Donostia

Altzako kiroldegiko obretan salatu diren lan irregulartasunekin amaitzeko eskatu dio EH Bilduk Eneko Goiari

Datorren asteleheneko Udal batzordeetan Udal Gobernuak hartuko dituen neurriak azaltzeko eskatu dio EH Bilduk alkateari

| 2020-02-12 12:26:00

Duela egun gutxi, Altzako kiroldegia eraikitzeko obretako langileak jasaten ari diren egoera larriaren berri eman da. Argitaratutako informazioen arabera, Donostiako Udalak sustatutako obra honetan langilek salatu dute hainbat hilabete daramatzatela kobratu gabe.

Gainera, horri gehitu behar zaio, ELA sindikatuak salatu duenez, Gipuzkoako eraikuntzako lan-hitzarmenak eskatzen dituenak baino %33 eta %40 arteko kotizazio-oinarri txikiagoak aplikatzen ari direla.

Deskribatutako egoera tamalgarrian dauden langileen egoeran eragina izateaz gain, honek eragina du baita bertako establezimenduetan ere. Izan ere, aipatutako informazioaren arabera, langileen egoera ekonomiko kaskarra dela eta, bazkaltzera eta afaltzera joaten diren tabernari edo aste barruan gaua igarotzen ari diren ostatuari ezin diete ordaindu.

Hori guztia ikusita, EH Bilduk urgentziazko eskaera bat erregistratu du, Eneko Goiak astelehen honetako Udal batzordeetan Donostiako herritarrei azal diezaien ea Udal Gobernuak egoera larri hori zuzentzeko neurriren bat hartzeko asmorik duen. Zehazki, galdera hauei erantzun beharko die alkateak:

  • Zergatik gertatzen ari da deskribatutako egoera? Alkateak jarduera edo esku-hartzeren bat egiteko asmorik al du udal obra batean langileei ez ordaintzea eragozteko?

  • Langileen egoeraz interesatzeko zerbait egin al du Eneko Goiak? Hitz egin al du obraren esleipendunarekin? Interesatu al da alkatea auzoan sortzen ari den egoeraz?

Gros-Ulia eta Erdialdean hotel berrietarako moratoria eskatu du EH Bilduk

Ricardo Burutaranek ohartarazi du hotel berriak ezartzeko Parte Zaharrean egun dagoen debekua ekainaren 7an amaituko dela, Eneko Goiak etxeko lanak egiten ez baditu.

| 2020-02-10 01:15:00

Hotel berrien uholdea gero eta handiagoa da. Ia astero-astero proiektu berriak, lizentzia berriak edo irekiera berriak ezagutarazten dira. Eta joera hori areagotu egingo da datozen hilabete eta urteotan. Izan ere, Donostia da estatuko hiririk errentagarriena hotel bat irekitzeko (+% 7 2019an, sektorearen beraren azken datuen arabera). Hau da, Donostia gaur egun mezu argi bat igortzen ari zaie sektoreko operadore handiei: “Etorri Donostiara hotel berri bat irekitzera”. Eta jakina da operadore hauen helburu nagusia etekin handiena ateratzea dela, eta ez donostiarron bizimodua defendatzea.

Hauxe izan beharko litzateke Eneko Goia alkatearen eginkizun nagusia, baina ez dugu ikusten, ez bere diskurtsoan, ezta bere gobernu jardueran ere, hotelen uholdearengatik kezkatuta dagoenik. Honen aurrean, hiria eta herritarrak babes gabe daudela salatu beharrean gaude. Eta gainera, Eneko Goiaren jarrera lasai horrek, sektorean aski ezaguna denak, hotel berrientzako "dei efektua" areagotzen laguntzen du.

Neurri eskasak

Gogoratu behar da bere garaian Udal Gobernuak bi neurri hartu zituela hotelen inguruan. Bi neurri horiek apalegiak zirela adierazi genuen orduan baina, borondate politikoa egongo balitz, hotelen ugaritzeari muga jartzeko balio zezaketen, sektoreari mezu argi bat bidaliz.

Alde batetik, Parte Zaharra merkataritza jarduerarako (hotelak, pentsioak, aterpetxeak eta abar) gune saturatu izendatuko zutela iragarri zuten. Hala ere, bere garaian salatu genuen bezala, neurri hori beranduegi iritsi zen. Izan ere, Goiak askoz lehenago iragarri arren, neurria hainbeste atzeratu zenez, Kale Nagusiko 31. zenbakiko hotel berriari lizentzia emateko denbora eman zitzaion.

