Oñati

Ezker subiranismotik dator alternatiba bakarra Europan

Irlandan, Eskozian, Katalunian eta Hego Euskal Herrian, hauteskundeetako emaitzek erakutsi dute gero eta babes handiagoa dutela independentziaren zein errepublika konstituzionalaren aldeko alderdi politikoek.

| 2020-06-14 17:26:00

Ezkerreko agenda soziala eta ekonomikoa dutenek, hain zuzen. Alderdi horiek hautesle gazteak irabazten ari dira bereziki, eta boto kopurua etengabe handitzen ari den Europako ezkerraren zati bakarra islatzen dute.

Irlandan, Seinn Féin lehen indarra

1961etik 1997ra bitartean, Irlanda Batua helburu izanik, Sinn Féinek ez zuen eserlekurik eskuratu Irlandako Parlamentuan. 1998ko Ostiral Santuko Hitzarmenaren ondotik, ordea, alderdi errepublikanoak igoera mantsoa baina etenik gabekoa izan zuen Irlandako hegoaldean. 2020ko otsaileko hauteskundeetan, berriz, izugarrizko biraketa jasan du: lehen postuan sartu da Sinn Féin botoen %24,5 eskuratuta. Emaitza hori azken 97 urteetako onena izan da hegoaldean, eta lortutako babesa %11 handiagoa 2016ko hauteskunde orokorrekin alderatuta. Sinn Féinen garaipena, halere, euroguneko krisiaren testuinguruan ulertu behar da. Hamarkada bateko herstura ekonomikoaren ondotik, etxebizitza kostuen murrizketa eta osasun arloan inbertsioak eskatzen dituen gehiengo gazteen botoak eskuratu baititu alderdiak.

Eskozian, SNP nagusi

Eskozian, Alderdi Nazionala (SNP) botere politiko nagusia bilakatu da azken hamarkadan: 2014ko independentzia erreferendumetik, Eskoziako sei hauteskundeak irabazi ditu SNPk. Areago, iazko abenduko hauteskunde orokorretan, SNPk eskoziar eserlekuen %80 irabazi zituen; bigarren “indyref”-erako (independentzia erreferenduma) eskaerak berpiztuz. Eskoziako Parlamentuko agintean izan da SNP 2007tik, eta beti ezkerretik gobernatu ez duen arren, Erresuma Batuko alderdi kontserbadorearen hamarkadako estura politiken aurka agertu da.

Katalunian, ERC indartsu

Katalunian, Esquerra Republicana-k (ERC) inoizko emaitzarik onena lortu zuen Espainiako hauteskunde orokorretan: 13 eserleku eta botoen %22,3. Quim Torra buru duen independentziaren aldeko koalizio gobernua Bartzelonan amilduko balitz ere, Kataluniako aurtengo hauteskundeetan, indar independentistek gehiengo konbinatua irabazteko bidean leudeke inkesten arabera. ERCk hauteskundeak irabazteko aukera handia izango luke.

Euskal Herrian, EH Bildu gora

Euskal Herrian, EH Bilduk bere emaitzarik onena lortu zuen Espainiako hauteskunde orokorretan. Zazpi hilabete lehenagoko hauteskundeetan baino %2 babes gehiago (%18,7 guztira) eta bost ordezkari eskuratuta, hain zuzen. Horrez gain, inkestek iradokitzen dute EH Bilduk babes are handiagoa eskuratuko duela, EAEko hurrengo hauteskundeetan.

Sozialdemokraziaren porrota

Nola azal liteke alderdi ezkertiar eta subiranisten gorako joera hori? Kontuan hartu beharreko faktore politikoak, soziologikoak eta instituzionalak daude. Politikoki, Europako sozialdemokraziak gainbehera historikoa jasan du 2008az geroztik. Zentro-ezkerreko alderdien konplizitateak, soldatak izoztu eta desberdintasun sozialak areagotu diren hamarkada honetan, ‘Pasoknifikazioa’ ekarri du. Greziako Pasok alderdi politikoaren izenetik dator hori, bere burua suntsitu zuen austeritate politiken aginduetara makurtzeagatik. Alderdi subiranistek babesa irabazi dute, Europako sozialdemokraziaren porrotaren aurrean, benetako ezkerreko alternatiba eskaintzen dutelako.

