Oñati

Herri Batzarra 2020 urtarrila

| 2021-02-25 19:58:00

Larunbateko Herri Batzarra bertan behera geratu da, bizi dugun egoera medio

Oso garrantzitsua da guretzat ariketa hau kolektiboki eta espazio eroso batean egitea. Gure komunitatearekin nahi genukeen moduan elkartzeko baldintzak ez direnez ematen, bertan behera uzteko erabakia hartu da. Hala ere, larunbatean lantzeko genituen edukiak email bidez jasoko dituzte 'elkarrekin.ehbildu.eus' plataforman inskribatuta dauden guztiek

| 2021-01-26 22:59:00

10 urte. Erraz esaten da. Hori da, hain zuzen ere, 2011ko maiatzean lehen aldiz hauteskunde batzuetara aurkeztu ginenetik igaro den denbora. Urteak azkar igaro diren sentsazioa eragin dezakeen arren, atzera begiratu eta ordutik egindakoari erreparatuz gero, askorako eman duela konturatzen gara. Egindako ibilbidea ez da nolanahikoa izan.

EH Bildu indartsu sartu zen Euskal Herriko agertoki politikoan, alkatetza ugarirekin eta inork gutxik aurreikus zitzakeen emaitzak eskuratuta. Batzuek hondamendia iragarri zuten, baina denborarekin, kudeaketarako eta gobernatzeko gaitasuna ez ezik, herri honentzat ezkerreko alternatiba sendo bat garela erakutsi dugu. Bizi ditugun garai konplexu hauetan errezeta zaharretara eta gutxi batzuentzat gobernatzera mugatzen direnen aurrean, gauzak beste modu baten egin daitezkeela erakusten jarraitzen dugu.

Bidean, euskal herritar gero eta gehiagoren ilusioa piztu duen egitasmoa izan da EH Bildurena. Lehenengo eguneko ilusioa, itzaltzetik urrun, areagotzen eta zabaltzen joan da. Gaur, hasieran baino komunitate zabalagoa eta anitzagoa osatzen dugu, eta aurrera begira ere bide horretatik jarraitu nahi genuke. Guztiongatik eta guztiontzat sortutako proiektua delako gurea.

Zentzu horretan, aurtengo ikasturtean inflexio puntu garrantzitsua izan nahi duen EH Bilduren II.Kongresua burutzea dagokigu. Duela lau urteko kongresuan zehaztutako norabidean sakontzen jarraitzea da erronka: herri honentzako ezkerreko alternatiba gisa sendotzea, gure eskaintza politikoa eguneratzea eta komunitate politiko gisa hazten jarraitzea.

Oñatin, urtarrilak 30, larunbata, ginen prozesu honi hasiera ematekoak, goizeko 11:00etan Gaztelekuan deituta genuen herri batzarrarekin. Bertan, egoera politikoaren azterketa partekatu, kongresuak jarraituko duen prozesua azaldu, eta herriko urteko plangintza aurkeztea zen gure asmoa. Hala ere, bizi dugun egoeraren ondorioz, batzarra bertan behera utzi behar izan dugu, ez daudelako gure komunitatearekin nahi genukeen moduan elkartzeko baldintzak. Oso garrantzitsua da guretzat ariketa hau kolektiboki eta espazio eroso batean egitea, are gehiago, pandemiaren eraginez herri batzar bat egin gabe urte bat baino gehiago daramagun honetan. Ikuspegi bikoitzetik heldu nahi diogu abiatzera goazen hausnarketa prozesu honi, perspektiba nazionaletik eta lokaletik, guztion artean herri honek behar duen EH Bildu eraikitzen jarraitzeko.

