AKTUALITATEA

| 2025-02-24 10:43:00

Sahararen askapen borrokarekiko konpromisoa berritzeko mozioa da, eta autodeterminaziorako erreferenduma eta preso politikoak askatzeko eskatzen du, besteak beste

Araba. 2025-03-24 | EH Bildu Araba batzarkide taldeak Berdintasun, Euskara eta Gobernantza batzordean eztabaidatzeko mozioa aurkeztu du Nazio Batuei eskatzeko Saharako gatazkari bidezko konponbidea eman diezaietela, «Saharako Herriaren autodeterminazio-eskubidea gauzatuta erreferendum baten bidez, amaitu gabe dagoen deskolonizazio prozesuari bukaera emateko».

Aurki beteko dira 49 urte Saharako Errepublika Arabiar Demokratikoa (SEAD) sortu zenetik.  June Mugica EH Bildu Araba batzarkidearen esanetan, «Arabako Batzar Nagusiek Sahararen askapen borrokarekiko erakutsi izan duten konpromisoa berritzeko unea da, gogoan izan behar baita Europako Justizia Auzitegiak hitzez hitz dioela Marokoko Erresumak Mendebaldeko Sahararekiko duen subiranotasuna ez duela onartzen ez Europar Batasunak, ez haren estatu kideek, ez, oro har, NBEk».

Mozioan, preso politikoak eta kontzientzia-presoak askatzeko eta espetxeetako giza eskubideen urraketak eteteko ere eskatzen zaio Marokori. Era berean, Espainiako Gobernuari eskatzen zaio estatus diplomatikoa eman diezaiola Fronte Polisarioak Espainian duen ordezkaritzari, Saharar Herriaren ordezkari bakarra eta legitimoa den aldetik, eta Nazio Batuen Mendebaldeko Sahararako Bake Plana betez behin betiko konponbide justua lortzeko behar diren ekimen politikoak susta ditzala.

Mozioak eskatzen du Mendebaldeko Saharako Erreferendumerako Nazio Batuen Misioak (MINURSO) Mendebaldeko Saharako lurralde okupatuetan giza eskubideen kontrolean eta jarraipenean dituen eginkizunak eta eginkizunak zabaltzea. Halaber, Marokoko Gobernuaren aldetik Mendebaldeko Sahararen baliabide naturalen espoliazioa salatzen du, eta Saharan jarduten duten enpresei eskatzen die errespeta dezatela baliabide naturalen gaineko subiranotasunerako eskubidea, baita lurralde okupatu bateko baliabide naturalen ustiapenari aplika dakizkiokeen nazioarteko zuzenbide humanitarioko arauak ere.