Oñati

Oñatiko Udalak Covid-19aren ondorioei aurreko egiteko neurriak hartzen jarraitzen du

Osasun krisia hasi zenetik, hainbat izan dira udalak hartutako neurriak eta Elorza alkateak bideo mezu baten laburtu nahi izan ditu. Horrez gain, deskonfinamendurako mezua ere bidali die herritarrei.

| 2020-05-08 18:26:00

EH Bildun argi dugu, osasun krisi honetan, zaurgarrienei eskaini behar dizkiegula gure baliabide eta esfortzu gehienak. Hain zuzen, helburu horrekin hainbat neurri eta ekimen jarri ditu martxan Oñatiko Udalak, besteak beste, honakoak:  

Interneterako sarbidea bermatzea SIM txartel bidez ikasturte akademikoa online formatuan jarraitzeko zailtasunak zituzten ikasleei.

Gaztetxoei zuzenduriko zerbitzu presentzialak online formatuan ematen jarraitzea, gaztelekuko hezitzaileen bitartez, ludoteka, Txipistin… Kalera irteten hasiak direnez, lagungarri izan dakiekeen dekalogoa ere argitaratu da.

Lehen sektoreak duen garrantzia aitortu eta asteburutako azoka segurtasun neurriak betearazteko lekuz aldatzea.

Diru-partida berriak sortu eta lehengoak indartu, bai gizarte zerbitzuetan eta baita sozioekonomian. Itxialdiko gastuei aurre egiteko partida bat ere gorde da. Hain zuzen ere, 500.000 euroko poltsa erreserbatu da herriko merkataritza, ostalaritza eta zerbitzu sektoreko establezimenduei laguntzeko. Kuttuna.org web plataformaren egitasmoarekin bat eginda, bonuen balioaren %20 diruz laguntzeko sistema sortu da.

Zumaiako udalarekin elkarlanean, jostunen sarea martxan jarri eta maskarila berrerabilgarriak egingo dira herritarrengan banatzeko.

Bestalde, Elortza alkateak bideo mezuan aipatzen du EH Bildun badakigula orain artean hartu ditugun neurri guzti hauekin, herritarren gehiengo baten beharrei erantzuten diegula, baina beste hainbatek laguntza berezia behar izango dutela. Hala, herritarrei dei egiten die, laguntza behar izanez gero, etxez etxe banatu diren esku-orrietan dauden harremanetarako kontaktuak erabiltzeko. 

Alkateak eskertze eta animo mezu batekin amaitzen du bere mezua: "Azken txanpa honetarako indarrak mantentzea eskatu behar dizuet, ez erlaxatzea alegia. Bestetik, eskatu gura nizueke deskonfinamenduaren fasean eta ostean ere herrian erroturik dugun elkartasunari heltzeko, ondokoa laguntzen segitzeko, elkar zaintzeko". 

 

EH Bilduk konfinamenduaren irteera koordinaturako egindako proposamena

Proposamen honen helburua, konfinamenduaren irteera ordenatua ahalbidetuko duten tresnak planteatzea da, kasu berrien agerpena ahalik eta gehien murriztuz eta horiek goiz antzemanez.

| 2020-05-01 11:35:00

Etorkizuneko agertokirik posibleena da, SARS-CoV-2 (nCOV) koronabirus berriaren transmisioa ezingo dela epe laburrean ezabatu, eta konfinamendua plangintza egokirik gabe erretiratzen bada, datozen hilabeteetan berriro ere gaitzaren agerraldiak izango direla. Kutsagarritasun handia, inkubazio-aldi laburra eta populazio immunizatuaren proportzio txikiaren (% 15) ondorioz gertatzen da hori.

Agerraldi horiek heriotza berriak eta osasun-baliabideen erabilera intentsiboa eragingo dituzte, Osakidetza eta Osasunbidearen sareen saturazioaren eta kolapsoaren ondorio ezagunekin.

Infekzioa kontrolatzeko neurri eraginkorrak erabiltzen baditugu ere, litekeena da kasu berri horiek kontrol epidemiologikotik ihes egitea. Infekzioa kontrolatzeko neurri zorrotz eta planifikatu horiek gabe konfinamendutik ateratzen bagara, kasu askok ihes egingo diote kontrol epidemiologikoari, aipatutako ondorioekin.

