AKTUALITATEA

| 2025-03-27 14:35:00

Patxi Xabier Fernandez EH Bilduko zinegotziak gaur adierazi duenez, Udal Gobernuak bizkarra eman die herritarrei, San Ignazio, Olabeaga, Deustu, San Adrian eta Uribarri auzoetako frontoiak estaltzeko plangintza bat egiteko EH Bilduk aurkeztutako mozioari uko egin diolako. 

Mozio hori gaurko Osoko Bilkuran eztabaidatu da. Bertan, Fernandezek gogorarazi du Bilbok 17 frontoi dituela gaur egun, batzuk dagoeneko estalita, eta beste auzo batzuetan, berriz, bizilagunen aldarrikapena izaten jarraitzen duela. 

Azaldu duenez, frontoiek "funtzio anitza" beteko lukete estalkiarekin; izan ere, eguraldia askotan lagun ez dela kontuan hartuta, espazio horiek kirola egiteko lekua izateaz gain, harreman pertsonalak errazteko eta sendotzeko balioko lukete, baita kirolarekin lotura zuzenik izan behar ez duten auzoa dinamizatzeko jarduerak ahalbidetzeko ere. 

Udal Gobernuak erabilitako kostu handiaren argudioari dagokionez, frontoi bat estaltzea gastua edo inbertsioa den galdetu du Fernandezek. "Auzoen azpiegitura erabilgarriak biderkatzea, zer da, gastua ala inbertsioa? Auzoetako bizimodua hobetzea, kirolerako sarbidea handituz, horretarako azpiegitura kopurua handituz. Zer da, gastua edo inbertsioa?", galdetu du. 

Bere ustez, "frontoi bat estaltzea inbertsioa da, gure auzoen eta auzotarren bizi-kalitatea hobetzeko inbertsioa". "Tamalez, EAJrentzat eta PSErentzat ez da horrela", gaineratu du.

Gainera, bere mozioaren bidez, EH Bilduk hurrengo aurrekontuen inguruko proposamen bat egitea eskatzen zuela zehaztu du, "ez zen jada egitea eskatzen, ezta frontoi guztiak batera egitea ere, baizik eta plangintza bat egitea".

Azkenik, EH Bilduko zinegotziak azaldu duenez, gobernu taldeak "ez du negoziatzeko inolako borondaterik erakutsi akordio batera iristeko, eta horren emaitza da bilbotarrek galtzen dutela".