AKTUALITATEA

| 2025-03-28 11:37:00

Urtebete igaro da 2024ko otsailaren 20an Tokiko Gobernu Batzordeak Bretxako emakidadunarekin kontratua eteteko espedientea hastea onartu zuenetik, EH Bildurekin hilabete luzez lankidetza estua eta diskretua izan ondoren. 

Erabakia hura, zalantzarik gabe, Bretxako merkatuaren (Arkoak eraikina) eta Arrandegi eraikinaren etorkizuna markatuko zuen gakoa izan zen, EH Bildutik beti defendatu izan dugun kudeaketa publikora itzultzea suposatzen baitzuen, eta gure aldetik sine qua non baldintza izan zena akordio bat lortzen saiatzeko. Guretzat ez zegoen beste modurik. Kudeaketa berriro esku pribatuetan uzteko tentazioaren aurrean, gertaerek behin eta berriz alternatiba okerra zela berretsi ziguten arren, arlo publikotik kudeatzeari ekin genion, auzoari eskatzen duena eman ahal izateko. Gaur egun ere auzotarrek arrazoi osoz eskatzen dituzten oinarrizko premiei erantzuteko modurik eraginkorrena da. Kudeaketa publikoa auzotik eta auzoarentzat.

Era berean, duela urtebete aurreratu genuen sortutako espazioen erabilerek, lehenik eta behin, Parte Zaharrean zeuden beharrei erantzun behar zietela eta, ahal zen neurrian, merkatu tradizionalaren funtsa berreskuratu behar zutela. Hiria okerreko erabakien ondorioz galtzen joan den ondarea da azoka tradizionalena.

Hedabideen aurrean egindako agerraldian, Juan Karlos Izagirre EH Bilduko udal bozeramaileak eta Itziar Iturri zinegotziak aldarrikatu dute beharrezkoa dela auzotik bizilagunak helarazten ari diren gabeziak erdigunean jartzea eta Bretxari interes orokorrari erantzuten dioten zerbitzuak eta ekipamenduak ematea.

«2024an zehar, Parte Zaharrak bere lehentasunak adierazi ditu, eta gehien eskatzen direnak kirol-kantxaren osagarri den gimnasio publikoa eta hirugarren adinekoentzako zentroa dira. Era berean, eraikin horiek ostalaritza-jardueretarako erabiltzea onartezina izango litzatekeela azpimarratu zen, Arrandegi eraikinaren barruko establezimendu bat izan ezik, merkatuaren ordutegi berarekin. Aitzitik, merkatu tradizionalarekin edo komertzialarekin lotutako jarduerak egoki ikusten ziren», gogorarazi du Iturrik. Ezin dugu ahaztu Parte Zaharra ostalaritza-jardueraz gainezka dagoen auzoa dela, eta sektore horren eta turismoaren hazkundearen ondorioz zigortutako auzoa dela. Horretarako, konpentsazio-neurriak hartu
behar dira.

Hiru alderdien arteko akordioa sinatu zenetik urtebete igaro denean, EH Bilduk denbora honetan zehar mahai gainean jarri dituen proposamenak balioan jarri ditu Izagirrek. 

EH Bilduk EAJren eta PSEren Gobernuarekin biltzen jarraitu du, proposamen ezberdinak planteatuz, baina proposamen guztiak beti etorri dira bat interes orokorrarekin eta herritarrek azaldutako beharrekin.

1.  Zentzu horretan, EH Bilduk Arrandegi eraikineko lehen solairuan gimnasio publiko txiki bat proposatu du, bigarren solairuan dagoen kirol kantxako aldagelekin lotuko lukeena. Eneko Goiaren Gobernuak Arkoak eraikinean aurreikusitako gimnasio pribatua kirol-txartelarekin erabiltzeko egin duen kontraproposamena zehaztu beharreko aukera da, baina ez da EH Bilduk egingo lukeena.

