AKTUALITATEA

| 2021-05-19 12:51:00

EH Bilduk Miñaoko Parke Teknologikoa handitzea babestuko du, baldin eta Arabako Lurralde Historikoan Gigafaktoria bat instalatzeko proiektu bati lotuta badago. Hala azaldu dute EH Bilduko hainbat erakundeetako arduradunek, Eusko Legebiltzarrean EH Bilduren mozio bat eztabaidatu aurretik, non Araban bateria elektrikoak ekoizteko zentro bat jartzea jasotzen den. Félix González Gasteizko Udaleko EH Bilduko bozeramaileak nabarmendu duenez, “Araba bidegurutze batean dago, hartzen diren erabakiek ondorio zuzenak izango baitituzte hurrengo belaunaldien ongizatean”.

 

Ildo horretatik, Gasteizko Udaleko EH Bilduren bozeramaileak aurreratu du begi onez ikusten duela Miñaoko PTA handitzea, Hiri Antolamendurako Plan Orokorraren eztabaidaren prestakuntza lanetan planteatzen den moduan, hau da, PTAren iparraldean kokatutako 90 hektareako handitzea. Miñaoko parkearen eta AP1 autobidearen arteko lurrak dira.

 

Gauzak horrela, EH Bilduk zeharo baztertu du Miñaoko PTA handitzea orain arte HAPOn planteatzen ziren terminoetan oinarrituta, hau da, azalera ia 300 hektarea handitzea, Gutxi balitz, Stoak 2009an idatzitako proiektuan oinarritzen da zabalpen hori. EH Bilduren ustez, zabalkuntza “erabat neurrigabea” zen, eta, gainera, ustelkeriagatik kondenatutako enpresa batek egin zuen, De Migelen kasuan, hain zuzen. “Gure ustez, iparralderantz zabalduta eta egun hutsik dauden lurrak berrantolatuta, nahikoa da eskaerari erantzuteko. EH Bildutik eskua luzatzen dugu horrelako baldintzetan parke teknologikoa handitzeko, betiere proiektu estrategiko eta traktoreak lotuta badaude”, gaineratu du Gonzálezek.

 

Hain zuzen, bihar, Eusko Legebiltzarrak, EH Bilduren ekimen bati esker, bateria elektrikoak ekoizteko zentro bat ezartzeari buruzko mozio bat eztabaidatuko du. Gogoan izan behar da EH Bilduk iazko abenduan aurkeztu zituela Europako Next Generation funtsen bidez finantzatu beharreko zenbait proiektu. Horien artean zegoen Arabatt, elektromugikortasunerako egoera solidoan dauden bateriak garatu, ekoiztu eta muntatzeko proiektua. Mikel Otero EH Bilduko parlamentariak adierazi du horrelako proiektu bat beharrezkoa dela emisiorik gabeko garraioa lortzeko eta, horrez gain, Arabak ihes egin ezin duen aukera dela azpimarratu du.

 

Hala, EH Bilduren proposamenean apustu egiten da Gigafaktoria hori Araban ezartzearen alde, eta, gainera, Eusko Jaurlaritzari eskatzen dio proiektuan akziodun gisa parte har dezala, ekimenaren garapenean eta erabaki estrategikoak hartzean interes orokorra bermatzeko. Halaber, EH Bilduren ustez, proiektuak kanpoko finantziazioa izan behar du eta Eusko Jaurlaritza animatzen du Next Generation europar funtsek finantzatu beharreko proiektuetan sar dadin defendatzeko. Baina, gainera, sektoreko enpresa liderren eta Miñaoko parkean bertan dagoen punta-puntako ikerketa-proiektuaren arteko elkarlana sustatzeko apustua egin du Oterok, CIC Energigune buru dela.

 

“Ezin dugu aukera hau pasatzen utzi, eta Arabak baldintza ezin hobeak ditu proiektu hau hartzeko. Hori ezartzeko lurzoru erabilgarria dago, energia biltegiratzeko ikerketa-zentroaren eta automobilgintzaren sektoreko punta-puntako enpresen esperientzia du”, gogorarazi du Oterok. Halaber, Oterok gaineratu du proiektu honekin batera, material kritikoak birziklatzeko instalazio bat sortu behar dela.

 

EH Bilduren ustez, sektore oso zehatzen eta multinazionalen mendekotasun handiegia duen lurralde baterako aukera da oso egokia da Gigafaktoriaren proiektua. “Aspaldi ohartu ginen Arabako egoera sozioekonomikoa agortze-zantzuak ematen hasi zela, krisi soziosanitarioak bizkortu duen prozesua”, ohartarazi du June Mugicak. Izan ere, automozioari lotutako EAEko Barne Produktu Gordinaren %28 da. Iaz %18 jaitsi zen fakturazioa. Gaur egun, 16.814 langabe daude Araban, %12,24.

 

“Arabak industria-ereduaren trantsizioa behar du, enpresa jakin batzuekiko duen mendekotasuna murrizteko eta balio erantsi handiko lanpostuak sortzeko. Industria-trantsizio horri begira, funtsezkoa da egiten diren inbertsioen nahiz inbertsio horiek lurraldean duten eraginaren kontrol publikoari eustea. Proiektu zehatzez hitz egin behar da kokaleku zehatzetan. Eta hori guztia erabateko gardentasun-ereduarekin” nabarmendu du Mugicak.