Donostia

ETSk berriro ezkutatu du istripu bat Donostian, oraingoan AHTren obretan

Ez da ulertzen zergatik administrazio publikoak ez duen egiten obra publiko handietan kontrol estuagori

| 2021-05-25 14:24:00

Sare sozialetan azken orduetan zabaltzen ari den bezala, eta EH Bilduk konfirmatu ahal izan duenez, larunbat honetan, Abiadura Handiko Trena eraikitzeko ETS Donostian egiten ari den obretan lan-istripu kezkagarria egon zen. Antza denez, Construcciones Mariezcurrena kontratako bi goi-kargudun zauritu ziren, baina haien egoera ez omen da larria.

Atzo Ernesto Martínez de Cabredo ETSko zuzendari nagusia Donostiako udaletxean egon zen metroko lanen jarraipeni buruzko informazioa ematen eta ez zuen istripu honen berri eman. ETSk hartutako jarrera hau ez da berria: gogoratu behar da metroko obretako azken zuloa ere ez zutela publiko egin, Donostiako EH Bilduk salatu zuen arte. Atzo, hain zuzen, eztabaidagai nagusia izan zen Kontxa azpiko obren inguruko ETSren eta Udal Gobernuaren isiltasuna, egia erdiak eta gezurrak.

Onartezina da Donostian egiten ari den obra guztietan gertatzen diren gorabehera guztiak nahita ezkutatzeko ETSk hartu duen erabakia, bai metro-pasantearen obretan, bai AHTren obretan. Atzoko batzordean argi geratu zen moduan, onartezina da ETSren eta Eusko Jaurlaritzako Garraio Sailaren gobernantza-eredua, baina, horrez gain, zalantzan dago ETSren egungo kudeatzaileen gaitasun operatiboa bera ere.

Gogoratu behar da, halaber, Construcciones Mariezcurrena metroaren aurreko fasea egiten ari zen ABEEko kidea dela, Easo-Mirakontxa zatiaren kudeaketa txarrean inplikatua. ETSk, hau da, Eusko Jaurlaritzak, bere gain hartu zuen lehen lizitazioa bertan behera uzteko erantzukizuna, obren planifikazio txarra onartuz eta enpresa pribatuari kalte-ordaina emanez. Orain, enpresa bera agertu da AHTren obretan, eta beste istripu bat izan du berriz ere. Ez da ulertzen zergatik administrazio publikoak ez duen egiten obra publiko handietan kontrol estuagorik. Ondorioak begi-bistakoak dira.

Donostiako alkateak, berriz, gaur goizean esan du “ez dakiela ezer” gertatutakoaz. Beste gai batzuetan ez bezala, gure hirian egiten ari diren obra publikoen langileen osasunak ez du alkatearen arreta publikorik merezi.

Horregatik guztiagatik, EH Bilduk premiazko interpelazio bat erregistratuko du, datorren osteguneko plenoan alkateak donostiarrei behar diren azalpen guztiak emateko.

Bidebietarrek kultur etxea behingoz izateko egiten ari diren eskaerari erantzuteko eskatu du EH Bilduk

| 2021-05-25 12:47:00

Bidebieta auzoan ez dago kultur etxerik, eta horrelako ekipamendurik ez duen Donostiako auzo jendetsuena da. Jakina, kultur etxea auzoan bertan izatea bidebietarren eskari historikoa da. Ekialdeko auzoek pairatzen dituzten desberdinkerien beste adibide bat.

2021eko aurrekontuen eztabaidan, EH Bilduk zuzenketa bat aurkeztu zuen Bidebietako Moneda baserrian kultur etxe bat moldatzeko, Kutxa Fundazioarekin hitzarmen bat eginda; duela 25 urte, alfabetatze ikastaroak, edota sexualitateari, yogari eta kultura aktiboari buruzkoak eskaini izan zituen Kutxaren Familia eta Gizarte Heziketa sailak. Tamalez, Udal Gobernuak ez du onartu proposamena.

