AKTUALITATEA

EH Bilduk salatu du Atxuriko kantxak ixtea udal gobernuak urritik hartutako erabaki politikoa dela, eta ez duela etxerik gabeko pertsonen egoera konpontzen

| 2022-01-28 11:43:00

Alba Fatuartek, EH Bildu Bilboko zinegotziak, gaur salatu duenez, Atxuriko kantxen gaueko itxiera, non etxerik gabeko pertsonak lo egiten zuten, EAJ-PSE udal gobernuak urritik hartutako “erabaki politiko” bat da, eta, hori justifikatzeko, “barrutiko kontseiluaren erabilera gaiztoa egin du, bizilagunak parapeto gisa erabiliz”.

Horren harira, Fatuartek zalantzan jarri du barrutiko kontseiluaren bilerarako deialdia, eta galdetu du ea zergatik ez ziren deitu Atxuriko Harrera Sarea, Ongi Etorri Errefuxiatuak, Atxurigorri, SOS Arrazakeria edo Atxuriko eskolako IGEak. «Agian, kontuak ateratzen ez zitzaizkizuelako ?», galdetu du.

Amaia Arregi eta Juan Ibarretxe, Segurtasun eta Gizarte Ekintzako zinegotzien, agerraldian egin ditu adierazpenok Fatuartek, Atxuriko kantxen itxieraren aurrean azalpenak emateko EH Bilduk eskatutakoa, hain zuzen ere.

EH Bilduko zinegotziak adierazi du Atxurin lo egiten zuten etxerik gabeko pertsonak “bizikidetzaren ustezko porrotarekin eta auzoaren degradazioarekin lotzeko asmo manipulatua” egon dela eta ziurtatu du kantxen itxierak “ez diola ezer positiborik ekarri auzoaren egoerari”.

Ildo horretan, auzoan egindako polizia-jarduketei buruz galdetu du, hala nola atzerritarrei buruzko jakinarazpenak ematea edo hertsapen-teknikak erabiltzea, besteak beste, gazteak megafoniaren bidez musika militarrarekin esnatzea. Praktika horiek, bere ustez, “pertsona horien duintasunaren eta eskubideen aurka egiten dute”.

Fatuartek adierazi duenez, hezkuntza-komunitateek eta Atxuri inguruko erakunde gehienek Udalak hesi horiek kentzea eta plaza eta topaleku ziren kantxa batzuk berreskuratzea nahi dute. Horrela, gogora ekarri du 300 pertsona baino gehiago manifestatu zirela “lotsaren” hesiak jartzen hasi ziren egunean, eta atzo ere beste elkarretaratze bat izan zela udaletxearen aurrean, helburu berarekin.

"Itxiera ez da irtenbidea, kaleetan lo egiten duten 300 pertsona baino gehiago ez baitira desagertuko, ikusezinagoak eta ahulagoak baino ez dira izango", adierazi du. Azkenik, adierazi duenez, “egoera horren aurrean, 2015etik aterpetxe berririk ez dugunean, gobernu-taldeak nahiago du erromesentzako aterpetxe bat ireki, etxerik gabeko pertsonentzako aterpetxe bat baino”.