Klima Araba 2050 estrategiaren parte-hartze prozesua luzatzea eskatu du EH Bilduk

Lurraldearen deskarbonizazioa lortzeko bide orria zehaztu nahi da horren bitartez eta, beraz, toki erakundeen zein gizarte eragileen parte-hartzea bermatu behar da, EH Bilduren ustez

| 2021-12-07 12:41:00

Klima Araba 2050 estrategiaren diseinu eta plangintzarako parte-hartze eskasa dela-eta, plan estrategikoa osatzeko lanak luzatzea eskatu du mozio bidez EH Bilduk Arabako Batzar Nagusietan.

Legealdiaren hasieran abiatu zuen Klima Araba 2050 estrategia osatzeko parte-hartze prozesua, baina EH Bilduk salatu du “oso parte-hartze eskasa” izan dela: besteak beste, 333 kontzejuren iritzia jasotzeko ez da biderik ezarri, eta parte hartzera gonbidatutako eragile sozialen % 10ek baino ez du parte hartu, Kike Fernandez de Pinedo EH Bildu Arabaren bozeramailearen esanetan.

“Lurraldearen deskarbonizazioa lortzeko bide orria zehaztu nahi da eta, beraz estrategia hau arrakastatsua izateko hasieratik bukaeraraino gizarteratu behar da, ahalik eta adostasun zabalena izateko. Horregatik, garrantzia berezia dauka hasieratik diseinatu den prozesu parte-hartzaile egokia eta aberatsa ziurtatzea”.

Argantzonek omenaldia egingo die 1936an herrian eraildako 11 pertsonei

Eguerdiko 12:00etan egingo den ekitaldi batean, memoriaren marka bat inauguratuko da, krimen horiek ahaztuak izan ez daitezen.

| 2021-12-07 09:37:00

Argantzongo Udalak frankismoaren biktimak omentzeko ekitaldia antolatu du abenduaren 12rako. Kolpistek abian jarritako beldurrezko estrategiaren barruan, Trebiñun ezkerreko ideologien, errepublikarren, abertzaleen edo anarkisten aurkako errepresioak zauri handia utzi zuen. Argantzonen kasuan, 1936ko uztailetik abendura bitartean, gutxienez 11 pertsona hil ziren “Las Conchas” izeneko eremuan, erreka alboan. Erreketeek eta falangistek osatutako eskuadroiek egin zituzten krimenak, eta tokiko agintari militarren laguntza izan zuten. Biktimak herriko hilerrian erregistratu eta lurperatu zituzten.

Orain arte, horietako sei baino ezin izan dira identifikatu: Juan María Codina Bañuls, Pedro Antero Gorrotxategi Aldai, Joaquín Hernández Tabera, Inocente Muro Fernández, Manuel San Juan Caño eta Agapito Vadillo Porres. Gainerakoak ezin dira identifikatu, eta haien gorpuzkiak hilerriko hezurtegian daude orain, eta, beraz, ezinezkoa da berreskuratzea.

Omenaldi ekitaldi horretan, oroimenaren marka bat inauguratuko da, hilerritik metro gutxira dagoena. Hildakoen senideak eta eskulturaren egilea den Iñigo Arregi ere ekitaldian izango dira. “Oroimenaren marka horrekin eta omenaldi-ekitaldi honekin, gure herrian hildako hamaika pertsonak ekarri nahi ditugu gogora. Baina, gainera, frankismoaren biktima guztiak omentzeko balio izatea nahi dugu. Argantzonek zor bat zuela uste genuen, eta horregatik jarri nahi dugu gure harri-koskorra oroimenaren alde lan egiteko, baina baita diktaduraren biktima guztiei justizia eta erreparazioa emateko ere”, adierazi du Argantzongo alkate Pablo Ortiz de Latierrok.