Zentzu honetan, EH Bildutik ohartarazi nahi dugu Udal Gobernuak ezarritako lizentzien etetea ekainaren 7an amaituko dela. Gune saturatu izendatzeak Plan Orokorrean aldaketa bat egitea eskatzen zuen, eta lizentzien etetea aldaketa horren ondorioa zen. Baina tramitazioa geldirik dago 2019ko urtarriletik, eta, datozen asteetan bukatzen ez bada, ekainaren 8tik aurrera berriro eman ahal izango zaizkie lizentziak hotel berriei. Puntu honetan, gogoan dugu enpresa talde batek La Cueva eraikina erosi berri duela. Espero dugu beste atzerapenik ez egotea, horrek interes pribatu jakin batzuei bakarrik mesede egingo liekeelako.

Bestalde, Udal Gobernuak aurrekanpainan iragarri zuen bizitegi-eraikin osoak hotel bihurtzea mugatu nahi zuela. Hitzez hitz esan zuten helburua zela "hiriaren erdigunea batez ere bizitegi-eremu gisa mantentzea, eta turismoak egiten duen higiezinen presioagatik bizilagunez ez hustutzea". Zehazki egin zutena 2019ko otsailean HAPOren aldaketa bat onartzea izan zen. Funtsean, aldaketa horrek bizitegi-eraikinetan hotel berriak irekitzeko tramite administratibo berri bat ezarri zuen: Plan Berezi bat egin behar zuen Udalak. Beste era batean esanda, lizentziak emateko orduan, azken hitza udalbatzarrak izango zuen. Esan genuen bere garaian neurri horrek ez zuela eragotziko hotel berriak irekitzea bizitegikoak ez diren eraikinetan, eta horixe gertatzen ari da. Edozein kasutan, neurriaren hasierako onarpena 2019ko otsailean eman arren, hortik aurrera tramitazioa eten egin da, eta oraindik ez da bigarren aldiz pasatu udalbatzarretik behin-behineko onarpena emateko (indarrean sartzeko hiru aldiz pasatu behar da udalbatzarretik).

Egoera okerrera doa

Kontua da gero eta hotel gehiago daudela Donostian, eta gero eta gehiago irekitzen ari direla. Eta Gros ingurua hotel enpresa taldeen jomugan dagoela dirudi. Izan ere, zenbait hotel berrien irekiera denon ahotan dago: hotel handi bat Ulian, beste bat San Pio X.aren parrokian (Ategorrieta), Clareten (Sagues)...

Baina, Udal gobernuak berak kanpainaurrean onartzen zuenez, hotelak ugaritzeak ondorio txarrak ditu hirian. Ondorioak etxebizitza eskubidean, merkataritza ereduan eta hotelez betetzen diren auzoen eguneroko bizitzan. Horri gehitu behar zaio auzo berdinetan pisu turistikoak ere ugaritzen ari direla. Datu bat ematearren, INEk argitaratutako azken errolda datuen arabera, hamar urtetan Grosek 1.144 biztanle galdu ditu (%6); Zentroak 639 (%7) eta Parte Zaharrak 313 (%5), hiriak %1 irabazten zuen bitartean.

EH Bilduren proposamenak

EH Bildutik uste dugu Eneko Goiaren Gobernuak erreakzionatu egin behar duela, eta neurri berriak eta eraginkorragoak jarri behar dituela martxan. Uste dugu hotel-enpresa handiei mezu argia bidaltzeko garaia dela.

EH Bilduk Gobernu bokazioa du, eta ez gara kudeaketa negargarri baten salaketa hutsean geratuko. Oso egingarriak diren hiru neurri aurkezten ditugu, Donostian jasaten ari garen hotel-uholdearen aurrean herritarrak babestea helburu dutenak:

1.- Gobernuari proposatzen diogu Gros-Ulia eta Erdialdea ere gune saturatu izendatzea. Horrela, bertan ezingo dira hotelak, pentsioak, aterpetxeak, etab. ezarri, ezta etxebizitza turistikorik ere.

2. Proposatzen dugu bizitegi-jarduera batetik hotel-jarduera batera aldatzeko HAPOren aldaketa behar izatea. Gobernuaren proposamenean Plan Berezi bat baino ez da eskatzen. HAPOren aldaketa bat udal ekimenekoa da, eta Udalak ez badu nahi, ez da tramitatzen.

