Donostia

EH Bilduk erantzukizun politikoak eskatu ditu metro-pasantearen zuloan egindako akatsengatik

Gaur eguerdian, Zubieta kaleko 8. zenbakian (zuloa atera zen eraikina), Nerea Kortajarena EH Bilduko legebiltzarkideak eta Reyes Carrere Donostiako EH Bilduko bozeramaileak adierazpenak egin dituzte prentsaren aurrean, metroko obren zuloaren inguruan egindako kudeaketa baloratzeko. Obraren diseinuan izandako akatsen inguruko azalpenak eskatu dituzte (hau da, Antonio Lopez ETSko arduradunak berak publikoki aitortu duen "akatsaren” ardura zeinek hartuko duen bere gain), pertsona askoren bizitza arriskuan jarri baitu akats horrek. Halaber, azalpenak eskatu dizkiote Udal Gobernuari, hasiera batean metroak zerikusirik ez zuela esateagatik. Egindako akatsaren kostuei buruz ere galdetu dute, eta, azken batean, bi bozeramaileek, Garbiñe Alkiza zinegotziarekin lagunduta, EAJri eta Eusko Jaurlaritzari eskatu diete "aurpegia emateko, gertatutakoaren erantzukizuna norena den azaltzeko eta ondorio politikoak izan ditzala edozein dela ere arduraduna".

| 2020-06-10 13:14:00

Reyes Carrere EH Bilduren Donostiako bozeramaileak "eremu osoaren segurtasunagatik" kezkatuta agertu da. Carrereren hitzetan, "behin eta berriz inprobisatzen ari dira: orain jakin dugu lurpean bazirela identifikatu gabeko harri mota batzuk, baina ekainaren 5 arte dena segurua zela zioten". Horren aurrean, "EH Bilduk eskatzen du, herritarren eta langileen segurtasunagatik, eremu osoaren azterketa sakona egiteko; ezin da lanean jarraitu zulotik 30 metro eskasera, ezer gertatuko ez balitz bezala", esan du Carrerek. "Orain, batez ere, segurtasuna lehenetsi behar da", azpimarratu du Reyes Carrerek.

Bestalde, Donostiako bozeramaileak Nekane Arzallus Hirigintza zinegotzi-ordezkariaren adierazpenak ekarri nahi izan ditu gogora, “oso adierazgarriak direlako”. Izan ere, metroak "zerikusirik ez" zuela esan zuen EAJko kideak, istripua gertatu eta berehala. Honen aurrean, Carrerek "udal gobernu honi geratzen zaion sinesgarritasun eskasa" nabarmendu du: "Aurreiritzi politiko argia egon da gertatutakoa metroaren obretatik bereizteko". Eta zuzenean galdetu du: "Zein informaziotan oinarritu zen Nekane Arzallus harremanik ez zegoela ziurtatzeko? Zergatik ez ditu oraindik honi buruzko azalpenik eman?" Amaitzeko, Reyes Carrerek metroko obren inguruan dagoen iluntasuna salatu du.

Nerea Kortajarenak, bere aldetik, erantzukizun politikoak eskatu ditu: "Nork hartuko du bere gain egindako akatsaren erantzukizuna? Tapia sailburuak berak? ETSko ordezkariak? Garraio Saileko kargu politikoren bat? Oraindik inork ez du autokritikarik egin. Kontrara, kontuari garrantzia kendu nahian dabiltzala eta honen inguruko ardura politikoak saihestu nahian”. Kortajarenak salatu duenez, “bizilagunen, herrirtarren eta langileen segurtasuna jokoan dago, eta are gehiago, dirutza publiko ikaragari batetaz ari gara, noiz eta pandemiak gogorren jo gaituenean, diru-sarrerak inoiz baino gehiago jaitsiko direnean, eta diru publikoarekin inoiz baino ardura gehiagoz aritu behar denean.”

