Oñati

Covid-19, herria zaindu dezagun

EH Bildutik hasiera beretik Covid-19ak sortu duen osasun eta ekonomia krisiari aurre egiten aritu gara, eremuz eremu eta dagokigun erantzukizunez, proposamenak egin edota aktibatzen.

| 2020-04-06 17:58:00

Udaletan zuzeneko gestioa egiten gabiltza, zaintzari, kontratazio publikoari, zaurgarritasunak ekiditeari, tasei edota zerbitzuen mantenuari dagozkion irizpideak etengabe ematearekin batera, gobernatzen dugun udaletan guztiak aplikatzen ari baikara. Ildo beretik gabiltza lanean gainerako erakundeetan ere, Gasteiz eta Nafarroa izan, edo Madril zein Bruselara iritsita.

Bizitzaren aldeko hautu radikala da gurea, inor bazterrean utzi nahi ez duena eta aberastasuna banatu eta oparotasuna denontzat bilatzen duena. Neurriak Covid-19aren ondorioz sortutako larrialdian gure herritarrak zaindu eta babesteko beharretik edo/eta arduratik sortzen dira. Herritarren babesa, zaintza eta larrialdiaren kalteordainak murriztea eta etorkizunerako baldintza berriak ezartzeko ardura, hartzen dugu gure gain, inor bazterrean utzi gabe.

Osasun eta sozioekonomikoa den azken krisi honek, agerian utzi du berriro ere, Estatuko markoa agortua dagoela, eta EAJ-PSE-PSNren gobernuek ez dutela askoz hobeto egin. Horregatik, inoiz baino beharrezkoagoa bilakatu da burujabetzaren bidetik herri honen izaera produktibo, erreproduktibo eta sozialari erantzungo dion marko berria eraikitzea.

Lidergo publikoen garaia da, elkar zaindu eta babesten duen eta denontzat aukerak sortzen dituen herri duin bati dagozkion mailako politika publiko eta komunitarioak artikulatzeko garaia. COVID-19tik babestu behar ditugu herritarrak, baina baita, langabeziatik, pobreziatik, babes faltagatik, zaurgarritasun egoeretatik, zorretatik, etxedesjabetzeetatik. Politika desmerkantilizatu eta bizitza zentroan jartzeko garaia da.

Horretarako, Euskal Herria Bilduk une edo fase desberdinetarako proposamena aurkezten du. Hemen duzu irakurgai:

Izaro Elorza alkatearen mezua Covid-19a dela eta

Oñatiko Udalak Covid-19ari aurre egiteko hainbat neurri hartu ditu. Elorza alkateak bideo bidez eman ditu argibideak eta herritarrentzako hitzak ere izan ditu.

| 2020-04-02 10:45:00

Udalak hartu dituen neurrien artean daude egoitzak ixtearena, antolatuta zeuden ekintzak bertan behera uztearena edo zerbitzuak murriztearena. Elorza alkateak dio ez direla erabaki errazak izan, baina ezohiko egoera batean, ezohiko neurriak hartu behar izan dituztela, herritarren osasuna bermatzeko. 

Elkar-zaintza, herrigintzaren oinarri

Elkar-zaintzarako hartutako neurriak ere aipatu nahi izan ditu alkateak. Boluntario sare bat sortu da herrian beharra dutenei laguntza eskaintzeko, besteak beste: lehentasunezko elikagaiak eskuratzeko, botikak erosteko, hondakinak ateratzeko, zaintzarako edo elkarrizketa bat izateko. Elorzak herritarrek erakutsitako prestutasuna goraipatu nahi izan du, izan ere, 100 herritarretik gora azaldu dira prest boluntario gisa aritzeko. 

Hala, alkateak dei egin die behar bereziak dituztenei saretuz@onati.eus helbidera idazteko edo 688 886 519 deitzeko.

Udaletik etxez etxe deika ere badabiltza beharrizan bereziak dituzten pertsonak identifikatzeko. Dagoeneko 1800 dei egin dira. Bakarrik bizi diren adinekoei deitu zitzaien hasieran eta 70 urtetik gorakoei ondoren. Asteon, guraso bakar direnei deitzen hasi dira.

Autonomo eta mikroenpresentzako laguntza

Autonomo eta mikroenpresei zuzendutako aholkularitza zerbitzua ere sortu du udalak, diru-laguntzen berri eman eta orientazioa eskaintzeko. Horretarako telefonoa honakoa da: 943 003 193. Edo enplegua@oinati.eus helbidera era idatz daiteke.

