Donostia

EH Bilduk “kirol leihatila bakarra” proposatu du kirol ekitaldien antolaketa errazteko

Donostiako kluben artean oso zabalduta dagoen eskaera eramango du biharko osoko bilkura Reyes Carrerek

| 2019-09-25 11:53:00

Gure hiriaren kirol motorra kirol entitateak eta elkarteak dira, dudarik gabe, urtea joan eta urtea etorri kirola sustatzen aritzen dira eta. Urtetik urtera lizentzia gehiago dago, eta kirol-jarduera dugu Donostiaren nortasunaren ezaugarrietako bat. Izan ere, badira pertsona batzuk —beren borondatez aritzen direnak, gehien-gehienak—, era askotako ekitaldiak antolatzen dituztenak urte guztian, esparru federatutik kanpo, eta, askotan, ekitaldi horiek izaten dira, hain zuzen ere, erakunde horien ekonomikoari eusten laguntzen diotenak.

Ekitaldi horietako batzuk eragin eta inpaktu handikoak dira (Behobia, nazioarteko txapelketak, lehen mailako kirol-topaketak...); beste batzuk txikiagoak dira (herri-lasterketak, zikloturisten martxak, kirol-jokoak...), eta badira jai eta gizarte izaera duten jarduerak ere, hiriko klubak finantzatzeko ezinbestekoak direnak (garagardo azokak, jaietako txosnak, elikagai azokak, merchandising saltokiak, jaialdiak, etab.).

Ekitaldi horiek egin ahal izateko, ordea, espedienteak eta baimenak bideratzeko diren kasuak eta konplexutasunak jakin behar izaten dituzte kudeatzaileek. Izan ere, ekitaldi bat antolatzeko, Udaleko sail bati baino gehiagori eskatu eta bidali behar zaizkio agiriak. Ekitaldiaren neurriaren edo beharren arabera, sail hauen aldeko txostena izan behar da:

  1. Mugikortasun Departamentua

  2. Hiri Mantentze Departamentua

  3. Osasun departamentua

  4. Hondartza Departamentua – Kostak

  5. Beste erakunde batzuk (San Markoko Mankomunitatea, Donostia Kirola...)

Era berean, baimen horiek eskatzeko, beste agiri mordo bat prestatu behar izaten da, eta, askotan, oso konplexua izaten da hori (planoak, homologazio-ziurtagiriak, autobabeserako planak, aseguruak...).

Gaur egun, baimen horiek telematikoki bideratzen dira “GUNE PUBLIKOA”n —teorian leihatila bakarraren lana egiten baitu hark—, eta inprimaki batzuk bete eta lehen aipatutako dokumentazio guztia erantsi behar izaten da. Gertatzen dena da, ordea, benetako “aditua” izan behar dela haren funtzionamendua eta eskakizunak jakiteko, eta, maiz, dagokion sailera bideratzen zaituzte zuzenean, eskaera izapidetzera (osasuna, hondakinak...).

Beraz, denboraldian egin behar izaten dituzten kudeaketa lan ohikoez gainera (federazioekiko harremana; lizentziak, ordutegiak, baimenak eta kuotak bideratzea; partidak eta joan-etorriak antolatzea; talde, kirolari eta entrenatzaileena kudeatzea; babesleak aurkitzea; Udalarekiko, Patronatuarekiko edo beste erakunde batzuekiko harremanak, eta abar), ohiz kanpoko gestio batzuk ere egin behar izaten dituzte gure hirian diren klubek, ekonomikoki eta sozialki aurrera aterako badira.

Udal Gobernuari zailtasun horiei guztiei buruz interpelatu eta zera erantzun zigun Kiroletako zinegotzi ordezkariak: Ez dugu zerbitzu espezifiko bat sortzeko aukerarik aurreikusten.