Egoera hau izanik, planteamendua aldatu behar izan dugu, eta larunbatean lantzeko genituen edukiak email bidez jasoko dituzte elkarrekin.ehbildu.eus plataforman inskribatuta dauden guztiek. Bide batez, prozesu honetan parte hartzeko interesa duten guztiak aipaturiko plataforman izena ematera animatzen ditugu, hori izango baita egoera honek dirauen bitartean gure artean komunikatzeko bide nagusia. Bertatik helaraziko dira egutegia, arautegia eta ponentziak. Norbaitek zalantzarik edo arazorik izango balu, modu berean, gurekin harremanetan jartzera gonbidatzen dugu, onati@ehbildu.eus helbidera idatzita. Horretaz gain, gogorarazi nahi dugu afilizazio kanpaina bat ere abiatu dugula, eta Bilkide kopurua handitzea izango dela hurrengo hilabeteetako beste erronketako bat. Zehaztuko ditugu horretarako bideak ere.

Hemendik eta ekainera bitartean hiru herri batzar burutzea zen hasierako asmoa, eta lehenengoa bertan behera utzi behar izan dugun arren, azpimarratu nahi dugu gure asmoa posible denean modu presentzialean elkartu eta ariketa honi kolektiboki ekitea dela. Gaurko agerraldiaren bidez, beraz, herritarrak prozesu honetan parte hartzera animatu nahi ditugu. Guztion ekarpenak beharrezkoak dira eta, guztion artean, hobeto pentsatzen dugu. Animatu eta parte hartu!

Igone Anduaga: "Beharrezkoa da instituzioek lehentasun zerrenda aldatzea, eta herritarrak lehenetsiz kudeatzea inbertsioak eta baliabideak"

Anduaga da arakatzailea eta lehen mailako osasun arretako erizaina. Berarekin hitz egin nahi izan dugu bizi dugun egoeraz.

| 2021-01-24 12:21:00

Zertan datza arakatzaile baten  lana?

Egunero kasu positiboen zerrenda jasotzen dugu eta bakoitzari telefonoz deitzen diogu egoera aztertu, egin beharreko isolamenduaren neurriak azaldu eta haien kontaktu zuzenak bilatzeko. Bilaketak bi modutara egin daitezke, kasu positiboak sintomak dituen edo ez kontuan izanik. Sintomak baditu, hauek hasi baino bi egun lehenagotik hasten gara bilaketa egiten. Asintomatikoa bada, honek egindako froga eguna baino bi egun lehenagoko data hartzen dugu kontuan. Behin honen kontaktu zuzenen zerrenda izanik, kontaktu guztiei deitzen zaie, dagokien frogaren hitzorduak eta neurrien azalpenak emateko.

Kontaktu zuzenen jarraipena arakatzaileok egiten dugu. Kasu positibo askoren kontaktuak esparru desberdinetakoak direnez (sozialak, etxekoak, lanekoak…) sarritan beste zenbait entitateekin lan egin behar izaten dugu.

Osasun arloko ezagutzak beharrezkoak al dira zuen jardunean aritu ahal izateko?

Bai. Osasun arloko zenbait esparrutan lanean jarduten dugun profesionalak gara, horretarako kurtso espezifiko batzuk jaso ditugunak.

Hainbat herrialdeetako esperientziek agerian utzi dute arakatzaileen lanaren garrantzia pandemiari aurre egiteko. EAEn arakatzailearen lana arrakastatsua al da Covid 19ren pandemia kontrolpean hartzeko?

Arakatzailearen lana garrantzitsua da pandemia bat kontrolatu ahal izateko, baina, halabeharrezkoa da jendartearen jokabidea arduratsua gure lanak arrakasta izan dezan. Biak eskutik helduta ez badoaz, ezer gutxi balioko du gure lanak; ez du arrakastarik izango.

Oro har, ematen ari garen azalpen eta jarraibideen aurrean jendeak oso ondo erantzuten du eta hori eskertzekoa da, lan handia baitago honen guztiaren atzean. Jakin badakigu batzuek ez dutela egia esaten; horregatik, zintzotasuna eskatuko nieke, gauzak errazteko eta guk gure eginkizunak ondo bete ditzagun.

