AKTUALITATEA

| 2024-10-20 10:07:00

Langileen eguneko orduak 6 ordutik 7ra aldatzea proposatu dute, erabiltzaileen ordutegi berean sartu eta ateratzen direlako, logistika aldez aurretik prestatu ezinik

Zigoitia. 2024-10-20 | EH Bilduk Zigoitian duen udal taldeak eguneko arretarako landa-zentroko (CRAD) langileen ordutegia zabaltzea proposatu du, erabiltzaileen beharretara egokitzeko. Zehazki, langileen eguneko orduak 6 ordutik 7ra aldatzea proposatu dute, edo, bestela, lanaldi erdian pertsona bat gehiago kontratatzea.

EH Bilduk ondorioztatu du langileek ordu gehiago behar dituztela, gizarte langilearekin eta zentroko langileekin bilera bana egin ondoren. «Erabiltzaileak adinean aurrera doazenez eta plaza guztiak denboran zehar okupatzen direnez, eta, gainera, pertsona jakin batzuek arreta indibidualizatua behar dutenez mendekotasun-egoeraren, egoera soziosanitarioaren eta, oro har, hauskortasunaren ondorioz, beharrezkoa da egungo plantilla handitzea», adierazi du EH Bilduk.

Egindako bileren ondoren, EH Bilduk jakin zuen Gizarte Langileak eskaera bat helarazi ziola Foru Aldundiari, lanaldi erdian langile bat gehiago sartzeko beharra azalduz, lantaldea indartzeko. «Aldundiak bere eskaerari uko egin dionez, gizarte-langileak jakinarazi digu gaur egun txangoak bertan behera utzi behar izan dituztela enpresak ez badu pertsona bat jarduera zehatz horiek indartzeko. Erabiltzaileen bilakaera ohikoa bada, hau da, adinean aurrera egin ahala, pertsona horiek laguntza handiagoa beharko dute, eta baliteke horrek zerbitzuaren kalitatean eta gainerako jardueretan ere eragina izatea».

Egoera horren aurrean, EH Bilduk langileen ordutegia luzatzea edo lanaldi erdiko pertsona bat kontratatzea proposatu du. Pertsona horrek pertsona laguntzaile bat emango luke irteera bakoitzean, zentrotik kanpo jarduerak egiteko aukera bermatuz. «Kontuan hartuta AFAk ez duela gizarte-langilearen eskaera onartu, beharrezkoa litzateke Zigoitiko Udalak gastu gehigarri hori bere gain hartzea eta datorren urteko aurrekontuan sartzea».

Gogoratu behar da Zigoitiko CRADean gaur egun 20 erabiltzaile daudela eta zentroa beteta dagoela eta itxaron-zerrendarekin. 20 erabiltzaileen artean, 4 pertsonak jarraitzen dute zentroan, 2. mendetasun-gradua aitortuta izan arren; izan ere, gizarte-langileak eta haren senideek uste dute baliabide ezin hobea dela pertsona horiek beren gizarte- eta kultura-ingurunean mantentzeko.