Zalduondok euskara sustatuko du bere jatorria gogoratuz

Herriaren izena duen pin bat banatuko da, Donemiliagako kodize zaharrean agertzen zen bezala, herri euskaldun baten sinbolo gisa.

| 2021-12-06 09:14:00

Euskararen Eguna dela eta, Zalduondok euskara sustatzea atzera begira erabaki du. Horrela, “Zalduhondo” izena duen pin bat banatuko da, Zalduondo herri euskalduna izan zen, den eta izango den balioa emateko asmoz. Izan ere, herriaren existentziari buruz ezagutzen den lehen dokumentua “Donemiliagako Goldea” da, 1.025ekoa,non esaten den Zalduhondok “2 burdingolde” ordaintzen zituela zerga modura. Halaber, jakin badakigu, XVI. mendean inkisidoreek euskal interpreteak bilatzen zituztela inguruan sorginkeriaz salatutako pertsonekin komunikatu ahal izateko, hauek “galdekatzeko” asmoz. Hortaz, Zalduondon euskarak bizirik iraun du urte luzetan mendietan (Urdasakon, Beorlatza, Marisoro), bideetan (Zumarraindi, Luzuriagabidea, Bidezahar...), auzoetan (Iturribarri, Torrelarre, Goikoaldea...), ibaietan (Ametzaga, Uiar...) eta gure hitzetan (olbea, atsuna,...), altxora bailitzan.

 

Gaur egun, Zalduondoko herritarren %42,3 euskaldunak dira eta %18,4 ia euskaldunak. Gutxi balitz, Zalduondo da Euskal Herri osoan euskararen hazkunderik handiena izan duen udalerria, eta euskalduntzearen sinbolo bihurtu da. “Ia 1.000 urte igaro dira Zalduhondo San Millan de la Cogollako monasterioko koderik baliotsuenetako batean tintaz erregistratu zenetik. Euskaraz bizitzeko, euskaraz jakitetik hitz egitera igarotzeko gai bagara, seguru beste mila urte egongo direla. Horixe da gure erronka”, azaldu du Gustavo Fernandez Villate Zalduondoko alkateak.

EH Bildu Arabak osoko emendakina egingo die EAJren eta PSEren aurrekontuei

| 2021-12-03 10:43:00

Foru Gobernuak EH Bilduren proposamenaren gainean eskaintza bat egiteko konpromisoa hartu zuen arren, ez du halakorik egin, eta kontraproposamenik aurkeztu gabe itxi egin du EH Bildurekin akordio batera heltzeko edozein aukera

Hainbat partida proposatu zituen batzarkide taldeak, lau ardatz aintzat hartuta: trantsizio energetikoa, gizarte politikak, arlo sozioekonomikoa eta gobernantza

 

Arabako Foru Aldundiaren aurrekontuei osoko emendakina aurkeztuko die EH Bildu Araba batzarkide taldeak, atzo Ramiro Gonzalezekin bildu ondoren. Aurreko bileran Foru Gobernuak proposamen bat egiteko konpromisoa hartu zuen arren, atzoko bileran ez zuen inolako eskaintzarik egin eta, ondorioz, EH Bilduk Gobernuaren aldetik akordio bat bilatzeko borondaterik ez dagoela ulertu eta osoko zuzenketa aurkeztuko dio 2022ko Aurrekontu proiektuari. 

Joan den azaroaren 15ean Arabako aurrekontuak aurkeztu zirenetik, zenbait kontaktu izan dira EH Bilduren eta Foru Gobernuaren artean; azkena, atzo bertan, EH Bilduk aurkeztutako proposamenaz jarduteko bilera egin baitzuten.

EH Bilduk 12 milioi eurotik gorako partidak aurkeztu zituen, trantsizio energetikoa, gizarte politikak, arlo sozioekonomikoa eta gobernantza ardatz hartuta, “baina EAJ-PSE gobernuak ez du horietan akordiorik lortzeko borondaterik adierazi”, Kike Fernandez de Pinedo EH Bilduren bozeramailearen esanetan.

 “Hasieratik bertatik susmatu genuen borondaterik ez zegoela, eta atzo susmo hori egiaztatu genuen, Gobernuak negoziaziorako inolako proposamenik luzatu ez zigunean”, adierazi du Fernandez de Pinedok.