Indarkeria matxista borrokatzeko

Egoera zaurgarrian dauden emakumeak ere gogoan izan ditu alkateak, hain zuzen, erasotzaileekin konfinamenduan bizi diren emakumeak. Hala, indarkeria matxistaren aurrean, laguntza eskatzeko deia egin du, bai auzokideei babesa eskatuta, baita 900 840 111 telefonora deituta ere. 

Hildakoak gogoan eta herritarrei eskerrak

Nola ez, ezin ahaztu Covid-19arekin hildako herritarrak. Hala, Elrozak doluminak helarazi nahi izan dizkie familiakoei, baita egun hauetan senitartekoren bat galdu eta behar bezala agurtzeko aukerarik izan ez duten herritarrei ere.

Amaitzeko, herritarrei eskerrak ere eman nahi izan dizkie emergentzia egoera honen aurrean erakutsi duten jarrera eta arduragatik. "Ez da bide erraza izango, baina denok batera, elkarrekin, egoerari aurre egingo diogu" esanez amaitzen du mezua. 

Koronabirusaren krisiari eta bere ondorioei aurre egiteko EH Bilduk proposatzen duen estrategia

Bi fasetan banatutako ekintza plan integrala da, jendartearen osasuna lehenesten duena eta egitura produktiboa kontuan duena.

| 2020-03-30 16:25:00

Covid-19aren krisian, noraeza da nagusi, inprobisazioa etengabea da. Horrek berez zaila den egoera bat, are eta zailagoa egin du. EH Bilduk estrategia bat jartzen du mahai gainean, koherentea, sinesgarria. Jendartearen osassuna lehenesten duena, eta, aldi berean, egitura produktiboa kontuan duena. Koronabirusaren krisiari eta bere ondorioei aurre egiteko EH Bilduk proposatzen duen estrategia horren ekintza plana bi fasetan banatuko litzateke. 

Mailuaren estrategia

Zientzialari batzuek horrela deitu diote kutsatuen osasun zerbitzuak gainezka egin gabe eta hildakoen kopurua gutxitzeko gai den estrategiari. Bi faseko estrategia da, eta Euskal Herrirako, honela planteatzen dugu:

Lehen fasea: mailu kolpea

Krisiaren hasieran, ahalik eta kolpe handiena eman behar zaio birusaren hedapenari. Horretarako, ahalik eta neurri murriztaileenak hartu behar dira, ahalik eta azkarren. Horrek esan nahi du funtsezkoa ez den ekoizpena gelditzea eta konfinamendua ahalik eta zorrotzena izatea.

Denbora tarte horretan, hartu behar dira behar diren neurri sozial eta ekonomikoak, enpresak stand-by egoeran mantendu daitezen eta jendeak beharrezko diru-sarrerak bermatuta izan ditzan. Aldi berean, ziurtatu behar da ez dela enplegurik suntsitzen. Horretarako, Estatutik datozen laguntza eta neurriak, osatu behar ditugu hemendik aktiba ditzakegun baliabideekin. Ildo horretan, EH Bilduk neurri sorta proposatu die eragile ekonomiko eta sindikalei, erakundeei eta alderdiei. 

Nazioartean nagusitzen ari den doktrina da: gastu publikoa handitzea, jendea eta ehun produktiboa babesteko beharrezkoa den guztia. Aztertu beharko da nola areagotu ditzakegun diru-sarrerak zerga bidez. Eta 2020ko aurrekontua ere berrantolatu beharko da, krisiak markatzen dituen lehentasunen zerbitzura. Une honetan ahalik eta azkarren jokatu behar da eta gastuarena ezin da aitzakia izan. Beharrezko baliabideak jarri behar dira jendeak bere diru-sarrerak gal ez ditzan, eta enpresa eta autonomoen jarduera kaltetua izan ez dadin.

Lehen fase honen helburua, hedapen kurbari mailukada bat emateaz gain (hazkunde indizea 0.5etik behera jarri arte), denbora irabaztea da. Hala planteatzen dute zientzialariek.

Lehen faseak irauten duen denbora tartean test azkarrak lehenbailehen eta modu masiboan egitea ezinbestekoa da. Hala, birusaren jokaeraren inguruko ezagutza handiagoa eta nola aurre egin behar zaion jakiteko.  

