Zamudioko egoitzaren egoera ere kezkagarria dela azpimarratu du EH Bilduk eta neurriak hartzeko eskatu dio berriro Aldundiari

| 2021-01-14 13:09:00

Izaskun Duque EH Bilduko batzarkidea harrituta agertu da Gizarte Ekintzako diputatu Sergio Murillok Marcelo Gangoiti egoitzako fokoaren ardura langileen gain utzi ostean.
«Berriro ere, pandemiaren hasieratik gertatzen ari den bezala, foru gobernuak bere erantzukizuna saihesten duela ikusi dugu. Ez zaigu arduratsua iruditzen langileak kutsatze-iturri gisa erruduntzea eta estigmatizatzea. Egin behar dutena irtenbideak bilatzea eta jardutea da».

Hain zuzen ere, Duquek gogorarazi du Muskizen gertatutakoa ez dela kasu isolatu bat eta Bizkaiko egoitzak oso egoera larrian daudela, 350 positiborekin eta 14 egoitzatan kutsatutako pertsonekin.

Egoera zaila Zamudioko egoitzan

 

Zamudioko Truiondo adinekoentzako zentroan ere kopuru kezkagarriak daudela ohartarazi du EH Bilduko batzarkideak. «Zamudion foku bat erregistratu zen abenduaren 7an eta kutsatzeen zifrek erakusten dute ezin izan zela kontrolatu».

Egoera horren aurrean, EH Bilduk kudeaketa pribatuko adinekoen egoitzetan esku hartzeko eskatu dio berriz ere Aldundiari.

EH Bilduren ustez, Aldundiak metro-linea berrietarako aurkeztu dituen proiektuek gabezia handiak dituzte oraindik, eta ez diete benetako beharrei erantzuten

Raul Mendez batzarkidearen esanetan, bi proiektuetan urratsak ematea positiboa da, baina Aldundiak lehentasuna izaten jarraitzen du, besteak beste, Lamiakoko tunela eta Supersurra

| 2021-01-13 16:23:00

Raul Mendez EH Bilduko batzarkidearen esanetan, Unai Rementeria ahaldun nagusiak eta Iñaki Arriola garraio sailburuak gaur goizean aurkeztutako proiektuek gabezia handiak dituzte oraindik, eta ez diete erantzuten bi zonaldeetako herritarren benetako beharrei.

Galdakaorako metro-linearen kasuan, "gaur aurkeztutako proiektuak ez die erantzunik ematen udalerriko auzoetako mugikortasun-beharrei. Proiektu honek ez du bermatzen Aperribain eta Bengoetxen geltokirik, nahiz eta lurpetik igaro. Gainera, aurkeztutako proiektua bi fasetan egingo da, bigarren zatiaren plangintza eta aurrekontua zehaztu gabe eta 2026an martxan egongo dela bermatzea zailduz", adierazi du Mendezek.

"Gainera, ahaldun nagusiak Galdakaora doan metroa Europako funtsen menpe jartzen dituela ikusi dugu. Ez dugu uste finantziazio arazo bat dagoenik; lehentasun arazo bat dagoela uste dugu, diru gehiago bideratuko baita Lamiakoko ibai azpiko tunela edo Supersur bezalako proiektuetara bi metro lineetara baino", azpimarratu du Mendezek.

Errekalderako metro lineari dagokionez, Mendezek gogorarazi du EH Bilduk proposatu zuela parte-hartze prozesu bat abian jartzea, baina gaur aurkeztutakoa herritarrei geltokietara sartzeko modua aukeratzera mugatzen da. "Gure ustez, aukera guztiak jarri behar dira mahai gainean, eta ez aukera bakar bat, tunelean modu konbentzionalean edo funikularren bidez sartzen den aukeratzeko".

"Beraz, gaurko aurkezpenarekin, Aldundiak eta Eusko Jaurlaritzak erabateko inprobisazioaren irudia eman dute, partxeatutako eta loturarik gabeko proiektua aurkeztuz eta, beste behin ere, 4. eta 5. lineetarako proposamen integral eta egoki bat aurkezteko aukera galduz".

EH Bilduk Muskizko Marcelo Gangoiti egoitza interbenitzea eskatu du, koronabirusarengatik kutsatu asko atzeman dituztelako

Izaskun Duque batzarkideak iragarri du proposamen bat aurkeztuko dutela Bizkaiko Batzar Nagusietan kutsadura-tasa altua duten kudeaketa pribatuko egoitzetan jardun ahal izateko

| 2021-01-13 14:48:00

Marcelo Gangoiti adinekoentzako egoitzan esku hartzeko eskatu dio EH Bilduk Bizkaiko Foru Aldundiari. Izaskun Duque batzarkidearen ustez, Muskizen dagoen eta titulartasun publikokoa baina kudeaketa pribatuko egoitzaren inguruko erabakia ezin da gehiago atzeratu erabiltzaileen eta langileen artean dagoen kutsatze-tasa handiaren ondorioz.

"Egoera Aldundiak jarduteko bezain larria dela uste dugu. Gogoratu behar da hitzarmen sistemak ez dituela erakunde publikoak egoitza horietan gertatzen denetik salbuesten. Kasu honetan, egoera oso kezkagarria da eta ezin dugu erabakia gehiago atzeratu", azpimarratu du Duquek.

