| 2021-07-23 12:24:00

EH Bildu Bilbok Alde Zaharreko Merkatarien Elkartearekin bilera egin zuen atzo, haien beharrak eta kezkak bertatik bertara ezagutzeko, hausnarketak elkarbanatzeko eta, horrela, elkarrekin lan egin ahal izateko, tokiko merkataritzaren egoera hobetzeko helburuarekin.

Bileran izan ziren Rosa Pardo Alde Zaharreko Merkatarien elkartearen presidentea, Janire Torvisco zuzendaria eta Luis Arbiol presidenteordea. EH Bilduren aldetik, Jone Goirizelaia eta Asier Gonzalez udal taldeko bozeramailea eta zinegotzia izan ziren.

Goirizelaiaren esanetan, bilera "oso positiboa eta emankorra" izan da; izan ere, Elkarteak "bere iritziak, kezkak eta ekarpenak helarazi dizkigu tokiko merkataritzaren egoerari buruz, eta hainbat gai jorratu ditugu, besteak beste, merkataritzarako eta ostalaritzarako bonuen kanpaina, Alde Zaharreko segurtasuna, batez ere gauez, eta Alde Zaharreko merkataritzaren sustatzeko neurriak".

Bonuen kanpainari dagokionez, merkatarien aldeko iritzia duela egia bada ere, Goirizelaiak esan du "argi" geratu dela "beste kanpaina bat martxan jarriz gero, finago jokatu beharko genukeela".

"Pandemiak gure kontsumo-ohiturak aldatu ditu, eta, ondorioz, sektore guztiak ez daude egoera berean; hori dela eta, Udalak etorkizunean ezarri beharreko laguntzak sektore bakoitzeko egoera zehatz horietara egokitu behar dira, eta horrela planteatuko dugu", adierazi du Goirizelaiak.

Azkenik, adierazi du EH Bilduk tokiko merkataritzaren alde lan egingo duela, inplikatutako elkarte eta eragileen eskutik, "behar duten horretan lagunduz eta gure babes osoa eskainiz

EH Bilduk SAMUR uztailean hainbat aldiz bertan behera gelditu dela ohartarazi du eta zerbitzua bermatzea eskatu du

Bilbok erreskate eta anbulantzia zerbitzua behar duela uste du, berezkoa eta publikoa, eta etenaldia Udal Gobernuaren kudeaketa txarraren ondorioa dela salatu du

| 2021-07-21 12:21:00

EH Bildu Bilbok kritikatu duenez, dagoeneko hiru egunetan Udal Anbulantzia eta Erreskate Zerbitzua (SAMUR) bertan behera gelditu da, eta bilbotarrak funtsezko zerbitzurik gabe utzi dituzte. Asier Gonzalez zinegotziak adierazi duenez, zerbitzu honen etenaldia Udal Gobernuaren "aurreikuspen faltaren eta kudeaketaren utzikeriaren ondorioa" da.

Horrela, SAMURek "udan urteko gainerako egunetan bezala funtzionatzen jarraitzeko neurriak hartzeko" eta "itxiera gehiago saihesteko" eskatu dio gobernu taldeari.

"Beharrezkoa da Bilbon SAMUR izatea, larrialdia berehala artatzeko, hiria ezagutzen duelako, erreskate egoeretarako prestatuta dagoelako eta suhiltzaileekin eta Udaltzaingoarekin koordinazio ona duelako", adierazi du.  

Ildo horretan, Udal Anbulantzia eta Erreskate Zerbitzuak suhiltzaileei irteeretan laguntzen diela eta larrialdietako laguntza Udal Zerbitzuen Kartan sartuta dagoela gaineratu du. "Bilbo bezalako hiri batek, bere ezaugarriengatik, zerbitzu propio eta publiko azkarra behar du", gaineratu du.

Horrela, EH Bildu "arretarekin egongo dela" egoera hori berriro ez gertatzeko, eta, etendura gehiago gertatuz gero, azalpenak eskatuko dizkiote Udal Gobernuari.

“Espero dugu udan SAMUR zerbitzuaren etenak errepikatzeak arrazoi ilunagoak ez izatea" adierazi du Gonzalezek, Udalak zerbitzu hau etorkizun hurbilean behin betiko baztertzeko duen asmoari buruz.  

 

 

 

EH Bilduk espero du Zorrotzan trenbidea lurperatzeko hitzarmena “berriro ezerezean ez gelditzea", aurreko sinadurarekin gertatu zen bezala

| 2021-07-16 11:44:00

Jone Goirizelaiak, EH Bilduren Bilboko bozeramaileak adierazi duenez, Juan Mari Aburto alkateak eta Raquel Sanchez Garraio, Mugikortasun eta Hiri Agentziako ministroak  Bilboko Zorrotza auzoa zeharkatzen duen FEVEren zatia lurperatzeko sinatutako hitzarmena "berriro ere ezerezean ez geratzea" espero du, 2019ko urtarrilean Sustapen Ministerioaren eta Bilboko Udalaren artean helburu horrekin sinatutako protokoloarekin gertatu zen bezala. 

"Asko dira bete ez diren promesak, beraz, espero dugu hau beste bat ez izatea eta Zorrotza auzoarekin dugun zor historikoari irtenbidea ematea", adierazi du Goirizelaiak. EH Bilduk akordio hori betetzeko lan egingo duela gaineratu du.

Goirizelaiak gogorarazi du Zorrotzako bizilagunek "borroka nekaezina" egin dutela trenbidea auzoaren erdigunetik lurperatzeko. "Espero dugu haien kemena eta pertseberantzia ekintzekin erantzutea oraingoan, eremu horretan egin beharreko lanak eginez. Espero dugu obrak, iragarri duten bezala, 2025aren amaieran amaitzea, bizilagunak nekatuta baitaude itxaropen eta ilusio faltsuekin eta, batez ere, auzoaren erdian tren-jardueraren ondorio kaltegarriak jasatearekin, 21 hildakoren eta istripu askoren sorburu izan baita".