Ekialdeko Barrutiaren 2020ko aurrekontuetan ere bi proposamen egin ziren Bidebieta auzoan kultur etxea sortzeko: bat EH Bilduk aurkeztua eta bestea, Herripe elkarteak. 2021eko aurrekontuetan, Barrutiko Udal batzordeak onartu egin du ekimen bat azter dadin Bidebieta auzoan kultur etxea sortzeko aukera; Kultura sailak emango duen erantzunaren zain gaude orain.

Garai berean, Bidebietako Auzo Sarean biltzen diren bizilagunek kanpaina bat abiatu dute Bidebietako kultur etxearen alde antolatzeko.

Udal Gobernuari galdetu diogunean ea aurreikuspenik egin duen Bidebieta auzoan kultur etxe bat sortzeko, erantzun digute aztertu izan dutela aukera hori, Kontadores edo Eskola Horia bezalako eraikinak baliatzeko aukera dagoelako. Edonola, adierazi zuen inbertsioak behar dituzten beste auzo berri batzuk ere badaudela, eta egungo kultur etxe sarea ere inbertsio ugariren beharrean dagoela. Beraz, ez zion baiezkorik erantzun, baina ezta ezekorik ere, gure taldeak egindako interpelazioari.

Horiek horrela, datorren osteguneko plenorako mozio bat aurkeztuko du EH Bilduk, eskatzeko Udal Gobernuari:

Azterketa bat egin dezala, aurten bertan, Bidebietan kultur etxe bat sortzeko aukerak zehazteko eta beharko diren baliabideen aurreikuspenak egiteko, eta txostena izatean, horren berri eman diezaiela udal taldeei.

Antola dezala parte hartzeko prozesu bat Bidebietako auzotarrei zuzendua, kultur arloan auzotarrek dituzten kezkei eta beharrei erantzuteko.

Dauden arriskuak eta kudeaketa txarra ikusita, metro pasantearen obrak ezin dira berriro hasi ekainean

Garbiñe Alkizak ETS-ri: “Orain arte egindako azterlanak ez badira gai izan horrelako zulo bat detektatzeko, nola esan dezakezue lanak ekainean hasiko direla, ezer gertatuko ez balitz bezala?”

| 2021-05-24 14:18:00

ETSk 17 egun behar izan ditu EH Bilduk hasiera-hasieratik salatu zuena baieztatzeko: orain arte agertu den zulo handienaren aurrean gaudela (138 m³ bolumena du; aurrekoak, 20-30 m³). Handiagoa eta, beraz, arriskutsuagoa izan arren, edo horrexegatik, hain zuzen ere, kasu honetan Administrazio Publikoek inoiz baino informazio gutxiago eman diete herritarrei, eta eman dutenean, gainera, egia erdiak eta gezurrak esan dituzte.

Ernesto Martínez de Cabredok defendatu du ETSk hartutako jarrera, baina Garbiñe Alkiza EH Bilduko zinegotziak erantzun dio hori ez dela beti horrela, nahi dutenean sekulako ekimen mediatikoak muntatzen dituztelako, adibidez, azken zulo hau agertu baino hiru egun lehenago Benta Berriko geltokiaren barruan Iñaki Arriola Garraio sailburuak egindako prentsaurrekoa.

Donostiako alkatea den Eneko Goiak, berriz, gaur erabaki du ETSren obren jarraipenerako batzordean ez agertzea. Bere agintaldiko obra publikorik handiena izan arren, zulo berriaren tamaina eta larritasuna handiagoa izan arren, eta aurreko egunetan prentsan botatako faltsukeriak gorabehera, alkateak autokritika egiteko eta gardentasunez jokatzen hasteko eta herritarrei egia esateko aukera galdu du gaurkoan. Gainera, ETSren Batzordea bildu zen azken aldian bai hartu zuen parte eta informazio guztia emateko konpromisoa hartu zuen. Oraingoan nahiago izan du bere bulegoan egotea, agerraldia egiten zen osoko bilkuren aretotik metro gutxira.