“Gizarteari eta EH Bilduri galdera asko sortzen zaizkigula” adierazi du EH Bilduko eledunak, eta galdera horiek guztiak egingo dituela EH Bilduk, bai Donostiako Udalean, bai Eusko Legebiltzarreko Diputazio Iraunkorrean:

  • Pandemia garaian premiak eta aurrekontu publikoak osasun publikoaren, babes sozialaren eta suspertze sozioekonomikoaren mesedetan jarri behar direnean, zenbateko gain-kostua izango du akatsa honek? Ziur asko, dirutza izango da: bi hilabeteko geldialdia obrak egiteko, estudio berriak egiteko.

  • Zergatik ez zen obra geldiarazi tunelean ur-bideak hasi zirenean? Izan ere, sare sozialetan zabaldutako bideoetan denok ikusi ahal izan dugu, ekainaren 5 baino lehenagotik, zerbait larria gertatzen ari zela tunelean.

  • Zergatik ez da orain arte azterketa geotekniko espezifikorik egin eremu osoan?

  • Zergatik hasiera batean Udal Gobernuak esan zuen metroak ez zuela zerikusirik zuloarekin?

EH Bilduk metroaren pasantearen lanak berehala gelditzeko eskatu du

| 2020-06-05 18:07:00

Donostiarren segurtasunarengatik, Eneko Goia Donostiako alkateari eta Eusko Jaurlaritzari metroaren pasantearen zati guztietako lanak berehala gelditzeko eskatu die EH Bilduk. Obrekin modu batera edo bestera lotutako istripuen enegarren kapituluaren aurrean gaude. Horietako azkena eremu bereko ur-bide bat izan da, eta herenegun bertan izan genuen horren berri sare sozialetan. Izan ere, istripuen larritasuna in crescendo doa eta obra gelditzeko eta segurtasun guztia birplanteatzeko ordua iritsi da.

Hasiera batean, EAJ-PSEren Udal Gobernuak gertatuak ez zuela “metroaren obrekin zerikusirik” esan du, baina azkenean onartu egin behar izan dute obrak izan direla istripuaren arrazoia. Izan ere, langileak eta bizilagunak zuloaren jatorriari buruzko testigantza argiak zabaltzen ari ziren.

Era berean, ezin ditugu ahaztu sindikatuek salatu dituzten lan-baldintza gogorrak. Eta alarma egoeran bertan, eraikuntzarekin lotutako jarduera guztiak geldiaraztea agindu zen egunetan obrekin jarraitzeagatik salaketak daudela. Izan ere, metroaren igarobidearen obraren inguruan gardentasun eza da nagusi.

Horregatik guztiagatik, EH Bilduk Eneko Goiaren premiazko agerraldia eskatuko du, Donostiako herritarrei azaltzeko zer gertatu den eta, batez ere, zer neurri hartuko dituen Donostiako Udalak herritar guztien segurtasuna bermatzeko, bereziki metroaren pasantea igarotzen den eraikinetan bizi diren pertsona guztien segurtasuna.

 

Donostia, 2020ko ekainaren 5ean

 

EH Bilduk eta Elkarrekin Donostiak uhartean izandako kalte larriak salatu dituzte

EH Bildu eta Elkarrekin Donostia udal taldeetako Markel Ormazabal eta Haizea Garay zinegotziek Santa Klara uharteko itsasargiaren obrak inguruan eragin dituen kalte larrien inguruan galdetuko diote alkateari Udal Batzordean, herritarrei azalpenak emateko.

| 2020-06-05 10:44:00

EH Bilduko eta Elkarrekin Donostiako udal taldeek adierazi dutenez, irlaren goiko aldean kalte larriak izan direla egiaztatu ahal izan dute asteburu honetan grabatutako bideo baten bidez.

Haizea Garay Elkarrekin Donostia koalizioko zinegotziak gogorarazi duenez, itsasargiko obraren aurrean oso kritiko agertu dira hiriko hainbat eragile. Ildo horretan, hainbat talde ekologistak behin eta berriz eskatu zuten ingurugiroaren babesa blindatzeko. Hala ere, "Udal gobernuak ez ditu eskaera horiek entzun, eta orain inguru natural honi egindako eraso larri honen berri izan dugu", kritikatu du Garayk.

