Bizkaia

Koronabirusak eragindako krisiari aurre egiteko eta sektore kaltetuenak babesteko neurri ekonomiko, sozial eta fiskalak aurkeztu ditu EH Bildu Bizkaiak

Aldundiari aurkeztutako neurrien artean enpresei laguntzak eta pertsona zaurgarrien beharrizanak babesteko proposamenak daude

| 2020-03-19 12:30:00

EH Bilduk hainbat proposamen aurkeztu dizkio Bizkaiko Foru Aldundiari koronabirusaren krisiari aurre egiteko. Helburua krisi soziosanitarioak kaltetutako gizarte sektoreak babestea da.

Pertsona zaurgarrien babesa

Hasteko, Bizkaiko Foru Aldundiak Bilbao Bizkaia Ur Partzuergoari ura izateko giza eskubidea eta familia zaurgarriei doako ur-hornidura bermatzea eskatu du EH Bilduk.

Pertsona zaurgarrien egoerarekin lotuta ere, Bizkaia Gara sarea tokiko eta sasoiko produktuen bidez hornitzea planteatzen da, horretarako baserritarrekin harremanetan jarriz.

Horretaz gain, EH Bilduk Arreta Zuzeneko langileak zerbitzu guztietan indartzea (etxez-etxeko zerbitzua, egoitzak, etxeak, pisuak…) eskatu du, langile horiek babesteko ekipamenduak bermatuz (batak, betaurrekoak, maskara, erabilera bakarreko eskularruak…).

Indarkeria matxistaren biktima diren emakumeentzat larrialdietako plazak handitzea ere eskatu da.

Neurri ekonomikoak

Arlo ekonomikoan, EH Bilduk enpresa txiki eta ertainei laguntza eta finantzazio lerro bereziak eskaintzea proposatu du. Horrela krisiak gogorren eragindako negozioetan (ostalaritza, tailerrak, landa-turismoa, turismo operadore txikiak…) kaltea gutxitzea bilatzen da. Laguntza ekonomiko lerro berezi hori kulturgintzaren esparruan ari direnen kalte ekonomikoak arintzeko ere erabiliko da.

Horretaz gain, Bizkaiko Foru Aldundiaren eta bere organismo autonomoen azpikontratei %100 ordaindu lanik egin ez arren, betiere enplegu guztiari ohiko baldintzetan eusteko konpromisoarekin.

Arlo fiskalean EH Bilduk eskatu du errenta kanpaina atzeratzea, Gipuzkoan eta Araban egin den moduan eta mugikortasunarekin lotuta EGAren koordinazio mahaia eratuta dagoela ikusita, bertatik Batzar Nagusietako taldeei, enpresa emakidunei eta enpresa horietako langileei zuzeneko informazioa jasotzeko kanalak ahalbidetzea eskatu da.  

Koronabirusaren ondorioei aurre egiteko jarraipen mahaia osatzea eskatu du EH Bilduk Bizkaiko Batzar Nagusietan

Krisiaren jarraipenerako mahai hori guztien arteko elkarlanean oinarritu behar dela azpimarratu du Bea Ilardia EH Bilduko bozeramaileak

| 2020-03-18 11:15:00

EH Bilduk Bizkaiko Batzar Nagusietan koronabirusak sortutako egoerari aurre egiteko Jarraipen Mahaia osatzea proposatu du.

Bea Ilardia bozeramaileak adierazi duenez, “espazio hori sortzea ezinbestekoa da. Elkarlanerako esparru bat izango da birusaren ondorioz sortutako egoerari aurre egiteko”.

Izan ere, birusaren hedapenaren ondorioz, Bizkaiko Batzar Nagusiek bertan behera utzi dituzte martxoko batzorde eta Osoko Bilkura. Horren aurrean EH Bilduk elkarlanerako espazio bat abian jartzea eskatzen du.

“Iraskunde, Gobernamedu on eta Gardentasunerako batzordea espazio egokiena izan daiteke lan hori egiteko. Astean behin deitzea proposatzen dugu, egokiena den formatuan guztion osasuna bermatzeko”, adierazi du Ilardiak.

Esparru horretan krisiaren jarraipen lana egitea posible izango litzateke, hiru helburu zehatz lortzeko:

- Krisi soziosanitarioaren jarraipena egitea lurralde historikoan, Foru Gobernuaren kudeaketaren asteroko informazioa jasoz eta kudeaketa neurrien ebaluazioa eginez.

- Krisi soziosanitarioa geldiarazteko eta ondorioak arintzeko, betiere Aldundiaren eskumenen esparruan, ekimen berriak aurkezteko espazioa izango litzateke.

- Adostasunerako eta elkarlanerako esparru bezala egituratuko den espazioa izango litzateke, eta ez konfrontazio politikorako espazio bezala.

Zaldibarko zabortegiaren aferan Aldundia akusazio partikular bezala aurkeztuko den galdetuko du EH Bilduk

Unai Rementeria ahaldun nagusiari egingo dio itauna asteazkeneko Kontrol Plenoan

| 2020-02-25 14:04:00

Asteazkeneko Kontrol Plenorako EH Bilduk Zaldibarko zabortegiarekin lotutako itauna erregistratu du. EH Bilduk Aldundiari galdetuko dio ea abian jarritako auzi penalean akusazio partikular bezala aurkeztuko den.