Gainera, osasun sistema material medikoz hornitu eta ahalik eta gehien indartu behar dugu. Hori beharrezkoa da gerta daitezkeen gailur berriei, osasun sistemak gainezka egin gabe aurre egiteko.

Azkenik, lehen fase honetan, bigarrenerako azpiegitura diseinatu eta prestatu behar da: testaketa eta miaketa masiboa. 

Bigarren fasea: testaketa eta miaketa masiboa

Gailurra gainditu eta hazkunde indizea 0.5era jaitsi ondoren (0.3 eta 0.5 artean), konfinamendu neurriak pixkanaka altxatzen hasi ahal izango gara. Proposatzen duguna da: egoera ebaluatzea gailurrera iristean, eta orduan aztertzea noiz eta nola eman amaitutzat lehen fasea.

Laburbilduz, bigarren fasea bihurgunea menderatzea lortu duten Asiako herrialdeek egin dutenera ahalik eta gehien hurbiltzea da: test masiboak eta arakatze sakona. Estrategia dibertsifikatua, deszentralizatua eta tokian bertan egina izan behar da, tresna digitalak eta prozedura komunitarioak konbinatuz. Horrek ahalbidetuko du positiboak detektatu; kutsatutako pertsonek izan dituzten kontaktu fisikoak arakatu, berrogeialdian jarraitu, testatu eta konfinatu ahal izatea, positibo eman badute. Eta fokuak agertzen badira, aplikatu beharko dira tokiko konfinamenduak.

Bigarren fase hau denboran luzatuko dela uste dute zientzialariek, ziurrenik txertoa iritsi arte. Beraz, ezingo da zaintza jaitsi. 

Paraleloan, EAEn eta Nafarroan hainbat sektorek osatutako mahaia eratu behar da, krisitik ahalik eta baldintza onenetan ateratzeko neurriak proposatu eta adosteko.

  

Mailuaren estrategia

Deskribapena

Ekintzak

Noiz

1. Fasea

Kutsadura kurba ahalik eta denbora laburrenean, ahalik eta gehien jaistea.

- Kutsadura kurba ahalik eta denbora laburrenean, ahalik eta gehien jaistea. 

- Erabateko konfinamendua. 

- Pertsonak eta enpresak babesteko neurri ekonomikoak hartzea.

- Test azkarrak eskuratzea eta hedatzea.

- Material medikoa hornitzea eta osasun-sistema indartzea.

- Bigarren fasea prestatzea.

Apirilaren erdialdea (garapenaren arabera ebaluatu beharrekoa)

2. Fasea

Gailurren gora-beherak

- Testaketa masiboa eta arakatze zehatza, tresna digitalen eta estrategia komunitarioen bitartez.

- Konfinamendu neurriak pixkanaka eta modu kontrolatuan altxatzea.

- Txertoa iritsi arte, kontrola.

Txertoa iritsi arte

Ardura kolektiboaren erakustaldia

Goraipatu nahiko genuke oñatiarrek erakutsi duten heldutasuna Covid-19ak sortutako krisi egoera honen aurrean. Horregatik Oñatiko gizartea zoriondu nahi dugu erakusten ari den jarrera arduratsu eta eredugarriarengatik. Ardura kolektiboaren erakustaldi hau izan dadila eraiki nahi dugun geroaren hitzaurrea.

| 2020-03-20 20:58:00

Lehenik eta behin, Oñatiko EH Bilduk bere doluminik sentikorrena erakutsi nahi dio Oñatin Covid-19ak utzi duen lehen biktimaren senide eta lagunei.

Goraipatu nahiko genuke gure jendarteak erakutsi duen heldutasuna, bai egoeraren larritasunaz jabetzerakoan, bai elkarren zaintza eta elkarlanerako erakutsitako grinarekin. Oso kontuan hartzekoa da egun gutxitan, soilik Oñatin 100 pertsonatik gorako zaintza sare herritarra sortu izana. Erakunde, eragile eta herritarren ekimenak osagarri, kooperazioa eta koordinazioa oinarri.