Era berean, Elkarrekin Donostia taldeko zinegotziak gogorarazi du Santa Klara uhartea babes bereziko eremua dela Euskal Autonomia Erkidegoko Itsasertza Babesteko eta Antolatzeko Lurralde Plan Sektorialaren arabera. Izan ere, irizpide orokorra "ekosistemaren kontserbazioa, esku-hartze antropikoa mugatuz, ezaugarri morfodinamikoen kontserbazio zorrotza eta landarediaren kontserbazio aktiboa sustatuz" izan behar da. Beraz, Santa Klara uhartea balio handiko eremua da naturaren kontserbaziorako ikuspegi batetik.

Hori dela eta, 2019ko uztailean, bi udal taldeek Eneko Goia alkateari eskatu zioten beharrezko neurriak har zitzala uhartearen ingurumena babesteko, haren babes bereziko kategoria kontuan hartuta, eta urtea amaitu baino lehen aurkez zezala uharteko proiektu eskultorikoaren ingurumen-inpaktuari buruzko txosten bat, ingurunea babesten dela ziurtatzeko.

Ondoren, iazko urrian, ezkerreko bi koalizioetatik "obra geldiaraztea eskatu genuen, besteak beste, itsasargiaren eraikineko obrak ingurumenean izango zuen eraginari buruzko plan bat eskatuz. Baina alkateak plana baztertu zuen; izan ere, bere hitzetan, esku-hartzea itsasargiaren eraikinaren barrualdera mugatzen da eta, beraz, ingurunea errespetatuko zen", gogorarazi du Markel Ormazabal EH Bilduko zinegotziak.

Kezka horiez galdetuta, Cristina Iglesiasek berak hedabideen aurrean adierazi du “ulertzen” dituela, eta zentzu honetan, nabarmendu du obraren asmoa dela “natura kontserbatzearen aldeko balioak transmititzea”. Donostiako Udaleko Kultura eta Euskara zinegotzi Jon Insaustik, esaterako, ondorengoa ziurtatu zuen 2020ko urtarrilaren 10ean hedabide batek argituratutako erreportajean: “Proiektua aurkeztu zenetik Cristina Iglesias sortzaileak adierazi zuen bere esku hartzeak ez zuela eraginik izango irlaren morfologian, ezta itsasargiaren kanpoko itxuran ere”. Baina jatorrizko asmo hau betetzea, sortzaileren ardura baino, lanen jarraipena eta gauzapena ziurtatzea dagokion erakundearena da. Eta ardura, kasu honetan, Donostiako Udalarena da.

Hala ere, proiektuak aurrera jarraitu du eta Udal Gobernuak ez du egin uharteko itsasargiko proiektu eskultorikoaren ingurumen-inpaktuaren txostena, 2018ko azaroan osoko bilkuran onartutakoa, eta ez du inolako ekintzarik egin uharteak behar duen ingurumen-babesa bermatzeko. "Alderantziz", adierazi du Ormazabalek: "Egiaztatu ahal izan duguna da alkateak erakutsi duen axolagabekeriak ingurumen kalte larriak eragin ditu uhartean".

Hori dela eta, Ormazabalek eta Garayk jakinarazi dute ekimen bat aurkeztuko dutela Udal Batzordean, alkateari "uhartearen ingurune babestu eta bereziari egindako eraso larri honen arrazoiari buruzko azalpenak eskatzeko". Izan ere, ikusitakoak ikusi ondoren, zeinek hartuko du bere gain itsasargiaren inguruko eremu zabalean egindako txikizioaren ardura? Eztabaidaren lehen minututik Donostiako alkate Eneko Goiak proiektuaren aldeko defentsa itsua egin du. Onartuko al du orain alkateak eskatzen genuena zentzuzkoa ez ezik, beharrezkoa ere bazela? Bere gain hartuko al du uharteko eremu naturalean proiektu honen lanek eragin duten kaltearen ardura? Eta gure ustez garrantzitsuena dena, Covid-19 birusak eragindako krisi testuinguruan Udala murrizketak iragartzen hasi den honetan, zein asmo ditu proiektu honekiko? Aurrera jarraituko du egitasmoarekin?

