalde, EH Bilduk Donostiako Sustapena Kontseilura eraman ditu aste hauetan udal gobernuari helarazi dizkiogun proposamen zehatzak, Donostiako merkataritza txikiaren sektoreko ordezkariekin eta tokiko ekoizleekin batera landu ditugunak. Neurri zehatzak ezagutzen ez baditugu ere, baikortasunez ikusten dugu gure proposamenetako batzuk onartu izana, hala nola banaketa-plataforma bat martxan jartzeko beharra, dendek on-line saldu ahal izan dezaten. Hala ere, denda txikiei udal-tasak barkatzeko oraindik ez da konpromisorik hartu.

Denda txikientzako eta ostalaritzarako laguntzen zenbatekoari dagokionez, gure ustez ez dira nahikoak, eskatzaile bakoitzeko 681 euroko zenbatekoa planteatzen delako. Izan ere, Udal Gobernuak laguntzetarako "tarifa plana" moduko bat ezartzea planteatzen du, inolako baremaziorik egin gabe. Eta kontuan hartzen badugu, Gobernuaren arabera, 2200 bat laguntza-eskaera jasotzea aurreikusten dela, eta guztientzat soilik 1,5 milioi euro daudela, laguntza 681 eurokoa izango da establezimendu bakoitzeko.

Amaitzeko, EH Bilduk berretsi nahi du Udal Gobernuarekin kooperatzeko borondatea duela, bai osasun-krisiari aurre egiteko, baita krisi ekonomikoa kudeatzeko ere. Pertsonak, bizitza eta zaintzak erdigunean jarriko dituen eredu ekonomikoa bultzatzea da, guretzat, lehentasuna.

EH Bilduk eredu turistikoa birbideratzeko neurriak proposatu ditu, jasangarria izan dadin eta akatsak ez errepikatzeko

Diru-laguntza zuzenak, salbuespen fiskalak, lanaren banaketa eta turismo-tasaren ezarpena dira proposatutako neurrietako batzuk.

| 2020-04-20 13:11:00

Deskargatu dokumentua osoa pdf-n

Prentsa oharra:

Turismo-industria bat-batean gelditu da mundu osoan, eta horren dimentsioak eta ondorioek kalkulaezinak izaten jarraitzen dute. Edozein kasutan, Turismoa pandemiak gehien kaltetutako sektoreetako bat izango da. Susperraldia motela eta zaila aurreikusten da, eta sektoreak gutxiengo egitura bati eusteko administrazioak laguntza handiak eman beharko lituzke. Donostiako alkate Eneko Goiak ere iragarri ditu diru-laguntzak, baita fondo bat sortuko dela ere.

Baina orain galdera ez da noiz eta zein laguntzekin itzuliko den turismoa krisi aurreko egoerara, baizik eta ea egoera berera itzuli behar ote duen. Donostiako EH Bilduk argi du krisiaren ondorioz turismoak bizi duen egoerak aurrerantzean gauzak beste modu batera egiteko aukera eskaintzen duela. Areago, ezinbestekoa da gauzak beste modu batean egitea. Izan ere, askotan errepikatu dugun bezala, turismoaren jardunak Donostian aspaldi utzi zion jasangarria izateari.

2008tik aurrerako finantza krisiaren testuinguruan gertatu bezala, orain ere arrisku handia dago lehentasunak turismoaren sektoreari eskaintzeko. Izan ere, turismoa diru iturri erraz eta azkarra izan daiteke, baina, era berean, oso sektore lurrunkorra dela agerian geratu da. Izan ere, sektore honek sortzen duen menpekotasun eta ahulezia ekonomikoaz ohartuta, berriro ere akats berdinak ez errepikatzea da orain erronka.

EH Bilduren ustez, lanpostuen galerari eta enpleguaren kalitateari aurre egitea da orain lehentasuna. Baina, epe ertainera, aldaketa estrategikoak egin beharko dira Donostiako egitura ekonomikoan, mendekotasun turistikoa murrizteko eta lehentasunezko inbertsio publikoak beste sektore indartsuagoetara bideratzeko: ekoizpena, berrikuntza, zerbitzu digitalak, nekazaritza eta “km0” praktikak, klima aldaketari aurre egiteko enpresak, zaintzak eta sektore sozio-sanitarioa, eta abar.