Lan karga handia duzue eta bizi duzuen presioa handia da; hori dioskue datuek. Zein baldintzatan egiten duzue lan?

Baldintzak oso gogorrak dira. Azken hilabeteetan, kasuak asko igo dira eta horrek lan karga handia eragin du. Gure lan orduez gain, ordu asko sartu behar izan ditugu. Askotan hamabi orduko lan egunak izan ditugu eta, hala ere, ez da nahikoa izan egunerokotasuneko erronkei aurre egiteko. Gainezka gaude eta arazo hori  baliabide pertsonal faltagatik da.

Arazoak arazo, kasuen azterketa egokiak egitea lortu dugu arakatzaile taldearen esfortzu eta gure inguruan elkarlanean dihardutenen laguntzari esker.

Hilabete batzuk pasa dira lehen bi olatuen artean. Prest harrapatu al gaitu bigarrenak?

Ez gaitu guztiz prest harrapatu; izan ere, lehenengo olatuak sorrarazitako nekea nabari da. Lehen olatua eta bigarrena ezberdinak izan dira. Gaixotasunari buruzko informazio gehiago daukagu orain eta hasieran izan genuen ezjakintasuna ez izateak lasaitu egiten gaitu. 

Lehenengo olatuan ez zen arakatzaile figurarik eta PCR frogak oso gutxi egiten ziren. Orain, aldiz, froga mota ugari atera dira eta, ondorioz, lan karga areagotu.

Baliabide nahikoak jarri al dira zuen jardunean?

Ez, pertsonal falta ikaragarria dago; hori argi eta garbi nabarmendu nahiko nuke. Arakatzailea izateaz gain, erizain lanetan dihardut. Horrenbestez, gure egunerokotasuneko lanez gain, Covid-ak dakarren lan karga gehitu zaigu osasun langileen estresa, antsietatea eta nekea areagotuz. Jasanezina da egoera!

Instituzio eskudunak era egokian kudeatu behar ditu baliabide pertsonal eta materialak. Kasu honetan, kudeaketa eskasa izan da, bi olatuen artean denbora nahikoa egon baita aurreikuspenak egin, lehentasunak berrantolatu eta estrategia eraginkorragoa pentsatzeko.

Test kopurua eta zuen lana zuzen-zuzenean daude lotuta. Zein da probak egitearen garrantzia? Nahikoak egiten al dira pandemiaren hedapena kontrolatzeko?

Test hauek kasu positiboen bilaketa egiten laguntzen dute. Kasu guztien sintomatologia ez da berdina eta paziente asko asintomatikoak dira. Test hauen helburua kasuen bilaketa eraginkor eta fidagarria egitea da.

Une honetan, pandemiaren hasieran ez bezala, inoiz baino froga gehiago egiten dira, baina, sekula ez da nahikoa.

Zein da pandemiari aurre egiteko errezatarik onena, beraz?

Uste dut pandemia honi aurre egiteko errezetarik onena denon aldetik arduratsuak izatea eta zentzuz jokatzea dela. Azken finean, denok gara pandemia honen parte.

Erabakiak osasun irizpideei erreparatuta hartu dira edo beste interes batzuek hartu dute parte?

Badaude osasun irizpideei erreparatuta hartu diren erabakiak eta badaude beste interes batzuek aginduta hartutako erabakiak ere. Denok dakigu osasun irizpideei erreparatu gabe hartutako erabakiek herritarrei egiten dietela kalte. Beharrezkoa da instituzioak gai izatea beraien lehentasun zerrenda aldatzeko eta inbertsioak eta baliabideak kudeatzeko herritarrak lehenetsiz. 

Hirugarren olatua aurreikusten  al duzue?

Pandemia hau erabat berria denez guztiontzat, beti egongo da hobekuntzarako eta ikasteko tartea. Osasun irizpideei erreparatu gabe hartutako erabakiek hirugarren olatu batera eraman gaitzakete eta hau kolpe handia izango da jendartearentzat eta osasun langileontzat.