Soziologikoki, nortasun nazionalaren indarra ahulduz joan da globalizazio garaian; bereziki, britainiar edo espainiar atxikimendu txikia duten gazteen artean. Testuinguru horretan, estaturik gabeko nazioen nortasuna politikoki indartu daiteke; besteak beste, estatu zentralaren kontra-kultura gisa. Estatu independentearen aukerak onarpen zabala dauka, bestelako gizarte eredua lortzeko bidean. Instituzionalki, ezker subiranismoa oso ondo kokatuta dago ordezkatzen dituen komunitateetan; estatu inperialen aurkako borroka historikoetan errotutako tradizio politikoak dituztelako. Bai Euskal Herriko eta Irlandako gatazka armatuen garaian, baita Katalunian zein Eskozian izandako azken independentzia erreferendumetan ere. Sustraitze horrek hauskaitzago egin du espazio hori; bai, behintzat, 2008az geroztik sortutako ezkerreko alderdiekin alderatuta.

Orain, ezker subiranismoak asmatu egin behar du nola itzuli hauteskundeetan jasotako babesa estatu independentea lortzeko estrategian; nazio desberdinen autodeterminazio eskubidea onartu nahi ez duten estatu inperialisten hortzen aurrean, alegia.

Arkaitz Rodriguez: "Eskubide sozialak erdiesteko beharrezkoa dugu burujabetza"

Gaurkotasun politikoaz jardun gara Arkaitz Rodriguez, EH Bilduren mahai politiko kide eta Sortuko idazkari nagusiarekin.

| 2020-06-03 19:50:00

Burujabetzaren aldarria dago EH Bilduren ekintza politikoaren erdigunean. Zergatik horrenbesteko garrantzia?

Burujabetza EH Bildurentzat ongizate handiagoaren seinale delako, hain zuzen ere. Beste batzuek aldarri hori identitate kontua dela esan ohi dute; guretzat, berriz, ez da bandera kontu bat soilik, ongizate kontu bat ere bai. Burujabetzak esan nahi du: gure pentsio sistema aukeratu ahal izatea, lan baldintzak hemen fi nkatu ahal izatea eta hezkuntza sistema propioa eraiki ahal izatea gure ekonomia erronken arabera, eta ez hirugarrenen premien arabera. Azken batez, burujabetzak esan nahi du babes sozialerako sistema publiko eraginkor bat hemen antolatu ahal izatea. Horrenbestez, burujabetza zuzen-zuzenean lotuta dago afera materialarekin, hots, ongizatearekin.

Zergatik uste duzu bertan erabakitzeak jendearen eskubideak bermatzeko eta herri honen etorkizuneko erronkei erantzuteko baldintza hobeak eskaintzen dituela?

Bi arrazoi nagusirengatik. Lehena lotuta dago erabaki markoen hurbiltasun edo urruntasunarekin. Frogatuta dago aspalditik erabaki markoak jendearengatik zenbat eta hurbilago egon, orduan eta eraginkorragoak direla erabakiak jendearen interesei eta beharrei erantzuteko. Horregatik, askoz ere eraginkorragoak izango dira
politikak baldin eta erabakiak Gasteizen eta Iruñean hartzen badira, eta ez Madrilen edo Bruselan. 

Bigarren arrazoia indar harremanarekin lotuta dago. Jakina da Ebrotik beherako edo, oro har, espainiar estatuko indar harremana zein den. Bertan eskuinak eta, are gehiago, eskuin muturrak askoz ere indar gehiago du Euskal Herrian baino. Hortaz, gure buruari egiten diogun galdera hurrengoa da: zer dela eta egon behar du gure gizarteak Ebrotik beherako indar harreman horien menpe? Euskal Herrian egon badago indar harreman bat gizarte gehiengoen behar eta interesen askoz aldekoagoa; langile eta herri sektoreen aldekoa, alegia. Euskal Herrian badaukagu klase sindikalismo bat borrokalaria Espainian ez dutena. Euskal Herrian badaukagu ezkerreko subiranismo bat EH Bildun hezurmamitua espainiar estatuan ez dagoena. Hemen aukerak daude askoz ere politika aurrekoiagoak egiteko. Horretarako, noski, beharrezkoa dugu inoren menpe ez jarraitzea eta gure kabuz erabaki ahal izatea.