Asparrenak 3,6 milioi euro izango ditu 2022ko aurrekontuetan

Horrez gain, 2 milioi euroko inbertsio-plan gehigarria izango du, Arrazpi kiroldegia eta Andra Mari eskola zaharrak zaharberritzeko bi proiektu, industrialdeko bide-sarea egokitzeko lanak, Askazubizar kaleko saneamendu-lanak eta kiroldegi berriaren estalkian eguzki-plakak jartzea, besteak beste.

| 2021-12-03 09:33:00

Asparrengo Udalak 2022. urterako aurrekontuak onetsi ditu, guztira 3,6 milioi eurokoak. Bi obra handik baldintzatuko dituzte kontu horiek: batetik, Santsaerreka kalea konpontzea, 600.000 euro inguruko partida baitu eta, bestetik, biohondakinak konpostatzeko instalazioa. 1.200 metro koadroko konposta egiteko instalazio horrek Arabako Lautadan sortutako biohondakinak Gasteizera eramatea saihestuko du. Asparrenako eta Donemiliagako udalerriei emango die zerbitzua, eta urtean 320 tona tratatuko ditu. Datorren urtean 339.000 euro inbertituko dira proiektu horretan. Horrez gain, aurrekontuek 24.000 jasotzen dituzte Marutegiko gaztelu balioan jartzeko plana gauzatzeko.

Aurrekontu horrekin batera, Asparrenak argi berdea eman dio 2 milioi euroko inbertsio planari. Plan horretan, besteak beste, sartzen dira Arrazpi kiroldegia birgaitzeko proiektuak (35.000 euro) eta adinekoen zerbitzuak hartzeko Andra Mari eskola zaharrak zaharberritzeko proiektua (50.000 euro) eta kiroldegiko teilatuan eguzki-plaka fotovoltaikoak jartzea (150.000 euro). Beste alde batetik, 500.000 euro erreserbatuko dira industrialdeko bide sarea egokitzeko lanetarako eta beste 100.000 Askazubizar kaleko saneamendu obretarako. Inbertsioen kapitulu horretan bertan, Asparrenak autokarabanetarako aparkaleku bat eraikitzea, ikastetxean patio inklusibo bat egokitzea, haur-parkeak egokitzea, osasun-zentroan pediatria-zentro bat sortzea eta Zirauntza-Arakil ibai pasalekua  zaharberritzen jarraitzea aurreikusten da.

Txelo Auzmendi Asparrengo alkateak esan du aurrekontu horrek herritarren beharrei erantzuten diela. “Asparrengo herritarren bizi-kalitatea hobetzeko lanean jarraitzen dugu. Gure lehentasunetako bat klima-aldaketaren aurkako borroka da, eta, ildo horretatik, energia-eraginkortasunarekin lotutako hainbat proiektu jarri ditugu abian. Baina ez gara ahazten gizarte-zerbitzuak emateaz edo, ahal den neurrian, gure herriko kultura- eta kirol-jarduerari eusteaz”, esan du Auzmendik.

Horren erakusgarri dira Eguneko Arretarako Landa Zentroa kudeatzeko erabiltzen diren 78.000 euroak. Izan ere, hemendik aurrera zentro horrek asteburuetan ere janglea-zerbitzua eskaintzen du. Horrez gain, badaude 19.000 euro enplegu-programetarako, 48.000 euro euskara sustatzeko edo 138.000 euro kiroldegia kudeatzeko. Araiako Umore Jaialdiak 100.000 euro izango ditu eta beste hainbeste Musika Eskola kudeaketarako.

ALBISTEAK

EH Bildu Arabak adinekoei arreta emateko plaza berriak premiaz sortzea eskatu du

2022-01-14 09:36:00

Gogorarazi du argitaratu berri den azterlan batek ondorioztatu duela Araban 730 plazako defizita dagoela

EH Bilduk EAJri eta PSEri eskatu die eskola-kirola berriz abian jartzea

2022-01-11 11:25:00

Xabier Valdor batzarkidea: “Halako neurriek ez dute laguntzen osasun mentala eta bizitzarako funtsezkoak diren ohiturak gara-tzen”

Artziniegak 2022rako aurrekontuak onartu ditu

2022-01-11 09:45:00

Bi milioi euro baino gehixeago izango ditu, eta inbertsioak egingo ditu, besteak beste, hotel-dorrea eraberritzeko lanak amaitzea, Kultur Etxea berritzeko lanak hastea, Mendietako La Llana bidea egokitzea edo Beraza aldapatik Goiko Plazara iristeko bidea hobetzea.

Urkabustaizek 2022rako aurrekontua onartu du, 1,5 milioi euro ingurukoa

2021-12-30 12:14:00

Aurreikusitako inbertsioen artean, besteak beste, aparkalekua birmoldatzea, plaka fotovoltaikoak jartzea eta eskolako eraikinean hainbat hobekuntza egitea