 

Balantzea: Eneko Goiak krisi hau istripu bat balitz bezala kudeatzen saiatzen jarraitzen du

Deseskaladaren bigarren fasean sartu garenean, EH Bilduk Donostiako Udal Gobernua pandemiaren garaian egiten ari den kudeaketaren balantzea egin nahi du.

| 2020-05-27 11:45:00

Lehenik eta behin, besarkada bat bidali nahi diegu Covid-19aren pandemian senide bat edo gertuko norbait galdu duten pertsona guztiei eta gaixotu diren guztiei. Udalaren datuen arabera, 49 pertsona hil dira Donostian COVID-19a dela eta. Bestetik, 800 positibo zenbatu dituzte orain arte, eta seroprebalentzia azterketako datuak estrapolatzen badira, 5.000 pertsona inguru kutsatu dira gure hirian.

Krisiaren kudeatzeari dagokionez, EH Bilduk azpimarratu nahi du Eneko Goia saiatu dela - eta saiatzen jarraitzen duela - krisia istripu iragankor bat balitz bezala kudeatzen. Izan ere, Donostiako Udal Gobernuak, gure inguruko beste hiri eta udalerri batzuekin alderatuta, denbora gehiegi behar izan zuen erreakzionatzeko (adibidez, Gasteizen baino 12 egun beranduago kendu zen TAO hemen). Eta atzerapenaren arrazoia da, neurri handi batean, Eneko Goiaren Gobernuak ez zuela pandemiaren irismenari buruzko diagnostiko egokirik egin. Eta horrelako krisi baten aurrean alkate batek eta udal-gobernu batek jokatu behar zuten paperaren inguruko kalkulu-akats horrek traba egin dio Gobernuaren jarduerari hasiera hasieratik. Eta diagnostiko oker hori islatzen ari da deseskalatze-prozesuan eta datozen hilabeteetarako hartzen ari diren erabakietan.

Pandemiaren dimentsioa ondo ulertu zutenak modu altruistan auzoetan eratutako zaintza-sareetan partu hartu duten 700 pertsonak izan dira. Alarma Egoera iragarri zen egun beretik hasi ziren taldeak eratzen, eta astebetean auzo guztietatik zabaldu ziren, hiritar zaurgarrienei laguntzeko prest. Nabarmendu behar da, halaber, hiriko hainbat gizarte-eragilek jarrera proaktiboa izan dutela konfinamendu osoan zehar, ekarpen eraikitzaileak eginez, adibidez, etxerik gabeko pertsonei laguntzeko edo mugikortasun seguru eta jasangarriaren norabidean.

Donostian, krisi sakonagoa

Osasun publikoan izan duen eraginaz gain, krisiak gogor jo du Donostiako egitura ekonomikoan.

Pandemiaren aurretik, Donostiako auzoen arteko errenta-desberdintasunak agerikoak ziren eta badirudi horrek bere ondorioak izan dituela orain: Altzan, kutsadura-tasak erdialdeko auzoetakoa bikoiztu eta hirukoiztu egiten du. Aztertu beharko litzateke ze lotura duen fenomeno honek bertan bizi diren zaintza sektorearen langileekin, euren lan-baldintzekin, etxebizitzaren prezioarekin eta abar. Dena dela, aste hauetan ikusi ahal izan dugu non zegoen orain arte indarrean egon den hiri-ereduaren sektorerik ahulena: zaintza sektorea.