Garbiñe Alkizak salatu du onartezinak direla obra publiko bat kudeatzeko modu hauek. “Lehenik eta behin, zuloaren existentzia ezkutatu zenuten, eta, EH Bilduk publiko egin zuenean, garrantzia kentzen saiatu zarete, helburu garbi batekin: ezkutatzeko gaur gaurkoz ez dagoela lanarekin jarraitzeko segurtasun-berme nahikorik, eta badakizuelako benetako txapuza egiten ari zaretela”, adierazi du Alkizak.

Izan ere, behin eta berriz errepikatzen ari den sekuentzia baten aurrean gaude: zuloa agertu den bakoitzean dena kontrolatuta dagoela ziurtatu dute, baina ondorengo gertaerek justu kontrakoa utzi dute agerian. Gaurko Batzordean, urtebete baino gutxiagoan hirugarren aldiz, ETSk garrantzia kendu dio zuloak agertzeari. Lehen zuloaren ondoren esan zuten eremuaren azterketa sakona egin zutela eta ez zutela ezer aurkitu. Ondoren, azaroan, beste 20 m³-ko zulo bat agertu zen 10 metrotara eta orain beste bat, 6 aldiz handiagoa, eta 30 metrotara.

Hauek horrela, Garbiñe Alkizak honako galdera hau egin die obraren arduradunei: “Orain arte egindako azterlanak ez badira gai izan horrelako zulo bat detektatzeko, nola ausartu zarete, ezer gertatuko ez balitz bezala, beste lizitazio bat lehiaketara ateratzera eta lanak ekainean hasiko direla adieraztera?”

EH Bilduk berriro eskatu du, herritarren eta langileen segurtasunagatik, obrak geldiaraztea Kontxako eremu osoaren azterketa sakona egin arte.

EH Bilduk etxebizitza eskubidearen aldeko manifestazioan parte hartzeko deia egin du

| 2021-05-21 13:18:00

Donostiako etxebizitzaren prezioa, salmentan eta alokairuan, maximo historikoetan dago, “adreiluaren krisian” baino gehiago. Garestitze prozesuak gora egiten jarraitu du pandemia garaian ere, beste hirietan prezioak jaitsi diren bitartean. Fenomeno horren ondorioa ezaguna da: ehunka pertsonak, gehienak gazteak, euren auzoetatik kanporatuak izan dira.

Legealdiaren erdia betetzear dagenean, eta Eneko Goiak alkatetzan 6 urte daramatzanean, bere etxebizitza-politikaren balantzea oso negatiboagoa da. Arazoa konponbidean jarri beharrean, etxebizitzaren arazoak okerrera egin du gure hirian, etxebizitza larrialdiko egoera honetara iritsi arte.

Balantzea izugarria da: sei urte hauetan 35 hotel ireki edo baimendu dituzte, lehen solairuaren gainetik kokatuta dauden 500 pisu turistiko baino gehiago legeztatu dira, funts-putreek ehunka familia kaleratzeko arrisku larrian jarri dituzte... Eta, gainera, Donostiako EAJ eta PSEko azken erabakia Etxegintzaren berankortasunaren aurkako protokoloetan etxegabetzearen bidea txertatzea izan da.

Argi dago etxebizitzaren arazoa ez dela bakarrik Donostiaren arazo bat, eta dimentsio orokorra duela. Alde horretatik, gure hiriari bete-betean eragiten dion Eusko Jaurlaritzaren etxebizitza-politikaren balantzea ere oso negatiboa da. Besteak beste, EAJk alokairuaren prezioei muga jartzeari uko egin izanari buruz ari gara, edo PSEk oraindik ez duela sortu 2016ko Etxebizitzaren Euskal Legean aurreikusitako etxebizitza hutsen erregistroa; izan ere, hori gabe ezin da martxan jarri ez etxebizitza hutsaren kanona ez alokairu behartua.

EH Bilduk uste osoa du arazoari irtenbidea emateko diziplina anitzeko neurriak hartu behar direla, arazoari helduz modu integralean. Neurri horien guztien helburua etxebizitza espekulazio-dinamikatik ateratzea da, etxebizitza eskubide gisa kudeatzen hasteko.