EH Bilduren proposamenak

Donostiako Turismo-sektorea laguntzeko neurriak

  • Egungo erreskate-paketeetan turismo-industriari eskainiko zaizkion diru-laguntzak mantendu behar dira. Hori bai, diru-laguntza horiek enpresa txiki eta ertainengan kontzentratu behar dira, konglomeratu erraldoiak finantzatu beharrean.
  • Diru-laguntza horiek lehentasunez jasotzeko, turismo eredu jasangarriarekiko konpromisoa hartu beharko dute enpresek:
    • Lan baldintza duinak (Gipuzkoako lan-hitzarmenen arabera)
    • Hiriko nortasun eta bizi kalitatearekiko erantzukizun soziala
    • Donostiako udalak larrialdi klimatikoari aurre egiteko hartzen ari den konpromisoarekin koherentzia
  • Udal-aplikazioko tasa eta zergen etena. Duela egun batzuk aurkeztu genituen Donostiako merkataritza txikiarentzako proposamen orokorrak turismo-sektorera atxikitako establezimendutan ere aplikagarriak dira. Zentzu honetan, Donostiako EH Bilduk bat egiten du hiriko merkataritza elkarte ezberdinek Udalari egin dioten eskaerarekin:
    • Urte honetako OHZren ordainketa kentzea
    • Uraren eta zaborren tasaren ordainketa kentzea
    • Merkataritzako elementuak bide publikoa okupatzeagatiko urte honetako ordainketa kentzea
  • Lana banatzea: Larrialdi egoeraren ondoriozko eszenatoki honetan, sektorean enplegu galera handia aurreikusten da. Enplegu-galera txikitzeko, gainerako lanpostuen banaketa sustatu behar da, lanorduen murrizketa orokorrago baten zati gisa (orduko ordainaren igoerarekin batera). Honek erakunde publikoen diru-laguntzak eskatuko lituzke, baita beste jarduera batzuetara bideratzeko langileek egin beharko duten berregokitze-formazioak eskatu ere.

Diru iturriak

  • Epe motzean, Udalak eskainiko dituen diru-laguntza paketeak
  • Epe ertainera, diru-laguntza horiek finantzatu behar dira bisitariei ezarritako tasa berrietatik (tasa turistikoa) edo karbono-isuriei ezarritako zergetatik.

Beste sektore batzuetara trantsizioa errazteko neurriak

  • Dagoeneko merkataritza-jarduerarako saturatuta dauden eremuetan edo galtzear daudenetan (Parte Zaharra, Erdialdea, Gros, Antigua), merkataritza-lokalak turismoaz bestelako jardueretara bideratzea sustatzea, hala nola merkataritza tradizionalera edo bertan kokatutako negozioak eta enpresak hiriarentzat estrategikotzat jotzen den beste jarduera batera.
  • Hobari fiskala (OHZ murriztea), etxebizitza turistikoak alokairu tradizionalaren merkatura itzul daitezen (edo orain krisialdian alokairu arruntean eskaintzen ari direnak bertan gera daitezen).
  • Beharrezkoa litzateke ekonomiak turismoan gutxiago ardazteko aukera emango luketen sektore anitzetako alternatiba gisa enpresa berriak sustatzea. Bide batez, ahalegin hau baliatu behar litzateke jarduera ekonomikoak birkokatu eta zenbait lurraldek merkatu globalen gorabeheren aurrean duten zaurgarritasuna gutxitzeko, orokorrean.
  • Proiektu komunitarioak antolatzeko oporrak eta aisialdia bultza behar dira, ez dirua irabazteko asmoak bultzatuta, baizik eta sozialki onuragarriak diren esperientzien trukeak.

Turismo estrategia aldatu beharra

  • Turismo Zuzendaritza Plana 2017-2021 iraungita dago. Krisiak utzitako ondorioei eta aipatutako hiri estrategia aldaketaren beharretara egokitzeko, gogoeta berri bat abiatu behar da sektorearekin, sindikatuekin, auzo elkarteekin eta beste eragile sozial eta politikoekin.
  • Estrategia egokitzen den bitartean, pisu turistiko eta hotel berriei moratoria ezarri behar zaie.