2.- Era berean, kantxaren eta erabilera anitzeko aretoaren kudeaketa Orixe Ikastolak egitea proposatzen dugu, ezarritako ordutegietan, eta auzoak berak kudeatzea gainerako ordu eta egunetan. «Horretarako, espazio horiek auzoan bertan onartzen dituen erakundeari edo klubari laga behar zaizkio, eta beharrezko baliabideez hornitu», zehaztu du Izagirrek.

3.- EH Bildutik Gizarte Zerbitzuen bulego berria (Arkoak eraikinean kokatuko da, Aldamar kalean) mendekotasuna ez duten adineko pertsonentzat zentro batekin osatzeko apustua egiten jarraitzen dugu.

Udal Gobernuak Kanpandegi kalean aurreikusitako zuzkidura-apartamentuen etxabeetan antzeko zentro bat jartzeko egin duen kontraproposamena alternatiba posible bat da, baina ez dago horri buruzko zehaztasunik, eta aukera galtzen da gizarte-zerbitzuetako bulegoak eta adinekoentzako zentro horrek alboko espazioak partekatzeko.

4.- Arkoak eraikineko -1 solairuko espazioak, Aldamar kalera begira daudenak, Parte Zaharreko elkarteentzat izango dira, bilera edo biltegi gisa, EH Bilduk negoziazioetara eraman zuen bizilagunen proposamena onartuz.

5.- Apustu egiten dugu Arrandegi eraikinean sortutako espazio berrien erabilerak (lehenengo solairuan 800 m² definitzeke baitaude), merkatu tradizionalaren edo merkataritza-erabilerarekin lotura izateko. Ez dugu ostalaritza-jarduerarik onartuko, merkatuaren ordutegia beteko duen establezimendu bat izan ezik.

Gaur egun, eta urtebetez erabilera definitu gabe egon ondoren, EH Bilduk auzoko beharrei erantzutea lehenesteko apustua egiten jarraitzen du. Horrekin bateragarria, eta aurretik azaldutako ideiaren haritik, EH Bilduk mahai gainean jarri du lehen sektorearekin, tokiko produktu ekologikoekin eta 0 Km-ko filosofiarekin lotutako proposamen bat. Espazioa kontsumo-kooperatiba bati lagatzea planteatzen da, eta kooperatiba horrek printzipio horiek bete beharko ditu. Izagirreren hitzetan, formula hori arrakastaz erabiltzen da gaur egun inguruko beste herri batzuetan, hala nola Oiartzunen, Azpeitian edo Igeldon. Era berean, lehen sektorearekin, elikadura-subiranotasunarekin eta kontsumo arduratsuarekin lotutako hitzaldiak eta tailerrak egiteko aukera emango litzateke, eta 0 solairuko merkatuaren eta baserritarren osagarri izango litzateke. Era berean, sukalde-tailerren zerbitzu bat ere jaso daiteke, eta, ondoren, produktu prestatuak merkaturatu edo erretiratuen elkarteetako jantokietan banatu.

6.- Baserritarren etorkizuneko kokapenak sortutako eztabaidari dagokionez, argi utzi nahi dugu EH Bildutik beraien iritzia defendatuko dugula. Jakin badakigu, gaur egun, azken urte hauetan esan zaienaren aldeko iritzia nagusitzen dela: espazio bat plazan bertan, Arkoak eraikinaren iparraldeko aldean. Baserritarrek iritzia aldatu eta Arrandegi eraikinaren barruan proposatutako kokapen berria onartuko balute, iritzia aldatuko genuke EH Bildun. Ezin da aldaketarik egin inplikatuta daudenen onarpenik gabe; gure ustez, onartezina da.

7.- Amaitzeko, EH Bildutik proposatzen dugu Parte Zaharreko bizilagunekin adostea auzoan ematen diren zerbitzuak birkokatu ondoren libre geldituko diren espazioen erabilerak, hala nola Esterlines kaleko anbulatorio zaharra.