AKTUALITATEA

| 2025-03-19 15:12:00

Ekialdeko Barrutiko Batzarraren baitan, Eneko Goia Donostiako alkatearen agerraldi eskaera aztertuko dugu gaur arratsaldean, hilak 19, arratsaldeko 18.30ean abiatuko den bileran. Helburua: azaldu dezan zer dela-eta EAJ-PSEren Udal Gobernuak bozkatu duen Ekialdeko Barrutia berariazko lantalde batez osatzeko eskaeraren aurka eta zer uste duen Barrutiaren egoeraz. Jakina, agerraldiaren bidez aukera eman nahi diogu alkateari entzuteko, bertatik bertara, Barrutiko batzarkideok esateko duguna.

Gogoratzea ezinbestekoa da 2025eko Udal Aurrekontuetan diru sail bat eskatzeko proposamena barrutiaren Batzarraren baitan onartu zela, azaroan, eta orduan ere PSE eta EAJ kontra agertu zirela (4 boto). Ordea, gehiengoak (9 boto), aipatu giza baliabideak zein ekonomikoak eskatzea premiazko dela bozkatu genuen.

Erabakiaren berri eman, eta Udal Gobernu honek Ekialdeko Barrutiaren inguruan azaltzen duen interes eta inplikazio eza azaleratzeko, agerraldia eskaini dute Garbiñe Alkiza, Zigor Etxeburua eta Mikel Osinalde EH Bilduren kideak, Barrutian bozkatuena izan zen alderdi politikoa/Barrutian ordezkaritza zabalena duen alderdia.

Ekialdeko Barrutia alderdi politikoetako ordezkariez gain, auzo elkarte eta eragileez osatua dago; denek, beren denbora libretik eskaintzen diote ahalegina eta esfortzua Ekialdeko Barrutia edukiz eta ekimenez hornitzeko. Memoria historikoa, mugikortasuna-hirigintza, berdintasuna, kultura eta euskera, komunikazioa eta parte hartzea (Sorleku hemendik jaio zen), egituraketa eta merkataritza direlarik lan ildoak.

Barrutiko burua den Carlos Garcia PSEko zinegotziak berak aitortu digunez, EH Bildutik eta Elkarrekin Donostia alderdietatik egindako zuzenketak ez ziren txertatu Udal Aurrekontuetan Gobernua «beste behar batzuk lehenetsi dituelako». Argi dago Ekialdeko Barrutia ez dela
lehentasun bat Goiaren lan taldearentzat.

«Baztertutako zuzenketak Ekialdeko Barrutiko Batzarrak bozkatu eta onartutako akordio proposamen batean oinarrituta daudenez, eta zuzenketak aurrekontu proiektuan ez sartzeko erabakia politikoa denez Egituraketa lantaldearen gehiengoak uste du Ekialdeko Barrutiko
Batzarrera Donostiako Udalaren ordezkaritza politiko handiena beharko litzatekeela, hau da, Eneko Goia alkatea, erabaki politiko hori zergatik hartu den azaldu dezan», adierazi du Garbiñe Alkiza zinegotziak eta Ekialdeko Barrutiko EH Bilduren hiru ordezkarietako bat.

«Gure iritziz ez da onargarria Udal Gobernuak, alkatea buru, erakutsi duen jarrera. Gobernuak bazuen bere kabuz ekiterik Barrutiaren eraginkortasuna hobetzeko, baina ez du aski bultzadarik eragin egoera onbideratzeko», uste du Alkizak.

Ekialdeko Barrutiko Batzarraren bilkuran agerraldia egin dezan erregistratuta, komeni da zehaztea egitea borondatezkoa dela eta alkateak duela azken hitza. Edonola, EH Bildutik espero duguna da Goiak bere ardurak bere gain hartu eta azalpenak emateko aukera aprobetsatuko duela. «Kontrakoa ez genuke ulertuko, ez EH Bildun, ez Ekialdeko Barrutian», zehaztu du Alkizak. Aurrera eginez gero, agerraldia maiatzaren 21ean egitea aurreikusten da, Altzan, Barrutiaren egoitzan.

Eraginkortasuna lortzea da helburua

«Ekialdeko Barrutiaren jarduerak eraginkortasuna lortu behar du, egitura hori benetan herritarron mesederako izan dadin. Ez da berria gaur adierazten ari garena: aurreko agintaldian ere horren premia azpimarratu genuen. Horrexegatik, neurriak hartzeko deia egingo diogu alkateari, behingoz, egoera zuzentzeko», adierazi du bere hitzartzean Zigor Etxeburuak. 

Etxeburuak xehatu duenez, Ekialdeko Barrutia herritarron partaidetza eta udal funtzioen deskontzentrazioa errazteko sortutako egitura da. Ordea, indarrean daramatzan zazpi urteok oso gorabeheratsuak izan dira. Barrutiko elkarteetatik eta baita EH Bildutik ere ezinegona adierazi izan dugu erakundearen jarduerak erakutsi dituen gabeziak eta dituen mugak direla eta: Barrutiaren funtzionamendua ez da operatiboa. Gaur egun, Barrutiak bi teknikariren laguntza du, baina nahi eta ezinean aritu dira eginbeharrak aurrera atera ezinik. Udaleko organo zentralek ez dute aski aintzat hartzen, eta, ez duenez esleitu zaion aurrekontua zuzenean kudeatzeko ahalmenik, atzerapen eta oztopoak gertatzen ari dira. «Etsigarria da», laburbildu du.

EH Bilduren ustez, barrutiaren jarduerak gabezia argiak ditu, eta horregatik, uste dugu neurri zuzentzaileak hartu behar direla. Udal Gobernuak, ordea, ez du erreakzionatu, elkarteek eta udal taldeok gertatzen ari zenaren inguruko arreta sarritan deitu dugun arren, eta ez du jakin Barrutian gobernu eraginkorra bideratzen. Horregatik, eten egin behar da orain arteko dinamika gaiztotu hau.

Horregatik, gaur urrats bat eman nahi dugu funtzionamenduaren eredua errotik aldatzeko norabidean; gure borondatea da Barrutiak bere jarduera nabarmen indartzea eta eraginkortasun eta garapen osoa lortzeko, berandu baino lehen.

«Ekialdeko auzokideok maizegi pairatu izan dugu Donostiako udal zentralismoaren ahanztura», deitoratu du Etxeburuak. Ezin dugu ahaztu 45.000 biztanle ordezkatzen dituela, hiriaren % 24, alegia. Barrutiko elkarteek ezinegona adierazi izan digute blokeo egoera dela-eta eta guk, EH
Bildutik, kezkaz bizi dugu.

Ordezkaritza

EH Bildu izan zen Ekialdeko Barrutian 2023ko udal hauteskundeetan alderdi bozkatuena, 5.276 botorekin. Atzetik, PSE (5.118), EAJ (4.619), Elkarrekin Donostia (1.846) eta PP (1.658). Hala, EH Bilduri Batzarreko lehendakaritza zegokion arren, hiritarrek beren botoekin hala erabakita, Eneko Goia alkateak PSEri eman zion horretarako ardura.