Eta etxebizitza-politika publikoak errotik aldatzeko ezinbestekoa da herritarrek jarrera aktiboa mantentzea. Alde horretatik, EH Bilduk bere oinarri sozialari eta donostiar guztiei dei egiten die bihar, maiatzak 22, larunbata, 17:30ean Katalunia plazatik, “Etxeak bizitzeko, ez negoziorako! Donostia por el derecho a la vivienda” lemapean Donostiako zenbait gizarte-eragileek antolatu duten manifestazioan parte hartzera.

Altza, Intxaurrondo eta Bidebietak pairatzen dituzten desorekekin amaitzeko ekimenak biderkatu ditu EH Bilduk

EH Bilduk Maiatzaren 30erako Hiri martxa antolatu du, Herreratik Udaletxeraino, eta aldizkari bat banatzen ari da Ekialdeko Barrutiko 18.000 postontzietan

| 2021-05-19 12:35:00

Legegintzaldiaren erdia betetzear dagoenean, Donostiako EH Bildu udal taldearen lan ildo nagusietako batek Altzako, Intxaurrondoko eta Bidebietako bizilagunen bizimodua hobetzea izaten jarraitzen du. Hilero, eragile sozialekin batera landutako ekimenak lantzen ditugu Udal batzordeetara eta Osoko Bilkurara eramateko; Ekialdeko Barrutiko Batzordeko gure ordezkariak gogor aritzen dira erakunde hau behingoz abian jartzeko, eta kaleari dagokionez, EH Bilduko taldeek beren dinamika propioa dute bertan.

EH Bilduk Udal Gobernuaren erantzukizuna bere gain hartu zuenean, 2011n, hiriko arazo oso larri bat konpontzeko konpromisoa hartu zuen: Martutenen eta Txominen aldizka izaten ziren uholdeekin amaitzea. EH Bilduk ordura arte inork egin ez zuena egin zuen. Eta, hura bideratu ondoren, esan genuen hiriaren hurrengo erronkak Altzak, Intxaurrondok eta Bidebietak hiriko gainerako auzoekiko dituzten desorekak ezabatzea izan behar zuela.

Hala ere, Udal Gobernuak eredu zentralistaren aldeko apustua egiten jarraitzen du, inbertsio gehienak zentrorako pentsatuta baitaude. Atzo bertan, Tokiko Gobernu Batzordearen albiste nagusia zen Kontxan hiru esku-hartze egingo zirela.

Izan ere, historikoki, Donostian dikotomia bat planteatu da, gaurdaino iritsi dena: zerbitzuak erdigunean eta ekialdean etxebizitzak. Eta ukaezina da hiriko oinarrizko zerbitzuak eskuratzeko zailtasunek eta proiektu-traktore berririk ez sustatzeak desberdintasun sozioekonomikoak areagotzen dituztela. Gainera, hiri ekipamendu eta zerbitzuen gabeziak herritarren eskubide oinarrizkoenak bete-betean gauzatzea oztopatzen du.

Desoreka horiek agerian uzteko datu batzuk emango ditugu:

  • 44.840 pertsona bizi dira hiriko ekialdeko auzoetan: Bidebieta (8.951), Altza (20.450) eta Intxaurrondo (15.439); hau da, lau donostiarretik bat.

  • Donostiako langabezia-rankingean, Bidebieta, Altza eta Intxaurrondo beti daude goiko hiru postuetan.

  • Familia errenta: Altzako etxeetan urtean sartzen den batez besteko dirua Zorroaga-Miramonen baino 3,5 aldiz txikiagoa da. Eta urtetik urtera handitzen doa tartea.

  • Hemen, gainerako auzoetan baino pertsona gutxiagok dituzte goi-mailako ikasketak. Eta jende gutxiago dago zuzendari edo profesional tekniko lanpostuetan.