Norabide horretan urratsak emateko herri akordioen garrantzia azpimarratu izan du EH Bilduk, baina, badirudi gainontzeko indar politikoak bederen ez daudela bide horri ekiteko prest. Zein irakurketa egiten duzu batez ere EAJk eta Podemosek legebiltzarreko estatusaren komisioan mantendu duten jarreraren inguruan?

EAJk eta Podemosek uko egin diote herri honen erabakitzeko eskubidea defendatzeari, autodeterminazio eskubidea defendatzeari eta, azken batean, burujabetzari. Horrekin uko egiten ari dira herri honetan ongizate handiagoa eraiki ahal izateari. Gogoan hartu behar da biek ala biek 2016ko hauteskunde programan gai hori jaso zutela, eta uko egin diote. Podemosek, horrez gain, uko egin dio ere ezkerreko alternatiba bat eraikitzeari, noiz eta EAJren makulu bihurtu denean. Baldintza horietan guk esaten dugu alternatiba bakarra EH Bildu dela, bai burujabetzan aurrera egiteko, baita alternatiba aurrerakoi bat eraiki ahal izateko ere.

Podemosek dio eskubide sozialak lehenetsi behar direla. EH Bilduk, berriz, eskumenetan jartzen du arreta, ez baitio zentzurik ikusten eskubide sozialak zerrendatzeari, haiek babestu eta blindatzeko eskumenik ez badago. EAJren formula, aitzitik, bestelakoa da: Espainiarekin akordioak bilatzen ditu haustura formularik onartu gabe. Nola baloratzen dituzu bi jarrera hauek?

Podemosen jarreraren aurrean, EH Bilduk argi dauka burujabetza eta eskubide sozialak ez direla banatu daitezkeen bi elementu. Eskubide sozialak erdiesteko beharrezkoa dugu burujabetza; izan ere, frogatu dugu burujabetza gabe ez daukagula aukerarik ez pentsioak hemen erabakitzeko, ez lan baldintzak hemen fi nkatzeko, ez etxebizitza lege propio bat aurrera atera ahal izateko –errekurritu eta kamustu egin zigutelako–, etab. Beraz, ez dago bereizketarik eskubide nazional eta sozialen artean. Biak dira bat.

Bestalde, EAJk dio Espainian ez dela giro eta ez duela zentzurik guk hemen burujabetza edo erabakitzeko eskubidea aldarrikatzeak, Espainiak aukerarik emango ez digulako. EH Bildun ez dugu gure burua engainatzen eta oso kontziente gara Espainiako giroaz eta bertan eman ahal den eboluzioaz. Edonola ere, horrek ez du esan nahi gure eskubideei uko egin behar diegunik. Uko eginez gero, orduan, dagoeneko, Estatuak irabazi duelako.

Gainontzeko indar politikoekin ezinezkoa bada, gizartea geratzen zaigu. Nola ikusten duzu herri honetako gizartearen pultsua? Aurreraka edo atzeraka goaz?

Uste dut nabarmen aurrerantz goazela. Azken urteetan azken hamarkadetako mobilizazio indartsuenak izan dira; kasu askotan aurretik ikusi gabekoak, gainera. Hor izan dira emakumeak, martxoaren 8an, kasu. Greba kontzepzio berri oso bat mahai-gaineratzea lortu dute. Pentsionistak ere astelehenero dira beraien eskubideen defentsan. Autoritarismoari aurre eginez eta demokrazia aldarrikatuz jardun dute gazteek ere, Altsasuko auziaren harira. Horiek guztiak erabakitzeko eskubidearen edo burujabetzaren aldeko aldarriak dira, Gure Esku Dagok eta beste hainbat eragilek egin dituzten mobilizazio erraldoiekin batera.

