Bilbo

EH Bildu Bilbok txartel bakarra eskatu du eta tarifa bateratua ez izateak garraio publikoaren erabilera kaltetzen duela kritikatu du

Garraio publiko mota edozein izanda ere, ibilbide berdinak egiteko prezio berdinak eskatu ditu, eta garraio aldaketak dohainik izatea

| 2019-09-20 12:44:00

Europako Mugikortasun Astean murgilduta gaudela, Udal Gobernua Bilboren irudi perfektua saltzen ari da mugikortasunaren inguruan. Egoera horren aurrean, EH Bilduk Bilbon mugikortasun jasangarria eta eraginkorra lortzeko oraindik egiteko asko daudela adierazi nahi dugu.

Premia horietako bat da Bizkaiko operadore guztietan txartel bakarra ezartzea. Horri buruz inork ez du hitz egin Mugikortasunaren Aste honetan eta, gure ustez, funtsezkoa da lurralde osoan garraio publikoaren erabilera sustatzeko.

Edozein kasutan, EH Bildu Bilbok gogoratu nahi du txartel bakarra ezartzeko, lehenengo ezinbestekoa dela tarifa bateratua ezartzea. Izan ere, ez du inolako logikarik Bilbon ohiko desplazamendu batek, esate baterako, San Mames eta Abando artekoa, lau prezio ezberdin izatea erabiltzen den garraio publiko motaren arabera.

Hurrengo taulan egungo prezioak surrealistak direla ikus genezake, eta tarifa bateratu bat ez izateak bilbotarrontzat gainkostu bat dela argi adierazten du:

IBILBIDEA:  SAN MAMES (TERMIBUS) – ABANDO

(bidaia zuzena)

 

GARRAIO MOTA

PREZIOA (Barik)

Ibilbidearen iraupena

BILBOBUS (linea desberdinak)

0,66 €

12/15 min

TRANBIA

0,73 €

15 min

METRO (L1/L2)

0,91€

10 min

RENFE

1,06 €

7 min

FEVE (Basurtu- Concordia)

1,06 €

10 min

 

 

Baina ez hori bakarrik; izan ere, bi tokiren arteko ibilbide bat egiteko garraio bat baino gehiago erabili behar baduzu, garraio-aldatzeak berriro ere bidaia garestitzen du.  

 

Adibide bezala, San Mames eta Otxarkoaga arteko bidaia jarriko dugu:

IBILBIDEA:  SAN MAMES (TERMIBUS) – OTXARKOAGA

(bidaia konbinatua)

 

Garrraio mota

PREZIOA (Barik)

Ibilbidearen iraupena

LINEA 38 BILBOBUS

0,66 €

30 min

METRO (L1/L2  > L3)

0,91€

28 min

TRANBIA +METRO L3

0,73 + 0,91 – (0,33) = 1,31 €

36 min

RENFE + BUS

1,06 + 0,66 (-0,34) = 1,38 €

35 min

RENFE + METRO L3

1,06 + 0,91 (– 0,39) = 1,58 €

33 min

 

Hortaz, EH Bildu Bilbok tarifa bateratuaz gain, garraio-aldatzeak dohain izatea ere aldarrikatzen dugu, Mugikortasun Aste honetan eta urte guztian zehar ere bai, garraio publikoa sustatzeko, ibilgailu pribatuaren erabilera saihesteko eta mugikortasun jasangarriaren aldeko pausoak emateko funtsezkoa baita.

Laburbilduz, EH Bildu Bilborentzat tarifa bateratua ezartzea ezinbestekoa da garraio publikoaren erabilera sustatzeko eta txartel bakarraren ezaugarriak honakoak izan beharko dira:   

  • Bidaiaren prezioa jatorriaren eta helmugaren arabera.
  • Prezio berdina desplazamendu berdina denean, garraio publiko mota edozein izanda ere.
  • Bizkaia guztiarentzat tarifa homogeneoak ibilbidearen, bidaia kopurua (progresibotasuna) eta errentei lotuta.
  • Operadoreen arteko osaketa.

Hemen aipatutako taulek argi uzten dute zergatik herritar askok ez dute nahi garraio publikoa trukatzea, ordaintzeko prest ez dauden gainprezio bat ordaindu behar dutelako. Hori, argi eta garbi, garraio publikoaren kalterako da.

Bartzelonan, hiritik ibilgailuak ateratzeko eta garraio publikoaren erabilera sustatzeko Mugikortasun plangintza egin ondoren, garraio publikoaren erabilera soilik handitu zen tarifa bateratua ezarri zenean. Bilbon oraindik urrun gaude! EH Bildu Bilbok lan egingo du erronka hori lortzeko.

