AKTUALITATEA

Nazioartea | 2025-08-28

EH Bilduren aldetik Gorka Elejabarrietak, Harreman Politikoetarako idazkari eta Senatuko bozeramaileak; Oihana Etxebarrietak, Eusko Legebiltzarreko parlamentari eta Harreman Politikoetarako taldeko kideak; eta Igor Zulaikak, Nazioarteko Harremanetarako arduradunak hartu dute parte. Más Madriden ordezkaritza Héctor Tejerok, Estrategiako arduradunak; Gabriel Ortegak, Antolakuntzako idazkariak; eta Ana Tejerok, Feminismoetako arduradunak osatu dute.

Bileraren balorazio positibo eta eraikitzailea egiten dugu, baliagarria izan baita Estatu espainiarrak eta mundu globalak bizi duten egoerari buruzko ikuspegia partekatzeko. Ondorio nagusi gisa, demokraziari mehatxu egiten dion eskuin muturrari eta autoritarismoaren erreakzioari aurre egiteko modua ezkerreko eta indar aurrerakoien arteko lankidetza izan behar dela azpimarratu da, baita politika publiko eraldatzaileak abiaraztea ere.

Ildo horretan, gobernu- eta oposizio-esperientziak partekatu ditugu, madrildarren zein euskal herritarren itxaropena elikatzeko ezinbestekoak direnak.

EH Bildu eta Más Madrid bat gatoz oinarri gisa justizia soziala, ekologia, feminismoa eta balio demokratikoak dituzten estrategiak eta politika eraginkorrak partekatzeko beharrean. Europan indartzen ari den eskuin muturrari eta olatu autoritarioari aurre egiteko, beharrezkoa da etorkizunera begira lankidetzarako eta elkarlaneko esparruak bilatzea. Eta horretarako konpromisoa hartu dugu.