Hori dela eta, guk ikusten dugu badagoela herri honetan gehiengo sozial bat aurrekoia, subiranista, feminista eta ekologista dena. Are gehiago, elektoralki nagusi den EAJri gustatuko litzaiokeena baino askoz jendarte handiagoa da aurrerazalea Euskal Herrian. Beraz, erronka hurrengoan datza: batetik, gehiengo sozial hori aktibatzea eta mobilizatzea; bestetik, termino elektoraletan proiektatzea.

Badirudi historikoki independentziaren aldarria gizarteko sektore abertzale eta euskaldunenetan nabarmendu izan dela. Hala ere, pixkanaka-pixkanaka badoaz beste herri sektore batzuk ere horrekin bat egiten. Zer esango zenioke euskalduntasun identitarioan kokatzen ez den pertsona bati? Nola konbentzitu burujabetzaren beharraz?

Euskalduntasun identitarioan kokatzen ez den pertsona bati esango nioke independentziak ez duela zerikusirik banderekin soilik. Burujabetzak ongizatearekin du zerikusia, batez ere; arlo guztietan hemen erabakitzeko aukera izatearekin, hain zuzen ere. Ondorioz, pentsio, lan baldintza, hezkuntza sistema, babes sozialeko sistema eta abar hobea izatearekin. Horrez gain, galdera bat luzatuko nioke: zer nahiago duzu, zure burua zuk zeuk gobernatu ala hirugarren batek gobernatzea? Zer dela eta gobernatu behar gaituzte beste batzuek? Ez gara adingabekoak, ezta ezinduak ere. Bistan da, ez garela inor baino gehiago, baina, ezta inor baino gutxiago ere. Zergatik izan behar dugu orduan, esaterako, espainolek, frantsesek, italiarrek edo alemaniarrek baino autogobernu gutxiago? Zer dela eta beraiek beraien burua goberna dezakete eta guk ez?

EH Bilduko Madrileko diputatu Mertxe Aizpuruak berriki adierazi du beraien helburua Madril mugiaraztea dela, bakarrik ez delako mugituko. Zer espero dezakegu Madrilgo gobernu “progresistarengandik”?

Uste dut afera ez dela horrenbeste esperoan egotea; afera da behartzea. Hau da, guk behartu behar dugu gobernu hori etxeko lanak egitera. Lehentasuna da Estatuaren sakoneko demokratizazioa bultzatzea, soil-soilik posible izango dena onartzen badu bere nazio aniztasuna eta bere baitako herrien erabakitzeko eskubidea edo burujabetza. Hala eta guztiz ere, argi dugu konponbideak ez zaizkigula Madrildik iritsiko; Euskal Herrian aurkitu behar ditugu. Horretarako, Euskal Herrian behar besteko gehiengoak eraiki eta prozesu eratzaile, subiranista eta autozentratu bat jarri behar dugu martxan.

Euskal Herriak konponbide politikoak behar dituela esaten dugu; haien artean, euskal presoen auzia lehenbailehen konpontzea. PSOE auzi horri erantzuna emateko prest dagoela uste duzu?

Ez dakit prest dagoen ala ez, baina, egon dadin behartu beharko dugu; hor dago gakoa auzi honetan ere. Herri honetan badago gehiengo bat espetxe politika aldatzearen alde, horrenbestez, jendarte hori aktibatu, mobilizatu eta operatibo bilakatu behar dugu euskal presoen auziari irtenbidea emateko, azken fi nean, Madrilek espetxe politika hori errotik aldatu beste aukerarik izan ez dezan.

Estatuko gainontzeko independentistekin (JxC, ERC, BNG, CUP, Esquerra Valenciana eta MES) Llotja del Mar-eko adierazpena sinatu zuen EH Bilduk. Zein bide egin dezake ekimen horrek?