EH Bildu Bilbok Harro plataformak deitutako manifestazioan parte hartuko du

Bilboko Udalak LGTBIQ+ kolektiboa turismoa erakartzeko baliabide soilik moduan erabiltzea kritikatzen du EH Bilduk

| 2019-09-18 12:40:00

EH Bildu Bilbok Harro plataformak ‘Harro ez da euro pride, gure izenean ez!’ leloarekin, irailaren 21ean, zapatuan, deitutako manifestazioan parte hartuko du. Bruno Zubizarretak Bilboko zinegotziak adierazi duenez, EH Bildu Bilbok “behin eta berriz” salatu du Bilboko Udalak LGTBIQ+ kolektiboa “turismoa erakartzeko baliabide soilik moduan erabiltzen duela, iaz 60.000 eurotik gorako kostua izan zuen Bilbao Bizkaia Harro bezalako ekimenekin”.

“Gainera, orain pauso bat gehiago ematen du eta, Bizkaiko Foru Aldundiaren eta Bilboko Udalaren laguntzarekin, APAOren asanblada orokorra Bilbon izango da. Horren kostua 113.000 eurokoa izango da, horietatik 70.000 euro bilbotarrok eta bizkaitarrok ordaindutakoak”, gaineratu du Zubizarretak. Ildo horretan, azaldu duenez, asanblea horretan EuroPride hartuko duen hiria aukeratzen da, eta “EuroPride LGTBIQ+ kolektiboa merkantilizatzen duen ekimena da, gutxi batzuek etekin ekonomikoak lortzeko”.

Aldiz, adierazi duenez, EH Bildu Bilbok LGTBIQ+ kolektiboaren “benetako ahalduntzearen eta aniztasun sexuala sustatzearen eta lantzearen aldeko apustua” egiten du.  

LGTBI+ baliabideen udal gunea

Horregatik, “Bilbao Bizkaia Harro eredu merkantilistaren ordez”, EH Bildu Bilbok Bilboko Udal Gobernuari LGTBI+ baliabideen udal gunea sortzea eskatzeko mozioa aurkeztu du eta hori irailaren 26ko Osoko Bilkuran eztabaidatuko da. Espazio horrek, zehaztu duenez, bereziki, bi lan ildo izango ditu: “batetik, informazio, babesa eta LGTBI+ ahalduntzea sustatzeko zerbitzua izatea; eta, bestetik, sexu-aniztasunarentzat harrera zerbitzua izatea”.

Horregatik, bere esanetan, “beharrezkoa” da “sexu-identitateagatik edota genero adierazpenagatik diskriminazio forma guztiak ezabatuko dituen eta arlo guztietan tratu berdintasuna eta aukera errealak bermatuko dituen gizarte baten alde aurrerapausoak ematea”. Hori lortzeko, Zubizarretak azpimarratu duenez, “ezinbestekoa” da “Bilbon sexu eta genero aniztasunari buruzko topaketa eta hausnarketa gunea sortzea, Iruñak eta Bartzelonak daukaten moduan”.

Azkenez, Zubizarretak adierazi duenez, “Bilbo LGTBI kolektiboarekiko diskriminazio eta biolentzia gabeko hiri askea, errespetuan oinarritutakoa, benetako berdintasun normalizatuarekin eta aurreiritzi gabekoa izatea nahi badugu, Udal Gobernuak aukera aparta du helburu horretan aurre egiteko”.

EH Bildu Bilbok 17 emendakin aurkeztu ditu fiskalitate justuagoa eta progresiboagoa lortzeko

EH Bilduk ekarpenak jasotzeko bideak erraztu nahi dizkie bilbotarrei eta proposatubilbo@ehbildu.eus helbide elektronikoa martxan jarri du

| 2019-09-17 12:31:00

Irailaren 26ko Osoko Bilkuran 2020. urteko ordenantza fiskalak eztabaidatu eta bozkatuko dira, herritar guztiengan eragin garrantzitsua duen gaia. Bilbok fiskalitate justuagoa eta progresiboagoa behar du eta, zoritxarrez, EAJk eta PSEk egindako proposamena ahalmen ekonomiko txikiena duten bilbotarren kalterako izango da; izan ere, zergen zama bilbotar guztien gainean jartzen du eta, aldiz, enpresa handiak saritzen ditu.

