Donostia

Albisteak

EH Bilduk hondakinen bilketaren ordutegiak berrantolatzea proposatu du kutsadura akustikoa murrizteko


“Soinu eta zarataren kutsadura dela eta udalak hartuko duen jarrera arautzen duen Udal Ordenantza” eguneratzeko fasean dago (oraingoa 2000. urtean onartu zen) eta EH Bildu udal taldeak zuzenketak egin dizkio Udal Gobernuak aurkeztutako testuari.

| 2021-04-26 14:21:00

Ordenantza honen xedea da ingurunearen kalitatea babestea eta hobetzea, kanpoko zein barneko guneetan sortzen diren zaratek eta dardarek eragindako kutsadura akustikoaren aurrean. Horrela, jardueren isolamendu akustikoek eta jarduera horien eta makinen eta instalazioen funtzionamenduaren ondorioz transmititutako soinuaren ezaugarriak arautzen ditu. Halaber, zenbait jarduera ordenantzatik kanpo uzten dira.

Jakina denez, kutsadura akustikoa osasun-arazoen iturri izan daiteke, batez ere esposizio luzea badago. Beraz, hirietako bizi-kalitatean eragin zuzena duen faktorea da.

Espainiako Nekazaritza, Elikadura eta Ingurumen Ministerioak 2016. urtean egindako ikerketa baten arabera, OMEk gomendatutako zarata-mailak gehien gainditzen zituzten hirien artean, Donostia lehen postuan zegoen euskal hirien artean, eta 100.000 biztanletik gorako estatuko hiri guztien artean bederatzigarren postuan. Vigo, Girona, Bartzelona, Logroño, Castelló, A Coruña, Getafe eta Leon bakarrik zeuden Donostiaren aurretik zerrenda honetan. Zehazki, ikerketaren arabera, donostiarren %28,4k gehiegizko zarata jasaten dute egunez, eta %37,9k, gauez.

Gure hirian, esposizio-maila altu horien atzean faktore asko daude: trafikoa, obrak, eremu askotako turismo-saturazioa, etab. Zarata gehien sortzen duen beste faktore bat Udalak berak sortzen du eta, gainera, gauez, pertsona gehienek atseden hartzen dutenean: zabor bilketa.

Hori dela eta, Donostiako EH Bildu udal taldeak uste du badela garaia zaborra biltzeko ordutegiak berrantolatzeko, herritarren lo-zikloa babesteko. Jakin badakigu aldaketa konplexua dela eta ezin izango dela goizetik gauera egin, baina uste dugu Donostiako Zarataren Ordenantzaren egokitzapen prozesua dela norabide horretan ibiltzen hasteko une eta toki aproposena. Hori dela eta, EH Bilduren zuzenketetako batek proposatzen du: "Hiri hondakinak biltzea eta/edo zarata sortzen duten garbiketa lanak egitea bizitoki eta/edo osasun inguruetan galarazita egongo da 00:00etatik 7:00etara”.

Gainerako zuzenketak honako hauek dira:

Interes orokorrekotzat jotzen diren eta ordenantzatik kanpo geratuko liratekeen ekitaldien artean, uste dugu, su artifizialak berariaz aipatu beharrean, egokiagoa dela Aste Nagusiari buruz hitz egitea.

6 hilabetetik gorako iraupena aurreikusten duten obren kasuan, proposatzen dugu Udaleko Ingurumen Saila izatea eragin akustikoari buruzko txostena gainbegiratzen duena. Metroaren obrekin gertatu dena ez errepikatzeko da xedea.

Halaber proposatzen dugu aipamen berezia egitea erabilera turistikoko jarduerei (hotelak, pentsioak, erabilera turistikoko pisuak eta antzekoak) gaueko aisialdiaren atalean.