Llotja del Mar-eko adierazpena indar metaketa bat da aldarri batzuen bueltan: gure herrien erabakitze edo autodeterminazio eskubidea; preso guztien kaleratzea; arazo politikoen aurrean, konponbide politiko, elkarrizketatu, negoziatu eta demokratikoa; eta azkenik, politika sozial eta ekonomiko aurrerakoiak. Dagoeneko martxan dira ekimen batzuk. Besteak beste, talde bateratua Espainiako Kongresuan eta Senatuan eta espiritu eta aldarri berak bilduko dituen talde bateratua Europako Parlamentuan. Oro har, Kataluniako eta Euskal Herriko burujabetza prozesuen desblokeoa, aurrerabidea eta arrakasta berma dezakeen giltza izan daiteke Kataluniarekin artikulazioa.

Eskuina ere hasi da indarrak metatzen. Zein irakurketa egiten duzu?

Espainiar eskuina eta eskuin muturra kontziente da posizioak galtzen ari dela bai Katalunian bai Euskal Herrian, eta baita Galizan ere, polikiago izan arren. Horregatik, orain arteko posizioei eusteko indarrak batu beharra ikusi dute. Nolanahi ere, gure aburuz eskuin eta eskuin mutur espainolaren gutxiengoranzko joera geldiezina da. Hori dela eta, Katalunian, Euskal Herrian eta Galizan geroz eta espazio gutxiago izango du, ordezkatzen duen proiektu politikoa herritarren nahi eta interesengatik geroz eta urrunago dagoelako eta, alderantziz, herria geroz eta urrunago dagoelako unionismo intransigente eta ultraneoliberal horretatik. Laburbilduz, gizarte horiek geroz eta aurrerakoiagoak, subiranistagoak, feministagoak eta ekologistagoak dira, ezkerreko subiranismoaren borrokaren eta lanaren ondorioz, nagusiki.

Bestalde, Europa mailan subirautzaren inguruko eztabaida pil-pilean dago eta ikusi besterik ez dago SNPk Eskozian eta Sinn Feinek Irlandan lortutako emaitzak. Zein aukera ireki daiteke Europa mailan?

Llotja-ko ereduari jarraiki, gure asmoen artean badago antzeko artikulazioa bat sustatzearena Europako estaturik gabeko nazioetako indar subiranisten artean, baina, Bruselari dagokionez. SNPren eta Sinn Feinen garaipenek erakusten dute Europan apurka-apurka prozesu subiranistak aurrera doazela eta herrien autodeterminazio eskubidearen aldarria pixkanaka-pixkanaka bidea egiten ari dela. Posible izan da Eskoziako erreferenduma, litekeena da bigarren bat izatea, eta uste baino hurbilago dago erreferendum bat Irlandan bertan. Eskozian edota Irlandan independentzia nagusituko balitz, aldaketa legalak eragingo lituzke egitura juridiko horretan ala, bederen, horretarako aukerak sortuko lituzke. Horrek, noski, erakusleiho bat zabalduko lieke gainerako nazioei: Katalunia, Korsika, Flandria eta Euskal Herriari, adibidez.

Aurrera begira, zer? Zein da EH Bilduren proposamena subirautza bidean aurrera egiteko?

Hiru ildo nagusi ditugu. Bata, Kataluniarekin artikulazioa: elkarrekin mahaigaineratzea bide-orri eta estrategia komun bat Madrilen eta Bruselaren aurrean, gure burujabetzaren defentsan jarduteko. Bigarrena, Euskal Herrian ezkerreko subiranismoaren indartzea, eta horrek EH Bildu potentziatzea eskatzen du. Hirugarrena, Euskal Herrian burujabetza eta aldaketa soziala uztartuko dituen herri bulkada indartsu bat antolatu eta sustatzea, izan ere, urtarrilaren 30eko greba orokorrak erakutsi zigun badagoela gehiengo sozial bat klabe horretan. Ondorioz, EH Bilduren eginbeharra da gehiengo hori aktibatzea, mobilizatzea eta operatibo bilakatzea termino politiko eta instituzionaletan.