Gure taldeak, ordea, uste du oso garrantzitsua dela kirol leihatila bakarra martxan jartzeko aukera aztertzea, ekitaldi horiek antolatzea samurtzeko klubei; zerbitzu bat, izaten diren eskaerak koordinatuko dituena, aholkularitza eta behar den informazio guztia emango diena klubei libre diren egun, toki eta instalazioez, baimenak bideratuko dituena, edota sinergiak bilatuko dituena ekitaldi handiagoak sortzeko eta diren baliabideak optimizatzeko.

Horiek horrela direla, hauxe da biharko udal batzarrean Reyes Carrerek aurkeztuko duen mozioa:

“Donostiako Udalbatzak Udal Gobernuari eskatzen dio azterketa bat egin dezala kirol leihatila bakarra sortzeko modua izateaz, Donostia Kirolarekin batera jardun eta gure hirian kirol ekitaldiak egiteko egin behar diren kudeaketak egitea zentralizatu, erraztu, arindu eta optimizatu dituen leihatila.”

Donostiako oposizioko alderdi guztiek Arte Ederren eraikina eraisteko baimentzearen arriskuaz ohartarazi dute

Eneko Goia alkateak Arte Ederren eraikina eraisteko baimentzearen arriskuaz ohartarazi dute gaur EH Bilduk, PPk eta Elkarrekin Donostiak

| 2019-09-24 12:06:00

Eraikinaren egoerari buruzko txosten teknikoak eskatu dituzte hiru taldeek eta, hala ere, PNV-PSOEko Gobernuak ez du eskatutako dokumentazioa entregatu nahi. "Informazio-eskaerak arauzko prozedurei jarraiki egin dira, eta, beraz, txosten horiek ez emateak zinegotzi eta udal-talde gisa ditugun eskubideak urratzen ditu. Sintomatikoa da hiriko gobernuak udal teknikariek egindako edo Udal honek eskatutako eta donostiar guztien diruarekin ordainduta dauden zenbait txosten ezkutatzea. Zergatik ezkutatzen da txosten publiko bat hiriko eraikin adierazgarrienetako bati eragiten dion gai sentikor bati buruz? Horrek guztiak Eneko Goiak Arte Ederren eraistea baimentzearen aldeko apustua egiten duela pentsatzera eramaten gaitu", amaitu dute hiru udal taldeek.

Gogora dezagun 2019ko apirilaren 24an SADEk Urbieta kalean dagoen Arte Ederren eraikina partzialki eraisteko baimena eskatu zuela. Espedientea eskatu zenean, arauz ezarritako ubidearen bidez, oposizioko taldeek egiaztatu zuten espedientean ez zegoela Hirigintza Iraunkorreko Departamentuaren txostenik; era berean, Udalak Pedro Ponce de León arkitektoari, egituretan aditua, eskatutako txostena eta, joan den abuztuaren 29az geroztik Udal Gobernuaren esku dagoen kanpo-txostena ez zegoela ere egiaztatu zuten. Txosten hauei dagokienez, Hirigintza Jasangarriko zinegotzi ordezkari den Nekane Arzallusek batzordean kopiarik ez zuela emango esan zuen, txosten hauek aldaketak jasan zitzaketela argudiatuta.

Ricardo Burutaranek, Mikel Lezamak eta Haizea Garayk, hurrenez hurren EH Bilduko, PPko eta Elkarrekin Donostia-ko ordezkariek, prentsaurrekoan baieztatu dutenez, "informazioa modu hain arduragabetuan ezkutatzen denean, Eneko Goia hiriko alkatea aterpean jartzen denean bere isiltasunarekin eta “Bellas Arteseko” etorkizunerako funtsezko informazioa eta txostenak bere bulegoko kajoi batean gordetzen denean, agian, txosten eta azterketa horien emaitza ez zaizkiola gustatzen aditzera ematen ari da. Donostiarroi eta talde politikooi informazioa ezkutatzen ari zaigu eta instituzio bezala izan behar duten gardentasunari muzin eginez, opakutasun batean sartzen ari dira. Gaian adituek egindako azterketak eta ebaluazioak dira. Donostiar guztiok sarbidea eduki beharko genuke informazio hontara, bai erakunde honetako langile teknikoak eginak direlako bai diru publikoekin ordaindu direlako; Pedro Ponce de León-i egindako eskaeraren kasuan esaterako. Beraz, exijitzen dugu Eneko Goiak politika ilun hau alde batera uzteko eta berehala argitaratzeko bai udal arkitektoen txostena bai Pedro Ponce de Leónek egina. Bestela, serio aztertuko dugu zein bide hartu."

