AKTUALITATEA

| 2026-01-09 09:01:00

EH Bilduk iragarri nahi du Jose Mari Gorroño buru duen taldearekin, Guztiontzako Herriarekin, aurrekontu akordioa lortu duela. Horri esker, Udalak datorren urtean aurrekontuak izango ditu eta blokeo eta ezegonkortasun instituzionaleko aro bati amaiera emango zaio.

Akordio horri esker, herritarrek aspalditik eskatutako bi proiektu enblematiko, hala nola Merkatu plaza eta Udal liburutegia, abiaraziko dira, eta, horrez gain, EH Bilduk bere udal programan proposatutako Beheko Ibarrako Ikasgela zerbitzua martxan jartzea ahalbidetuko da.

Akordioak 820.000 euroko aurrekontu-aldaketa jasotzen du, Gernika-Lumoren benetako lehentasunetara bideratua. 700.000 euro baino gehiago Beheko Ibarrako lokala erosteko eta egokitzeko erabiliko dira ikasgelak zerbitzurako. Horrez gain, datuetan oinarritutako etxebizitza-politikan aurrera egiteko egoeraren azterketa, Txaportan hiri-atletismoko ibilbide baten bideragarritasun-azterketa, Udaleko lanpostuen balorazio-prozesua ixteko partida, kiroldegian erasoei aurre egiteko protokoloa, berdintasunean eta zaintzan aurrera egiten jarraitzeko neurriak, eta. Eguneroko bizitza hobetzeko eta Gernikan etorkizuna eraikitzeko pentsatutako inbertsio publikoa.

Urrats garrantzitsua da Gernika-Lumorentzat, eta keinu horrekin, EH Bilduk beste behin ere herriaren interesak edozein kalkulu alderdikoiren gainetik jartzeko borondatea erakutsi du, udal politika moteltzen eta herritarren ongizaterako beharrezkoak diren proiektuak geldiarazten ari zen egoera desblokeatzen lagunduz. Akordio honek amaiera ematen dio Gernika Lumoko Udalean bizitako etapa zail bati, eta aukera bat irekitzen du elkarrizketa eta akordioetara iristeko gaitasuna berreskuratzeko, herriak aurrera egin dezan ezinbestekoa den bultzada lortzeko bidean.

Une honetan, garrantzitsua da egoera honetara nola iritsi den gogoratzea. EAJ-PNVk, EH Bilduk alkatetza hartzea eragozteko helburu bakarrarekin, akordio bat sinatu zuen Jose Mari Gorroñorekin, ondoren bertan behera uzteko eta EH Bilduri zentsura mozio bateratu bat aurkeztea proposatzeko. Mugimendu hark ez zion Gernika-Lumo gobernatzeko benetako interesari erantzuten, herritik kanpoko proiektu bat inposatzeko borondateari baizik, Guggenheim museoa Dalian eraikitzeari, alegia.

Une hartan, EH Bilduk bere alderdiaren interesen gainetik jarri zituen Gernika Lumoko interesak. Ordutik, EAJ-PNVren politika bakarra zubi guztiak dinamitatzea, konfiantza haustea eta akordiorako edozein aukera zapuztea izan da. Dalia eraistearen erantzulea da, eta Busturialdeak azken urteotan astindu duten kaos instituzionalaren, larritasunaren eta ziurgabetasunaren arduraduna. Guggenheimarekin azkenean zer gertatu den ikustea besterik ez dago.

Ezezko iraunkorraren diskurtsoan kokatua, eta konfiantza guztiak hautsita, Udaleko egoera gero eta zailagoa eta korapilatsua bihurtu zen.

Eta, beste behin ere, EH Bilduk bere gain hartu du Gernika-Lumoren interesak bere interesen gainetik jartzeko ardura, udal talde ezberdinekin elkarrizketa berreskuratzen ahaleginduz. EAJ-PNVrekin aurrera egitea ezinezkoa izan da —EH Bildutik datorren edozein ekimen sistematikoki baztertzeko hautu esplizituarekin, eta benetako alternatibarik gabe Udal gobernuaren proposamen guztiak atzera botatzeko estrategiarekin—, baina Jose Mari Gorroñoren taldearekin esertzea posible izan da aurrekontuetan akordio bat lortzeko.

Akordio hau ez da gobernu-ituna, ezta egonkortasun-akordio bat ere, eta ez dira EH Bilduren aurrekontu propioak. Baina bada gernikarrentzat baliagarria den akordio bat, herriak behar dituen proiektuak aurrera ateratzeko ezinbestekoa den lankidetza instituzionalerako gutxieneko giroari ateak irekitzen dizkiona.

EH Bilduk eskatzen dio Gernika-Lumoko EAJ-PNVri biktimismoa eta ezetza gainditzeko, Sabin Etxeara begiratzeari uzteko eta Gernika-Lumora begiratzen hasteko. Aurrekontu akordio honekin bat egiteko eta elkarlanean aritzeko eskatzen diogu, gure herriak akordioak behar dituelako, ez blokeoak; konponbideak, eta ez kalkulu alderdikoiak. Eh Bilduk arduraz, eskuzabaltasunez eta konpromisoz jarraituko du lanean Gernika Lumok aurrera egin dezan.