  • Altzan, Bidebietan eta Intxaurrondon batez besteko bizi-itxaropena Aieten baino lau urte txikiagoa da.

Borroka sozialak

Auzokoek askotan esaten duten bezala: "beste auzo batzuetan zerbitzuak ezartzen dituzte, guk ekarri behar izan ditugu". Eta, hain zuzen ere, borroka sozialei esker lortu dira Altza, Bidebieta eta Intxaurrondo oinarrizko azpiegiturak eta ekipamenduak.

Adibide historiko asko daude: 60-70eko hamarkadako autobus zerbitzuaren eta argiztapen publikoaren aldeko borroka, anbulatorioa, Larratxoko haurtzaindegia, etab. Eta ondorengo adibideak ez dira falta: Bidebietako institutua ez ixteko antolatutako "marea horia"; Intxaurrondoko trenbideak lurperatzeko borroka; Altzako behin-behineko kiroldegia eskatzeko dinamikak; Intxaurrondon barruko mikrobus-zerbitzu berri bat ezartzeko aldarrikapenak; Bidebietako kultu etxearen aldeko sinadura bilketa....

Hiri martxa maiatzaren 30ean

Altza, Bidebieta eta Intxaurrondok pairatzen dituzten desorekak agerian uzteko, udal gobernuaren pasibotasuna salatzeko - oso arduratuta dagoela esaten du, baina bere praktikan ez du ezer aldatzen egoerari buelta emateko, aitakeria eta zurikeria, besterik ez - eta irtenbideak proposatzeko, EH Bilduk Hiri Martxa bat antolatu du, “Ekialdean Bizi eta Lan / Terminemos con las desigualdades entre barrios” lemapean, maiatzaren 30ean, igandea, goizeko 11:00etan, Herrerako Euskotren geltokitik Udaletxeraino.

Era berean, Altza, Bidebieta eta Intxaurrondoko bizilagunen artean gai horiek guztiak zabalago aztertzen dituen aldizkaria buzoneatzen ari da.

ALBISTEAK

Basque Culinary Centerren bigarren egoitzaren kokapenak Groseko oraingo arazoak areagotzea baino ez du ekarriko

2021-08-17 12:14:00

Basque Culinary Centerren bigarren egoitza Okendo-Alden jartzeko Eneko Goia alkateak egindako hautuak Groseko gaur egungo arazoak areagotu besterik ez du egingo. Izan ere, Grosek etxebizitza premia larria du, eta neurri gabeko turistifikazio prozesu batean murgilduta dago; beraz, lursail hau, gazteentzako eta adinekoentzako apartamentuak eta kirol-eremua duen parke handi bat izango zituela iragarri ostean, orain Basque Culinary Centerren bigarren egoitza eraikitzeko erabiltzeak ez du ez hanka ez buru.

Donostiako etxebizitza hutsak mobilizatzeko prozedurarekin hasteko eskatu dio EH Bilduk EAJ-PSE-ri

2021-07-15 11:47:00

Ricardo Burutaran: "Donostia etxebizitza arazo handien duen euskal hiria bada, aitzindaria izan beharko luke etxebizitza eskubidea bermatzeko neurriak aplikatzen."

Donostiako Zaintzaren Kontseilua sortzeko eragileek egin duten proposamenarekin bat egin du EH Bilduk

2021-07-14 11:56:00

Olaia Duarte: "Bat egiten dugu Donostiako 11 gizarte-eragilek (Asade, Elkartu, Gautena, Haurralde, SOS Arrazakeria, Arrats, etab.) Zaintzaren Kontseilu Sektorial bat sortzea proposatuz zaintza eredu publiko berri baten alde eman duten aurrerapausoarekin"

EH Bilduk atzera urratsak salatu ditu Udaltzaingoan, bai herritarren hizkuntza eskubideak bermatzean, bai udaltzainek euskara ikasteko duten eskubidean

2021-07-07 11:16:00

Udaltzaingoaren Zuzendariak eta Euskara zinegotziak azalpenak eman beharko dituzte datorren asteleheneko Udal batzordeetan