Zein mezu duzu herritarrentzat?

Herritarrei lasaitasuna eta gurekin konfiantza izatea eskatzen diet. Egoera ez da erraza eta guk haiek ulertzen ditugun moduan, haiek ere gu ulertzea eskatzen diet. Askotan ez gara gai lan kargari eraginkortasunez erantzuteko, ez baitugu baldintza egokietan lan egiten. Horregatik, argi utzi nahi dut arreta falta ez dela nahi ez dugulako, ezin dugulako baizik. Gure ardura beti herritarrak ondo egotea izango da. Denon artean eta elkarlanean gaindituko dugu egoera.

 

Abiadura Handiko Trena: Amaierarik gabeko zuloa

AHTa ez da errentagarria ekonomikoki, injustua da sozialki eta ez da jasangarria ekologikoki

| 2021-01-20 11:51:00

Hamarkadaz hamarkada sinesgarritasuna galtzen

1987.urtean Euskadiko Garraio Plana sortu eta 1989an Euskal Y-aren lehen aurreproiektua marraztu zutenetik, hamaika izan dira Abiadura Handiko Trenak jasan dituen atzerapenak eta gainkostuak aurrekontuan.

90.hamarkadan zehar Europako Kontseiluak estrategikotzat jo zuen proiektuak indar eta sinesgarritasuna galdu zuen XXI.mendearen hasieran. AHT Gelditu Elkarlana sortu zuten garai hartan sindikatu, alderdi eta eragile sozial ugarik eta proiektu antiekologikoa, antisoziala eta baliabideen xahutzailea zela arrazoitu zuten. 2004.urtean Roberto Bermejo Ekonomia katedradunak Bermejo Txostena argitaratu zuen; AHTaren errentagarritasun sozial eta ekonomiko eza argudiatu zituen bertan.

2006an Eusko Jaurlaritzak eta Espainiako Gobernuak sinatutako akordioan Euskal Y-aren finantzazioa adostu zuten. Sustapen Ministerioak Araba, Bizkaia eta Gipuzkoako zati bat hartu zuen eta Eusko Jaurlaritzak, berriz, Astigarraga eta Bergara arteko zatia. 2016an, baina, Sustapen Ministerioak Bergarako lotuneko hainbat kontratu baliogabetu zituen, proiektu osoak zuen finantzaketa krisi sakona agertaraziz. Gainera, hiru urte lehenago Frantziako Gobernuak iragarri zuen Lapurdiko AHTaren zatia bertan behera utziko zuela, Espainiako Estatuko beste lotunearekin batera, teknikoki eta finantzieroki jasangaitza zelako.

2018an Europako Kontu Auzitegiak adierazi zuen AHTa ez dela eraginkorra. Europar auzitegiko Oskar Herrics-ek idatztitako txostenak baieztatzen du proiektuak ez duela Europar Batasuna egituratzen, garestia dela eta ez dela aurreikusitako abiadura errespetatzen. Erantzukizun Fiskaleko Agintaritza Independienteak (AIREF) ere adierazi du AHTaren errentagarritasun ekonomikoa ezer ez eta minimoaren artekoa dela.

Inoiz iristen ez den Abiadura Handiko Trena

EAEko AHTa martxan jartzeko epea behin eta berriz atzeratu da. 2006an hasi ziren obrak eta behin eta berriz atzeratu da azpiegitura martxan jartzeko eguna: 2010, 2012, 2016, 2018, 2019, 2021, 2024…

Aurreko urtean Arantxa Tapiak, Eusko Jaurlaritzako orduko Ekonomiaren Garapen eta Azpiegitura sailburuak, iragarri zuen azpiegitura 2024an jarriko zela martxan. Iñaki Arriolak, Lurralde Plangintza, Etxebizitza eta Garraio sailburu denak, aldiz, argi adierazi zuen uda ostean azpiegitura ez dela amaituko eta martxan jarriko 2024rako. Gogora dezagun Arriolak AHTaren gidaritza izan zuela lehenago ere, Patxi Lopezen lehendakaritzan, eta 2016rako EAEko hiriburuak konektaturik egongo zirela esan zuela.

