AKTUALITATEA

Donemiliagak Lautadako osasun-zentroen arreta “bizkor” berreskuratzeko eskatu dio Osasun Sailari

| 2022-05-18 12:31:00

Donemiliagako Udalak Eusko Jaurlaritzako Osasun Sailari eskatu dio “bizkor” konpontzeko Arabako Lautadako osasun-zentroetako egoera. Pandemia aurretiko egoera berrezartzeko konpromisoa hartzea eskatu du langileei, arreta-ordutegiei eta zerbitzuei dagokienez. Horrela jaso da gaur udalbatzan aho batez onartu den mozioan. Izan ere, Aguraingo osasun zentroko profesionalen kopurua “nabarmen” murriztu da, eta horren ondorioz, eskualdeko gainerako anbulatorioetan guardiako zerbitzua kendu da, asteko arreta egun batean murriztu da eta hitzordu bat hartzeko itxaronaldia luzatu egin da. Donemiliagako kasuan, udalerri osatzen duten 15 herrietako herritarrak Araia, Agurain, Dulantzi eta Ozaetako anbulategietan artatuak dira.  

Erika Letamendi Donemiliagako alkateak nabarmendu duenez, "egoera horrek eragin larria du, ez bakarrik kopuruan, baita arretaren kalitatean ere". Halaber, esan du herritarrek Udalera jo dutela, eta adierazi dutela egonezina dutela eta osasun-arreta okertzen ari zaiela. “Alde batetik, gaizki artatzen gaituzte, eta, bestetik, badakigu profesionalak erabat saturatuta daudela eta horrek eragina duela zerbitzuaren kalitatean. Adineko jende asko bizi den landa-populazioa gara, eta hori ere kontuan hartzeko modukoa da ratio egokiak kalkulatzeko orduan”, gaineratu du.

Gaur aurrera atera den testuan Eusko Jaurlaritzari egungo eskaria eta etorkizuneko aurreikuspena aztertzeko ere eskatzen zitzaion, baliabide egokienak zehazteko. Era berean, Udalak Eusko Jaurlaritzako Osasun Sailarekin batera lan egiteko konpromisoa hartu zuen, baliabideak benetako beharretara egokitzeko.