AKTUALITATEA

Alkateak aitzakia ugari jarri arren, Donostiak deskontuak izango ditu 2023an Mugi txartelean

| 2022-12-20 13:34:00

Hala ere, erabilitako tonuak eta alkateak emandako aitzakia kopuruak adierazten dute ez duela konpromiso politikoagatik egingo, horretara behartuta dagoelako baizik.

Izan ere, Eneko Goia berriz ere oso kritikoa izan da deskontu honekin, edukian eta forman, eta orain arte izan duen jarrera politikoa justifikatzeko erabili dituen aitzakia guztiak desmuntatu behar izan ditu Garbiñe Alkiza EH Bilduko zinegotziak.

Are gehiago, Alkizak Goiaren baieztapen batzuk ezeztatu behar izan ditu gaurko eztabaidan. Adibidez, Goiak esan du, hitzez hitz, «udal kontu-hartzaileak aurrekontuak geldiarazi dituela», deskontuen finantzaketa zehaztuta ez dagoelako. Alkizak zalantzan jarri du baieztapen hori, eta Goiari eskatu dio udal kontu-hartzailearen txosten juridikoa erakusteko. Baina Goiak ez du aurkeztu, txostena ez delako existitzen. Izan ere, beste hiriburu eta lurralde batzuetan ikusi dugun bezala, deskontuak aurrekontuetan egon ala ez, erabaki politikoa da, eta, beraz, udal-aurrekontuak geldirik edukitzea Goiaren ardura da.

Era berean, mozio honen bidez lortu da, azken bileran ez bezala, Donostiako Udala ordezkatuta egotea Gipuzkoako Garraioaren Agintaritzaren bileran. Bilera gaur arratsaldean egingo da, deskontuei buruz hitz egiteko. Halere, Goiak ez du argitu bilera horretan deskontuen alde egingo duen.

EH Bilduren mozioa, aho batez onartua:

1. Donostiako Udalbatzak hertsiki eskatzen dio Udal Gobernuari berma dezala udal ordezkaritzaren presentzia Gipuzkoako Garraio Agintaritzaren bileretan.

2. Donostiako Udalbatzak hertsiki eskatzen dio Udal Gobernuari, garraio publikoan % 50eko beherapena 2023ra luzatzea bermatzeko, behar den kontu-saila txerta dezala 2023ko aurrekontuetan.