AKTUALITATEA

Hartutako konpromisoa betetzeko eta araztegi berria eraikitzen hasteko eskatu dio Dulantziko osoko bilkurak Foru Gobernuari

| 2026-09-17 07:55:00

Dulantziko Osoko Bilkurak Arabako Foru Aldundiari eskatu dio bete dezala duela bi hamarkada baino gehiago hartutako konpromisoa eta has ditzala berehala hondakin-uren araztegi berri bat eraikitzeko izapideak. Proiektu honek behin betiko irtenbidea emango dio Dulantziko udalerriaren saneamendu-arazoari, eta, gainera, etxebizitza babestua eraikitzeko aukera emango du. Izan ere, gaur egun, Hiri Antolamenduko Plan Orokorrak sustapen berri asko saneamenduaren konponbidearen baldintzapean jartzen ditu.


Ekimena EH Bilduk aurkeztu du eta udalbatzaren babesa jaso du azken osoko bilkuran. Arabako Foru Aldundiak Dulantzi eta Oreitia artean kole ktore bat eraikitzeko proiektua onartu zuen abuztuan. Gerora, Dulantzin bertan Foru Gobernuak komunikabideen aurrean aurkeztu zuen Dulantzin udalbatzako kideak gonbidatu gabe.  Baina obra hori ez da nahikoa izango. Hori gutxi balitz, Foru Gobernuak gai horri premiazko erantzuna emateko beharraz hitz egiten du. Hala ere, Krispijanan urak tratatzeko Gasteizko sarearekin bat egiten duen aztertzea planteatu du orain Foru Gobernuak. Soilik ezinezkoa bada, etorkizunean Oreitia inguruan araztegi berri bat eraikitzea proposatu du.


Erabaki horrek urratu egiten ditu Arabako Foru Aldundiaren planak, 2016an Arabako Lurralde Historikoko Hornidura eta Saneamenduko Plan Zuzentzailean ezarri baitzuen eskualdeko hondakin-uren araztegia eraikitzea dela irtenbiderik onena. Nolanahi ere, funtsezko obra honek 22 urteko atzerapenak pilatu ditu. 2004an, Eusko Jaurlaritzak eta Arabako Foru Aldundiak akordio marko bat sinatu zuten, obra hori barne hartzen zuena. Akordio hori 2017an berritu zen, baina oraindik ez da osorik gauzatu.