Egoera horri buelta ematen ahalegintzeko, EH Bildu Bilbok 17 emendakin aurkeztu dizkiegu ordenantza fiskalei. Gure helburuak, besteak beste, honakoak dira: ohiko tasak ordaintzeko larri dabiltzan pertsonei laguntzea, ordena erlijiosoei pribilegioak ezabatzea, eta tokiko komertzio txikiari eta langile autonomoei lotutako jarduera ekonomikoa sustatzea.

Bestalde, Zorrotzaurreko irla paradisu fiskal bihurtu nahi du Udal Gobernuak, eta horren kontrako emendakina aurkeztu dugu. Izan ere, enpresa handien irabazi asmoa kontuan hartu gabe onura garrantzitsuak eskaini nahi dizkie Aburtoren taldeak.

Azken finean, bilbotarron eguneroko bizitza hobetzeko neurriak proposatzen ditugu guk, eta ahalmen handiena duenak ordain dezala beretik.

Neurrien artean, etxebizitza hutsek %25eko errekargua izan beharrean %50ekoa izatea eskatzen dugu, etxebizitza parkearen alokairua azkartzeko.  Ildo horretan, begi onez ikusi dugu aurten EAJk gure iazko proposamena onartu izana, dependentzia egoeran dauden pertsonek halabeharrez ezin dutenean euren etxean bizi, Ogasun Higiezinaren ganeko Zergatik (IBI) salbuestea alegia.

Baina guk harago joatea eskatzen dugu eta menpeko egoeran dauden  pertsona guztiak kontuan hartzea: bai zahar-egoitzan baita zentro mediku zein psikiatrikoan bizitzera behartuak daudenek ere, gain ordainketarik ez ordaintzea proposatzen dugu. 

Egoera oso estuan bizi diren bizilagunen zama fiskala arintzeko xedearekin, zaborren eta estolderiaren tasen kasuan, errentaren araberako tasen zehaztapenerako sistema proposatzen dugu, sarrera txikienak dituztenei oinarrizko zerbitzuak bermatu behar baitzaizkie.

Horrez gain, ingurumenaren zaintzarekin kontzientziatuta dauden herritarrak saritu behar direla uste dugu eta, ildo horretan, bosgarren edukiontzia erabiltzen duten pertsonei bonifikazioa aplikatzea eskatzen dugu 2020. urtean; izan ere, jadanik edukiontzien sarea osatuta dago Bilbo osoan eta aurrera pausoak egiten jarraitu behar genuke.

Bestalde, Zorrotzaurreko Eremu Mixtoan egin nahi diren hirugarren erabilerako eraikuntza berriei Udalak inolako zerga onurarik ez aplikatzeko  emendakina aurkeztu dugu, izan ere, badirudi batzuek Zorrotzaurreko irla paradisu fiskal  bihurtu nahi dutela, zergak ia desagerrarazten. EH Bilduk zera defendatzen du: hezkuntza publikoa balioetsi behar dugula esparru publikotik, esparru pribatuko beste jarduera akademikoak saritu barik.

Paradisu fiskalei jarraiki, Estatu Españolak eta, bere eskutik, Bizkaiko Foru Aldundiak edozein jarduera zerga ordaintzetik salbuetsi nahi ditu UEFA Euro 2020rekin harremana daukaten jarduerak. Horren aurrean, Bilbon jarduera ekonomikoa egingo duten enpresek dagozkien zergak derrigor ordaintzeko  mozioa ere proposatu dugu Bilboko Udalean.  

Aipatutako horiek guztiak eta beste batzuk dira ordenantza fiskalei egindako mozioetan jasotzen ditugunak. Fiskalitatea oso garrantzitsua da herritarrentzat eta ezinbestekoa da bilbotar guztien beharrizanak kontuan hartzea ordenantza fiskalak lantzerako orduan; izan ere, EH Bildurentzat lehentasuna herritarrak eta euren beharrizanak dira.

proposatubilbo@ehbildu.eus

Horri lotuta esan behar da, gero eta herritar gehiago direla fiskalitateari buruz eta bestelako gaiei buruz euren beharrizanak, ekarpenak, iritziak, kezkak edota proposamenak helarazten dizkigutenak. EH Bildu Bilboko bulegoko ateak zabalik daude herritarrentzat: lehen, orain eta beti. EH Bilduko zinegotziok herritar guztiak animatu nahi ditugu euren proposamenak egitera, bilbotarron egoera hobetzeko helburuarekin.

Horrela, EH Bildu Bilbotik proposamenak helarazteko bideak erraztu nahi dizkizuegu herritarroi. Horretarako, proposatubilbo@ehbildu.eus helbide elektronikoa jarri dugu martxan. Horren bidez, zuen ekarpenak helarazteko edo hitzordua hartzeko aukera izango duzue, aurrez-aurre EH Bildu Bilboko zinegotziekin egon eta gairen bat zuzenean jorratu nahi baduzue, gurekin elkarlanean.