Eta beste ondorio nabarmen bat da Donostian krisia gainerako euskal hirietan baino sakonagoa izango dela, neurri handi batean, nazioarteko turismoarekiko dugun mendekotasunagatik. Langile asko birkokatu egin beharko dira, edo sektorean lana banatzeko planak ezarri. Edozein kasutan, turismoan oinarritutako hiri eredu bat zein ahula den frogatuta geratu da. Baina Eneko Goiaren Gobernua ez da oraindik jabetu edo ez du jabetu nahi. Halere, etorkizunari begira, beste sektore ekonomiko sendoagoak indartzea saihestezina izango da.

Udal Gobernuak pandemiaren irismena eta ondorio sozio-ekonomikoak neurtzeko egin duen akats hori auzoetako denda txikientzako laguntzetan ere islatu da. Establezimendu bakoitzeko 680 euroko laguntzak oso urriak dira Errenterian edo Azpeitian adostutako 1.000 euro baino gehiagorekin alderatuz gero, herrialdearen bi adibide jartzeagatik. Eta Zorroaga Fundazioaren jabetzako lokalen kasuan, merkatariei alokairuak ez barkatzeko EAJk hartutako erabakiak agerian uzten du sektore horrekiko duen konpromiso maila.

Eta Donostiako udal Gobernua oso atzean geratu da mugikortasun jasangarriarekin eta bizikletaren sustapenarekin zerikusia duen erabaki guztietan. Izan ere, orain arte 800m kale baino ez dira “zona 10” bihurtu (oinezkoak + bizikleta + autoak), eta Askatasunaren Hiribideko errei bat birmoldatu dute autoek eta bizikletek partekatzeko. Hiriko erdigunera ibilgailu pribatuak iristearen aldeko apustua da oraindik ere udal gobernuaren lehentasuna.

Bestalde, arrakala digitalaren aurka ezer ez egitea justifikatzeko, Hezkuntzari buruzko eskumen falta teorikoaren atzean ezkutatu da Eneko Goia. Baina errealitatea da kultur etxeetako ekipoak, adibidez, erabiltzen ez ziren bitartean ikasle donostiar askok ezin izan dutela on line ikasi ordenagailurik edo wifirik ez zutelako. Era berean, Berra adinekoen egoitzako gertakari larriei dagokienez, Goiak bitartekari lanak ez egiteko eskumen falta ere erabili zuen argudio bezala. Halaber, etxez etxeko zerbitzuko langileek segurtasun-neurriak eskatu zituztenean, "hori enpresa esleipendunaren eskumenekoa zela" erantzun zuen hitz hitz Eneko Goiak. Eta jarrera hori mantendu zuen apirilaren 6 arte, Eudelek Udalaren ardura zela adierazi arte.

Gobernantza-eredua

Krisiaren irismena ondo ulertu ez izanaren beste ondorioetako bat da Eneko Goiak hiriko eragile sozialak eta oposizioko udal taldeak erabat baztertu dituela. Gure ustez, horrelako egoerei aurre egiteko modurik onena lidergo partekatzea da. Baina Donostian boterearen zentralizazioa izan da nagusi: Goiak ez du akordiorik bilatu eta ez du batasun irudia eman nahi izan. Terrazei buruzko araudia aldatzea auzo elkarteen iritziak mespretxatuz eta Aste Nagusia aldebakarrez bertan behera uztea adibide onak dira krisi garaian nola ez den gobernatu behar erakusteko.

Gobernantza-eredu autoritarioak zabaltzen ari dira leku guztietan, eta Donostia ez da salbuespen bat izan. Eta ezin dugu ahaztu Goiak, pandemiaren aurretik, Osoko Bilkuraren Araudia aldatu zuela oposizioko taldeen jarduna oztopatzeko. Pandemian zehar erakutsitako jarrera honen jarraipena da.