Hiru alderdien uztez, “Eneko Goiaren jarrera irregularrak Udal Gobernuak Urbieta kalean dagoen eraikin enblematikoa eraisteko baimena aztertzen ari dela pentsatzera eramaten gaitu. Gure ustez, Donostiak Bellas Artes eraikina galtzeko benetako arriskuan dago epe laburrean. Horregatik, gaur egun, gure aniztasunetik berretsi nahi dugu legeak babesten duen eta hiriaren ondare historiko eta arkitektonikoaren funtsezko atal bat den eraikin hori mantentzeko konpromisoa. Eta Eneko Goiak, hiriko alkate gisa, konpromiso hori publikoki har dezala eskatzen dugu ”, adierazi dute.

Tomas Albari omenaldia egingo dio Donostiako Udalak bere erailketaren 40. urteurrenean, EH Bilduren ekimenez

HBko Donostiako zinegotzia talde parapolizialek hil zuten 1979ko irailaren 28an

| 2019-09-23 12:45:00

‘Batallón Vasco Español’ taldeak Tomas Alba hil zuen, 1979ko irailaren 28ko goizaldean, Astigarragan. Donostiako Herri Batasuneko zinegotzia eta Amnistiaren Aldeko Mugimenduaren kidea zen.

Tomas Alba gatazkaren biktima da eta, beste biktima guztiek bezala, Egia, Justizia eta Erreparazio eskubidea du. Alba Donostiako zinegotzia zenez, Udalak ardura berezia du Albaren aitortzan eta heriotzaren testuinguruaren ezagutarazpenean. Hori dela eta, bere erailketaren 40. urteurrenean, udal bezala aitortza ekitaldia antolatzea proposatu du EH Bilduk Giza Eskubideen Batzordean. Gobernuaren iturrietatik konfirmatu digutenez, ekitaldia larunbat eguerdian egingo da.

Indarkeria-zikloa atzean geratzen ari den arren, ezin dugu ukatu bizikidetza demokratiko baterako bide luzea geratzen dela. Zoritxarrez, oraindik ez dira bermatzen biktima guztien Justizia, Egia eta Erreparazio eskubideak. Horregatik, Egia osoa ezagutze aldera, garrantzitsua da maila instituzionalean indarkeria polizialaren, gerra zikinaren eta eskuin-muturraren biktimak aitortzeko aurrerapausoak ematea.

Zentzu honetan, gogoratu behar da Donostiako Udalak 2005ean Albaren omenez plaka bat jarri zuela udaletxe barruan eta, era berean, 2014tik Donostiako plaza batek Albaren izena daramala, Sagues aldean, Nestor Basterretxearen “Bakearen Usoa” dagoen eremuan, hain zuzen ere.

Bukatzeko, EH Bilduren iritziz, bizikidetzaren eraikuntzak eztabaida eta negoziazio handien beharra du, sentsibilitate ezberdinen arteko bizikidetzan aurrera pausuak ematen jarraitzeko. Ezin dugulako iragana aldatu, baina bai etorkizun hobe baten alde lan egin. Gertuko beste leku batzuetan sentsibilitate politiko eta sozial guztiak bildu dituzten akordioak egiteko gai izan dira; Donostia, indarkeriaren ondorio garratzak jasan dituen horretan, ezin da atzean geratu.