3. Eskatzen dugu berehala amaitzea Parte Zaharrari buruzko HAPOren aldaketa, Parte Zaharrean hotel gehiago ireki ez daitezen. Ekainaren 7ko mehatxua bertan dago, baino espedienteak geldirik jarraitzen du. Eskakizun hau datorren asteko Udal batzordeetara eramango dugu.

Eneko Goiak beste 400.000 euro eman dizkio Munillari aurrekontuen eztabidatik pasatu gabe eta publizitaterik eman gabe

Artzai Onaren dorrearen berrikuntzaren %87,5 erakunde publikoek finantzatzen dute, eta Eliza katolikoak soilik %12,5. Eta gogoratu behar da Juan Ignacio Munillak zuzentzen duen Donostiako Elizbarrutia dela eraikinaren jabea. Obraren hasierako aurrekontua 1,5 milioi eurokoa zen, eta horietatik %12,5 aurrekontu bidez finantzatu behar zuen Donostiako Udalak, hau da, 200.000 bat euro, 2019ko eta 2020ko ekitaldietan banatuta. Hala ere, nahasmena iritsi da egiaztatu ahal dugunean Udalak beste 400.000 euroko partida eman duela, 2019ko amaieran, aurrekontuetan onartua ez zegoena.

| 2020-02-05 11:33:00

Dirudienez, dorrearen argiztapena diruz laguntzeko partida baten aurrean gaude. Zehazki, 2019ko abenduaren 31n sinatutako Ogasuneko ordezkariaren ebazpen baten bigarren puntuan, Kultura sustatzea eta bultzatzea programan, Artzai ona argitzeko aportazioa sortzea eta 394.958,50 eurokin hornitzea onartu zen.

Osoko Bilkuran onartutako aurrekontua hirukoiztu egin da, beraz, horretarako udal-kontingentziarako funtsa erabiliz. Gogoratu behar da funts hori aurrekontuan egiten denean aurreikusi gabeko premiazko gastuak ordaintzera bideratuta dagoela. Artzai Onaren dorrea berritzeko proiektua ezaguna zen aurrekontuak egin zirenean, eta diru laguntzaren urgentzia ere ez dugu justifikatuta ikusten.

Azken hilabeteetan Goia alkatearen kudeaketa-eredua gero eta antidemokratikoago bihurtzen ari da eta hemen joera horren beste adibide baten aurrean gaude. Baliabide publikoen kudeaketa kontrolatzeko mekanismoak behin eta berriz saihesten ari da Eneko Goia, eta erakunde publikoen kudeaketa zuzendu beharko luketen gardentasun eta informazio printzipioak lurperatzen ari da. Beste era batean esanda, Eneko Goiak bere mesederako eta bere interes alderdikoien mesedetan erabiltzen du alkatetza.

1,6 milioiko “akatsa” eta ROParen aldaketa atzerakoia

Munillari emandako aparteko diru-laguntzaz gain, astebeteko epean ikusi dugu, halaber, alde batetik, Udal Gobernuak ia 1,6 milioi euroko aurrekontu-aldaketa bat egin duela, Txomin Enea auzoa urbanizatzera bideratuak zeudenak baina Santa Klara uharteko itsasargiaren obra artistikorako transferituak izan direnak. Eta, bestalde, berriki publiko egin da, halaber, Goiak Osoko Bilkuraren Araudia aldatuko duela, Udal Gobernuaren jarduerari oposizioak egin behar dion kontrol-mozioen kopurua asko murrizteko eta eztabaida guztietan azken hitza beti Udal Gobernuak izateko. Alegia, nahi duena nahi duen eran egiteaz gain, Goiak ez du nahi herritarrek beren trikimailuak ezagutu eta salatu ahal izatea.

Baina Goiaren kudeaketa-eredu txar honetaz gain, diru publikoa erabiltzeko orduan Udal Gobernuaren lehentasunak ere salatu nahi ditugu EH Bildutik, baita Kultura departamenduarenak ere. Artzai Ona lehenetsi da orain baina gogoratu behar da Larrotxene kultur etxea birgaitzea 2020ko aurrekontutik kanpo utzi dutela, azken orduan Victoria Eugeniaren fatxadan txukuntze lan bat egitea hobetsi dutelako. Kultura eta lurralde desorekak gero eta handiagoak gure hirian.