EH Bildu, proaktiboa

EH Bildu, une oro, proaktibo izaten saiatu da. Guztira, 50 proposamen zehatz baino gehiago egin ditugu osasun-krisiari eta krisi ekonomikoari aurre egiteko. Herritarren eta udal langileen osasuna babesteko neurriez gain (SAD, dBus...), EH Bilduk 20 proposamen zehatz baino gehiago aurkeztu zituen auzoetako dendei eta lehen sektoreari laguntzeko; eta ikasleen artean dagoen arrakala digitala arintzeko neurri guztiz gauzagarriak proposatu zituen; Donostiako kultur sektorea suspertzeko plan bat plazaratu zuen; behin-behineko bidegorriak ezartzeko beste plan bat proposatu genuen; eta, turismoaren sektorea birzuzentzeko proposamen bat aurkeztu genuen, begi bat etorkizunean jarrita eta beste bat sektorearen gaur egun dagoen egoera larrian.

Aurkeztutako neurri horietatik batzuk Udal Gobernuak jaso ditu, hala nola, Etxegintzak zailtasun ekonomikoak dituzten familiei alokairu soziala etetea edo auzoetako dendetako produktuak banatzeko plataforma bat sortzea (1). Gainera, poztu egin gintuen prentsan irakurtzeak Udalak Donostiako adinekoei banan-banan deitu ziela. Izan ere, EH Bilduk aurretik egindako proposamena zen, Errenterian konfinamenduaren lehen egunetik egiten ari zirela ikusi bezain laster egindakoa.

Etorkizunari begira, EH Bildu talka-plan integral bat prestatzen ari da krisi honetatik, eta etorkizunean etor daitezkeen beste krisi batzuetatik, Donostia indartuta atera dadin eta herritarron bizitza politika publiko guztien erdigunean jartzeko.

1 Atzo aurkeztutako Donostia Market Plaza plataformaz ari gara, baina esan beharra dago 170.000 euroko aurrekontua oso urria dela Donostia bezalako hiri batentzat. Logroñok, adibidez, Donostiak baino 35.000 biztanle gutxiago dituen arren, 250.000 euro inbertitu ditu; eta Azpeitiak (14.000 biztanle), 50.000 euro.

Covid-19ren pandemiak espetxean dauden pertsonengan eragindako egoera dela-eta, EAJk, EH Bilduk eta Elkarrekin Donostiak sinatutako Erakunde adierazpena

| 2020-05-26 13:17:00

COVID-19ren pandemiak sortutako osasun-krisiak eragin handia du espetxean dauden pertsonengan. Testuinguru horretan, nazioarteko erakunde garrantzitsuek espetxeei buruzko neurri espezifikoak hartzera premiatzen dute. Horren adibide dira, besteak beste, Osasunaren Mundu Erakundea, Giza Eskubideen Goi Komisarioa eta Tortura eta bestelako tratu edo zigor krudel, anker edo apalesgarriak prebenitzeko Nazio Batuen azpibatzordea, Tortura Prebenitzeko Batzordea, Europako Kontseiluko Giza Eskubideen komisarioa eta Estatuko presoekiko giza eskubideen eta elkartasunaren erakunde eta elkarteak. Horiek guztiek azpimarratzen dute askatasuna gabetzearen aurrean alternatibak hartu behar direla, presoak espetxetik ateratzea barne, era berean premia espezifikoetara egokitutako arreta medikoa bermatu behar dela ere, batez ere, talde kaltebera edo arrisku-taldeei zuzendutakoa: adinekoak eta aurretiazko patologiak dituztenak.

Era berean, egiaztatu dugu Europako zenbait estatuk ildo horretako neurriak hartu dituztela, edo diseinatzen ari direla. Horiei dagokienez, Espainiako Estatua presoen tasa globalik altuena dutenen artean dago (126 preso 100.000 biztanleko), emakumeen ratio handienetakoa (presoen %7,5), atzerritarrak (%28,1), 50 urtetik gorakoak (%20), desgaitasun psikiko edo fisikoa dutenak (%5,17), bai eta espetxealdiaren batez besteko iraupen altuenetakoak (21 hilabete) ere. Beraz, uste dugu tarte handia dagoela, pandemiari eraginkortasunez aurre egiteaz gain, espetxeratze-estatistika aurrerakoiagoetara hurbiltzeko.

