EH Bildu Udal Gobernuaren aldetik Osoko Bilkuran onartutako proposamen askoren gauzatze maila eskasa dela kritikatu du


| 2021-12-15 13:27:00

Jone Goirizelaia EH Bildu Bilboko bozeramailea kezkatuta agertu da Osoko Bilkuran onartutako proposamenen gauzatze maila eskasa dela eta, besteak beste, mugikortasunari, euskarari eta irisgarritasunari dagokienez.

Besteak beste, EH Bilduren ekimenez, Osoko Bilkurak konpromisoa hartu zuen Eusko Trenbide Sareari eskatzeko amaitu dezala Bilboko metroaren 4. linearako informazio-azterlana idazteko zerbitzua, azterketa hori amaituta eta parte hartze prozesuaren ondoren 4. linearako aukerarik egokiena onartuta, ahalik eta lasterren has dadin eraikuntza-proiektuaren lizitazioa.

Goirizelaiak adierazi duenez, gobernu taldeak “egin duen gauza bakarra akordio hau Euskal Trenbide Sarera bidaltzea izan da, eta ez dakigu erantzun duen, zer erantzun duen edo zer unetan dagoen idazketa, hiriaren mugikortasuna hobetzeko ezinbesteko azpiegitura denean”.

Ildo horretan, kritikatu du “akordioak betetzea ezin dela mugatu akordioak erakundeei helaraztera jarraipenik egin gabe”, eta hainbat gaitan horretara mugatu dela udal gobernuaren jarduna gaineratu du.

Adibidez, Burtzeñako zubia estaltzeko alternatiba aztertzeko konpromisoari dagokionez, honako hau baino ez du erantzun: proiektua Barakaldoko Udalarekin partekatu duela eta ez dakigu horri buruz ezer zehaztu duten ala ez.

“Eta gauza bera gertatzen da kirol federazioen nazioarteko ofizialtasuna sustatzeko konpromisoarekin eta banketxeei beren bulegoetan leihatila zerbitzua eguneroko ordutegian eskaintzeko eskaerarekin. Gobernuak akordioa soilik bidaltzen du, besterik egin gabe”, nabarmendu duenez.

Bestalde, salatu du Bilbobusen egungo lineei buruzko azterketa egiteko dagoela oraindik, EH Bilduk eskatu bezala, eta horrek baldintzatu egiten duela beste akordio batzuk gauzatzea, hala nola egungo lineak Bilboko auzoen beharretara egokitzea, besteak beste.

Era berean, azaldu duenez, “ez da gauzatu Udalean euskararen erabilera areagotzeko akordioa, ez da ezarri eskola-bideen programa, ezta aniztasun funtzionala duten pertsonen elkarteetako pertsonen parte-hartzearekin irisgarritasun unibertsalean aurrera egiteko jarduera-irizpideak ezartzeko konpromisoa ere, eta ez dakigu Bilbok agroekologiaren aldeko hirien sarearekin bat egin duen”.

 Beraz, udal gobernuaren kudeaketak, “akordioak betetzeari dagokionez, eskasa izan da, bilbotarrekiko erantzukizun eta konpromiso falta erakusten baitu, eta, hartutako konpromisoak % 100ean betetzeko eskatzen diogu”.