Pisu turistikoen krisiari buruzko ponentzia bat eratzeko eta baimen berriak bertan behera uzteko eskatu du EH Bilduk

Ricardo Burutaranek etxebizitza turistikoen krisia sakon aztertzeko prentsaurrekoa eman du gaur, EAEko Auzitegi Nagusiaren epaiaren ostean areagotu egin baita.

| 2020-01-17 11:47:00

EAEko Auzitegi Nagusiaren epaiaren ondoren, areagotu egin da Donostian pairatzen ari garen pisu turistikoen krisia. Eta hemen ez dela ezer gertatzen esan eta esan arren, Eneko Goiak badaki sortu den egoera oso konplikatua dela eta hau ez dela konponduko epe motzean. Horregatik, hasierako puntura itzultzeko garaia dela uste dugu, Plan Orokorraren segurtasun juridikora itzultzeko garaia da, alegia. Edo modu kolokialean esanda: lehen solairuko araura itzultzeko garaia da.

Gogoratu behar da Donostiak bazuela 90eko hamarkadatik arau bat (lehen solairuko araua), benetan eredugarria zena, baina pisu turistikoen booma Donostiara iritsi zenean, 2015-16an, ez zela behar bezala aplikatzen. Orduan, Plan Orokorra (PG) betearazteko neurri berriak hartu beharrean, pisu turistikoak arautzeko ordenantza berria aurkeztu zuen Goiak. EH Bilduk, ordenantza onartzeko egin zen udalbatzarrean, oso ibilbide laburra iragarri zion, "eragingo dituen prozesu juridiko ugariengatik". Goiari esan genion bere zuzenbidean lizentziatu izaeragatik jada jakin beharko lukeen zerbait: ordenantza batekin ezin direla hirigintza erabilerak arautu, eta ezin duela Plan Orokorraren kontra joan. Baina aurrera jarraitu zuen.

Orain, ordenantzaren aurkako epaiak iristen hasi dira, batzuk Plan Orokorra ez betetzeagatik, eta hau EAEANren aldetik, hirigintzaren legezkotasuna ez betetzeagatik. Paradoxikoki, denbora honetan guztian, Udalari arrazoia ematen dioten dozenaka epai ere iristen joan dira, hori bai, solik PGa betetzen duenean ("lehen solairuko araua").

Bitartean, bi urte hauetan, gutxi batzuek diru asko irabazi dute PGaren arabera legez kanpokoak izan beharko liratekeen etxebizitza turistikoekin. Bitartean, Donostian alokairuaren prezioa etengabe igo da. Bitartean, donostiar askok kanpora joan behar izan dute bizitzera eta, bitartean, bizilagunen komunitate askotan arazo larriak izan dituzte pisu turistiko berrien kontura.

Horregatik guztiagatik, EH Bilduk Goia jaunari eta bere Gobernu taldeari helarazi nahi diegu iritsi dela momentua ordenantza kaxoi batean sartu eta abiapuntura itzultzeko. Ordenantza salbatzen saiatzeko ingeniaritza juridikoa egiteko denbora amaitu da. Gauzak ondo egiten hasteko garaia da.

Zentzu horretan, EH Bilduk ponentzia bat eratzea eskatuko du, pisu turistikoen booma iritsi zirenetik Donostian sortu den egoera aztertzeko, eta ze egoera juridikoan gauden ere sakon aztertzeko. Ponentziaren azken helburua pisu turistikoak behar bezala arautzea izango litzateke, Donostiako herritarren interesak eztabaidaren erdigunean jarriz. Ponentzia eratzearekin batera, pisu turistiko berrietarako baimen gehiago ez emateko erabakia hartu beharko litzateke.

Eneko Goiaren turismo eta etxebizitza arloko politikak babesgabe uzten dituzte donostiarrak

Gaur ezagututako epai baten arabera, EAEko Auzitegi Nagusiak Donostiako pisu turistikoen ordenantza bertan behera utzi du, ordenantza batek ezin duelako hirigintzako erabilerak arautu. Bihar, ostirala, 11: 00etan, epaiaren eta bere ondorioen irakurketa pausatuagoa egingo du EH Bilduk, baina ohar honen bidez EH Bilduk lehen premiazko balorazioa egin nahi du.

| 2020-01-16 18:55:00

Eneko Goiaren gobernuak araudi berria egin nahi zuela adierazi zuen lehen unetik, EH Bilduk ohartarazi zuen ordenantza batek ezin duela hirigintza-erabilerak erregulatu, hori Hiri Antolamendurako Plan Orokorraren eskumena delako. Behin eta berriz, EAJ eta PSEren gobernuari ohartarazi genion hori ez zela legezkoa, baina erantzuna beti izan da kosta ahala kosta aurrera segitzea.

