AKTUALITATEA

EH Bilduren mozio batek aho bateko adostasuna lortu du aparkaleku disuasorioak indartzeko

| 2023-07-28 16:39:00

EH Bilduk aurkeztutako kontrol mozio batek talde guztien babesa jaso du lehenengo Osoko Bilkuran, eta, horrela, aurrera egin du Udal Gobernuak Illunbeko aparkaleku disuasorioa indartzeko eskaerak. Egungo epeak luzatzea ezinbestekoa da. «Udako hilabeteetan, zehazki uztaila eta iraila bitartean bakarrik gaitzea ez da nahikoa. Gainera, sarbide seinaleak hobetu behar dira», ohartarazi du Garbiñe Alkiza zinegotziak.

Beste neurri bat ere babestu zen: Usurbilgo udalerrian dagoen Aritzetako aparkalekua hiriburuarekin lotzeko beharko liratekeen inbertsioaren eta baliabideen beste azterketa bat egitea. «Aparkaleku hori Donostiarekin lotzeko beharrezkoak diren baliabideak ezartzea funtsezkoa izango litzateke».

Alkizaren hitzetan, gaur egun eskaintzen diren baliabideak ez dira nahikoak ez dituztelako beharrak modu integral eta iraunkorrean betetzen. Illunbe, Miramon, Igara, Zuatzu, Garbera eta Ficoba dira Udalak gomendatzen dituenak, baina lehenengoa udan bakarrik gaitzen da, eta uztailaren 8tik aurrera, gainera; gainerakoak asteburuetarako pentsatuta daude. Ficobarena bakarrik, Euskotrenekin lotura duenak, egunero erabiltzen da.

Zinegotziak gogorarazi duenez, Dbusek duela bederatzi urte egin zuen Aritzeta eta hiria autobusekin lotzeko inbertsioaren kalkulua, eta, ildo horretan, premiazkoa da azterlana eguneratzea. «Gure ustez, jasaten ari garen auto pilaketak gure egunerokotasuna baldintzatzen du, eta beharrezkoa da proposatzen dugun alternatiba berriz aztertzea, egungo disuasio-aparkalekuak indartzeaz gain».

Osoko Bilkurak onartutakoarekin batera, EH Bilduk Aritzetako proposamena Gipuzkoako Batzar Nagusietara eramango du, Aldundiaren eskumena baita, Usurbilgo lurretan dagoelako. «Foru Erakundearen lankidetza eskatzen dugu, beraz ekimen hau babestea espero dugu», eskatu du Alkizak.