AKTUALITATEA

| 2026-03-31 11:23:00

Udal liburutegiaren zerbitzua indartzea eta euskara eta berdintasun partidak % 2 eta % 1,5 handitzea proposatu dute, hurrenez hurren, besteak beste

Arraia-Maeztu. 2026-03-31 | Arraia-Maeztuko EH Bildu udal taldeak gaur erregistratu ditu udal aurrekontuen proiekturako bere proposamenak, eta arreta jarri du, besteak beste, berdintasun politikak eta euskararen normalizazioa indartzean eta udal liburutegiaren zerbitzua hobetzean.

EH Bilduk garrantzi berezia eman nahi izan dio udal aurrekontuari, «tokiko erakundearen plangintza ekonomiko eta politikorako tresna nagusia» dela argudiatuta. «Horren bidez, finantza-egonkortasuna ez ezik, udal-eskumenak benetan betetzea, kalitatezko zerbitzu publikoak ematea eta gizarte-, kultura- eta lurralde-kohesioa sustatzea ere bermatu behar dira». Horrela, EH Bilduren zuzenketek «ikuspegi estrategiko bat indartu eta gastu publikoaren eraginkortasuna hobetu nahi dute».

EH Bilduk Udal Gobernua kritikatu du aurrekontuen proiektua aurkezteko modua dela-eta, ez baitu gaia sakon aztertzeko aukerarik eman. «Martxoaren amaieran gaude, eta, beste behin ere, Udal Gobernuak aurrekontuak korrika eta presaka onartu nahi dituela ikusten dugu, gauzak oharkabean pasatzea nahiko balute bezala». Horren aurrean, EH Bilduk bere proposamenak aurkeztu ditu «arduragatik eta Arraia-Maeztuko herritarrekin dugun konpromisoagatik».

EH Bilduren proposamen nagusiak udal liburutegiaren zerbitzua hobetzera eta berdintasun eta euskara politikak indartzera bideratuta daude. Azken kasu horretan, «aurrekontua egokitu nahi da berdintasunaren eta hizkuntza gutxituen babesaren arloan erakundeek eta Europak egindako gomendioetara, politika publiko eraginkorrak garatzeko zuzkidura nahikoa bermatuz».

Gainera, EH Bilduk aurrekontu partida berri bat sortzea proposatu du, udal teleklubaren erabileraren kudeaketa eta programazioa zehazteko prozesu parte-hartzaile bat egiteko. Nortasun kulturala indartzeko, memoria historikoa berreskuratzeko eta turismo jasangarria sustatzeko helburuarekin, "Brujas" baliabide kulturala sendotu eta udalerriko beste gune batzuetara zabaltzeko partida bat ematea ere proposatu dute.

Udalerrian turismoa sustatzeko, EH Bilduk udal aparkaleku berriaren zati bat autokarabanentzat eta camper furgonetentzat gordetzea ere eskatu du. Azkenik, arrazakeriaren aurkako udal-protokoloa eta aniztasunean oinarritutako bizikidetza-plana proposatu dituzte, kohesio soziala sustatzeko, gatazkak prebenitzeko eta udalerriko egungo errealitate sozialetara egokitzeko.