Erantzun hori bera eman zuen alkateak abenduan bertan, Donostiako auzitegi baten epai batek ordenantza "erabat deusez" gisa definitu zuenean, hain zuzen ere, Plan Orokorraren aurka zihoazelako. Orduan Goiak esan zuen "oso lasai" zegoela, arazorik ez zegoela itxura eman nahian. Gero prentsaren bidez jakin genuen maniobrak egiten ari zela Plan Orokorraren aldaketa bat hasteko, egindako akats larria zuzentzen saiatzeko.

EH Bilduk, 2018ko martxoaren 1ean, pisu turistikoen ordenantzaren aurka bozkatu zuen, besteak beste, EAEko Auzitegi Nagusiak orain erabili duen argudio beragatik. Orduan esan genuen ez geundela ordenantza berri bat egitearen aurka, baina ordenantza hori turismo-erabilerako etxebizitzen erabilera-baldintzak arautzera mugatu behar zela, jarduera ekonomikoa den aldetik, hala nola segurtasun-neurriak, irisgarritasuna, intsonorizazioa eta abar. Ez dago esan beharrik PNV-PSEk ez zigutela jaramonik egin, aurrera jarraitu zuten, eta denbora kontua zen horrelako epai bat iristea.

Beraz, galdera da.: zergatik jarraitu du aurrera Eneko Goiaren gobernuak? EH Bilduk 2018an jada esan zuen Gobernu honen arrazoi nagusia garai hartan hirian zeuden legez kanpoko ehunka etxebizitza turistikoak legeztatzea zela (orduan "amnistiatzea" esaten genuen). Gogoratuko denez, Plan Orokorrak pisu turistikoen jarduera zuzenean arautzen zuen, beste arau batzuen artean, "Lehen solairuko” arauaren bidez. Ordenantza berriak pisu turistikoen ezarpena malgutu zuen eta, beraz, gauetik goizera, lehen legez kanpokoak ziren ehunka pisuak legezkoak izatera pasatu ziren.

Etxebizitzaren preziorik garestiena duen euskal hirian, etxebizitza turistikoen ugaritzeari hainbeste erraztasun ematea, etxebizitzen bizitegi-erabileraren kaltetan, benetako suizidio politikoa zen Donostiarentzat. Hilabete hauetan alokairuaren prezioek izan dituzten etengabeko igoerak horren lekuko dira. Orain, ordenantza honen aurkako etengabeko epaiek gutxi batzuei bakarrik mesede egiten dien entramadu juridiko hau oso ikutua utzi dute. Bada garaia etxebizitza eta turismo politiken erdigunean donostiarrak jartzen hasteko. Izan ere, Eneko Goiaren gobernuaren politikak Donostiako herritarren interesentzat kaltegarriak direla erakusten duten ebidentzia gehiegi ditugu dagoeneko.

ALBISTEAK

Biharko ekimena aurrerapauso bat da torturaren biktimek merezi duten erreparazio instituzionalean

2020-12-18 13:56:00

Udal talde guztiek babestu dute Mikel Zabaltzaren omenez bihar egingo den ekitaldi instituzionala Ondoren, Altzako San Martzial plazan, Herri Ekimenak sustatutako ekitaldia egingo da “Mikelen Txokoa” inauguratzeko

EH Bilduk eskatu dio Kutxabank bankuari irekita mantendu dezala Bidebietako bulegoa

2020-12-16 11:45:00

EH Bilduk mozio bat eramango du biharko osoko bilkurara, udal talde guztiek Bidebietako 1202 bizilagunen salaketarekin bat egin dezaten

Ekialdeko Barrutiaren aurrekontuaren murrizketa berreskuratzeko formula adostu nahi du EH Bilduk Udal Gobernuarekin eta beste eragileekin

2020-12-10 12:11:00

Datorren asteazkenean egingo den Barrutiko Batzarrari begira, akordio proposamen aurkeztu dute Garbiñe Alkizak eta Zigor Etxebruruak

Pandemiaren urtea izan arren, Eneko Goiak ez du agortuko gizarte-ekintzako 2020ko aurrekontua

2020-12-03 13:08:00

Inbertsio sozialetan hiru milioi geratu dira erabili gabe, aurreikusitakoaren %89