AKTUALITATEA

| 2024-10-17 07:57:00

Lagrango Udalak 2025erako ordenantza fiskalak onartu ditu. Berritasunen artean, nabarmentzekoa da lehen aldiz hobariak sartu direla familia ugarientzat OHZn eta Ibilgailuen gaineko Zergan, % 45 eta % 95 artekoak, errentaren arabera. Gainera, Lanbideen arteko Gutxieneko Soldata berrira eguneratzen dira zergetako hobarien ohiko taulak, % 95era iristen direnak errenta txikienetan, bizikidetza-unitatea osatzen duten pertsonen kopuruaren arabera.

Ondasun Higiezinen gaineko Zerga 0.01 hazi da, eta 0.36tik 0.37ra igaro da hiri-izaerako ondasunen kasuan, eta 0.32tik 0.33ra landa-izaerako ondasunen kasuan. Kasu honetan, zerga % 2,4 eguneratzea da. Ibilgailuen gaineko Zergaren kasuan, igoera % 9 ingurukoa da, foru-arauak jasotzen duen gutxiena baitzen.

Horrela, urtetan aldaketarik egon gabe ordenantza fiskalak eguneratzeko bidean beste urrats bat eman du Lagrango Udalak. Izan ere, aurten lehen aldiz, Lagranek Gainbalioen Zerga kobratu du. Eta lehen aldiz deskontuak ere izan ditu, bai Ondasun Higiezinen gaineko Zergan (OHZ), bai Eraikuntza, Instalazio eta Obren gaineko Zergan (EIOZ). OHZren kasuan, babes ofizialeko etxebizitzek eta etxebizitza sozialek % 30eko beherapena izan dute lehen hiru urteetan, Bizigune Eusko Jaurlaritzaren alokairu sozialeko programan sartutako etxebizitzek % 20ko deskontua izan dute eta etiketa energetikoa duten higiezinek % 20-30eko hobaria izan dute.

Urtzi Gaintzarain Lagrango alkateak Udal Gobernua araudi osoa eguneratzeko eta berritzeko egiten ari den ahalegina azpimarratu du. Horrek guztiak helburu hirukoitza ditu: errenta baxuenak arintzea, Udalari baliabideak bermatzea kalitatezko zerbitzuak eskaintzeko eta udalerriko jarduera errazteko.

Ildo beretik, Lagranek argi berdea eman dio bere dirulaguntzen lehen ordenantzari. Araudi horrek bere gain hartuko ditu kirol- eta kultura-jarduerak, berdintasuna eta esku-hartze soziala sustatzeko jarduerak, ingurumeneko programak eta programa soziokulturalak. Atal honetan sartzen dira, halaber, pertsona edo erakundeentzako banakako laguntzak, gizarte-bazterkeriaren ondorioak murrizteko edo euskara ikasi eta normalizatzeko.