“Guztiak egoera berrira moldatu diren bitartean, Aldundiak aurrera jarraitzen du gero eta zalantza gehiago sortzen dituen proiektu batekin”, adierazi du Izaskun Duquek eta gaineratu du aurkeztutako proiektuen inguruko xehetasun guztiak eskatuko dituztela

| 2020-09-17 13:12:00

Gaur goizeko prentsaurrekoan Izaskun Duque EH Bildu Bizkaiko batzarkideak eta Jone Goirizelaia Bilboko udal taldeko bozeramaileak haien kezka agertu dute Bizkaia Dorrearen proiektuak hartu duen norabidearengatik.

 

Goirizelaiak zein Duquek proiektuak norabide aldaketa bat behar duela azpimarratu dute eta gogoratu dute jada ez dela erakargarria nazioarteko enpresentzat ere ez. “Bostoneko Cambrigde Innovation Center-ak eta Israelgo SOSA Holding-ak idatziz esan zutela ez dutela aukeraketa prozesu honetan jarraitu nahi. Haientzat Aldundiaren proiektu izarra ez da erakargarria izan nahiz eta, aurreko lizitazioarekin alderatuz gero, kudeatzaileek 20 milioi euro gutxiago ordaindu beharko ditu eta 10 milioi euro gehiago jaso”, azpimarratu du Goirizelaiak.

 

Horretaz gain, EH Bilduk bere sorpresa agertu du proiektuaren arduradunak kargua utzi duelako Impact HUB eta PWC Bilbaoren proiektuen balorazioaren azkeneko txanpan dagoenean. “Azken hau, gainera, nahiz eta esperientziarik ez izan nazioarteko ekintzailetzan gaietan, oso ondo baloratua izan da. Hori dela eta prozesu honetan aurkeztutako proiektuen inguruko xehetasunak guztiak eskatuko ditugu”.

 

“Pandemiak gure bizitzako arlo guztietan eragina izan du, baita honelako proiektu erraldoietan. Eta guztiak egoera berrira moldatu diren bitartean, Aldundiak aurrera jarraitu du gero eta zalantza gehiago eragiten dituen proiektu honekin” adierazi du Duquek proiektu honen alde egiten den bitartean eskualdeetako Behargintzak eta Garapen Agentziak gero eta egitura txikiagoa dutelako beraien lana egin ahal izateko.

Leioako kanpusera eta aireportura doazen Bizkaibusetan segurtasun eta erosotasun neurriak bermatzea eskatu du EH Bilduk

Garraio publikoa kutsatze-gune bihurtu ez dadin neurriak ahalik eta azkarren hartzea ezinbestekoa da

| 2020-09-08 11:34:00

Azken egunetan emandako egoeraren ondorioz, aireportura eta EHUra doazen Bizkaibuseko lineatan segurtasun eta erosotasun neurriak bermatzea eskatu du EH Bilduk.

 

Raul Mendez EH Bilduko batzarkideak azaldu duenez, zerbitzu horietan egoera kezkagarriak eman dira kontuan izanda COVID-19ak eragindako egoerarekin. “Oporraldia amaitu ondoren oso irudi kezkagarriak ikusi ditugu aireporturako Bizkaibuseko linean”.

 

Batzarkideak gogoratu duenez, gaur egun autobusetako metro koadroko edukiera lau pertsonatakoa da. “Egungo egoera soziosanitarioan kezkagarria da erabiltzaile-edukiera horri eustea. Beharrezkoa da neurriak hartzea zerbitzu egoki eta segurua eskaintzeko”.

 

Gainera, Mendezek azpimarratu duen bezala, neurri horiek ahalik eta azkarren hartu behar dira datorren astean unibertsitateko fakultate guztietan klaseak hasiko dira eta. “Neurriak berandu baino lehen hartu behar dira garraio publikoa kutsatze-gune baten ez bihurtzeko”.

