Donostia

Metroaren obren ondorioz kaltetutako donostiarrei elkartasuna adierazteko kontzentrazioa deitu du EH Bilduk

Ez Eneko Goiak, ez EAJ eta PSE Legebiltzar taldeek, ez dute salatu nahi izan metroaren obren ondorioz kaltetutakoei emandako gutunak

| 2021-09-21 10:17:00

Metroaren obrengatik kaltetutako pertsona askoren babesgabetasun-egoera areagotzen ari da inplikatutako erakundeak beste aldera begiratzen ari direlako. Izan ere, Donostiako alkateak gutunen existentzia bera zalantzan jarri zuen atzo, Eusko Jaurlaritza sostengatzen duten talde parlamentarioek, EAJk eta PSEk, Kontxa inguruko ikerketa geotekniko sakonago bat egiteari uko egiten zioten aldi berean.

Donostiako Udalari dagokionez, bai EH Bilduk eta bai Elkarrekin Donostiak aurkeztutako premiazko interpelazioak jorratu ziren atzoko Udal Batzordeetan. Gogoratuko denez, hainbat herritarrek ABEEn aldetik klausula bat sinatzeko presioak salatu dituzte. Izan ere, kalte-ordaina kobratu ahal izateko klausula bat onartzea exijitu diete, etorkizunean kalte gehiago ez salatzeko.

Kaltetuak une gogorrak ari dira pasatzen, klausula hori sinatzeko presioak oso handiak baitira eta administrazio publikoek haien babesa erakutsi beharko liekete, batez ere gertuko erakundea den Udalak.

Hala ere, Eneko Goiak zalantzan jarri zuen gutunen existentzia bera. Erreplika txandan, Garbiñe Alkizak bi ABEEek sinatutako gutunak erakutsi zizkion alkateari, bai Kontxako zatiari bai Benta Berriko tarteei dagozkienak, eta Goiaren akusazioa desmuntatu zuen. Gainerakoan, nahiz eta orain arte gertatutakoa gertatu eta obra oraindik geldirik egon, alkateak berriro ere saiatu zen normaltasunaren itxura ematen. Eta, EH Bilduk egindako interpelazio zuzenaren aurrean, Goiak uko egin zion publikoki kaltetutako donostiarrei babesa emateari.

Bestalde, ordu berean, Eusko Legebiltzarrean, EH Bilduk aurkeztutako legez besteko proposamen bat eztabaidatu zen, Eusko Jaurlaritzak metro-pasantearen obrak eragindako hiru zuloei dagokien eremu ezegonkorrean dauden eraikinen zimenduen egitura-egoeraren azterketa egin dezan. EAJk eta PSEk orain arte egindako zundaketekin nahikoa dela adierazi zuten, nahiz eta ez duten antzeman agertu diren zuloak. Era berean, ukatu egin zuten Kontxaren lurpea ezegonkorra dela, Gobernuak berak egindako hainbat txosten teknikotan kontrakoa esan arren (azkena, Kontxaren azpiko tunela egiteko bigarren saiakerarekin hasi ahal izateko Ministerioko Itsasertzeetako Zuzendaritza Nagusiari baimena eskatzeko bidali berri den txosten bat). EAJ eta PSEko legebiltzarkideak ere normaltasun irudia ematen saiatu ziren eta proposatutako azterketa berria baztertu zuten. Aldiz, bai Podemos-IUk bai PPk azterketa berria egitea babestu zuten.

Fernandez de Betoñok eremuko segurtasun faltari buruzko datuak eman zituen, eta Gobernuari leporatu zion "beldur" direla obraren segurtasunagatik. Izan ere, Zubieta kaleko eta Antiguako zenbait bizilagunei exijitzen ari zaizkie, kalte-ordainak kobratu ahal izateko, etorkizunean beste gorabeherarik ez salatzeko konpromisoa. "Lanak hain seguruak badira, zertara dator orain egungo patologiengatik etorkizunean gorabehera gehiago ez salatzeko exijitzea?", laburbildu zuen EH Bilduko legebiltzarkideak.

Horregatik guztiagatik, eta erakunde publikoen aldetik babes eta autokritika faltaren aurrean, EH Bilduk kontzentrazioa deitu du, kaltetuei gure babes esplizitua erakusteko. Kontzentrazioa datorren igandean, irailaren 26an, izango da, Antiguako Benta Berri plazan, eguerdiko 12etan, “Eusko Jaurlaritzaren harrokeriaren aurrean, bizilagunak babestu” lelopean.

