AKTUALITATEA

| 2025-05-16 09:48:00

Miranda eta Altsasu arteko aldiriko zerbitzua maiatzaren 30ean martxan jartzeko Eusko Jaurlaritzak egindako iragarpena txalotu du EH Bilduk. Izan ere, trenbide-korridoreko udalerrien aldarrikapen historikoa da. EH Bilduren ustez, zerbitzu eraginkorra, korridore horretan bizi eta/edo lan egiten dutenei kalitatezko zerbitzua emango diena, trena Arabako lurraldearen zati handi batean mugikortasuna erraztuko duen garraiobidea delako.

2025eko urtarrilaren 1ean, Eusko Jaurlaritzak aldiriko tren-zerbitzuen eskumena bere gain hartu zuen, eta udaberri honetarako zerbitzu hori martxan egongo zela agindu zuen. Orain, abian jartzeko data zehaztu da, baina oraindik ere ez dira eskaera guztiak gauzatu, hala nola udalekin elkarlana sustatzea egungo geltokiak hobetzeko eta geraleku berriak sortzeko.

Hori, hain zuzen ere, iaz onartu zen Arabako Batzar Nagusietan. Orduan, 2024ko ekainean, mozio bat atera zen aurrera, eta bertan planteatzen zen, besteak beste, erakunde arteko lantalde bat abian jartzea, bai erakunde eskudunekin, bai zerbitzu hori martxan jartzeko hala eskatzen duten Arabako udalerriekin. Horretarako sei hilabeteko epea ezarri bazen ere, orain arte ez da jakin lantalde hori sortu denik.

Era berean, mozio horretan Eusko Jaurlaritzari eskatzen zitzaion Arabako Lurralde Historikoko geltoki eta/edo geraleku guztien inbentarioa egiteko, azpiegiturak eta egungo egoera ezagutzeko, eta, udalerriekin lankidetzan, trenbide-zerbitzu berri horren barruan geltoki berriak ezartzeko aukera eta beharra aztertzeko, bereziki industria guneetan.
Horregatik, EH Bilduk eskatu du erakunde arteko lantalde hori martxan jartzea, geldialdien inbentarioa egitea zer hobekuntza egin behar diren aztertzeko, geraleku berrien ezarpena aztertzea eta prozesu hori guztia trenbide-korridoreko tokiko erakundeekin lankidetza estuan egitea.