Norabide berri bati egiteko EH Bilduren plana

Hurrengo hilabeteak erabakigarriak izango dira Covid-19ren ondorioz sortutako krisiaren kudeaketan. EH Bildun norabide berri bati ekiteko larrialdi plana garatu dugu.

| 2020-05-19 22:19:00

Alde anitzetara begiratuz kudeatu beharreko garaiak izango dira: alde batetik, krisiaren ondorio sozioekonomikoak arintzeko premiazko neurriak hartu behar dira. Bestetik eta berehala, etorkizuna prestatu behar da, politika publikoei ikuspegi berri bat aplikatuz. Premia larriei aurre egiteaz gain, transformazio-bektore bat aktibatu behar da, sistemaren akats larriei eraso egingo diena eta gaurtik hasita garapen eta gizarte-ongizateko eredu berri baten oinarriak eraikitzen hasiko dena. Berehala jaiki, norabidea zuzendu eta ibiltzen hasteko. Lehenengo gauza zutik jartzea da.

Krisiaren dimentsio sanitarioa eta sozioekonomikoa gutxiestea etorkizun hurbilean erraz ordain daitekeen akatsa da. Eusko Jaurlaritza eta EAJ akats hori egiten ari dira. Eta interes elektoral batek bultzatuta ari dira, eta hori arduragabekeria larria da. Historia garaikidean aurrekaririk ez duen krisi honi neurria hartu behar diogu, eta gure gaitasun komunitarioak berehala aktibatu, inguruabarrei aurrea hartzeko eta egoera sozioekonomiko benetan konplexu baten aurrean birkokatzeko.

Larrialdi plan instituzional honen zeregina da, egungo krisiaren berehalako ondorioak, ahal den neurrian arintzeko beharrezkoak diren tresna publiko eta pribatuak artikulatzea, eta aldi berean, etorkizun hurbilean beharrezkoak diren finantzaketa- eta inbertsio-mekanismoak artikulatzea, bertatik, berrikuntza, berdintasun eta ekitate-oinarri berriekin irteteko, desberdintasun-arrisku handiagoaren aurrean inor albo batetara ez uzteko eta hamarkada honetan dituen erronka erraldoiei aurre egin ahal izateko.

EH Bildutik norabide berri bati ekiteko larrialdi plana garatu dugu. Hemen duzue irakurgai: 

EH Bilduk hezkuntza sistemarako eginiko proposamena

EH Bildutik hezkuntza sistemara begirako planteamendu bat egiten dugu gainerako Hezkuntza komunitateko eragileekin partekatu eta adosteko borondatearekin.

| 2020-05-15 20:17:00

SARS-Cov-2arekin bizitzeko epe motz zein ertainean, eman beharreko pausuak ondo emateko ezinbestekoa izango da osasun jarraibideak jarraitu eta bermatzeaz gain, guztiok behar bezala egoeraren garrantziaz jabetzea. Horrek ezinbestean, ezarri beharreko neurrien oinarriak, arrazoiketa ezagutzeaz gain, konpartitzea eta adostea eskatzen du; gisa horretara bakarrik egin dezakegulako aurrera, ahaldunduta eta kolektiboki. Guztiok batera. Horregatik konpartitu nahi dugu gure proposamena zuekin. Hemen duzue dokumentua: 

 

EH Bilduk proposatutako laguntzak eztabaidatzeari uko egin dio EAJk

EH Bilduk Nafarroako eredua aplikatzea proposatu du 2.200 euroko laguntzak emateko autonomoei, baina EAJk, PSErekin batera, ez du premiazkotzat jo Diputazio Iraunkorrean horretaz eztabaidatzea. Berdin egin du hezkuntza arloan: EH Bilduk ikasturte amaiera sektorearekin adostea planteatu du, baina hori ere atzera bota du, eztabaida bera ere galarazita.

| 2020-05-15 20:12:00

EAJk euren negozioak itxita eduki behar izan dituzten eta ekonomikoki itota dauden milaka eta milaka langile autonomoei azaldu behar die ez dela premiazkoa Legebiltzarrean haientzako laguntzei buruz eztabaidatzea. EAJren jarrera, EH Bilduk helburu horrekin aurkeztutako proposamena tramitera onartzeari uko eginez, irain ikaragarria da merkataritzan, ostalaritzan, turismoan eta bestelako sektoreetan aritzen diren autonomoentzat, are gehiago Jaurlaritzak gaizki eta berandu iragarri dituen dirulaguntzak oso motz geratzen direnean, autonomoek beraiek ere salatu dutenez.