Metro-pasantearen eskutitzen kasuan ere iluntasuna eta gardentasun eza salatu ditu EH Bilduk

EH Bilduk premiazko interpelazioa erregistratu du Eneko Goiak gutun hauekin ez duela bat egiten eta kaltetutako herritarrei babesa adierazteko

| 2021-09-16 12:47:00

Gutun polemikoak eta horiek sinatzeko bizilagunei egindako presioak publikoki ezagutu zirela egun batzuk igaro ondoren, obren arduradun politikoak ez dira oraindik gutun hauen edukitik eta erabilitako forma txarretatik desmarkatu. Eta are okerrago, EAJko eta PSEko kargu politikorik ez da oraindik atera kaltetutako herritarrak defendatzera.

Gogoratuko denez, duela egun batzuk jakinarazi zen Donostiako Zarautz hiribideko eta Zubieta kaleko hainbat bizilagunek gutun bat jaso dutela metroaren obrek euren etxeetan eragindako kalteengatik. Gutunen bidez, obren arduradunak prest agertzen ziren kalte-ordaina emateko klausula bat onartzearen truke. Baina klausula hori gehiegizkoa da, kaltetuei etorkizunean kalte gehiago ez salatzeko konpromisoa exijitzen baitzaie. Eta bada beste kontu larriago bat ere: ez dela partikularren arteko akordio-proposamena, baizik eta Eusko Jaurlaritzari (erakunde publiko bati) ezer ez erreklamatzeko eskatzen zien ABEEak kaltetuei.

EH Bilduk gutun horiek salatu zituen joan den astelehenean, bai gehiegizko klausulengatik, bai erabilitako moduengatik, eta kaltetutako pertsonei gure babes osoa eskaini genien. Gainera, hainbat ekimen iragarri genituen administrazio publikoaren esku dagoen informazio guztia biltzeko, eta publikoki interpelatu genituen inplikatutako erakunde guztiak horren inguruan iritzia eman zezaten, gutun horiekin ez dutela bat egiten adierazteko eta herritarrei azaltzeko zein izan den Eusko Jaurlaritzaren ardura gai honetan, ea gutunen elaborazioan parte hartu duten eta abar.

Baina, esan bezala, albistea jakin zenetik 6 egun igaro direnean, obretako arduradunek isilik jarraitzen dute. Inplikatutako erakunde publiko guztiek egin behar denaren kontrakoa egin dute. Lehenik eta behin, gardentasun-ariketa demokratiko bat egiteari uko egin diote albistea jakin bezain laster. Eta, bigarrenik, esplizituki uko egin diote prentsako galderei erantzuteari. Gobernantza-eredu hori errotik aldatu behar da. Herritarrek eskubide osoa dute administrazio publikoek beren dirua zertan gastatzen duten jakiteko, eta administrazio horiek kontuak emateko betebeharra dute.

Baina jarduera hau ez da berria. Metro-pasanteko obren akats tekniko eta politikoen hamaikagarren pasartearen aurrean gaude. Gogora dezagun, adibidez, Eusko Jaurlaritzak 17 egun behar izan zituela maiatzean Kontxako kabinetan agertu zen hirugarren zuloa publikoki onartzeko. EH Bildu izan zen gertatutakoari buruzko informazioa eman zuena, bai bizilagunen bai langileen datuak bildu ondoren. Horrela bakarrik ezagutu ahal izan zen zulo horren tamaina handia, adibidez. Eta ez da ahaztu behar, halaber, Donostiako Udal Gobernua ahalegindu izan dela, behin baino gehiagoetan, obrak eta ondorio guzti hauek bereizten, adibidez, Zubieta kaleko 8. zenbakian zuloa agertu edota Zarautz Hiribideko atzealdeko lur-jauzia gertatu bezain laster.

Baina EH Bildu ez da isilik geratuko eta, orain arte egin duen bezala, obrak gure hirian izaten ari diren eraginei buruzko egia osoa exijitzen edota publiko egiten jarraituko du, baita hiritarren eskubideak defendatzen ere. Ildo horretatik, EH Bilduk premiazko interpelazioa erregistratu du, datorren asteleheneko Udal Batzordeetan aztertuko dena, Eneko Goiak gutun hauekin ez duela bat egiten aitortzeko eta kaltetutako herritarrei babesa adierazteko. Gertatutakoa ikusita, Donostiako Udaleko arduradun nagusiak ezin du beste erantzunik eman.

