AKTUALITATEA

| 2025-05-29 17:00:00

Bilbon larrialdi klimatikoari aurre egiteko helburuarekin EH Bilduk aurkeztutako  bi proposamen baztertu ditu Gobernu taldeak (EAJ-PSE); alde batetik, hiriko parkeetan eta egonaldi eremuetan zuhaiztia indartzeko plan bat martxan jartzea eta, bestetik, Atxuritik eta Abusutik igarotzean Nerbioi-Ibaizabal ibaiaren ertzak egokitzeko eta birnaturalizatzeko plan bat aktibatzea. 

Zuhaiztia indartzeko planari dagokionez, Garazi Pereak EH Bilduko zinegotziak gogorarazi du, Lurralde Plan Partzialaren arabera, Bilbon bero-boladak eragin handia dutela. Fenomeno hori areagotu egiten da urteekin eta osasunerako arriskuak areagotzen ditu, bereziki adinekoen, haurren eta kolektibo zaurgarrien artean. Esan duenez, zuhaiztiak dira hiriko beroari aurre egiteko tresna eraginkor, osasungarri eta iraunkorrenetako bat. 

Ildo horretan, "OMEk hiru biztanleko zuhaitz bat gomendatzen badu ere, Bilbon hamar biztanletik ia ez dugu zuhaitz bat, eta horrek berdeguneen gabezia kezkagarria dela erakusten du". 

Hori dela eta, Udalak hiria berdatzeko plan integral bat bultza dezala eskatu du EH Bilduk, "denbora jakin batean landatu beharreko zuhaitz kopurua aintzat hartzeaz gain; parkeetan, plazetan, oinezkoentzako kaleetan eta egoteko guneetan zuhaitz autoktonoak landatzea (gure klimara eta ekosistemara egokituak) ere kontuan hartuko duen plana, alegia". 

"Bereziki garrantzitsua da espazio publikoan berritze-lanak egiten diren bakoitzean zuhaitz-masaren dentsifikazioa hiri-diseinuaren funtsezko irizpidetzat hartzea", nabarmendu du Garazi Pereak. 

Paris, Viena eta Bartzelona bezalako hiri aurreratuenek horrelako planak dituztela adierazi ondoren, "tamalez Bilbok ez duela planik, eta gobernu taldearen borondate faltagatik ez duela epe laburrean izango", esan du. "Beste behin ere Bilbo berdetzeko aukera galtzen dugu, estetikaz haratago, ezinbesteko beharra izan arren". 

Nerbioi-Ibaizabal 

Bestalde, Karlos Renedok, EH Bilduko zinegotziak, Atxuri eta Abusuko tartean, Nerbioi – Ibaizabal ibaiaren erriberak egokitzeko eta birnaturalizatzeko Plana gauzatzeko beharraren garrantzia azpimarratu du, itsasadarra hiriaren ardatz egituratzaileetako bat dela kontuan hartuta. 

Ekologistak Martxan-ek 2024ko ekainean aurkeztutako plan bat dela EH Bilduren proposamenaren oinarria esan du Renedok, eta horren barne garatu beharko liratekeen jarduketak azaldu ditu. Proiektu hori bultzatzea Udalari dagokiola ziurtatu du. "Aurrekontu jakin bat duen ekintza-plan bat da edozein proiektu bultzatu ahal izateko lehen baldintza", adierazi du. 

Baina, gainera, gogorarazi duenez, itsasadarrak hainbat organo eskudun ditu, "Abusuko oinezkoen pasabideraino Kostas zuzendaritzarena da, Estatuari dagokio obren gaia, ibaian gora URAren eskumena da, eta ertz eta sarbide gehienak udal-eskumenekoak dira". Hori dela eta, "hitzarmen bat egin eta eraberritzeari nola aurre egin adostu nahi bada, zalantzarik gabe, beharrezkoa da proiektu zehatz bat izatea", nabarmendu du. 

Renedok adierazi duenez, bai Trantsizio Ekologikorako Ministeriotik bai Europatik horrelako jardueretarako dirulaguntzak gaitu dira, baina "horiek eskuratzeko modu bakarra Plan bat izatea da". 

Hala ere, Udal Gobernuak "plan hau martxan jartzeko gure ekimenari uko egiten dio, aukera pasatzen utziz eta bilbotar askoren bizitza hobetzeko aukera leiho bat galduz, Atxuri eta Bilbo Zaharra auzoetatik Etxebarri eta Arrigorriagako mugaraino ibaian gora itsasadarra berreskuratuz".