Albisteak

EH Bilduk eskatu du Klima Araba 2050ek energia berriztagarriak hedatzeko bazterketa-eremuak barne har ditzala


Mugarri Planak jasotzen duen bezala, “Natura 200” sarea, paisaia bereziak edo nabarmenak, harrapariek habia egiteko eremuak eta galtzeko zorian dauden espezieentzat interes berezia duten eremuak jaso behar dira baztertze eremu gisa.

| 2021-10-11 11:51:00

Klima Araba 2050 zirriborrorako ekarpenen lehen fasea amaitu ondoren, dokumentuak Trantsizio Energetikoaren Behatoki bat sortzea jasotzen du, EH Bilduk eskatu zuen bezala. EH Bilduren ekarpena izan zen hori. Orain, bigarren fase honetan, haratago joatea eskatu du, behatoki horrek kontrol publiko eta demokratikoa bermatuko duten tresnak emateko. Gainera, plan hori gardena eta adostua izatea eskatu du, eta gizarte-eragileek benetako eta aktiboki parte hartzeko aukera izatea. Guztira, 15 zuzenketa berri egin ditu EH Bilduk.

 

EH Bildurentzat, oro har, asmo gutxiko plan bat da, eszenatokirik zehazten ez zuena eta nazioarteko itunek ezarritako helburuak lortzen ez zituena. Orain, ordea, Estrategiaren helburuak lurraldea deskarbonizatzea eta 2050erako karbonoz neutroa den lurralde bat lortzea jasotzen du. Hala ere, planak oraindik ez ditu zehaztu energia berriztagarriak baztertzeko eremuak, ez natura-inguruneetan, ezta nekazaritza-balio handiko lurretan ere. Puntu horretan, EH Bilduren apustua da Mugarri Planean jada agertzen ziren bazterketa-eremuak mantentzea, hau da, Natura 2000 Sarea, Paisaia Bereziak edo Apartekoak, harrapariek habia egiteko eremuak eta desagertzeko arriskuan dauden espezieentzat interes bereziko eremuak.

 

Ildo horretatik, ekologiaren eta paisaiaren ikuspuntutik inpaktu txikiena duten guneak eta erabiliak izan direnak lehenestea da EH Bilduren apustua. Nolanahi ere, uste du Ingurumen Inpaktuaren Ebaluazio Bateratua egin behar dela eta zuhurtzia-printzipioa aplikatu behar dela. Eguzki baratzeei dagokienez, baztertu behar dira %20tik gorako malda duten lurrak eta babestu behar dira kalitate agroekologiko handia duten laborantzako lurrak.

 

Bestalde, EH Bilduk hiru proposamen berri planteatzen ditu: mugikortasun iraunkorra eta erresilentea lortzea, gaur egun Altsasu-Miranda linean eta C3 Aiaraldea linean gutxi erabiltzen diren trenbide-azpiegiturak modernizatuz, nekazaritzako elikagaien estrategia bat egitea eta Arabako Nekazaritzako Elikagaien Kontseilua sortzea, eta hiri-hondakinak gutxitzearekin eta deszentralizatzearekin batera, ekonomia zirkularra sustatzea.