AKTUALITATEA

Aisialdi eredu alternatibo bat garatzeko gazteek autogestionatutako Errekaldeko Etxarri gaztetxearen aurkako ekintza "neurriz kanpokoa" dela uste du EH Bildu Bilbok

| 2025-04-04 10:48:00

EH Bildu Bilbok "neurriz kanpokotzat" jo du Errekaldeko aktuazio poliziala, eta Etxarri gaztetxearen hustutzea gazteei alternatibarik eskaini gabe egin izana deitoratu du. 2014. urtean bestelako aisialdi-eredu bat garatzeko espazioa abiarazi zuten gazteek, auzoaren beharrak asetzeko helburuarekin. Gainera, Ertzaintzak gomazko pilotak erabili izana kritikatu du, horren ondorioak aski ezagunak dira Bilbon. 

"Errekaldeko gaztetxea hustutzea ez luke izan behar, inola ere, egoera honi heltzeko modua. Udal gobernuak aurrea hartu eta gazteekin aisialdiko eta ekipamenduetako alternatibak jorratu beharko lituzke", adierazi du EH Bildu Bilbok. Gaineratu duenez, “auzoetako ekimen horiek ez dira kasualitatearen ondorio, baizik eta auzoetan dauden benetako premien ondorio, udal-gobernuak erantzun beharko lituzkeenak". 

Ildo horretan, Errekalde auzoak Kukutzaren adibidea izan zuela gogoratu du EH Bildu Bilbok, eta hain zuzen ere, Etxarri gaztetxeak auzoan utzitako hutsunea bete duela azken hamaika urtetan. 

Azken batean, EH Bilduren ustez, egoera horrek agerian uzten du, besteak beste, hiri-ereduaren eta udal-gobernuak gazteei eskaintzen dizkien alternatibei buruzko eztabaidaren beharra, aisialdiari, etxebizitzari, ekipamendu publikoei eta kulturari dagokienez, besteak beste”. "Hiria gobernantza kooperatiboko eredu baten bidez eraiki beharko litzateke, bizilagunei eskua luzatuz", nabarmendu du.