 

Garraio diputatuari azalpenak eskatu dizkio EH Bilduk

 

Egoera horren aurrean EH Bilduk Miguel Angel Viar garraio diputatuaren batzorderatzea eskatu du. “Beharrezkoa da diputatuak aireportura eta EHUrako lineen inguruan azalpenak ematea. Egoerak eskatzen du neurri eraginkorrak ahalik eta azkarren hartzea”.

Gutxieneko 1.080 euroko pentsioak bermatuko ditu EH Bilduk

Jasone Agirrek azpimarratu du Araban, Bizkaian eta Gipuzkoan 13.500 pentsiodunek pentsioa DSBEarekin osatu behar dutela

| 2020-06-29 14:40:00

EH Bilduk pentsiodunei 1.080 euroko pentsioak bermatuko dietela azpimarratu du Jasone Agirre EH Bildu Bizkaiko zerrendaburuak.

Gaur Bilbon egindako agerraldian gogoratu du Araban, Bizkaian eta Gipuzkoan 13.500 pentsiodunek osatu behar dute pentsioa DSBEarekin eta horietatik bi heren emakumeak direla. “Gainera, legeak aitortzen diena baino 300 euro gutxiago jasotzen dute, Urkullu eta Mendiak pentsioen osagarria murriztu dietelako”, esan du Agirrek.

“Hau da benetako argazkia. Hau da gurea bezalako herrialde batek onartu ezin duen argazkia. Ez du balio ustezko konpetentzi faltan ezkutatzea. Euskal pentsiodunei pentsio duinak bermatzeko eskumen eta ahalmen nahikoak ditugu. Euskal pentsiodunenei 1.080 euroko gutxieneko pentsioa bermatzeko aukera egon badago, Eusko Jaurlaritzatik pentsio txikienak osatuta. Hori da gure konpromisoa. Borondate politiko kontua da, eta EH Bilduk badu”.

Agirrek azpimarratu du EH Bilduk lanean jarraituko duela bizitza duinak bermatzeko eta Gizarte Segurantzaren kudeaketa zuzenaren transferentzia osoa lortzeko lan egingo dela. Bien bitartean, euskal pentsiodunen benetako arazoei irtenbidea bilatzeko borondatea izango duen gobernuaren beharra azpimarratu du.

“EH Bilduk konpromisoak hartzen ditu herritarrekin, konpromisoa hartzen du euskal pentsiodunekin. 1.080 euroko gutxieneko pentsioak bermatzeko, milaka euskal pentsiodunek jasotzen dituzten miseriako pentsioekin amaitzeko, euskal pentsio-sistema publiko bat sortzeko, Gizarte Segurantzaren kudeaketaren transferentzia atsedenik gabe eskatzeko. EH Bilduk euskal pentsiodunei bizitza duinak bermatzeko konpromisoa hartuzen du”, adierazi du Agirrek.

Prekarietatearekin amaitzea, gazte eta emakumeei begira bereziki, lehentasuntzat izango duen gobernu bat osatzeko konpromisoa hartu du EH Bilduk

Jasone Agirre EH Bilduko Bizkaiko zerrendaburuak esan duenez, uztailaren 12an hautatu behar da: edo EAJren eredua, prekarietatera kondenatzen gaituena, edo EH Bildurena, segurtasuna ematen duena. 33.000 lanpostu sortu, 1.200 euroko gutxieneko soldata ezarri eta alokairu publikoko 11.000 etxebizitza eskaintzeko plana azaldu du

| 2020-06-26 17:11:00

Gaur Bilbon Jasone Agirre EH Bilduko Bizkaiko zerrendaburuak gazteei eta emakumeei arreta berezia eskaintzearen beharra azpimarratu du eta prekarietatearekin bukatuko duen gobernua osatzeko konpromisoa agertu du EH Bildu.

“Gurea bezalako herri aurreratu batek ezin du onartu Europako lan-prekarietate tasarik altuenetako bat izatea”, erantsi du, “jendearen oinarrizko eskubide guztiak babesteko konpromisoa ere” hartu aitzin.