EH Bilduk berriro salatu behar du EAJk, PSEren babesarekin, Legebiltzarreko Mahaia alderdikeriaz erabiltzen ari dela etengabe, gaurkoan EH Bilduren legez besteko hiru proposamen atzera botatzeko. Antza, egoera kritiko honetan gezurra dirudien arren, EAJren iritziz ez da premiazkoa ez autonomoak babesteko neurriez, ez ikasturte amaiera hezkuntza eragileekin adosteaz, ez etxebizitza gastuak arintzeko laguntzez eztabaidatzea. Horiek ziren EH Bilduren proposamenen helburuak, baina EAJk eta PSEk horiei buruzko eztabaida bera ere galarazi dute. Hala, Diputazio Iraunkorra astelehenean batzartuko da, baina gai bakar bat eztabaidatuko du, familientzako laguntzak hobetzeko EH Bilduren legez besteko proposamena. Izan ere, Elkarrekin Podemosek Osakidetza sendotzeko aurkeztutako ekimena ere atzera bota dute gobernuko alderdiek.

Autonomoak babesteko proposamena eztabaidatu gabe atzera botatzea bereziki larria da. Nafarroan adostu dutena EAEn egitea proposatu du EH Bilduk, pandemiaren ondorioz itxi behar izan duten autonomoei 2.200 euroko laguntza bat emateko. Kontuan hartu behar da autonomoen egoera kritikoa dela, milaka lanpostu eta negozio kolokan daudela eta autonomoek beraiek Jaurlaritzak iragarritako laguntzak oso eskasak direla ohartarazi dutela, baina, hala eta guztiz ere, EAJk EH Bilduren proposamena blokeatu du haren lehentasuna Urkullu Gobernuaren politiken gabeziak ezkutatzea delako, ez autonomoen egoera hobetu dezaketen neurriak aztertzea.

Halaber, Jaurlaritzaren nora ezaren ondorioz hezkuntza komunitatean anabasa erabatekoa den honetan, ulergaitza da ikasturte amaieraren baldintzak sektoreko eragileekin adosteko proposamena eztabaidatzeari uko egitea. Gaur bertan jakin dugu Hezkuntza Sailak azkenean atzera egin duela eta eskoletara itzultzeko data hilaren 25era arte atzeratzea erabaki duela. Egoera honetan are premiazkoagoa zen EH Bilduren proposamena eztabaidatzea, Lakua garaiz dagoelako ikastetxeetan bete beharreko baldintzak eta protokoloak hezkuntza komunitatearekin adosteko, baina EAJk Urkullurentzat deserosoak diren debateak saihestea lehenetsi du berriz ere.

 

 

 

ALBISTEAK

Egungo beharretara egokituriko aurrekontuak 2021erako

2021-01-01 12:17:00

Hilabeteetako lanketaren ostean, 2021erako aurrekontuak aurkeztu zituen EH Bilduko gobernu taldeak abenduan.

EH Bilduk Ostalaritzaren Erreskate Plana aurkeztu du, berehalako neurriak hartu ezean, sektorea hondamendira doalako

2020-10-21 19:52:00

Autonomo guztiek jaso ahalko lituzkete laguntzak: 600 eta 1.200 euro artekoak jarduera eteten dutenentzat, 400 eta 800 euro artekoak %25etik gorako galerak dituztenentzat.

Hezkuntza itzulera, segurua eta adostua

2020-09-10 22:08:00

Ikasturte hasiera kaotikoaren aurrean, EH Bildutik itzulera segurua eta pedagogikoki egokia bermatzeko proposamen zehatzak egiten ditugu

Larraitz Ugarte: “Etorkizunari aurre egiteko ez dute balio errezeta zaharrek”

2020-07-04 12:48:00

Larraitz Ugarteri politikaren lehen lerroan egotea egokitu zaio azken urteotan. Abokatu lanbidez, Gipuzkoako Foru Aldundiko bozeramailea izan zen 2011-2015 agintaldian, eta Eusko Legebiltzarreko kide 2016-2020 legegintzaldian. Hain zuzen, azken legealdi horretako balantzea egin dugu berarekin.