EH Bilduk eskatu dio Udal Gobernuari atzera egiteko Ekialdeko Barrutiko dBus lineei ezarri dizkien murrizketetan

| 2021-09-14 11:34:00

2021eko maiatzaren 11n, 970/2020 Errege Dekretua sartu zen indarrean; horren bidez, Estatuko hiri guztiak abiadura-muga berriak eta “30. eremuak” ezartzera behartzen ziren. Nahiz eta data zehatza duela hilabete asko ezagutu, eta urteetan zehar neurri hori iritsiko zela iragarri arren, Donostiako Udal Gobernuak, beste hiri batzuek ez bezala, ez zituen etxeko lanak egin, maiatza iritsi zen eta, esan ohi den bezala, zezenak harrapatu zuen.

Gai honetan erakutsitako inprobisazio eta kudeaketa negargarriak erakusten du Donostiako Udal Gobernuak klima-aldaketaren aurkako borrokan eta mugikortasun jasangarri baten alde duen konpromiso-maila. Emisioak murrizteko asmoz gure inguruko hirietan ezartzen ari diren mugikortasun-ereduaren aldaketekin alderatua, Donostia oso atzean geratzen ari da.

Udal Gobernuaren planifikazio txar horrek izan dituen beste ondorioez gain, autobus-zerbitzuak dira kaltetuenetako bat. Izan ere, abiadura-muga berriek dBus-en linea batzuetan ordutegiak betetzeko zailtasunak eragin dituzte. Hori dela eta, Donostiako Udaleko Mugikortasun Sailak eta Dbus-ek hainbat neurri ezarri dituzte. Neurri horietako batzuek zerbitzuak murriztea ekarri dute, bereziki hiriaren ekialdeko zerbitzuetan, eta aldaketa horiek eragina izan dute inguruko bizilagunen mugikortasunean eta garraio publikoaren erabileran.

Murrizketa handiena jasan duena 31. linea izan da, Intxaurrondo-Ospitaleak-Altza lotzen dituena. Diseinu berriarekin Renfe Herrera, Pikabea, Santa Barbara, Nerecan, San Martzial eta Martillum geltokiak 31. lineatik kanpo geratuko dira. Dbusek geltoki horien erabiltzaileentzako bestelako aukerak eman arren, ordezko zerbitzu horiek eremu honetako bizilagunen mugikortasuna zailtzen dutelakoan gaude, eta ez dutela garraio publikoaren erabilera errazten. Horrek guztiak auzotarren kezka eragin du, eta ekialdeko hainbat elkartek egoera honi soluzioa emateko sinadura bilketa bat jarri zuten, Ekialdeko bizilagunen 660 sinadura bilduz.

Azkenik, hiri barneko abiadura moteltzeko aitzakia baliatuta, Udal Gobernuak ez du Bidebietako auzotarrei osasun etxera iristeko aukera emango zien 38. linearen geltokia ezarriko.

Laburbilduz, murrizketa hauek arazoak gehitzea besterik ez dute egiten lehendik ere aski makala zen Udal Gobernuaren Ekialdeko Barrutirako mugikortasun politikari: bidegorri sarerik ez izatea, bizikletaren sustapen eskasa, DBizi ekialdera zabaltzeko atzerapenak, Topoaren Altza-Galtzaraborda egitasmoa lehentasunezkoa ez izatea, bulebarizazioak eta auzoetan oinezko bideak egiteko asmorik ez izatea....

Horregatik guztiagatik, EH Bilduk hainbat ekimen jarri ditu martxan sortu duten egoera hori zuzentzeko asmoz. Alde batetik, Pilar Arana mugikortasun-zinegotziaren agerraldia eskatu genuen Ekialdeko Barrutiko mugikortasun lantaldean. Agerraldia hilaren 8an egin zen, eta Udal Gobernuaren ordezkariak murrizketak defendatzera mugatu zen, auzotarrek azaldutako kexei jaramonik egin gabe eta bestelako irtenbiderik eskaini gabe.

Era berean, bihar, irailaren 15ean, egingo den Ekialdeko Barrutiko Udal Batzarrari begira, EH Bilduren ordezkariek, Garbiñe Alkizak eta Zigor Etxeburuak, akordio-proposamena erregistratu dute, bihar bertan ebatzi beharko dena. Esan beharra dago Barrutiko Batzordeak mugikortasun arloko eskumena duela.