EH Bilduren hautagaiak berretsi du uztailaren 12an bi aukera egongo direla mahai gainean: prekarietatera kondenatzen gaituen EAJren eredua eta herritar gehienei segurtasuna eta ziurtasunak ematen dizkien EH Bildurena. Horri jarraituz, koalizioak prekarietatea desagerrarazteko eta herritarren eskubideak bermatzeko plan bat eta borondate politiko osoa duela adierazi du, bai eta neurriak zehaztu ere: 33.000 lanpostu berri sortu eta arriskuan dauden 100.000 lanpostuei eustea, 1.200 euroko gutxieneko soldata, lan erreforma ez aplikatzea, 35 orduko lan astea enplegua banatzeko eta, etxebizitza eskubidea bermatzeko, alokairu publikoko 11.000 etxebizitza herritarren eskura jarri eta alokairuaren prezioa mugatzea”.

Gazteek bizi duten egoera prekarioaren aurrean, EH Bilduren Bizkaiko hautagaiak azpimarratu du “erakunde publikoen lehenengo eta funtsezko eginkizuna jendea babestea izan behar dela, gure jendeak etorkizun duina ziurtatuta izateko politikak indarrean jartzea”. Ziurtatu duenez, “egin daiteke, borondate politiko kontua da, Urkulluren Gobernuak urrunetik ere izan ez duen borondate politikoa, alegia, bere lehentasunak beste batzuk direlako”.

EH Bilduk eta Elkarrekin Podemosek Bizkairako Berreraikuntza Mahaia sortzea eskatu dute

Bea Ilardia: “Anbizio handiagoko plana behar da non zaintza edo mugikortasuna kontuan hartzen diren”

| 2020-06-11 11:15:00

EH Bilduk eta Elkarrekin Podemosek Bizkaiko Batzar Nagusietan eskatu dute "Bizkaian ekonomia eta gizartea berreraikitzeko lantaldea" sortzea.

Aldundiak asmatutako plana, Bizkaia Aurrera!, ez da nahikoa oposizioarentzat, "Ideiak bildu eta eztabaidatzeko" gune bat eskatzen baitu, "Bizkaiko ekonomia eta gizartea berreraikitzeko planak eta jarduerak sistematizatzeko, COVID19 pandemiaren ondoren", Bizkaiko Batzar Nagusietan erregistratutako dokumentuan azaltzen den bezala.

Oposizioak beste akats bat ere aurkitzen du: Bizkaian berreraikuntzaren talka-planak proposamen ekonomikoetan bakarrik zentratzen dira, baina ez bi alderdientzat funtsezkoak diren gizarte-gaietan.

Israel Escalante Elkarrekin Podemoseko batzarkidearen hitzetan, Aldundiak Bizkaia berreraikitzeko duen plana "ekonomikoa baino ez da, eta osatu egin beharko litzateke. Proposatzen dugu guztiok parte hartzea, ez bakarrik talde politikoentzat, baita erakunde sozial eta sindikalentzat ere".

Bea Ilardia EH Bilduko bozeramaileak anbizio gehiago eskatzen du. “Ezin gara mugatu neurri ekonomikoetara. Bizi dugun krisi soziosanitario honetan ezinbestekoa da zaintzan, egoitzen ereduan edota mugikortasunean irtenbideak proposatzea”. 

Elkarrekin Podemosentzat eta EH Bildurentzat argi dago ez dagoela "planifikaziorik", "Ez dago modu eztabaidagarrian, neurri horiek aberasteko edo hobetzeko ekarpenak egiteko aukerarekin, Kongresuan eta beste parlamentu batzuetan gertatzen den bezala". Horrenbestez, Aldundiak elkarlanerako asmoa badauka, ez litzateke ulertuko honelako proposamen bati ezetz esatea.

• «
• 1
• 2
• 3
• 4
• 5
• 6
• 7
• 8
• ...
• 17
• 18
• »