Babestutako etxebizitzen eskaerak izugarri igo dira Donostian azken urtean


| 2022-07-15 11:57:00

Donostiak pairatzen duen etxebizitza larrialdia egunetik egunera okertzen ari da. Prezioen igoeraz gain, alokairuko etxebizitza babestuen eskariari buruzko azken datu ofizialak oso kezkagarriak dira: ia 20000 donostiarrek etxebizitza bar behar dute.

Argitu behar da Donostiako Etxegintzak onartutako eta barematutako eskaerak direla. Udal Gobernuak eman zuen alokairu sozialeko etxebizitza eskatzaileen azken kopurua 7000 ingurukoa zen, 2021. urtearen hasieran, Txomin Eneko alokairu sozialeko etxebizitzak esleitu aurretik, zerrenda zaharrak garbitu ondoren. Beraz, urtebete pasatxoan, izugarri igo da kopuru hori. Pandemiaren ondoren eskaera nabarmen igo da EAE osoan, baina inon ez Donostian bezala.

Eta eskari-datu horiek agerian uzten dute baieztapen bat: ezinezkoa da arazoari aurre egitea etxebizitza berriak eraikitze hutsarekin. Are gutxiago Euskal Autonomia Erkidegoko Justizia Auzitegi Nagusiak Loiolako Kuartelei buruz emandako epaiaren ondoren.

EH Bilduk beharrezkotzat jotzen du babestutako etxebizitzak eraikitzea Donostian, eta Legegintzaldi honetan Udal Gobernuak sustatutako 1.000 etxebizitza eraikitzearen aldeko botoa eman dugu. Ildo horretatik, gogoratu behar da EH Bilduri esker Ilarra eta Infernuko egitasmoetan etxebizitza sozialen ratioak %50era arte handitzea lortu egin dela. Baina eraikin berria beharrezkoa bada ere, bistakoa da ez dela nahikoa.

Etxebizitza larrialdiari aurre egiteko plan integrala behar da, eraikuntzaz gain beste hainbat neurri jasoko dituena: alokairuaren prezioa legez mugatzea, alojamendu turistikoen hazkundea izoztea, etxebizitza hutsak alokairutik merkatura ateratzeko neurriak hartzea, eta abar. Tamalez, Eneko Goiaren Gobernuak neurri horiei guztiei bizkarra eman die orain arte.

Jakina denez, EH Bildu eta Elkarrekin Donostia udal taldeek datorren astelehenerako etxebizitzari buruzko pleno berezia behartu dute. Oposizioak osoko bilkura monografiko bat behartzea lortzen duen lehen aldia da. Osoko bilkura berezian eztabaidatzeko eta, hala badagokio, onartzeko aurkeztu ditugun neurri guztiak Udalaren eskumenetara mugatzen direla argitu behar da, araudiak hala eskatzen du-eta.

Laburbilduz, asteleheneko Udalbatzarrean, EH Bilduk Eneko Goiari etxebizitza politika publikoetan norabidea aldatzeko eskatuko dio. Eta bost neurri jarriko ditugu mahai gainean, Elkarrekin Donostiarekin batera, astelehenean bertan ezarri daitezkeenak, borondate politikoa izanez gero. Izan ere, Etxebizitzaren Legean jasotako neurriak dira gehienak. Besteak beste, Donostia «etxebizitza behar eta eskaera egiaztatuen eremua» izendatzea eskatuko dugu, horrek, beste neurri batzuen artean, alokairuaren prezioak mugatzeko aukera emango bailuke.

Osoko bilkura 10:00etan hasiko da eta sarrera libre izango da.