Hauxe da, hitzez hitz, EH Bilduk erregistratutako akordio-proposamena:

  1. Arloko zinegotzi delegatuari edo dagokion arduradunari eskatzea Intxaurrondo-Ospitaleak-Altza 31. lineak egun eskaintzen duen zerbitzua edo haren parekoa izan daitekeena mantendu ahal izateko behar diren baliabideak ezartzeko.

  2. Arloko zinegotzi delegatuari edo dagokion arduradunari eskatzea Ekialdeko Barrutiari dagozkion Dbuseko lineei buruzko azterketa bat egin dezan Mugikortasun Saila, Dbus eta Ekialdeko Barrutia osatzen duten eragileekin batera, Ekialdeko bizilagunen mugikortasun beharrak ezagutzeko eta izan ditzaketen arazoak konpondu ahal izateko.

EH Bilduk salatu du Eusko Jaurlaritza ahalegintzen ari dela pasantearen lanek kaltetutako pertsonak isilarazten

Zarautz hiribidean bizi den bizilagun bati emandako gutun bat publiko egin da azken egunetan. Gutun honen bidez, 1100 euroko kalte-ordaina onartzera gonbidatzen dute, metroaren obrek bere etxebizitzan eragindako kalteengatik. Era berean, etorkizunean, kontu honengatik obraren arduradunei ezer gehiago ez erreklamatzeko exijitzen diete, ez aldi baterako enpresa-elkarteari ez eta Eusko Jaurlaritzari ere.

| 2021-09-13 12:30:00

Kontxa azpiko tunela egiteko bigarren saiakeraren bezperetan, Zarautz hiribideko eta Zubieta kaleko zenbait bizilagunek euren kezka azaldu diote EH Bilduri, metro pasanteko bi obra-zatietako ABEEetako ordezkariek eskuz eta oso modu bortitzean emandako gutun baten inguruan.

Zarautz hiribidean bizi den bizilagun bati emandako gutun bat publiko egin da azken egunetan. Gutun honen bidez, 1100 euroko kalte-ordaina onartzera gonbidatzen dute, metroaren obrek bere etxebizitzan eragindako kalteengatik. Era berean, etorkizunean, kontu honengatik obraren arduradunei ezer gehiago ez erreklamatzeko exijitzen diete, ez aldi baterako enpresa-elkarteari ez eta Eusko Jaurlaritzari ere.

Badakigu antzeko gutun bat jaso dutela Benta Berriko bizilagun gehiagok, baita Zubieta kaleko bizilagunek ere. Hau da, metroaren obretan gorabehera gehien izan dituzten eta herritarrentzat arrisku gehien eragin duten bi eremuak. Kalte-ordainak Zubieta kaleko eta Zarautz etorbideko zenbait eraikinetan agertutako pitzadurei dagozkie, baita Zarautz etorbidearen atzealdean 2019ko azaroan izandako lur-jausiagatik ere.

Baina gutunaren edukia bera baloratu aurretik, kontu bat aipatu nahi dugu: Metroaren obrek Zarautz hiribideko etxebizitzetan kalterik eragin ez badute, zergatik onartzen du orain ABEEk kaltetutako pertsonei milaka euro ematea?

Gogoratuko denez, 2019ko azaroan, lur-jauzi bat gertatu zen Zarauzko Hiribidearen atzeko hegaletik, hainbat etxebizitzatan sartzeraino. Bizilagunek EH Bilduri baieztatu zioten metroaren obren ondorio zirela, nahiz eta Eneko Goiak eta Eusko Jaurlaritzako ordezkariek ukatu egin zuten hasieratik, Zubieta kaleko lehen zuloarekin egiten saiatu ziren bezalaxe. Izan ere, Zarautz hiribidean hilabeteak zeramatzaten bibrazioak, pitzadurak eta obren beste ondorio batzuk jasaten. Nahiz eta gero txosten tekniko batek ondorioztatu luizia euriteen ondorio izan zela, bizilagunek sinetsirik jarraitu zuten metroko obrek jauzia eragin zutela.