Inork sentitzen badu herritarren eta zinegotzien arteko distantzia handia dela, animatu nahi zaituztegu aurrera pausu bat eman eta gurekin harremanean jartzera.

Hortaz, interesa duzuen guztiok zuen proposamenak helaraztera edota hitzordua hartzera animatzen zaituztegu proposatubilbo@ehbildu.eus helbide elektronikoaren bidez.

 

Vueltak “gure identitatea aldarrikatzeko aukera paregabea” ematen duela adierazi du EH Bilduk eta herritarrak ikurriñarekin kalera ateratzera animatu ditu

EH Bilduk “gardentasuna” eskatu du eta Bilboko Udalari galdetuko dio zenbat diru eta baliabide bideratu dituen ekimen honetara

| 2019-09-04 12:15:00

Bihar Espainiako Vuelta Bilbora helduko da, eta horrek, zalantza barik, hiria hankaz gora jarriko du.

EH Bildutik karrera pasatzen den ingurura herritarrak ikurrinarekin kalera irtetzera edota balkoietan ikurrinak jartzera animatzen ditugu, txirrindulari guztiak animatuz eta, batez ere, gureak.

Euskal Herria Bilduren ustez, Vuelta Euskal Herritik igarotzeak eta, bereziki, Bilbotik igarotzeak aukera ederra ematen digu gure identitatea aldarrikatzeko. Munduari erakutsiko diogu nazio bat garala. 

Bestalde, Gobernu taldeak ekimen hain potolo honek Bilbon eragin ekonomiko “izugarria” izango duela salduko digu: beti era positiboan. Baina, denok dakigun moduan, balantzeetan irabaziak eta kostuak agertu behar dira.

Alfonso Gil zinegotziak gela honetan esan zuen moduan,  besteak beste, trafikoan aldaketa garrantzitsuak izango dira, eta zalantza barik, herritarren egunerokotasunean eragin handia izango dute.

EH Bilduko taldeko kideon ustez, Bilbok honelako mega-ekimenak hartzen dituenean herritarrei informazio guztia ematea ezinbestekoa da, baina ez bakarrik ibilbidearen informazioa, errepideen mozketena edo Arraiz eta Artxandako bideen mozketena.

Instituzioetatik horrenbeste aipatzen den gardentasunaren izenean, ekimen hauen koste errealari buruzko informazioa ere eman behar dute, jakin badakigu, kostea oso handia dela.

Horregatik, EH Bildu Bilbo taldeak galderak aurkeztuko ditu, herritar guztiok jakin dezagun Bilboko Udalak zenbat diru bideratu duen Espainiako Vueltara. Informazio hau publikoa izan behar da, eta gardena. Izan ere Rugby txapelketa, MTV, Eurokopa edo Vuelta Bilbora erakartzea ez da dohainik.

Horrez gain, zeharkako gastuak zenbatekoak diren galdetuko dugu, hau da, udal baliabideen erabilera: segurtasuna, garbitasuna, elementuak kentzea, instalazio elektrikoak… Hori guztia bilbotarrok ordaintzen baitugu.

Herri honek badaki zer nahi duen: gardentasun politikoa eta identitatearen defentsa. EH Bilduk beti defendatuko du informazio eskubidea eta Euskal Herria nazio bezala aldarrikatzea.

 

 

 

 

 

 

EH Bilduren iritziz aurtengo Aste Nagusia arrakastatsua izan da eta Bilboko Konpartsek egindako lana goraipatu du

Eraso sexistak ekiditeko neurri gehiago eskatu ditu, zezen plazari buruzko kontsulta exigituko du eta udaltzaingoaren jokamolde batzuk kritikatu ditu

| 2019-08-27 11:34:00

 

Aurtengo Aste Nagusia bukatu da eta Euskal Herria Bilduren balorazioa oro har positiboa da. Jaiak benetan politak izan dira; arrakastatsuak eta jendetsuak.Beraz balorazio ona egiten dugu, bai, baina irakurketa honek baditu bere argi-ilunak.

Jaien alderdi oso positiboa Bilboko Konpartsak dira: jai herrikoi, parte-hartzaile eta parekideak lortzeko ehunka pertsonek egin duten lana berriz ere izugarria izan da.Zalantza barik, eurei esker Bilboko jaiak bakarrak dira munduan. Horregatik,  beste urte batez Bilboko Konpartsak zoriondu behar ditugu.  