Jakin badakigu, Barne Ministerioak neurriak iragarri dituela hirugarren graduan dauden eta gaua espetxean igaro behar duten pertsonek kartzelara itzuli behar ez izateko. Baina kontrol telematikorako gabeziak direla eta, 3.000 preso ingururi bakarrik aplika dakiekeela.

Hala eta guztiz ere, uste dugu kutsadurak geldiarazteko eta birusaren hedapena saihesteko eskubideak murrizten dituzten neurriez gain (horien beharraz eta aukeraz inork ez du zalantzarik), Espetxe Erakundeetako Idazkaritza Nagusiak neurri alternatibo sakonagoak hartu beharko lituzkeela presoen osasuna bermatzeko, ahulezia bereziko kolektibo edo arrisku-talde batzuen irteera malgutuz, bai eta espetxetik epe laburrean aterako direnak, euren konfinamendurako baldintza egokiak izan ditzaten gainontzeko herritarrek duten egoera berdinean.

Hala, ekimen honen sustatzaileek uste dute guztiz lehentasunezkoa dela espetxetik ateratzeko neurri zorrotzagoak hartzea, presoak espetxeak ematen dizkien baino espazio osasuntsuagoetan, arreta eta zaintza baldintza profilaktikoagoetan eta osasun aldetik baldintza egokiagoetan egon daitezen.

Neurri horiek, lagungarriak dira birusa presondegietan ez zabaltzeko, osasun-baliabide urriak eta presondegietako tentsioa arintzeko, eta aldi berean, familia eta gizartearekin presoek dituzten harremanak errotu eta indartzeko. Espetxean egiaztatu diren kasuek zorigaiztoko amaiera izan baino lehen hartu behar dira prebentzio neurriok, gaur arte tamalez gertatu diren horietatik haratago ez joateko.

Espetxeetako araudiak hainbat bide eskaintzen ditu COVID-19aren arriskuagatik planteatutako salbuespenaren aurrean modu humanitarioan erantzuteko, hala nola hirugarren graduko sailkapen humanitarioa (PAko 104.4. artikulua eta KP 36.3), aurretiazko patologia serioak, kronikoak edo adinagatik larriagotuak (65 urtetik gorakoak) dituzten eta pandemiarekiko bereziki kalteberak diren pertsonei zigorra etxean bete dezatela agintzeko. Oro har, ZKko 86.4 artikuluan eta ZRko 100.2 artikuluan aurreikusitako modalitatea aplikatuko zaie; 3. graduan sailkatuta daudenei, edo lehenbailehen berrikusi beharko da gaur egun 2. graduan sailkatuta dauden eta baimenak hartzen ari diren eta gizarteratzearen aldeko pronostikoa duten pertsonen gradu-sailkapena, berehala 3. gradura iristeko.

Ildo beretik, ZKren 91. artikuluaren bidez, zigortutako pertsonen egoera indibidualak berrikusiko dira, eta Tratamendu Batzordeek baldintzapeko askatasunaren proposamena helaraziko diete epaitegiei, zigorraren hiru laurdenak bete dituzten barnekoei, berrerortzeko arrisku handirik ez dutenei edo/eta gizarteratzeko aldeko pronostikoa dutenei, hirugarren graduan sailkatu ondoren.

Horregatik guztiagatik, ERAKUNDE ADIERAZPEN hau aurkezten dugu behean sinatzen dugun udal taldeetako bozeramaileok, hurrengo udalbatzarrean eztabaidatua izan dadin, eta Espainiako Gobernua premiatzen dugu neurri hauek har ditzan:

1- Donostiako Udalbatzak Espainiako Gobernuari eskatzen dio, bere ahalmenak erabiliz, ordenamendu juridikoaren barruan eta nazioarteko erakundeen gomendioei jarraituz, presoak espetxetik ateratzeko neurri egokiak har ditzala, bereziki COVID-19ren aurrean kalte-beratasun berezia dutenak, zehazki, pandemia kutsatzearen aurrean arrisku-taldeak osatzeagatik 65 urtetik gorako adinagatik aurretiko patologia serioak, kronikoak edo larriagotuak dituztenak.