Ia bi urte geroago, bizilagun horiei kalte-ordaina eskaini diete bere garaian jarritako erreklamazioengatik. Berriro diogu: metroko obrek ez bazuten zerikusirik etxebizitza horietan agertutako pitzadurekin, zergatik orain, pertsona horiei milaka euroko kalte-ordaina eman nahi diete, ABEEk eta Eusko Jaurlaritzaren menpeko erakunde publikoak erantzukizunik ez bazuten? Bertsio ofiziala desegiten ari da. Beste behin ere.

Zentzu honetan, Eneko Goia alkatea interpelatu nahi dugu, metroko obrekin zerikusia duen orotan bere rola errotik alda dezan. Orain arte, obren arduradunak justifikatu eta babestu izan ditu beti. Bada garaia metro pasantearen obrek kaltetutako donostiarrak babesten hasteko. Aukera paregabea du gutun horien bidalketatik desmarkatzen.

Bizilagunen kezka ulergarria da. Aipatutako balorazioez gain, EH Bildutik salatu behar dugu, ABEEak eta Jaurlaritza ahalegin handia egiten ari direla bizilagunek kalte-ordainekin batera klausula bat onar dezaten: ez diezaietela gehiago erreklamatu etorkizunean “kontu honengatik”, eraikuntza lanen arduradun diren enpresei eta erakunde publikoei.

Hau da, etorkizuneko kalte-ordainak saihestu nahi dituzte, kosta ahala kosta. Honek talka egiten du administrazio publikoek obra erabat segurua dela eta istripu gehiago ez dela izango eman nahi duten itxurarekin.

Era berean, “kontu honengatik” ez erreklamatzeko eskaerak indefentsio handia eragiten die kaltetutako pertsonei. Orokorregia da, are gehiago arazo berriak sor daitezkeela onartzen dutenean. Eta gogorarazi behar dugu lanak ez direla bukatu eta lurrazpia zulatzen jarraituko dutela. Adibidez, demagun Zubieta kaleko etxebizitza batean aurretik agertutako leku berean agertzen direla pitzadura berriak, edo demagun Zarautz hiribidean beste lur-jausi berri bat dagoela: kaltetuek ezingo liokete ezer erreklamatu Administrazio Publikoari? Ezin da halakorik eskatu.

Gainera, gaur gaurkoz inork ezin du ziurtatu ABEEak orain arte onartutako kalteak egonkortuta daudenik, eta denborak aurrera egin ahala pitzadura horiek ez direla gehiagora joango. Orduan, bizilagunek ere ezin izango dute erreklamatu lehendik sortutako arazoak larriagotzen badira? Ez da inolaz ere onargarria.

Eta aipatutakoaz gain, ezin ditugu onartu Eusko Jaurlaritzaren menpeko ETSk eta ABEEek kaltetutako pertsonekin erabilitako moduak. Izan ere, beren interesen aurkako zerbait sinatzera behartu nahi izan dituzte. Xantaia eta presio horiek berehala ezabatu behar dira euskal administrazio publikoaren jarduteko moduetatik.

Ez dakigu eraikuntza-enpresa pribatuen artean horrelako eskaerak ohikoak diren, baina EH Bildutik ezin dugu inola ere onartu ETS bezalako erakunde publiko bat, Eusko Jaurlaritzaren mende dagoena, jarduteko modu horretan sartuta egotea. Onartezina da herritarrei kalte-ordaina kobratzeko klausula hori sinatzera behartzea, are gehiago erakunde publiko baten aldetik. Erakunde publiko baten jardueraren ondorioz herritarrei gerta dakiekeenaren gaineko erantzukizuna ezin baita inola ere saihestu.

Gutun honi eta modu hauei buruzko azalpenak eskatuko dizkiegu Eusko Jaurlaritzari eta Eneko Goiari. Alde horretatik, Unai Fernández de Betoñok hainbat ekimen aurkeztu ditu gaur Eusko Legebiltzarrean, horri buruzko informazio guztia biltzeko: zenbat gutun bidali dituzte? Zenbat onartu dira? Zer parte-hartze izan du Eusko Jaurlaritzak gutunak egiten? Zenbateraino zekiten beren izenean akordio-proposamenak egiten ari zirela?

Metroko pasantearen obrek ez dute onartzen akats tekniko edo politiko gehiagorik.