Guzti horregatik Oñatiko gizartea zoriondu nahi dugu krisi honen aurrean erakusten ari den jarrera arduratsu eta eredugarriarengatik. Oñatiarrek etengabe hartu diete agintariei aurre birusaren zabalpena murrizteko neurriak hartzerakoan. Lehenik, Jaurlaritzatik inolako neurririk hartu aurretik, tabernari, ostalari eta dendari askok euren negozioak itxi zituzten arriskua ekidite aldera. Bigarrenik, konfinamendu neurriak oraindik ere ezarri gabe zeudenean, elkartasuna eta zaintza erdigunean jarriz, herritar ugari zaintza sareetan antolatzen hasi ziren, egoera ahulenean daudenei babes komunitarioa ematearren. Eta, azkenik, ekonomia-produkzioaren eta osasunaren arteko eztabaida aurreikusita, Oñatiko langileriak argi izan du lehen momentutik orain osasuna dela lehenetsi beharreko eremua.

Bestetik, esker berezia eman nahi diegu momentu zail honetan gizartearen sostengu nagusi bilakatu diren profesional guztiei. Osasungintzan bere onena ematen ari diren mediku, erizain eta langile guztiei. Premiazkoak diren zerbitzuak bermatzeko esfortzu berezia egiten ari diren herritarrei, horniketa kateak sostengatzen ari direnei: elikagaiak, farmaziak, zerbitzu sozialak, garraioa, kale garbiketa… Bere onena ematen ari diren lagun hauentzat guztientzat babes pertsonalerako tresnak baliatzea ezinbesteko ikusten dugu.

Une honetan argi izan behar dugu osasuna, norbanakoarena eta guztiona, beste ezeren gainetik jarri beharrean gaudela, krisi produktibo-ekonomikoaren menpe utzi gabe. Lehentasuna krisi sanitarioa gainditzea da, inor bazterrean utzi gabe, eta gero bai, gero heldu beharko diogu dudarik gabe etorriko diren kalte ekonomikoak gainditzeko neurriak zehazteari, beti ere “pertsonak lehendabizi” lelopean eta, nola ez, baita ezinbesteoak ditugun herriko denda eta negozio txikiek jasandako kalteak konpontzeko norabidean.

Amaitzeko, honen guztiaren ondoren eraiki beharko dugun etorkizunean, egunotan ikusitako ehunka ezohiko irudi horiek izan daitezela geure normaltasun berriaren parte. Ospitaletan, arreta zerbitzuetan, lantokietan, eta, batez ere, etxean onena ematen ari direnen balioak bihur daitezela geure jendartearen iparrorratz. Ardura kolektiboaren erakustaldi hau izan dadila eraiki nahi dugun geroaren hitzaurrea.

Herri Plana, guztion artean guztiontzat

Azken bi urteotan, Harittu prozesuaren baitan, izugarrizko lana egin dugu EH Bilduren komunitatea saretzen eta etorkizunerako zutabeak finkatzen. Orain arte egindakoa herritarrei aurkeztu diegu Herri Batzarrean.

| 2020-03-01 18:59:00

Azken bi urteotan, Harittu prozesuaren baitan, izugarrizko lana egin dugu EH Bilduren komunitatea saretzen eta etorkizunerako zutabeak finkatzen. Ehun herritar baino gehiagok hartu dute parte prozesuan. Hala, lortu dugu hainbat arlotako herritar eta eragilek, etorkizuneko ildoak finkatzeko lanean jardutea. Lan gogorra, baina oso aberasgarria izan da. Komunitatearen ekarpenak, iritziak, proposamenak eta hobetu beharrekoak jaso ditugulako, besteak beste. Maiatzean eman genion amaiera Harittu prozesuari, eta bertan jasotako ekarpenak hauteskundeetako Herri Programan batu genituen. Orain, jaso ditugun ekarpen horiek guztiak hurrengo urteetarako Herri Planean jaso ditugu, denbora lerro baten finkatuta.

Herriari plana itzultzea

Azken bi urteotan lantzen jardundakoa, herriari aurkeztu genion azaroaren 23an Gaztelekuan egin genuen Herri Batzarrean. Plan sendoa da egin duguna, gure herrian ditugun erronkei ausardiaz eta arduraz erantzuteko prestatua. Gure komunitatearekin batera osatua. Hain zuzen, horrexek ematen digu izugarrizko bermea, gure komunitatearekin batera egin dugun plana izateak. Gaztelekuan egin zen batzarrean onartu zen plangintza zehatz eta integral hori; beraz, orain lanerako garaia da. Plangintzatik ekintzetara pasatzeko garaia da.

Ekintza Plana

Hain zuen, Harittu prozesuan irtendako proposamenak kronograma baten baitan jaso ditugu, eta hurrengo lau urteetarako ekintza zehatzak finkatu ditugu, arloz arlo. Beraz, plana eginda dago, ekintzak kronograman zehaztuta eta aurretik martxan dauden proiektuekin uztartuta.  

