AKTUALITATEA

| 2022-07-18 13:22:00

Gaur etxebizitzari buruzko lehen osoko bilkura berezia egin da Donostian, EH Bildu eta Elkarrekin Donostia udal taldeen eskariz. Aurkeztutako mozio bateratuan jasotako bost neurriak Udal Gobernuak babestu ditu eta PPk aurkako botoa eman du. EH Bilduk onartutako neurrien jarraipena egingo du, behin betiko ezarri arte. Izan ere, nahiz eta puntuak onartu, argi geratu da EAJk alokairuaren merkatuan esku-hartze publikoaren aurka jarraitzen duela.

Osoko bilkuran, EH Bilduko zinegotzi Ricardo Burutaranek alkateari leporatu dio «zerbaitek huts egiten» duela bere hiri-ereduan, «gero eta jende gehiagok ezin badu bere bizi-proiektua Donostian garatu». Eta 180 graduko aldaketa eskatu du udal gobernuaren etxebizitza politikan.

Burutaranek azaldu du gaur egun Donostian babestutako alokairuko etxebizitza baten 20.000 eskatzaile daudela, eta, beraz, «ezinezkoa da arazoari aurre egitea etxebizitza berriak eraikitze hutsarekin». Gainera, Burutaranek gogorarazi du Goiak aurkezten dituen sustapen berrietan ahalik eta etxebizitza babestu gutxien izan dezaten ahalegintzen dela. Eta, gainera, etxebizitza tasatuei ematen die lehentasuna, hau da, garestienei; izan ere, Pilar Klinikaren sustapenean ikusi dugunez, 400.000 € inguruko prezioetan daude. Eta azken adibidea: Eneko Goiak aurkeztutako azken promozioan, Hiri Lorategian, ekainaren 21n legezko gutxienekoan gelditu da berriz ere.

Era berean, EH Bilduko zinegotziak salatu du etxebizitzen prezioek gora egiten jarraitzen duten bitartean, donostiar gehienen erosteko ahalmena ez dela igotzen neurri berean. Izan ere, etxebizitzaren prezioa errentaren bikoitza igo da azken bost urteetan Donostian.

Egoera horren aurrean, EH Bildu erantzukizunez aritu da lanean. Adibidez, azken legegintzaldi honetan, 1.000 etxebizitza berri eraikitzea babestu dugu. Askotan, gainera, gure zuzenketei esker, etxebizitza babestuen kopurua handitu egin da, hala nola Illarran edo Infernuan.

Baina etxebizitza berria eraikitzearekin ez da nahikoa. Etxebizitza larrialdiari erantzuteko plan integrala behar da, eraikuntzaz gain beste neurri asko hartuko dituena, hala nola alokairuaren prezioa legez mugatzea, Alojamendu turistikoen hazkundea izoztea, etxebizitza hutsak alokairutik merkatura ateratzeko neurriak hartzea, etab.

Eta bide horretan, EH Bilduk etxebizitza politikan hiri hitzarmen aurrerakoia egitea proposatu du.

Hauek dira, laburbilduta, onartutako bost neurriak:

1.- Donostiak etxe-kaleratzerik gabeko hiria izan behar du berriro, eta kaleratzeen biktimak ezin dira kale gorrian geratu.

2. - Eusko Jaurlaritzaren Dekretua aplikatzen hasteko makinaria martxan jartzea; izan ere, urtebete baino gehiago igaro da etxebizitza hutsak alokairu soziala ateratzera behartzeko lege-dekretua ezarri zenetik, baina Donostian, beste hiri batzuetan ez bezala, oraindik ez da ezer egin.

3.- Donostia «etxebizitza behar eta eskaera egiaztatuaren eremu» izendatzea, dagozkion legezko ondorioetarako.

4.- Udal Gobernuari eskatu diogu erabaki dezala auzoka zonako alokairuko prezioen erreferentzia-indizeak egitea, eta, era berean, erabaki dezala etxebizitza libre berria edo bigarren eskukoa salerosteko Etxebizitza Prezioen Indizea (EIP) egitea. Indize horrek beste neurri asko hartzea ahalbidetuko luke, auzoz auzo.

5.- Parte Zaharraz gain, «erabilera turistikoko jarduerez betetako eremu» gehiago izendatzeko aukera aztertzea.