Gladys del Estali egindako omenaldia dela eta , Eguzkik jasotako ordainagiriari buruzko galderak Eneko Goiari

Eremu publikoaren erabilera biktima batekiko omenaldia izanik helburu gisa, lekuz kanpo ikusten dugu ordainagiririk ezartzea bertan parte hartu zuen eragileetako bati.

| 2020-04-17 12:36:00

1979ko ekainaren 3an hil zuen Guardia Zibilak tiroz Gladys del Estal, eta ordutik, urtero egin dute hura oroitzeko omenaldia haren auzoan, Egian. 2019an, 40 urte bete ziren gertakari horretatik, eta Gladys Gogoan plataformak omenaldi berezia prestatu zuen Cristina Enea parkean.

Omenaldi horretan Gladys del Estalekin lotura izan zuten askotariko pertsonak bildu ziren: lagunak, ikaskideak, auzokideak eta mugimendu antinuklearreko kideak. Era berean, Eguzkik, EHUko Informatika Fakultateak eta Kalapie elkarteak ere bat egin zuten bertan.

Horiek horrela, aurreko astean (2020ko apirilaren 11n) Eguzkik aditzera eman zuenez, 2019ko ekainean Cristina Enea parkean egindako omenaldiaren harira, eremu publikoa erabiltzeagatiko ordainagiria jaso zuen. Bertan, 8,40 euro ordaintzeko eskaera egiten zen.

Eguzkik salatu bezala, diru-kopurua ez da handia, baina kezkagarria iruditzen zaigu biktima bati egindako keinu batengatik horrelako kargak ezartzea.

Egun hartan biktima baten 40. urteurrenaren inguruko omenaldia egin zen Cristina Enea parkean, beste hainbat biktimekin egin ohi den moduan. Eta egun hartan ere,  Gladys del Estal biktimaren inguruko senide, lagun eta kideek antolatu zuten omenaldia, beste hainbatetan bezala.

Eremu publikoaren erabilera biktima batekiko omenaldia izanik helburu gisa, lekuz kanpo ikusten dugu ordainagiririk ezartzea bertan parte hartu zuen eragileetako bati.

Hori dela-eta, hauxe da behean sinatzen duen zinegotziak egindako

GALDERAK

  • Zer dela eta erabaki du Donostiako Udalak ordainagiri hori bidaltzea Eguzkiri?
  • Zer iritzi du Udal Gobernuak biktimen omenaldiak eremu publikoan egitearen inguruan?
  • Biktimen omenaldi ekitaldien antolatzaileei eremu publikoa erabiltzeagatiko ordainagiria helaraztea al da Udalaren irizpidea? Kasu guztietan egiten al da? Mota honetako zenbat ordainagiri helarazi dira agintaldi honetan?
  • Zer egiteko asmoa du Udal Gobernuak Eguzkiri iritsi zaion ordainagiri horrekin?

Egoitzen eta pisu tutelatuen egoeraz azalpenak emateko Eneko Goiaren agerraldia eskatuko du Donostiako EH Bilduk

Reyes Carrere: "Udal Gobernuak informazio guztia gardentasunez partekatu behar du udal taldeokin eta donostiarrekin"

| 2020-04-16 13:04:00

Zinez gogorra da, osasun-larrialdi honetan, Hego Euskal Herriko adinekoen egoitza-zentroetan edo ezgaitasuna duten pertsonen zentroetan gertatzen ari dena. Donostia ere ez da salbuespena, eta Altzako Berra egoitzatik, batik bat, albiste kezkagarriak iristen ari dira. Horregatik, Donostiako egoitzen egoeraren berri izateko eta haietan dauden donostiarren zein haien familien eskubideak bermatzeko Udala zer lan egiten ari den jakiteko, Eneko Goia alkatearen agerraldia eskatuko du EH Bilduk. Izan ere, zentro hauek COVID19aren hazkundearen nukleo zaurgarrienetakoak bilakatu dira, eta kutsatuen zein hildakoen kopuruak dira horren adierazle. Era berean, Udalaren eskumeneko pisu tutelatuen egoeraz ere informazioa eskatuko du EH Bilduk.