Herritarren babesa

Udal hauteskundeetara begira, proiektu eta talde sendoa aurkeztu genuen. Eta herritarrok ere hala ikusi zenuten. Horren lekuko da lortu genuen emaitza historikoa: 3620 bozka. Hala, hirugarren agintaldia dugu dagoeneko. Azken urte hauetan gauzak beste era batera egin daitezkeela erakutsi dugu, eta aurrerantzean ere bide beretik jarraituko dugu.

Beste politika eredu bat

Gainerako alderdiak politika instituzionalera mugatzen diren bitartean, guk gure jardun politikoa bi zutabetan oinarritzen dugu: alde instituzionala eta alde soziala. Uste dugulako ezinbestekoa dela herritik herriarendako eta herriarekin lan egitea. Hala, azken bi urteotan Harittu prozesuaren baitan egin dugun bezala, aurrerantzean ere arlokako lan-taldeekin jarraituko dugu lanean. Bere garaian sortu genituen taldeak indartu eta eraberrituko ditugu, gure komunitatearekin batera lanean jarraitzeko.

Jakin, badakigu ez dela erraza. Desberdinen arteko elkarlana eta norberaren gaitasun eta interesak dinamika amankomun batean uztartzea ez da erraza, baina konbentzimendu osoz diogu herritarren ekarpena beharrezkoa izango dela proiektu hau aurrera ateratzeko. Arlo desberdinetan lanean ari diren herritarren laguntza eta ekarpenak ezinbestekoak izan zaizkigu orain arte, eta aurrerantzean ere herritarrekin eskuz esku lanean jarraitzea da gure asmoa. Desberdinen arteko elkarlanean eta lidergo partekatuan oinarritutako kultura politiko berri bateranzko urrats garrantzitsuak eman ditugu azken urteetan, eta bide horretan sakontzea beste modurik ez dago aurrera egiten jarraitu ahal izateko. Hori da gure konpromisoa.

EH Bildu sarea

Hain zuen, hori aurrera eramateko eskuartean dugun beste erronka nagusia da EH Bildu sarea egunez egun zabaltzen joatea. Azken bi urteotan herritar askok hartu dute parte Harittu prozesuan, baina argi dugu komunitatea zabaltzen eta osatzen joan behar dugula. Herritar guztion beharra dugu. Guztiok gara ezinbestekoak. Gure helburua izan behar da ahalik eta jende gehienarengana iristea, zenbat eta ahots gehiago izan, orduan eta aberatsagoa eta indartsuagoa izango delako gure jarduna. Horregatik, zabalik ditugu ateak eta planak irekita jarraitzen du proposamen berrietara. Gure proiektuan parte hartzera animatzen zaitugu, guztiok daukagulako zer esan eta zer egin.

 

ALBISTEAK

Arkaitz Rodriguez: "Eskubide sozialak erdiesteko beharrezkoa dugu burujabetza"

2020-06-03 19:50:00

Gaurkotasun politikoaz jardun gara Arkaitz Rodriguez, EH Bilduren mahai politiko kide eta Sortuko idazkari nagusiarekin.

Norabide berri bati egiteko EH Bilduren plana

2020-05-19 22:19:00

Hurrengo hilabeteak erabakigarriak izango dira Covid-19ren ondorioz sortutako krisiaren kudeaketan. EH Bildun norabide berri bati ekiteko larrialdi plana garatu dugu.

EH Bilduk hezkuntza sistemarako eginiko proposamena

2020-05-15 20:17:00

EH Bildutik hezkuntza sistemara begirako planteamendu bat egiten dugu gainerako Hezkuntza komunitateko eragileekin partekatu eta adosteko borondatearekin.

EH Bilduk proposatutako laguntzak eztabaidatzeari uko egin dio EAJk

2020-05-15 20:12:00

EH Bilduk Nafarroako eredua aplikatzea proposatu du 2.200 euroko laguntzak emateko autonomoei, baina EAJk, PSErekin batera, ez du premiazkotzat jo Diputazio Iraunkorrean horretaz eztabaidatzea. Berdin egin du hezkuntza arloan: EH Bilduk ikasturte amaiera sektorearekin adostea planteatu du, baina hori ere atzera bota du, eztabaida bera ere galarazita.