Basque Culinary Centerren bigarren egoitzaren kokapenak Groseko oraingo arazoak areagotzea baino ez du ekarriko

Basque Culinary Centerren bigarren egoitza Okendo-Alden jartzeko Eneko Goia alkateak egindako hautuak Groseko gaur egungo arazoak areagotu besterik ez du egingo. Izan ere, Grosek etxebizitza premia larria du, eta neurri gabeko turistifikazio prozesu batean murgilduta dago; beraz, lursail hau, gazteentzako eta adinekoentzako apartamentuak eta kirol-eremua duen parke handi bat izango zituela iragarri ostean, orain Basque Culinary Centerren bigarren egoitza eraikitzeko erabiltzeak ez du ez hanka ez buru.

| 2021-08-17 12:14:00

Berriz ere, Eneko Goiaren errezetek ez diete auzotarren beharrei erantzuten; era berean, beste pauso bat dira mota honetako eraikuntzak eta azpiegiturak Donostiako auzo jakin batzuetan pilatzeko inertzia zaharrean.

Groseko errealitatea hauxe da: bertako auzotar askok -zeresanik ez, gazteek- alde egin behar izaten dute ez dutelako etxebizitza duin baterako sarbidea. Datuak argiak dira: Donostian etxebizitza bat erostea zaila bada, are zailagoa da Grosen (% 18 garestiagoa); alokairuaren prezioa, bestalde, 1.300 euro ingurukoa da; babestutako etxebizitzarik ez dago, eta biztanle kopurua jaisten ari da etengabe (1.100 bizilagun galdu zituen Grosek 2010etik 2019ra bitartean, eta beste 177 2020ean). Modu paraleloan, gero eta pisu turistiko gehiago dago (300 inguru) eta gero eta hotel gehiago (Mariaren Bihotza eta Inmaculada ikastetxeetako proiektuak, azkenak).

EAJk eta PSEk Gros azoarentzat dituzten politika publikoak argiak dira: turistifikazio prozesua areagotzea eta bizilagunak kanporatzen jarraitzea.

Horregatik, EH Bilduren ustez, ez du inongo logikarik Okendo-Alden hasieran aurreikusitako proiektua (gazteentzako eta zaharrentzako apartamentuak) baztertzeak eta Nafarroako etorbidearen, Rodil pasealekuaren, Okendo kultur etxearen eta Zubiri-Manteo institutuaren arteko udal lursail hau Basque Culinary Centerren bigarren egoitza kokatzeak. Are gutxiago, handik oso gertu, Udal Gobernuak orain arte hezkuntza zentro izandako bi eraikin (Mariaren Bihotza eta Inmaculada ikastetxea) hotel bihurtzea onartu duela kontuan hartzen badugu.

EH Bilduren ustez, errezeta eta joera zaharrak alboratzeko eta Donostia eta bertako auzoak iraunkortasun eta oreka terminoen arabera, eta herritarren eskubideak bermatzea helburu, pentsatzeko garaia da. Eta hori, gainera, bertako eragile eta bizilagunekin egin behar da.

Donostiaren eta donostiarren interesak eta beharrak, ikerkuntza eta ezagutzaren sektorearenak eta Basque Culinary Centerrenak berarenak ere ondo aztertu behar dira, alternatiba guztiak mahai gainean jarrita. Gainera, hiriko eremu askok, Ekialdeko Barrutiak bezala, proiektu ekonomiko traktoreen premia handia dute.

Baina berriz ere, Eneko Goiak ez du halakorik egin nahi izan: Groseko gaur egungo errealitateari bizkar emanda eta inorekin hitz egin gabe erabaki du kokapena. Zein alternatiba aztertu dira? Zergatik hobetsi da Okendo-Alden BBCren egoitza jartzea apartamentuak egin beharrean? Ontzat ematen al du alkateak Grosen babestutako etxebizitzarik ez egitea?

EH Bilduk ez du konpartitzen ez erabakia, ez hura hartzeko prozedura. Eta horrexegatik azalpenak eskatuko dizkio Eneko Goia alkateari.

ALBISTEAK

EGIAKO EGOERA DELA-ETA

2021-11-18 13:08:00

Egiako eremu jakin batean gertatzen ari den segurtasun eta bizikidetza arazoa dela-eta, EH Bildu udal taldeak honako hau jakinarazi nahi du:

Hotelen proiektu oldea dela-eta, Donostiako EH Bilduk kitto esateko eskatu dio Udal Gobernuari

2021-11-11 13:33:00

Londresen egoitza duen inbertsio funts japoniar batek Santa Teresa komentua erosi duela iragarri izanak harridura eta haserrea eragin du Parte Zaharreko bizilagunen artean.