2- Donostiako Udalbatzak Espainiako Gobernuari eskatzen dio neurriak har ditzala, delituaren tipologia edo larritasunetik eratorritako inolako salbuespenik gabe, zigorraren hiru laurdenak bete dituzten presoak espetxetik ateratzeko, berrerortzeko arrisku handirik ez dutenak edo/eta gizarteratzearen aldeko pronostikoa dutenak, familia-baliabideekin edo hurbileko gizarte-inguruneko baliabideekin, konfinamendua gizartearen baldintza berberetan egiteko.

3- Donostiako Udalbatzak Espainiako Gobernuari eskatzen dio Osasun, Justizia eta Herrizaingo sailen arteko koordinazioa bermatu dezala, babes-neurriak orokortzeko, prebentzio sintomak aztertzeko eta espetxean dauden pertsonen diagnostiko azkarra egiteko. Berehala sare publikoko ospitaleetara bideratuko dira COVID-19 gaixotasunagatik positibo ematen duten edo sintomak dituzten pertsonak.

4- Donostiako Udalbatzak Espainiako Gobernuari eskatzen dio osasun-krisiak irauten duen bitartean berma dezala presoei informazioa emateko eskubidea, pandemiaren garapenari eta hartutako neurriei buruzko ezagutza eguneratua eta eskuragarria eskainiz, bereziki espetxeen barruan, birusaren hedapena prebenitzeko eta geldiarazteko. Era berean, presoen eta senideen arteko zeharkako komunikazioa hedatu behar da, telefono-deien doakotasunarekin, eta bideo-deien erabilera zabalduz gaixotasun edo familia-larrialdiagatik ezarritako egungo murrizketetatik harago.

5- Donostiako Udalbatzak Espainiako Gobernuari eskatzen dio, pandemia piztu aurreko normalizazioaren bila deseskalada hasten denean, kontuan har ditzala askatasunik gabe dauden pertsonak, eta arindu daitezela presoek beren familiekin eta abokatuekin zuzeneko komunikazioei berrekiteko erabakiak. Ildo horretan, beharrezko urratsak eman behar dira hala eskatzen duten presoak euren etxeetatik gertu dauden espetxeetara hurbiltzeko. Ez bakarrik beren eskubidea delako, baizik eta presoen komunikazioak normalizatzeko eragozpen erantsi bat delako. Presoak beren familiengana geografikoki hurbiltzea; horretarako, beharrezkoa da beste garraio-mota batzuen antzeko higiene- eta segurtasun-neurriak dituzten garraiobideak berreskuratzea. Hurbilketa hasi beharko litzateke etxetik urrunen dauden presoekin eta seme-alaba adingabeen gurasoekin.

 

Donostian, 2020ko maiatzaren 22an

Sinatzaileak: 

Jon Insausti Maisterrena (EAJ/PNV taldeko bozeramailea), Reyes Carrere Zabala (EH Bildu taldeko bozeramailea) eta Aitzole Araneta Zinkunegi(Elkarrekin Donostia taldeko bozeramailea)

ALBISTEAK

EGIAKO EGOERA DELA-ETA

2021-11-18 13:08:00

Egiako eremu jakin batean gertatzen ari den segurtasun eta bizikidetza arazoa dela-eta, EH Bildu udal taldeak honako hau jakinarazi nahi du:

Hotelen proiektu oldea dela-eta, Donostiako EH Bilduk kitto esateko eskatu dio Udal Gobernuari

2021-11-11 13:33:00

Londresen egoitza duen inbertsio funts japoniar batek Santa Teresa komentua erosi duela iragarri izanak harridura eta haserrea eragin du Parte Zaharreko bizilagunen artean.