AKTUALITATEA

| 2026-02-06 10:37:00

Zerbitzu hori ezagutzera emateko kanpaina bat ere proposatu dute, EH Bilduren iritziz, «ez baita nahikoa ezagutzen, eta oso lagungarria izan daiteke zaintza lanetarako»

Araba. 2026-02-06 | EH Bildu Araba batzarkide taldeak mozio bat erregistratu du Laguntza Pertsonalerako Prestazio Ekonomikoa (LPPE) jasotzeko baldintzak hobetzeko eta malgutzeko. Zehazki, EH Bilduk eskatu du «Laguntza Pertsonalerako Prestazio Ekonomikoaren hedapena modu integralean hobetzeko, batez ere jasotzeko baldintzei eta bateraezintasunen erregimenari dagokienez». Horretarako, prestazio hori arautzen duten 36/2014 eta 39/2014 Foru Dekretuak berrikustea proposatu du.

EH Bildu batzarkide taldeko bozeramaile Eva Lopez de Arroyabek gogorarazi duenez, mendekotasuna duten pertsonen autonomia sustatzea da LPPEren eginkizun nagusia, eta bere helburua laguntza pertsonala kontratatzen laguntzea da, onuradunak eguneroko bizitzako oinarrizko jardueretan bizimodu autonomoagoa izan dezan.

Ez da lehen aldia EH Bildu Arabak prestazio hori hobetzeko neurriak proposatzen dituela. Lopez de Arroyabek azaldu du proposatu zutela LPPEren zenbatekoa Lanbide arteko Gutxieneko Soldatarekin parekatzea edo LPPE Etxez Etxeko Laguntza Zerbitzuarekin (ELZ) osatzea mendekotasunagatik zaintza gehiago behar duten pertsonen kasuan. «Duela aste batzuk, eta Espainiako Gobernuak iragarritako LGSaren igoera berria ikusita, ekimen berri bat aurkeztu genuen, Foru Gobernuak LGS eta LPPE berriro parekatzeko duen asmoa ezagutzeko. Eta joan den astean jakin genuen parekatzea gertatuko dela, eta, beraz, pozten gara: oso berri ona da mendekotasuna duten pertsonentzat».

Baina EH Bilduk haratago jo nahi izan du eta prestazioaren hobekuntza eta eskakizunen malgutzea proposatu du. Horrela, Lopez de Arroyabek zehaztu du 2024an 45 pertsonari ukatu zitzaiela laguntza hori, beharrezko baldintzak ez betetzeagatik. Bozeramailearen ustez, oso kopuru handia da, eta, horregatik, «hausnarketa bat egin beharko litzateke baldintzei buruz, inor atzean ez uzteko». Gainera, 2024an prestazioa jaso zuten pertsonen artean, 16 bakarrik ziren 65 urtetik beherakoak, eta ez dago 18 urtetik beherako pertsona bakar bat ere. Datu horiek ikusita, bozeramaileak uste du prestazioari buruzko ezjakintasuna oso handia dela, eta, beraz, uste du beharrezkoa dela dibulgazio-kanpaina bat egitea eskuragarri dauden laguntzak ezagutzera emateko eta, bereziki, laguntza pertsonalerako prestazio hau.

«EH Bildurentzat lehentasuna da pertsona zaintzen erdigunean jartzea, eta prestazio ekonomiko horrekin zaintza profesionalizatu duinak bermatzen dira, mendekotasuna duen pertsona bere bizitzaren protagonista izan dadin», amaitu du Eva Lopez de Arroyabek.