Donostian Larrialdi Klimatiko egoera deklaratzeko eskatu dio EH Bilduk Eneko Goiari

EH Bilduren mozioa datorren irailaren 26ko udalbatzan eztabaidatuko da

| 2019-09-18 09:48:00

Larrialdi Klimatikoa datozen urte eta hamarkadetako agenda baldintzatzera etorri da, gure ongizatearentzako mehatxu nagusienetarikoa baita, benetako zibilizazio erronka bat. Mundu mailako eta Euskal Herriko egoera eta joerak ez du baikortasunerako tarte handiegirik uzten, are gutxiago geldotasunerako. Gazteentzat dagoeneko kezka nagusi bihurtu da, ez bakarrik larrialdia bera, baita gaiari ematen zaion erantzun politiko eskasa ere.

Azken urte luzeetan komunitate zientifikoak aldaketa klimatikoaren bilakaeraren inguruko abisuak eta jakinarazpenak igorri ditu. Aldaketa klimatikoa, Berotegi Efektuzko Gasen isuri masibo baten ondorioz gertatzen ari da, eta isuri horien arrazoi nagusia, bakarra ez bada ere, gure metabolismo sozioekonomikoa mantentzeko erretzen ditugun baliabide fosilen erabilpenean datza. Aldaketa klimatikoa, beraz, guk eragiten dugu nagusiki, eta dagoeneko ondorioak atzematen hasiak gara.

Urtez urte argitaraturiko txostenetan egoera kaskartzen ari deneko zantzuak ditugu. Nazioarteko hainbat erakunde eta lantaldek argitaratzen dituzten txostenetan gero eta argiago esaten da klima eta energia politiketan, eta ondorioz gure egunerokotasunean, eraldaketa sakon bat, iraultza bat, eman behar dela, baldin eta egoerari aurre egin nahi badiogu eta aldaketa klimatikoaren efektu bortitzenak pairatu nahi ez baditugu.

Hala ere, orain arte emandako pausoak ez dira nahikoa izan, EAEn ere ez, Berotegi Efektuzko Gasen isurketak ez duelako beherantz egin, gorantz baizik, 20 milioi tonako langa gainditzeraino, 2012az geroztik gertatzen ez zena. Datu hauek oso kezkagarriak dira, helburua 2050. urterako karbono neutraltasuna lortzea delako eta, agertoki horretara hurbildu beharrean, urruntzen ari garelako.

Eusko Jaurlaritzak klimaren eta ingurumenaren larrialdi egoera deklaratu du. Neurri zehatz bat ere iragarri du: urteko aurrekontuaren zati bat klima aldaketa arintzeko neurrietara bideratzea, eta aldaketara egokitzeko neurrietara.

Hainbat dira larrialdi klimatiko egoera deklaratu duten hiriek: Frantzian, Irlandan, Erresuma Batuan, Kanadan eta Argentinan, esaterako. Besteak beste, Kataluniak, Sevillak eta Zaragozak ere larrialdi klimatiko egoera deklaratu dute. Donostia, ordea, atzera geratzen ari da, halakorik ez du-eta egin Udal Gobernuak.

Horiek horrela, aitzakiaren garaia agortu dela uste du EH Bildu udal taldeak eta iraileko osoko bilkuran mozio bat aurkeztuko du Donostian ere emergentzia klimatikoa deklaratzeko.

Alokairu sozialeko etxebizitzak eskuratu ahal izateko zerrendak desblokeatzeko eskatu dio EH Bilduk Eneko Goiari

Milaka donostiar alokairu sozialeko zerrendetan izena emateko zai daude, tartean ia prest dauden Txomin-Eneako 162 etxebizitza berrietarako

| 2019-09-11 12:46:00

Jakina da Donostian etxebizitza bat eskuratzeko dagoen arazo larria, eta EH Bilduk askotan salatu duen moduen, Udal Gobernuaren etxebizitza politikak ez du batere laguntzen arazoaren konponbidean. Horren adibidea da, adibidez, babestutako alokairuzko etxebizitzak eskuratu ahal izateko baremazio irizpideen ezarpenean dauden atzerapenak eta blokeoak.

