AKTUALITATEA

EH Bilduren ekimenez, Diputazioak urratsak emango ditu laguntza pertsonalerako prestazioa eta etxeko laguntza bateragarriak izan daitezen

| 2025-07-14 08:12:00

Puntu bakarreko mozioan, Batzar Nagusiek Diputazioari eskatu diote prestazio horiek arautzen dituzten Dekretuak teknikoki berrikusteko eta bateragarritasunerako pausoak emateko

Araba. 2025-07-14 | EH Bildu Araba batzarkide taldearen ekimenez., Batzar Nagusiek mozio bat onartu dute gaur Diputazioari eskatuz urratsak eman ditzala Laguntza Pertsonalerako Prestazio Ekonomikoa (LPPE) eta Etxez Etxeko Laguntza Zerbitzua (ELZ) osagarriak izateko, mendekotasun mailagatik zaintza sendoagoak behar dituzten pertsonen kasurako. Mozioa aho batez onartu da.

Claudia Venceslao EH Bilduko batzarkideak azaldu duenez, urte hasieran hasi ziren Autonomia Pertsonala Sustatzeko eta Mendekotasun Egoeran dauden Pertsonak Zaintzeko Lege berria idazten. «Besteak beste, Espainiako Gobernuak iragarri zuen araudi berri horrek mendekotasuna artatzeko prestazioen eta zerbitzuen bateraezintasunekin amaituko duela», adierazi du Venceslaok.

Hala ere, Arabaren kasuan, bi foru-dekretuk beren artikuluetan ezartzen dute LPPE bateraezina dela Etxeko Laguntza Zerbitzuarekin. Baina, gainera, Bizkaian eta Gipuzkoan ez dago bateraezintasun hori, eta bi lurralde horien mendeko pertsonak prestazio horren eta zerbitzu horren onuradun izan daitezke aldi berean, «horrela, beren autonomia pertsonalaren eta etxean egotearen alde eginez», Venceslaoren arabera.

Gaur onartutako mozioan, Arabako Batzar Nagusiek Foru Aldundiari eskatzen diote 36/2014 eta 39/2014 Foru Dekretuetako artikuluak teknikoki berrikusteko, Laguntza Pertsonalerako Prestazio Ekonomikoa (LPE) eta Etxez Etxeko Laguntza Zerbitzua (ELZ) bateragarriak diren aztertzeko, mendetasuneko II. eta III. mailetarako, eta, hala badagokio, beharrezko arauzko neurriak ezartzeko, LPPE eta ELZ bateragarri egiteko, mendetasun-maila altuak dituzten pertsonak etxean egon daitezen errazteko.

«Mendekotasuna dagoen kasuetan, oso garrantzitsua da nor bere etxean egotea, horrek autonomia sustatzen duelako eta ingurune hurbilarekiko atxikimenduari eusten diolako. Premia desberdinak estaltzen dituzten bi prestazio bateraezinak izatea, ezin da ulertu zaintza integralak jasotzearen ikuspegitik, eta ez da bidezkoa Arabako mendeko pertsonek Gipuzkoakoen edo Bizkaikoen baldintza berak ez izatea», esan du Claudia Venceslaok.