Esan bezala, Hego Euskal Herriko adinekoen eta ezgaitasuna duten pertsonen zentroen egoera oso kezkagarria da. Administrazioek gomendio eta prebentzio neurriak onartu dituzte, baina haiek eraginkortasunez betetzeko ez dago arreta zuzeneko langile eta material nahikorik. Bestalde, larrialdiaren aurrean, planifikazio falta eta irizpide desberdintasunak izan dira nagusi, egoitzetako langileek eta senideen elkarteek salatu duten bezala: test falta, norberaren babeserako ekipoen gabezia, gaixotu eta ordezkatu ezin den pertsonala…. Bitartean, birusaren aurrean ahulen diren adinekoei dagokienez, isolamenduak, bisitarik ezak eta gertukoen afekturik ezak areagotu egin dute haien zaurgarritasuna.

Gipuzkoaren kasuan, 240 zentro ditugu eta atzo Foru Aldundiak adierazi zuen bezala, 111 izan dira hildakoak; haietako zazpi Altzako Berra egoitzan. Atzo 12 hildako izan ziren eta 17 positibo; horietako hiru Donostian (Berran, Uliazpin eta Iza zentroan).

Altzako Berra egoitzari dagokionez, zenbait langilek oso lekukotza gogorrak eman dituzte eta pertsonal eta material falta nabarmena dagoela eta positibo emandako egoiliarrak eta testa egin gabekoak nahastuta ibili direla ere salatu dute. Argi dago egoera hau argitu behar dela eta neurriak hartu behar direla balizko gabeziak konpontzeko eta akatsak zuzentzeko.

“Donostiako herritar eta eragile askok adierazi digute egoitza eta zentroen egoeraren inguruko kezka. Gauza jakina da Gipuzkoako Foru Aldundiaren eskumena dela, baina guk garbi dugu alkateak Donostiako egoitzen egoeraren berri izan behar duela eta, areago, bertan dauden herritarren eta haien senideen eskubideak defendatu behar dituela, eta horren inguruko informazio guztia gardentasunez partekatu behar duela udal taldeokin eta donostiarrekin; besteak beste, horrek ekarpenak eta proposamenak egiteko aukera eman dezakeelako. Oso gai larria da, herritar askori eragiten diona, denok batera jardun behar dugula diogu etengabe, eta beraz, horrekin guztiarekin koherentziaz jokatu behar dugu. Horregatik eskatuko dugu Eneko Goiaren agerraldia”, adierazi du Reyes Carrere Donostiako EH Bilduko bozeramaileak.

Era berean, Udalaren eskumena diren honako baliabide hauen egoera zein den ere jakin nahi du Donostiako EH Bilduk, baliabide hauek ere adineko pertsonei zuzenduak daudela kontuan izanda:

Berrako apartamendu tutelatuak (39 plaza).

Zorroagako apartamendu tutelatuak (27 plaza).

Elizarango apartamendu tutelatuak (10 plaza).

Txara 2-ko apartamendu polibanteak (18 plaza).

Ategorrieta, Berio, Benta-Berri eta Marrutxipiko apartamendu tutelatuak (47 plaza).

Monseko etxebizitza komunitarioak (36 plaza).

Zorroagako 67 plaza.


 


 


 


 


 

ALBISTEAK

Ategorrietako sarraskiaren 90. urteurrena

2021-04-14 11:47:00

Ategorrietako sarraskiaren 90. urteurrena dela eta, bertan gertatutakoa oroitzeko eta egun hartan (1931ko maiatzaren 27a, Errepublika aldarrikatu berria) hildako 7 langileak errekonozitzeko proposamena aurkeztuko du Donostiako EH Bilduk.

EH Bildu Udal taldeak Groseko eragileen salaketa aztertuko du

2021-03-29 12:49:00

Joan den ostegunean, Groseko hainbat taldek salatu zuten Donostiako Udaleko idazkariak erabilera turistikoko etxebizitza bat duela Gros auzoan. Talde horiek salatzen zutenez, osoko bilkuretan hartutako erabakien legezkotasunaren bermatzailea denak, Idazkariak, erabilera turistikoko etxebizitzak lehen solairutik gora legeztatzeko aukera baliatu zuen jarduera ekonomiko hori ezartzeko.

EH Bilduk kontzentrazio bat egingo du Kontxan “PNV-PSE: Ez handitu zuloa” lemapean

2021-03-18 11:55:00

Kontzentrazioa martxoaren 28an izango da, 12:30ean.