AKTUALITATEA

| 2022-11-09 13:27:00

Eneko Goiak asteak daramatza hotelak mugatuko dituela iragartzen. Baina, oraingoz, argi dagoen gauza bakarra da lehiaketara aterako direla «ostatu-erabilerak arautzeko Donostiako Hiri Antolamenduko Plan Orokorraren aldaketa idazteko lanak», lizitazio-aurrekontua 108.000 eurokoa dela eta, kontratua formalizatu ondoren, 24 hilabeteko epea izango duela.

Donostiarrek jakin behar dute Gobernuak aukeratutako esleipen motak prozedura 4-6 hilabete atzeratzen duela. Ez da ulertzen azterketa hau azpi-kontratatzea, plantillan gaitasun teknikoa nahikoa duten langileak daudenean lan hori egiteko, askotan frogatu duten bezala, eta datu guztiak denbora errealean dituztenean.

Lan hau udal-teknikariekin egiteko erabaki politikoak nabarmen murriztuko lituzke epeak. Hori ez da bigarren mailako kontu bat, honen bidez lizentzia berriak bertan behera uzteko aukera ematen duelako. Jakina denez, lizentziak eten daitezke HAPOren aldaketa baten hasierako onespenaren ondoren.

Izan ere, kontuan izan behar da kontratuaren esleipenerako behar diren 4-6 hilabete horiek baino gehiago atzeratuko litzatekeela epeak, hasierako onarpenera iritsi arteko izapideak hilabete gehiago beharko lituzkeelako (jendaurreko aurkezpena, zirriborroaren idazketa, ingurumen-txostena...). Denera, urte bat edo urte eta erdiz ari gara. Nolanahi ere, Goia iragartzen ari den ezer ez da gertatuko legegintzaldi honetan.

Hau da, horrek guztiak erakusten du Goiaren benetako borondatea kautelazko neurri horiek atzeratzea dela. Are gehiago, «azken dei» moduko bat egiten ari da Donostian hotel bat ezarri nahi duten guztientzat.

Horregatik, Goia jaunari eskatzen diogu izapide guztiak ahalik eta gehien arin ditzala Donostian hotelei eta gainerako turismo-ostatu berriei lizentziak kautelaz bertan behera uzteko dekretatzeko. Urrats hori denboran atzeratzeak, Goiak nahi duen bezala, egoera okertu baino ez du egingo.

Izan ere, hirian kaltea egina dago jada: Ostatu turistikoak ugaritzearen ondorio zuzena etxebizitzaren prezioen neurrigabeko igoera izan da. Dagoeneko azterlan asko egin dira, batzuk Udal Gobernuak berak eginak, eta horiek argi uzten dute lotura zuzena dagoela turismo-ostatuen hazkundearen eta prezioen igoeraren artean. Ez dago ikerlan berririk azpikontratatu beharrik prezioak nola igotzen jarraitzen duten ikusteko, hilabetez hilabete marka historiko berriak hautsiz.

Goiak, alkate gisa egin dituen bi legegintzaldietan, 50 hotel (eta beste turismo-ostatu mota batzuk) berri irekitzeko baimena eman du. Alkatetzara iritsi zenean 8.000 plaza turistiko inguru zeuden hirian, eta, duela gutxi turismoko zinegotziak ziurtatu zuen 2024an 20.000 inguru egongo direla, martxan dauden proiektu guztiak amaitzen direnean. Hau da, mugarik gabeko turistifikazio-eredu bat bultzatu da, etxebizitzaren prezioen etengabeko garestitzeari estuki lotuta dagoena, eta, ondorioz, gero eta donostiar gehiagok kanpora joan behar izan dute bizitzera.

Izan ere, Donostian hotelak mugatzea ezinbestekoa da, eta neurri hori oso berandu dator dagoeneko. Denbora honetan guztian, EH Bilduk neurri zehatzak proposatu ditu, baita osoko bilkuran ere, hirian hotel oldea mugatzeko, baina EAJk eta PSEk atzera bota dituzte guztiak.

María Inmaculada eta Mariaren Bihotza ikastetxeak

Lizentzien kautelazko eteteak, besteak beste, Maria Inmaculada Ikastetxean eta Mariaren Bihotzean (biak Grosen) proiektatutako bi ostatu-proiektuei eragin diezaieke.

Maria Inmaculadari dagokionez, hasiera batean sustatzaileek ekipamendu pribatua erabiltzeko orube horretan hotel bat, supermerkatu bat, 317 plazako aparkaleku bat (90 publikoak) eta prestakuntza-zentro bat sortzea aurreikusi zuten. Hala ere, Hirigintza Batzordeak planari argi berdea eman eta hurrengo egunean, Lanbide Heziketako zentroa ikasleen egoitza batengatik aldatu zuten (egoitza hori hotel gisa erabil daiteke, kudeatzaileek hala erabakitzen badute). Azkenik, Osoko Bilkurak 2021eko uztailean onartu zuen sustatzaileek eskatutakoa, EAJren, PSEren eta PPren botoekin eta EH Bilduren eta Elkarrekin Donostiaren ezezkoarekin. Orain, prentsan agertutako informazioen arabera, Goiaren Gobernua sustatzaileekin negoziatzen ari da hasiera batean ikasle-egoitzara bideratutako lursaila bizitegi-erabilerara aldatzea (eta zergatik ez hotelarena?).

EH Bilduk beharrezko ikusten du Eneko Goiaren Gobernuak sustatzaileekin negoziatzea, baina bi ostatu bat bera ere egin ez dadin, ez jatorrizko proiektuarena, ezta ikasle-egoitzarena ere. Garaiz gabiltza, horretarako borondate politikoa balego.

Biztanleriaren galera ikusita, batez ere gazteena, Grosek behar duen azken gauza hotel gehiago dira: babes publikoko etxebizitzak behar dira. Eta, horregatik, ez zaigu nahikoa iruditzen ikasleen egoitza etxebizitza bihurtzea, ez baitira izango etxebizitza babestuak, salmenta libreko etxebizitzak baizik, seguru asko prezio astronomikoetan merkaturatuko direnak.

Mariaren Bihotzaren kasuan, Saguesen, tramitazioa motelago doa, antza denez. Bi proiektu horietako batek ere ez du lizentzia eskatu oraindik, eta horrek Udal Gobernuari esku-hartzeko aukera ematen dio, esan bezala, horretarako borondate politikorik balego.