Beraz, beharrezkoa da konfinamenduaren irteera koordinatua egitea. Hemen duzue EH Bildutik proposatzen duguna:

EH Bilduren proposamen eta neurriak Covid-19aren aurrean

EH Bilduk estrategia integral bat jarri du mahai gainean eta zuzeneko kudeaketan gabiltzan udaletan argi erakutsi dugu gure jarrera, proposamen eta neurriak hartuz.

| 2020-04-25 18:58:00

Covid-19-aren pandemiak guztiok jarri gaitu arriskuan. Hala ere, krisi momentuetan beti daude gogorrago kolpatutakoak izaten diren sektoreak, eta ondorioak modu gordinago batean jasaten dituztenak. Hori horrela izanik, ezinbestekoa da pertsona guztiak babesteko neurriak hartzea eta garai zailak pasatzean guztiek lehengo bizitzari berriro ekiteko baliabideak dituztela bermatzea. 

Zentzu horretan, eta alderdikeriak albo batera uzteko momentuak bizi izan ditugula kontuan izanik, adituekin kontrastatutako proposamen integralak egin dizkiogu Eusko Jaurlaritzari pandemiaren momentu desberdinetan, eta gure udaletan neurri zehatzak hartu ditugu egoerari behar bezala aurre egin ahal izateko. Gure proposamenek momentu batzuetan jasan duten manipulazioa kontuan izanik, jarraian herritar guztien eskura jartzen ditugu, nahi duenak zuzenean irakurtzeko eta bere ondorioak ateratzeko aukera izan dezan. 

Hemen gure estrategiaren inguruko argibideak: 

  1. Pandemia hasieran egindako proposamena
  2. Ondorio ekonomikoei aurre egiteko talka plana
  3. Oñatiko Udalak herrirako hartutako neurriak
  4. Konfinamenduaren irteera koordinatua 

Izaro Elorza alkatearen bideo mezua ere ikusgai duzue hemen.

Covid-19: Udalak hartutako neurriak

Covid-19ak sortutako ondorio eta kalteei aurre egiteko, Oñatiko Udalak hainbat neurri hartu ditu, besteak beste, herriko merkatari eta ostalariei laguntzeko neurriak iragarri ditu.

| 2020-04-25 18:40:00

EH Bildutik argi izan dugu inor alboan utzi gabe egin behar genuela aurrera krisi honetan, elkartasunez, pertsonak erdigunean jarriz. Argi izan dugu zaurgarrienak ezin zitezkeela zaurgarriago bilakatu. Horregatik, eskura ditugun baliabideak jartzen gabiltza.

Hala, sozioekonomiari dagokionean, 500.000 euroko diru-poltsa sortu dugu merkataritza, ostalaritza eta zerbitzu sektoreko establezimenduei laguntzeko. Zehatz esanda, argiaren eta uraren fakturak ordaintzen laguntzeko (97.000 euro), zabor tasak ordaintzeko (25.000 euro), herriko komertzioen aldeko sentsibilizazio kanpainarako (8.000 euro), bestelako kostu finkoei aurre egiteko (220.000 euro) eta erosketa bonuen sistema indartzeko (150.000 euro) erabiliko litzateke poltsa hori. Azken horri dagokionez, esatea, oso harrera ona izaten ari dela Kuttuna.org web plataformak sorturiko erosketa bonuen sistema: 20.000 euroko hasierako diru-poltsa bat sortu genuen, herriko merkataritza, ostalaritza eta zerbitzu sektoreko negozioetan 100.000 euroko fakturazioa bermatzeko -aste bat igarota (apirilak 22), 62.500 eurokoa zen bermaturiko fakturazioa-. Eusko Jaurlaritzari dagokio aipaturiko sektoreendako neurri eraginkorrak hartzea, baina, behar moduko laguntzarik ematen ez duela ikusita, iniziatiba hartzea eta horiendako laguntzak bermatzeko poltsa sortzea erabaki dugu. Neurri gehiago ere hartu ditugu, besteren artean, autonomo eta mikroenpresentzako informazio eta aholkularitza zerbitzua jarri dugu martxan, eta negozioak itxita egon bitartean ez da kobratuko bide publikoaren okupazioaren tasa.

