AKTUALITATEA

| 2026-02-07 11:22:00

"Etorkizunarekin BAT EGIN, somos viento de libertad" da EH Bilduk aukeratu duen leloa, 1976ko martxoaren 3ko sarraskiaren 50. urteurrenean. Poliziak bost langile hil zituen tiroz, Gasteizko San Frantzisko Asiskoaren elizan batzarra egiten ari zirela. Azken urteotan egin duen bezala, EH Bilduk ekitaldi politikoa egingo du martxoaren 3an, 13:00etan, Zuberoa plazan. Ordubete geroago, ohiko omenaldia egingo da elizaren parean dagoen monolitoan.

Horrekin batera, EH Bilduk kartelen erakusketa bat inauguratu du, azken urteetan antolatutako ekitaldien kartelak biltzen dituena. "Ezkerreko soberanismoa beti egon delako hor. Beti egon da inoiz ahaztu ez duten beste eragile sindikal, herrikoi eta politikoekin batera. Beti eskatu du egia, justizia eta erreparazioa bere biktimentzat. 76an defendatzen zituzten balioek inoiz baino indar handiagoa dutela defendatu du beti ", nabarmendu du Eva Lopez de Arroyabe EH Bilduk Arabako Batzar Nagusietan duen bozeramaileak.

"Bai, 50 urte igaro dira, baina, zoritxarrez, antzekotasun gehiegi aurkitzen ditugu 1976 eta 2026 urteen artean. 1976an Latinoamerikan diktadurak ugaritzen baziren, kezkaz ikusten dugu autoritarismoaren gorakada bat mundu osoan. Garai hartako Nixon, Videla eta Pinochet orain Trump, Milei eta Kast dira. 1976an langile klasea bere eskubide sindikal, laboral eta politikoen alde borrokatzeko antolatzen bazen, orain berriro kalera atera behar da lanpostuak defendatzeko, lan baldintza duinak eskatzeko eta zerbitzu publikoen murrizketak salatzeko "gaineratu du.

Gainera, Espainiako Estatuari eskatu dio onar dezala sarraskian izan duen papera, eta Alemaniako eta Erresuma Batuko gobernuak jarri ditu adibide gisa. "Eraildako baten lagunek jarritako monolitora gerturatzea modan jarri den honetan, EH Bildutik esan nahi dugu omenaldietatik haratago igaro behar dela eta erantzukizunak hartzeko garaia dela. Adibideak gertu ditugu. Duela gutxi Alemaniako presidentea etorri zen gobernu naziak Gernikako bonbardaketan izandako inplikazioa publikoki aitortzera. Hor dago Britania Handiak 1972ko Igande Odoltsuan Derryn gertatutakoari buruz egindako adierazpena. Espainiako estatuaren kasuan, gure buruari galdetzen diogu... Noizko ikerketa bat? Noizko artxiboetarako sarbidea? Noizko estatuak jokatu zuen paperari buruzko errekonozimendu publikoa? ", galdetzen zion bere buruari Lopez de Arroyabek.

Rocio Vitero EH Bilduk Gasteizko Udalean duen bozeramaileak ere parte hartu du aurkezpenean. EH Bilduk 50. urteurrenari lotutako gastuak finantzatzeko aurrekontu-partida bat lortu duela gogoratu du. Gainera, nabarmendu du 2011tik EH Bilduk San Frantzisko Asiskoaren eliza memoriarako gune nagusi bihurtzea eskatzen zuela, beti ere prozesu horretan biktimen parte-hartze zuzena eta haien borondatea errespetatuko dela bermatuz.

"Gure aitona-amonak, gure gurasoak, kalera atera zirelako 1976an, lan-eskubideak aldarrikatzeko... Baita gureak ere. Lan-baldintza duinak eskatzen zituzten, haientzat eta guretzat. Gaur, aldarrikapen eta balio horiek defendatzen jarraitzen dugu: duintasuna, borroka, konpromisoa, komunitatea... Bere oroimenak bizirik dirau Gasteizen. Bizirik mantentzen dugu: greba bakoitzean, aldarrikapen bakoitzean... kapitalismo patriarkalaren aurrean planto egiten dugun bakoitzean, politika deshumanizatzaileen aurretik pertsonak jartzen ditugun bakoitzean, Zaramaga auzoan bizitza eman zutenen oroimenez ukabila altxatzen dugun bakoitzean ", ziurtatu du.

EH Bilduk antolatutako oroitzapen ekitaldiez gain, hitzaldi musikatu bat egingo da martxoaren 3an sortutako 50 abestiei errepaso bat egiteko. Otsailaren 20an izango da, 18:30ean, Gasteizko bilgunean, Lander Garciaren eskutik.