Horrez gain, Beatriz Sever pregoilariaren eta Itsasne Nuñez txupineraren lana eskertu nahi dugu.“Naizen” Euskal Herriko Adin Txikiko Transexualen Familien Elkarteko bozeramaile da Beatriz eta, bene-benetan, bere pregoia hunkigarria izan zen, aniztasunaren balioa azpimarratuz eta transexualitatearen errealitatea agerian jarriz.

Baina Aste Nagusiak bere alde ilunak ere izan ditu, eta arlo batzuetan serioski lan egin beharra dago, hurrengo jaietara begira.Adibidez, gertatutako eraso sexistak gogor salatu behar ditugu,  eta kasu honetan ere Bilboko Konpartsen jarrera eredugarria goraipatu nahi dugu, segituan protokoloa aktibatu eta kontzentrazioak eta paroak deitu dituztelako, gizartea kontzientzia har dezan.

EH Bilduren ustez, beharrezkoa da Bilboko Udalak eraso sexualen kontrako neurri errealak hartzea.EH Bilduk hainbat neurri proposatu zituen uztailean, jaietan ere emakumeok libre izan (d)gaitezen bermatzeko. Besteak beste: jaietan zehar indarkeria matxistari aurre egiteko protokoloa,  autodefentsa feminista ikastaroak, eta jai egitarauko ekintzak programatzeko orduan genero ikuspegia oso kontutan hartzea.  

Marketinetik harago doazen politikak egin behar ditugu. Izan ere, indarkeria sexista gizon eta emakumeen arteko harreman desoreka estrukturalaren ondorio dira.Horregatik Udal Gobernua ezin da lelo hutsetara mugatu. Udalak ahalegin handiagoa egin behar du indarkeria matxistaren aurkako politikak urte osoan landuz, mugimendu feministarekin elkarlanean arituz eta baliabide gehiago jarriz.

Bestalde, segurtasuna Aste Nagusi honetako beste puntu ilun bat izan dela uste dugu, nahiz eta Aburtok kontrakoa esan eta bikaina izan dela ziurtatu.Guk auzo-poliziaren eredua defendatzen dugu eta horren aldeko Hitzarmena sinatu genuen, polizia herritarrengandik hurbila, arretatsua eta prebentzioan trebatua nahi dugulako.Baina hori ez da Aste Nagusian ikusi dugun polizia eredua izan. Ez bakarra. Prebentzioan lan egin beharrean neurri zigortzaileak hartu dituzte kasu batzuetan eta ondorioak okerragoak izan direla bistan da.

Adibidez, abuztuaren 21eko jokaera guztiz arduragabea eta neurrigabea izan zen. Ez zen ez ordua ezta ere lekua era horretan interbenitzeko. Gau hartan “segurtasun arazo” baten izenean inseguridade arazo larriagoa piztu zuten hiritarrengan.

Eta hori ez da gehiegikeriaren adibide bakarra izan. Asteazken arratsaldean konpartsakide bat bortizki azpiratu, atxilotuta eraman eta 19 ordu izan zuten inkomunikatuta, familiari ezer esan barik.Hemen polizia batzuek Segurtasunaren Aldeko Hitzarmenaren kontra jokatu dute. Aburtoren iritziz balorazioa bikaina da, baina gure iritziz eskasa da Udal Gobernuak segurtasun arloan egindako kudeaketa.

Azkenik, EH Bildutik salatu nahi dugu Udalak berriro ere fondo publikoen bitartez zezenketak sustatzea. Denon diruarekin ari dira sarrerak erosten. Bilboko udalak zezenketei eusteko gastatzen duen dirua zenbatekoa den jakin nahi genuke.Honezkero, Aburtok eta Gilek zezenketak babesteko egindako ahaleginari argi erantzun dio Bilbo hiriak: bilbotarrok ez dugu zezenketarik nahi!Asistentzia hain da eskasa, prentsak ere porrot gisa definitu duela. Lehenengo hiru zezenketek 4.000 inguru ikusle izan zituzten, zezen plazaren aforoa 14.000 pertsonakoa denenean.Zezenketek Bilbon ez dute etorkizunik. Jendeak ez ditu maite eta 2018an zezen plazak 360.000 euroko galera ekonomikoak izan zituen. Alegria handirik dagoenik ez dago Vista Alegren.

Zenbat froga gehiago behar ditu Alkateak? Aburtok herriari kasu egitea dauka behingoz, eta horrelako ikuskizun lotsagarriekin bukatu. EH Bilduk Vista Alegreren erabileraren gaineko eztabaidari adarretatik heltzea proposatzen du, eta herri kontsulta da irtenbideetako bat.