Bestetik, gizarte zerbitzuetako laguntzak indartu ditugu. Hainbaten artean, bonu sozialak sortu ditugu baliabide urriko pertsonek edo familiek herriko dendetan elikagaiak eta garbitasunerako produktuak eros ditzaten -20.000 euroko igoera izan du halakoetara bideraturiko poltsak-. Ostera, arreta berezia dugu jarria Gizarte Larrialdietarako Laguntzetan (GLL). Krisi honen ondorioz, goraka doaz eskaerak, eta askotarikoak dira eskatzaile berriak. Kasu horretan, Eusko Jaurlaritzaren ekarpen ekonomikoarekin ez da aski -85.874 euro jarri ditu guztira-, eta, beraz, udalak jarri du laguntzaren zati handiena -205.430 eurokoa da aurtengoa-. Aipaturikoez gain, alokairu sozialetako alokairuen kobrantza eten egin da momentuz.

Bada martxan jarri dugun bestelako neurririk ere: ikasleei internet sarea ahalbidetzeko partidaren sorrera (2.000 euro); indarkeria matxistaren kontrako baliabideak eta arreta ziurtatzeko bitartekoak jarri dira; eten ez zitezen, udal liburutegiko, euskaltegiko, gaztelekuko, ludotekako eta abarretako zerbitzuak moldatzeahainbat zergaren ordainketa atzeratzea -horien artean dira Trakzio Mekanikoko Ibilgailuen Gaineko Zerga, Ondasun Higiezinen Gaineko zerga, IBI iraunkorra, garaje eta hilerriko tasak-; kiroldegiko edo udal ludotekako urteko kuotaren zati proportzionala itzultzeabide okupazioagatiko (hesiak, aldamioak, eraikuntza materialak…) zein baratze parkearen erabileragatiko tasarik ez kobratzeaudalaren zenbait lokalen erabiltzaileei alokairurik ez kobratzea –Eltzia eta Zubiko tabernak, Olaburu eta Olalan-; umeak kalera irteten direnerako dekalogoa sortzea…

Era berean,  gogora ekartzea nekazari eta baserritarren azokaren alde egindako apustua. Bada,  agerian utzi genituen Eusko Jaurlaritzak azokak debekatzeko harturiko erabakiaren zentzugabetasuna eta oinarri sendo baten gabezia.

Bestetik, boluntario sarea ehuntzen laguntzeko erronka bota genizuen, eta ondo baino hobeto erantzun zenuten. Horregatik, eskerrik asko. Eskerrik asko, albokoa laguntzeagatik, elkartasunez aritzeagatik, txarrenaren testuinguruan onenerako zirrikituak topatzeagatik, nork berea partekatzeagatik...

Kritiko Eusko Jaurlaritzaren kudeaketarekin

Bizi izan dugun egoeran, politika alderdikoia alde batera utzita, proposamen eraikitzaile integral bat egin genuen EH Bildutik. Batzuek hura desitxuratzeko eta eztabaida desbideratzeko egin duten ahalegina ikusita, argipen pare bat egin nahi genituzke. Lehenik eta behin, modu arduragabean milaka langileren osasuna arriskuan jarri izana gaitzetsi dugu. Ez dugu inondik inora ekonomia blokeatzea planteatu, krisi honen ondorio ekonomikoek kezka handia sortzen baitigute. Esan duguna da, guztia gero eta lehenago gelditu, lehenago bueltatu ahal izango ginatekeela normaltasunera eta ondorioei aurre egiten hasi, eta gainera modu horretan herritarren segurtasuna ere bermatzen zela. Erdibideko formulek, horrelako egoerak luzatu besterik ez dituzte egiten.

Bestalde, Jaurlaritzaren neurriek batez ere elite ekonomikoen interesei erantzuten zietela salatu dugu, batzuk beste batzuk baino gehiago babestu dituelako (nabarmen ikusi genuen hori azoken debekuan). Merkataritza txikia eta lehen sektorea ere ekonomia dira, eta momentu zailetan guztiei lagundu behar zaiela uste dugu (AHTa egiteko 542 milioi euro bideratu berri ditu EAJk, eta, hegoaldeko trenbide saihesbidearendako, 464 milioi euro. Bitartean, autonomoak laguntzeko 3 milioi euro agindu ditu. EAEn 180.000 autonomo daude. 17 euro autonomo ratioko). Zaurgarrienendako behar moduko laguntza neurririk ez dakar Eusko Jaurlaritzak.

Osasun neurriak betetzen direla bermatuta, Oñatiko azoka irekita!