EH Bildu pozik agertu da, azkenean Bilbok barrakak izango dituelako uda honetan, pandemiagatik zigortutako sektore honi lan egiteko aukera emanez

| 2021-07-08 14:36:00

Jone Goirizelaia EH Bildu Bilboko bozeramailea pozik agertu da Bilbok uda honetan barrakak izango dituelako, pandemiagatik egoera larrian dauden ferianteei lan egiteko aukera emango dielako. Ildo horretan, gogorarazi duenez, “EH Bilduk uda honetan barrakak izateko mozio bat aurkeztu ondoren, Osoko Bilkuran akordio bat lortu genuen eta Udal Gobernuak atrakzioak instalatzeko konpromisoa hartu zuen, osasun-neurriak bermatuz”.

Goirizelaiak azaldu duenez, EH bilduko ordezkariek ferianteen sektorearekin bilera egin zuten, eta, horretan, dituzten zailtasun ekonomikoak azaldu zizkieten, urte eta erdiz lanik eta diru-sarrerarik gabe egon ostean. Horrela, alderdi subiranistak mozioa aurkeztu zuen Osoko Bilkuran, eta akordio batera iritsi zen gobernu taldearekin. Akordio horri esker, "Bilboko barruti guztiek barrakak izango dituzte abuztuaren 16tik 31ra, guztira 40 barraka gutxi gorabehera, eta, aldi berean, jai batzordeek hala eskatzen dutenean, barrakak jarri ahal izango dira, betiere aipatutako egunetatik kanpo".

Adibidez, une honetan, eta Santutxuko jai batzordearen lanari esker, auzo honek barrakak ditu, ferianteek lan egiteko aukera dute, eta haurrek eta helduek, berriz, gozatzeko aukera.

EH Bilduren Bilboko bozeramaileak adierazi duenez, "badakigu  ferianteen sektorerako ez dela eszenatokirik egokiena, Etxebarria parkean ezin izango baitute azoka-gunea erabili, baina akordioak aukera emango die uda honetan Bilbon lan egiteko, eta EH Bilduk euren defentsan lan egiten jarraituko du".

Azkenik, gogorarazi duenez, EH Bilduren ekimenez, Bilbao Aurrera Planaren baitan, azoka-esparruen instalazioarekin lotutako tasa espezifikoak % 95 jaistea adostu da, sektore horri laguntzeko.

 

 

Bilboko Udalak aurten barraken instalazioa ahalbidetzeko konpromisoa hartu du, EH Bilduren ekimenez

| 2021-06-24 15:02:00

EH Bilduren bozeramaileak, Jone Goirizelaiak, azpimarratu duenez, talde soberanistari esker, Bilboko Udal Gobernuak aurten barraken instalazioa ahalbidetzeko konpromisoa hartu du, pandemiaren bilakaera eta LABIren neurriak kontuan hartuta, baldintzak sektoreko ordezkariekin negoziatuz eta, pandemia egoera dela eta, osasun neurriak beteko direla ziurtatuz.

Udal Gobernuaren eta EH Bilduren arteko zuzenketa aho batez onartu ostean hartu dute erabakia, talde sobiranistaren mozio baten ondorioz.

Goirizelaiaren hitzetan, akordio "ona" da, eta "espero dugu ferietako langileek uda honetan Bilbon lan egin ahal izatea"; izan ere, gogorarazi duenez, EAEn 200 familiak baino gehiagok bizi duten egoera "oso larria" da. "Urte eta erdi baino gehiago daramate lanik gabe, diru-sarrerarik gabe eta horietako asko zorpetuta. Lan egin ahal izatea besterik ez digute eskatzen ", nabarmendu du.

Ildo horretan, LABIk joan den ostiralean hartutako azken neurriek "uda ezberdin bat iragartzen digute, kultura, kirol eta aisialdiko jarduera batzuk malgutasun handiagoz egin ahal izateko". "Bilboko tabernetara, antzokietara, ikuskizunetara joan ahal bagara, ezin izango gara barraketara joan, beharrezko segurtasun-neurriak errespetatzen badira? Ez luke zentzurik ", adierazi du.

Goirizelaiak gogorarazi duenez, Euskal Herriko beste herri eta hiri batzuetan ere hasi dira lanean; Iruñean, esaterako, barrakak dituzte, Gasteizko auzoetan Udalak ahalbideratuko ditu, eta Donostiako Udalak ere atrakzioak onartuko ditu uda honetan. "Atrakzioak ez dira aurreko urteetan bezala izango, argi dago, eta hauek, beharrezko segurtasun neurriak izango dituzte", zehaztu du.

Hori dela eta, bere ustez, "ez dago aitzakiarik Bilbo uda honetan barrakarik gabe geratzeko". "Bilboko Udalak, beharrezko segurtasun neurriak bermatuz, atrakzioak instalatu ahal izateko lan egin behar du. Ferietako langileek lan egiten uzteko eskatzen digute eta euren bidezko aldarrikapenari erantzun behar diogu", nabarmendu du.

Bestalde, EH Bilduk, Aurrera Planaren barruan, barrakak jartzearekin lotutako tasa espezifikoak aldatzeko aukera aztertzeko eskatu zuen jatorrizko mozioaren bigarren puntuan. Goirizelaiak esan du gai hori Bilbao Aurrera Planaren jarraipen-batzordeari helarazi diotela, eta bertan aurrera egitea espero dutela.

 

 

 

• «
• 1
• 2
• 3
• 4
• 5
• 6
• 7
• 8
• ...
• 23
• 24
• »