EH Bilduko batzarkideak gogorarazi duenez, gaur egun Aldundiak titulartasun pribatuko egoitza itunduetan esku hartu ahal izateko mekanismoak daude, izan ere, Gizarte Zerbitzuen Euskal Sistemak zenbait eskumen aitortzen dizkie administrazio publikoei.

"Orain arte erkidego bakanetako bat izan gara COVID-19ren krisialdian egoitza bakar bat interbenitu ez duena. Ez da horrelako neurririk hartu egoitza horietan egoera oso zaila izan den arren. Ezin dugu akats bera berriro egin", adierazi du EH Bilduko batzarkideak.

Proposamena Batzar Nagusietan

Bestalde, EH Bilduk iragarri du Bizkaiko Batzar Nagusietan horren inguruko proposamen bat aurkeztuko duela. "Kutsatze kopuru handia duten eta kudeaketa pribatua daukaten zentroetan esku hartzea da proposamenaren helburua. Era berean, adinekoak artatzen dituzten zentroetan ikuskapenak areagotzea eskatuko dugu, horiek baitira pandemia honen aurrean ahulenak", azpimarratu du Duquek.

Aurrekontuetan akordioetara heltzeko prestutasuna adierazi EH Bildu Bizkaiak, betiere benetako lehentasunei erantzuteko norabide aldaketa bat emanez gero

Bea Ilardia Bizkaiko EH Bilduko bozeramaileak berretsi du 2021eko aurrekontuek lehentasun berriei aurre egiteko balio behar dutela

| 2020-12-11 13:31:00

Bea Ilardia EH Bildu Bizkaiko bozeramailea aurrekontuen inguruan akordioak lortzeko prest agertu da, “betiere egungo egoera iraultzeko balio badute". Ilardiak Arantza Urkaregi batzarkidearekin batera egin ditu adierazpen horiek gaur goizeko prentsaurrekoan.

Ilardiak azpimarratu duenez, "EH Bildu aurrekontuen inguruan akordioak lortzeko prest dago, baina proiektu horrek egungo egoera aldatzeko balio behar du. Bizkaian bizi diren pertsonen bizimodua hobetzeko politikak inoiz baino beharrezkoagoak dira. Helburu horrekin egingo du lan EH Bilduk".

Bizkaiko bozeramaileak adierazi duen bezala, egun dauden gabeziak zuzentzeko eta erronka berriei aurre egin ahal izateko "orain arte funtzionatu ez duten politikak aldatzea ezinbestekoa da”.

Ildo beretik mintzatu da Urkaregi: "Aurrekontuek lehentasun berriei erantzun behar diete, eta lau ardatz izan behar dituzte: gizarte-zerbitzuen sistema indartzea, enplegu duina bultzatzea, politika ekonomikoen bidez Bizkaia orekatua lortzea eta benetako trantsizio ekologikoa lortzeko urratsak ematea".

Tabernak eta jatetxeak itxita dituzten ostalariei ur-tasa finkoa ez kobratzea eskatu dio EH Bilduk Ur Partzuergoari

Gaur arratsaldeko Ur Partzuergoaren bileran egingo du proposamena EH Bilduk eta, horrekin batera, saneamenduaren tasa ez kobratzeko neurria berriro ere abian jartzeko eskatuko du

| 2020-11-24 11:53:00

COVID 19-ak ostalaritzaren sektorean izandako ondorioen aurrean, tabernak eta jatetxeak itxita dituzten ostalariei uraren tasa finkoa ez kobratzea proposatuko du EH Bildu Bizkaiak. Proposamena Ur Partzuergoari helaraziko dio gaur arratsaldean ospatuko den bileran.

“Uztailean ur partzuergoak onartu zuen alarma egoeraren ondorioz itxita egon ziren ostalari eta merkatariei saneamendu tasa finkoa ez kobratzea. Neurri hori abian jarri behar da berriro, baina ostalariak berriro behartuta daude bere negozioak ixtera eta urrats bat gehiago eman behar dela uste dugu. Uraren tasa finkoa ere ez zaiela kobratu behar uste dugu eta hori proposatuko dugu”, adierazi du Asier Egiraun EH Bilduko ordezkariak.

EUDELekin landu beharreko proposamena

EH Bilduk gogoratu zuenez, uztailean ez zen horrelako erabakirik hartu udalengan izan zezakeen eraginagatik. Hala ere, ostalaritzan egoerak txarrera egin duela ikusita, EH Bilduk uste du udalek ez dutela oztoporik jarriko.

Hori dela eta, proposamena Ur Partzuergoarekin eta EUDELekin batera landu beharko litzatekeela azpimarratu du EH Bilduk. “Egoera oso larria da ostalaritzaren sektorean eta elkarlanetik abiatutako irtenbideak beharrezkoak dira sektore horretan izandako kalteak gutxitzeko”, azpimarratu du Egiraunek.

• «
• 1
• 2
• 3
• 4
• 5
• 6
• 7
• 8
• ...
• 18
• 19
• »