AKTUALITATEA

| 2024-11-29 11:19:00

Maria del Rio EH Bilduko bozeramaileak adierazi duenez, gaur Udalbatzan onartutako udal aurrekontuaren proiektuak "ez du helbururik, ez ibilbide-orri argirik ezta politika eraldatzailerik ere".

"Ez dakigu zein den aurrekontu-proiektua gidatzen duen helburua, baina badakigu gure proposmenekin posible izango zela etxebizitza-parke publikoa handitzea, zerbitzu publikoak eta zaintza-zerbitzuak hobetzea, aztarna ekologikoa murriztea, tokiko ekonomia bultzatzea, auzoak indartzea eta komunitate-egiturak ehuntzea", adierazi du Del Riok gaur Bilboko Udalean egindako aurrekontu-eztabaidaren osoko bilkuran. 

Horren ildotik, Del Riok azaldu du EH Bilduren proposamen "zehatzak, egingarriak, eraldatzaileak eta eraginkorrak" zirela "pertsonen bizitza hainbat alderditan hobetzeko", eta proposamen horien helburua "etorkizunari aurrea hartzea" dela, "ditugun erronka ugariei aurre egiteko, inertziak gainditzeko eta Udalaren kontuetan anbizioz eta eraginkortasunez jokatzeko". 

Hala ere, beste urte batez "aukera galdu" baten aurrean gaudela deitoratu du, "gobernu taldetik haratago, borondate ezberdinak batuko lukeen aurrekontu bat onartzeko aukera, hain zuzen ere". 2002tik Bilboko udal aurrekontuak gobernu taldean ez dagoen ezein talderen babesik izan ez duela gogorarazi ondoren, adierazi du "negoziazioan sinesten duen gobernu bat behar dugula, akordioan sinesten duena, ez bakarrik gai demokratiko batengatik, baita eraginkortasunagatik ere". 

Horrela, EH Bilduk osoko zuzenketa aurkeztu duela azaldu du, udal gobernuaren aurrekontu proposamena itzultzeko eskatuz, "ez guztiaren aurka gaudelako, gauza batzuk gehiago gustatzen zaizkigu eta beste batzuk gutxiago; baina sinetsita gaude gauzak beste era batera egin daitezkeela, modu negoziatuago eta parte-hartzaileago batean". 

Bestalde, Karlos Renedok zehaztu duenez, udal-aurrekontuak ibilbide-orri bati erantzuteko eta bilbotarren beharrei erantzuteko, EH Bilduk 39 zuzenketa partzial aurkeztu zituen, 30 milioi eurotik gorakoak, hainbat helbururekin: etxebizitza-parke publikoa handitzea, etxebizitza hutsak mobilizatzea, tokiko merkataritzarako eta gizarte-ekonomiarako zuzeneko laguntzak, Bilbo berdatzea eta deskarbonizatzea, auzoetako obrak, euskararen sustapena eta gazte-politikak, bai eta Etxez Etxeko Arreta Zerbitzua, SMUS eta zaintzaileentzako zaintza-zerbitzuak hobetzea ere. 

Esan duenez, "Udal Gobernuak onartu dituen zuzenketek helburuetan aurrera egiten lagunduko badute ere, ez dira nahikoak gure hiriak behar dituen politika eraldatzaileak martxan jartzeko". Gainera, horien onarpena "EAJ-PSEk ezarritako kupoaren ondorio da, eta ez hiriaren beharrei buruzko negoziazio eta elkarrizketa prozesu baten ondorio", gaineratu du. "Egindako 39 proposamenetatik bost baino ez dituzte onartu eta 719 milioiko aurrekontutik 500.000 euroko balio irrigarria dute", adierazi du. 

Ibarsusi futbol zelaia, etxebizitza hutsa, euskararen sustapena, zaintzaileentzako laguntza eta ekonomia soziala 

Nolanahi ere, Renedok adierazi duenez, "gure zuzenketak onartzeari esker, Udal Gobernuak hiriko etxebizitza hutsak kanonaren bidez mobilizatzeko konpromisoa hartu du". "Akordio garrantzitsua da, kontuan hartuta etxebizitza dela Bilboko arazo larrienetako bat, 29.000 pertsona inguru baitaude Etxebiden inskribatuta", adierazi du, eta onartutako neurriak Bilbon dauden 9.231 etxebizitza hutsak  mobilizatu ditzakeela gaineratu du. Hala ere, Renedok faltan bota du Bilbon etxebizitzarako eskubidea bermatzeko Udal Gobernuaren apustu handiago bat. Izan ere, EH Bilduk sail horretara bideratutako aurrekontua hirukoiztea eskatzen zuen. 

Zainketen arloari dagokienez, "Zaintzea programarako partida handitzea lortu dugu, hau da, zaintzaileei laguntzeko zerbitzua". "Zerbitzua deszentralizatzeko eta hedatzeko aukera bat da, baita programa honetan besteren konturako zaintza-lanak egiten dituztenak sartzeko ere", adierazi du Renedok. Hala ere, esan duenez, "Etxez-etxeko zerbitzurako edo oinarrizko gizarte zerbitzuetarako partida garrantzitsuak geratu dira tintontzian, besteak beste". 

Bestalde, Renedo pozik agertu da, EH Bilduren ekimenez, Ibarsusiko futbol-zelaian belar artifiziala aldatuko delako. Otxarkoagako eta Txurdinagako auzotarren aspaldiko aldarrikapena da, 400 haurrek eta gazteek erabiltzen duten zelaia egoera oso txarrean dagoelako. 

Euskarari dagokionez, Renedo pozik agertu da euskararen erabilera sustatzeko partidak handitu direlako. Halaber, EH Bilduri esker, gizarte-ekonomiako enpresen sustapenerako laguntzen deialdi espezifiko bat irekiko dela adierazi du,  marka garatzeko, hedatzeko, marketinerako eta salmentarako estrategiak egitea ahalbidetuko dutenak, bai eta enpresak bultzatzeko beharrezkoak diren tresnak digitalizatzearekin edo abian jartzearekin lotutako beste batzuk ere. 

"Akordio garrantzitsuak dira, ez dugu zalantzarik, baina kanpoan geratzen dira trantsizio ekologikoa bezalako ardatz garrantzitsuak, hiriarentzat funtsezkoak diren proposamenekin, hala nola eskola-inguruneak berdetzea eta Boluetatik Abusuraino Ibaizabal naturalizatzea eta berreskuratzea", adierazi du. 

Bere esanetan, auzoetan irisgarritasun-plan bat egiteari ere ez zaio heltzen, ez eta Auzokide Plana handitzeari eta tokiko merkataritza sustatzeko bonuari ere.  Kontuan hartzen ez diren beste kontu batzuk gune kogestionatuak sortzea eta zabaltzea edo etxegabetasunari aurre egiteko urratsak emateko eskatutako partida dira, nahiz eta 600 pertsonak kalean lo egin Bilbon. "Udal Gobernuak ez die jaramonik egin horiei guztiei. Hau zozketa bat da eta guri apurrak tokatzen zaizkigu", deitoratu du Renedok. 

Horregatik guztiagatik, EH Bilduk aurrekontuaren proiektuaren aurka bozkatu du. Hala ere, Maria del Riok EH Bildu negoziatzeko eta akordioak lortzeko prest dagoela adierazi du. "Espero dugu, behingoz, Udal Gobernuak gure proposamena jasotzea eta gobernantza kooperatiboko eredu bat Bilboko Udalean instalatzen joatea, hau izan dadin osoko zuzenketa bat aurkezten dugun azken aldia eta aurrekontuari ezetz bozkatzen dioguna", amaitu du.