EH Bilduk itauna Unai Rementeria ahaldun nagusiari zuzendu dio eta instituzioak auzian parte hartzearen garrantzia azpimarratu du.

Luiziak izandako ondorioak Bizkaiko hainbat herritarrei eragin diela gogoratu du EH Bilduk. Langile bi desagertu dira, suteak milaka pertsonen bizia baldintzatu du, langileak beharrezko babes gabe aritu dira erreskate lanetan eta A-8a partzialki moztua dago.

Hortaz, EH Bilduren ustez, ezinbestekoa da Aldundia prozesu juridikoan parte hartzea.

Inbertsio funtsek adinekoentzako egoitzekin negozioa egitearen arriskua salatu du EH Bilduk

EH Bilduk bi galdera aurkeztu ditu inbertsio funts batek adinekoentzako lau egoitza erosi ondoren

| 2020-02-05 13:54:00

Arantza Urkaregi EH Bilduko batzarkideak galdera bi bideratu dizkio Aldundiari inbertsio funtsek Bizkaiko adinekoentzako lau egoitza erosi ondoren eta gehiago erosteko nahia erabaki ondoren.

Urkaregik adierazi du “oso larria da foru titularitatea daukan egoitza baten kudeaketa bere oinarrian inbertsio funtsa daukan enpresa baten esku uztea. Inbertsio funtsaren helburua da diru gehien egitea pertsona nagusien kontura eta hori ezin da onartu”.

EH Bilduko batzarkideak gogoratu du Adriano Care Inbertsio funtsak adinekoentzako Bizkaiko lau egoitza erosi dituela eta gehiago erosteko asmoa erakutsi dutela. Egoitza horietako hirutan, Urkaregik azpimarratu duen bezala, plaza kontzertatuak daude eta Otxartagakoan titularitatea Bizkaiko Foru Aldundiarena da nahiz eta kudeaketa pribatua izan.

Nazioarteko Ekintzailetza Zentroan kudetzailerik ez aurkeztea proiektua abian jartzeko moduaren ondorio zuzena da, EH Bilduren ustez

Proiektuak sakoneko hausnarketa behar duela adierazi du Arantza Urkaregi batzarkideak

| 2020-01-25 10:34:00

Aldundiak Nazioarteko Ekintzailetza Zentroaren kudeaketarako inolako eskaintzarik ez jasotzea kezkagarria da eta proiektua abian jartzeko moduaren ondorio zuzena da, EH Bilduren ustez.


Arantza Urkaregi batzarkideak adierazi duenez, “planteatu den kudeaketa eredua oso kezkagarria da. Aldundia itsu-itsuan joan da kanpoko elitezko kudeatzaile baten bila. Bertako baliabideen artean aukera bilatu beharrean”.

 

Horretaz gain, zentroa kudeatzeko baldintza oso gogorrak jarri zirela aipatu du Urkaregik. “Urrian Ekonomia Sustapenerako diputatuari esan genion jarritako baldintzekin elite-elitezko kudeatzaile baten bila ari zirela eta hemengo enpresei ateak guztiz ixten zitzaizkiela. Denborak arrazoia eman digu”.

 

Izan ere, EH Bilduren ustez, proiektua teilatutik hasi du Aldundiak. “Kudeatzailearen bila hasi dira proiektuaren helburuak ondo finkatu gabe. Proiektu honek sakoneko hausnarketa bat behar du”, azpimarratu du batzarkideak.

 

Ainara Basurko Ekonomia Sustatzeko diputatuaren batzorderatzea

 

Egoera honen aurrean, EH Bilduk Ainara Basurko diputatuaren batzorderatzea eskatu du. EH Bilduk argitu nahi du nola baloratzen duen Aldundiak inolako eskaintzarik jaso ez izana, zeintzuk izango diren orain emango dituen urratsak eta zein izango den ekintzailetza zentroa abian jartzeko epe berria.

ALBISTEAK

Asier Vega: «EH Bilduren egiteko moduak gero eta jende gehiago biltzen du, baita Bizkaian ere»

2021-06-13 19:29:00

EH Bildu Bizkaiak bere zuzendaritza berria aurkeztu du gaur goizean, Bilbon.

EH Bilduko Bizkaiko zuzendaritza berriak %90,62ko babesa jaso du

2021-06-05 12:29:00

Asier Vega Isasik aurkeztutako lan taldeak zuzenduko du hurrengo lau urteetan EH Bildu Bizkaia

Lurralde politika eta plangintza estrategikoa eskatu ditu EH Bilduk Ezkerraldera inbertsio industriala erakartzeko

2021-06-05 12:12:00

EAJk eta PSEk Ezkerraldearekiko ahanztura instituzionala eta tertziarizazioaren aldeko urteetan nahita egindako apustua gaitzetsi ditu. Horren aurrean, lurzoruaren kudeaketa bere katalogazio industrialaren araberakoa izan dadila aldarrikatu du EH Bilduk, inbertsioak erakartzeko eta eskualdeari etorkizun duina bermatzeko.

EH Bilduk Bizkaiko Foru Aldundiari eskatu dio hobari-sistema bat ezar dezala AP-68ko ordainlekuan, Bizkaiko zatian

2021-06-01 14:32:00

Neurri horri esker, Hego Uribek jasaten duen diskriminazioarekin amaitu eta BI-625 errepidetik kamioien trafikoa murriztuko litzateke