Guztiz inkoherentea eta zentzugabea iruditu zaigu Eusko Jaurlaritzak azokak debekatzeko argitaratu berri duen dekretua.

| 2020-04-11 10:51:00

Lantegiak eta supermerkatuak jendez lepo dauden honetan, zein zentzu dauka azokak egitea debekatzeak? Gainera, ez dugu ahaztu behar elikagaien salmenta lehen mailako beharra dela.

Guk, EH Bilduk presentzia duen instituzio guztietan, egoerak eskatzen duen erantzukizunarekin, jendearen osasuna lehenetsi eta gizartea konfinatzearen aldeko jarrera hartu dugu. Hala ere, logikoa den bezala, egoera ekonomikoak kezkatzen gaitu, eta ez dugu inondik inora ekonomia besterik gabe gelditzeko eskatzen. Ezinbesteko jarduera ekonomikoa, segurtasun neurriak zorrotz jarraituz, mantentzearen aldekoak gara, besteak beste, elikagaien banaketa.  Gainerako jarduera ekonomikoak, gero eta lehenago itxi, azkarrago itzuliko gara normaltasunera eta lehenago ekin ahal izango diogu ondorioei aurre egiten. Eta denbora guri arrazoia ematen ari da.

Covid 19-ren krisiak ekonomian izango duen eraginak biziki arduratzen gaitu, jakin badakigulako pertsonen osasuna eta ekonomia guztiz lotuta doazela. Hala ere, arreta deitu digu EAJk eta Eusko Jaurlaritzak erakutsi duten aurpegi bikoitzak: komertzio txikia eta ostalaritza itxi zirenean ez zuten horrenbesteko zaratarik atera, baina sektore jakin batzuk ukitu direnean eta Confebask eta elite ekonomikoek ahotsa altxatu dutenean, dena hankaz gora jarri dute. Ez al dira guztiak gure ehun ekonomikoaren parte eta, beraz, ez al gara guztiengatik modu berean arduratu behar? 

Kontraesan horren barruan interpretatzen dugu gure nekazari, abeltzain eta artzainen azokak debekatzeko egin duen hautua. Osasun krisi hau hasi zenetik, azoka kiroldegira lekualdatu eta segurtasun neurri guztiak zorrotz bete ditu. Gainera, azokari berebiziko garrantzia aitortzen diogu bi arrazoirengatik: kalitatezko elikagaiak herritarren eskura jartzea lehen mailako beharra delako, eta herriko baserritarrei, eta lehenengo sektoreari oro har, lagundu egin behar zaielako garai zail hauetan ere.

Hori dela eta, txalotu egiten dugu udalak, osasuna bermatzeko neurriak betetzen direla bermatuta, azoka ireki izana. Bide batez, eskerrak eman nahi dizkizuegu egun hauetan jarrera erabat arduratsua erakusten ari zareten herritarrei, eta horretaz gain, herriko merkatari eta ekoizle txikien aldeko konpromisoa mantentzera animatu nahi zaituztegu.

ALBISTEAK

Arkaitz Rodriguez: "Eskubide sozialak erdiesteko beharrezkoa dugu burujabetza"

2020-06-03 19:50:00

Gaurkotasun politikoaz jardun gara Arkaitz Rodriguez, EH Bilduren mahai politiko kide eta Sortuko idazkari nagusiarekin.

Norabide berri bati egiteko EH Bilduren plana

2020-05-19 22:19:00

Hurrengo hilabeteak erabakigarriak izango dira Covid-19ren ondorioz sortutako krisiaren kudeaketan. EH Bildun norabide berri bati ekiteko larrialdi plana garatu dugu.

EH Bilduk hezkuntza sistemarako eginiko proposamena

2020-05-15 20:17:00

EH Bildutik hezkuntza sistemara begirako planteamendu bat egiten dugu gainerako Hezkuntza komunitateko eragileekin partekatu eta adosteko borondatearekin.

EH Bilduk proposatutako laguntzak eztabaidatzeari uko egin dio EAJk

2020-05-15 20:12:00

EH Bilduk Nafarroako eredua aplikatzea proposatu du 2.200 euroko laguntzak emateko autonomoei, baina EAJk, PSErekin batera, ez du premiazkotzat jo Diputazio Iraunkorrean horretaz eztabaidatzea. Berdin egin du hezkuntza arloan: EH Bilduk ikasturte amaiera sektorearekin adostea planteatu du, baina hori ere atzera bota du, eztabaida bera ere galarazita.