AKTUALITATEA

| 2025-09-29 10:07:00

EAJ-PSEren ordenantza fiskal berriaren onarpenetik egun gutxi batzuetara, eta indarrean dagoen eredua EH Bildurenetik oso urrun dagoela egiaztatu ondoren, fiskalitatearen progresibitatea eta donostiarren ordaintzeko gaitasuna bezalako ardatz estrategikoak alde batera uzten dituelako, laster ekingo diogu 2026ko Udal Aurrekontuen proposamenari gure ekarpenak egiteari.

Edukia ezagutzeko zain, EH Bildutik gogorarazi behar dugu kontuek herritarren eskaera eta arazoei eta hiri gisa ditugun erronkei, ez direla gutxi, erantzuteko tresna izan behar dutela. Espero dugu egoerak eskatzen duen beste ematea eta horri guztiari erantzuteko gai izatea.

Aurrekontu baten edukiarekin ados egon daiteke edo ez, Gobernu programaren translazio ekonomikoa izan beharko litzatekeen neurrian. Dena den, dokumentu sinesgarria izatea da funtsezko oinarria. Ildo horretan, gogora ekarri behar da Illarrako hasierako plangintzaren aurkako kontrako epaia, eta aurtengo kontuek oinarritzat zituzten 13,5 milioi euro horiek egiteko ezintasuna. Arrazoi horrek eraman gintuen, hain zuzen ere, Aurrekontua itzultzeko eskatzera. Behin baino gehiagotan galdetu dugu jarraipen-batzordeetan zer egoeratan dagoen balorazio eguneratua, eta erantzuna beti izan da ‘horretan ari direla’. Ez da serioa, ezta arduratsua ere aurrekontu-kudeaketaren ikuspegitik.

Hedabideen aurrean egindako agerraldi batean, Jabi Vitoria EH Bilduko zinegotziak ohartarazi du «gauzak ondo egin nahi badira» Goiaren Gobernuak ahalegina egin behar duela gehiengo zabalagoak lortzeko, eta herritarrei entzunez. Tasen eta zergen proposamena hobetzeko eskua luzatu genuen bezala, orain ere gauza bera egingo dugu.

Inbertsioei dagokienez, ez dugu onartuko bigarren aukeran hartzen den proposamenik, ezta aurrekontu propagandistikorik ere. ‘Inor atzean ez uztea’ baieztapenak lelo izateari utzi eta ekintzekin egi bihurtu behar du. Hori dela eta, anbizio handikoak izan behar dugu eta etxebizitza, justizia sozial, zaintza, turismo eta mugikortasun politiketan sakondu behar dugu, bai eta arlo publikoaren kudeaketa eraginkorrean eta berdintasunaren arloan jauzi kualitatibo bat eman ere. Gogoratu behar dugu aurten atal hau Aurrekontu osoaren % 0,21 baino ez dela, EAErako Berdintasun Legeak ezartzen duen % 1etik oso urrun.

Etxebizitza krisiari dagokionez, funtsezkoa da gure hirian etxebizitza sustatzea, babestua eta modu iraunkorrean. Gure ustez, etxebizitza eskubidea da, eta gure seme-alabek ez dute zertan Donostiatik alde egin behar emantzipatzen direnean. Inbertitu egin behar da, bai; eta eraiki egin behar da, baina artifizializatutako lurzoruak kontuan hartuta, kalifikazio-estrategiak martxan jarriz, hutsik dauden etxebizitzetan eraginez eta merkatuan esku hartuz prezioa mugatzeko eskura dauden baliabideekin, hauek aplikatuz.

EH Bilduren udal taldetik Goiaren gobernuak onartzen duen proposamena arretaz aztertu eta arduraz jokatuko dugu premisa batekin: interes orokorrek partikularren gainetik egon behar dute hiri honek behar duen norabide aldaketan urratsak ematen hasteko. EH Bildu akordioetarako prest dago beti ere herritarren ongizatea bermatzea helburu duten proiektuak badira.