Etxebizitza Legea 2015ean onartu arren, Donostiako udalak laur urte behar izan zituen Lege berriak agintzen zituen baremazio irizpideak ezartzeko. Izan ere, oposizioaren presioaren eraginez, pasa den legealdiaren azken minutuan onartu ziren baremazioa egiteko irizpideak. Baina legealdi berria bide berdinetik doa eta onartu zirenetik lau hilabete igaro ondoren irizpideak ezarri gabe jarraitzen du Eneko Goiak.

Honen ondorioz, milaka donostiar alokairuzko etxebizitza sozial bat eskuratu ezinean daude. Dagoeneko funtzionamenduan dauden etxebizitzak eta apartamenduak libre geratzen direnean, oso zaharkitua geratu diren zerrenden arabera okupatzen dira. Izan ere, azken urteotan alokairuzko etxebizitza bat eskuratzeko izena eman duten donostiarrek ez daude, gaur gaurkoz, inongo itxaron zerrendetan.

Eta etxebizitza berriei dagokienez, Txomin-Enean Donostiako Etxegintzaren bidez eraiki diren alokairu sozialeko 162 etxe berriak baremazioaren arabera banatu behar direla gogoratu behar da. Halere, nahiz eta etxebizitzak ia-ia bukatuak egon (dagoeneko ez badaude bukatuta), 2-3 hilabetez luzatuko den banaketa prozesua hasi gabe dago.

Honen aurrean, EH Bilduk Eneko Goiaren gobernuak azalpenak eman ditzan ekimen bat erregistratu du, datorren asteleheneko batzordean jorratuko dena. Zehazki, atzerapenaren arrazoiengatik galdetuko diogu Nekane Arzallus hirigintza zinegotziari, baita alokairu sozialeko zerrendetan izena emateko prozesua desblokeatzeko hartu behar dituzten neurriei buruz ere. Era berean, Txomin-Eneako 162 etxebizitzak donostiarren eskura uzteko aldez aurretik zehaztutako epea ea errespetatzen ari den ere jakin nahi dugu.

Jakina denez, Ekainaren 18ko 3/2015 Legeak, Etxebizitzari buruzkoak, amaiera eman zion etxe babestuak edo zuzkidura bizitokiak esleitzeko zozketa sistemari. Beraz, legea onartu zenean, errotik aldatu ziren ordura arte etxebizitza edo apartamentu babestuak esleitzeko erabili ziren sistemak. Horrek eskatzen zuen udal mailan baremazio irizpide batzuk onartzea, izena ematen duten pertsonen eskaerak baloratzeko. Horrela, eskaerak barematzean, hainbat irizpide hartu behar dira kontuan: hala nola errenta, eskatzailearen antzinatasuna, larrialdietako egoerak, etab. Legea betetzeko, ezinbestekoa da baremazio irizpideak onartzea.

ALBISTEAK

Ategorrietako sarraskiaren 90. urteurrena

2021-04-14 11:47:00

Ategorrietako sarraskiaren 90. urteurrena dela eta, bertan gertatutakoa oroitzeko eta egun hartan (1931ko maiatzaren 27a, Errepublika aldarrikatu berria) hildako 7 langileak errekonozitzeko proposamena aurkeztuko du Donostiako EH Bilduk.

EH Bildu Udal taldeak Groseko eragileen salaketa aztertuko du

2021-03-29 12:49:00

Joan den ostegunean, Groseko hainbat taldek salatu zuten Donostiako Udaleko idazkariak erabilera turistikoko etxebizitza bat duela Gros auzoan. Talde horiek salatzen zutenez, osoko bilkuretan hartutako erabakien legezkotasunaren bermatzailea denak, Idazkariak, erabilera turistikoko etxebizitzak lehen solairutik gora legeztatzeko aukera baliatu zuen jarduera ekonomiko hori ezartzeko.

EH Bilduk kontzentrazio bat egingo du Kontxan “PNV-PSE: Ez handitu zuloa” lemapean

2021-03-18 11:55:00

Kontzentrazioa martxoaren 28an izango da, 12:30ean.