AKTUALITATEA

| 2025-11-05 11:38:00

EH Bilduko udal taldeak mozio bat aurkeztu du, Bilbo osoan eta bere auzoetan turismorako gehieneko harrera ahalmena ezartzea eskatzeko, gutxienez, turismo ostaturako plazen eskaintza osoaren eta bertan bizi den biztanleriaren arteko erlazioa irizpide gisa hartuta. 

Garazi Perea eta Karlos Renedo EH Bilduko Bilboko zinegotziek prentsaurreko batean adierazi dutenez, proposamen horren bidez "neurrigabeko boom turistikoaren" ondorioei aurre egin nahi diete. Horren ildotik, Pereak gogorarazi du urtero Bilbok "errekorra" duela turisten hazkundean. "Abuztuan bakarrik, 313.423 ostatu-gau erregistratu ziren Bilbon, hiriko biztanleria 350.000 pertsonara iristen ez denean", zehaztu du. 

Halaber, eraikinei erabilera turistikoa emateko funtsek egindako hainbat hainbat eragiketa zerrendatu ditu. Adibidez, "Mazarredoko 6 zenbakiko eraikina, 240 bulego txiki dituena, hotel-negozio bihurtzea; Matikoko Epalza kalean 54 logelako hotel berri bat irekitzea; Sarrikon beste apartamentu bloke handi bat; Urquijo zumarkalean Correosen dagoen eraikin handiaren enkantea, ziurrenik beste funts baten eskutik hotel-erabilera izango duena; edo Zabalbideko bizilagunek salatutako eragiketa, funts putre batek apartamentu turistikoak irekitzeko". "Eta hauek lagin txiki bat besterik ez dira", adierazi du. 

Testuinguru horretan, esan duenez, gazteak "gero eta kritikoagoak dira turismo-industriarekin". Izan ere, Eusko Jaurlaritzak egindako inkesta baten arabera, "%75ek uste dute eragin negatiboa duela, % 72ak uste dute gutxi edo batere jasangarria dela, eta % 91ren iritziz  etxebizitzen prezioen igoeraren erantzule direla". "Agindua argia da, gehiegizko hazkunde horri mugak jartzeko garaia da", azpimarratu du. 

Hala ere, udal gobernuak astelehen honetan iragarri duenez, "2,6 milioi euro erabiliko ditu turismoa sustatzeko, 2025ean baino %19 gehiago". "Argi dago EAJren eta PSEren estrategia mugarik gabe hazten jarraitzea dela", ohartarazi du. Horren aurrean, EH Bilduk "etxebizitzak, eraikinak, auzoak eta hiria bera irensten dituen turismo industriari mugak jartzeko" proposamenak egin ditu. 

Harrera-gaitasuna

Horrela, EH Bilduk, bere mozioaren bidez, hiri osoan eta bere auzoetan harrera turistikorako gehienezko ahalmena ezartzeko eskatu du. Renedok azaldu duenez, Turismoaren Mundu Erakundeak honela definitzen du harrera- edo karga-gaitasuna: leku turistiko bat bisitatu dezaketen pertsonen gehieneko kopurua, ingurune fisiko, ekonomiko edo soziokulturalari kalterik egin gabe eta bisitarien esperientziaren kalitatea modu onartezinean murriztu gabe. 

Esan duenez, "munduko hiri askotan erabiltzen ari den" tresna bat da, "gehiegizko kontzentrazioak sortzen dituen arazoak saihesteko: etxebizitzaren garestitzea eta bizilagunen kanporatzea; espazio publikoen gainokupazioa; azpiegituren saturazioa, hala nola garraio publikoa edo garbiketa-zerbitzuak, eta nortasunaren eta espazio sinbolikoen galera". "Bilbotarrok dagoeneko pairatzen ari garen ondorioak, batez ere zonalde jakin batzuetan bizi direnak", gaineratu du. 

Bere ustez, "beharrezkoa" da indize hori ezartzea hainbat gai kontuan hartuta, hala nola "bizilagunen pertzepzioa, espazio publikoaren erabilera edo hirirako nahi dugun eredu ekonomikoa, frogatuta baitago turismo gehiago izateak ez duela aberastasun gehiago esan nahi, baizik eta lan prekario gehiago eta nazioarteko inbertsio-funtsen etorrera". 

Adierazi duenez, ohe turistikoen eskaintzaren eta bertan bizi diren pertsonen kopuruaren arteko erlazioa "abiapuntu eta kalkulatzeko erraza" da, eta "eskaintza turistiko osoa arautu eta mugatzeko aukera emango digu, ostatu berriak ezar daitezkeen auzoak eta dagoeneko gainezka daudenak eta, beraz, murriztu behar direnak ezarriz".

"Hiriko ostatu turistikoak eta oinarrizko eskubideen bermean, etxebizitzarako eskubidean eta bizilagunen bizi-kalitatearen hobekuntzan oinarritutako hiri-eredu jasangarria bateragarri egiteko beharra arautzen lagunduko duen akordio batera iristea espero dugu", amaitu du.