Europako Kontu Auzitegiko auditoreek  2020ko amaieran azaldu berri dute uste dutela Euskal Y-a bere gaitasun osoarekin martxan jartzea 29 urte atzeratuko dela. Europako trenbide sarearen interkonexioen garapenean jazo diren etengabeko atzerapen eta gainkostuen ondorioz, Auzitegiak azaldu du Espainiako Estatuak hogei urtez jarraitu beharko duela gutxienez itsas eta lurreko bideen menpe merkantzien mugaz gaindiko garraioari dagokionez.

Badirudi tunelaren amaiera urruti dagoela oraindik. Abiaduraren eta eraginkortasunaren izenean sorturiko proiektuari ez zaio amaierarik aurreikusten eta oso posible da amaiera inoiz ez iristea.

Aurrekontu handia, txiki

Datu kuantitatiboak esanguratsuagoak  izan ohi dira kualitatiboen aldean: 10.000.000.000€. Hori baino handiagoa da Euskal Herria zeharkatuko duten AHTaren lerro guztien kostua. Estimazio hori egin daiteke azken urte luze hauetako atzerapen eta etengabeko gainkostuak kontuan harturik. Eta ez dira gutxi izan.

Ohitu egin gara AHTaren gaineko aurrekontuaren gainkostuak maiz irakurtzera: Ana Oregi, Arantxa Tapia, Iñaki Arriola… Egun batean gauza bat esan eta hurrengoan beste bat. Txantxa bat dirudi, baina, zenbakiak ez dira txantxetakoak.

Proiektuaren aurrekontua 2006an egin zuten Madrilek eta Lakuak: 175km-ko ibilbiderako 4.178 milioi euroko aurrekontua. Adostutakoaren arabera, Eusko Jaurlaritzak %40a ordainduko zuen kupoaren bitartez; 118 milioi euro europar funtsetik atera eta gainerako 2.500 milioi euroak espainiar Gobernuak jarriko lituzke.

Obrek, baina, atzerapenak jasan dituzte, horrek eragiten duen aurrekontuaren gainkostuarekin. Egungo gainkostua 1.825 milioi eurokoa da. Hortaz, aurrekontu berria  6.000 milioi eurokoa da guztira. Horrenbestez, EAEko AHTaren zatian %39ko gainkostua izan da. Hain dira asaldagarriak datuak, non Europako adituek adierazi duten Europako Batzordeak tinko jokatu  beharko lukeela estatu kideek proiektua betetzeko ezarritako epeak betetzen direla bermatzeko.

Covid-19aren garaian ere, lehenengo

Hainbat eta hainbat izan gara AHTaren proiektua bertan behera uztea  ez ezik, bizi gaituen pandemia garai larri honetan haren moratoria ere eskatu dugunok. Diru gehiago gastu sozialera bideratzea premiazkoa da: osasuna, enplegua, hezkuntza, pentsioak, mendekotasuna eta etxebizitza. Nolanahi ere, obrek martxan jarraitu dute konfinamendu garaian ere.

Europar Batasunaren berreraikitzeko funtsa Covid 19k sortutako egoerari erantzun irmo bat emateko erabili beharrean, Eusko Jaurlaritzak 2.712 milioi euro bideratu nahi ditu AHTra. Horrek suposatzen du hurrengo lau urteetarako dagoen funtsaren ia %25a proiektu horretara bideratzea.  

Konparaketak saihestezinak dira. 100.000 biztanleko 9,7 ohe daude ospitaleko zainketa intentsiboko unitateetan (ZIU) Espainian; Alemanian, berriz, 29,2 ohe. AHTaren alorrean, alderantziz: Alemanian 1,9 kilometro daude eraikiak 100.000 biztanleko; Espainian 7,2 kilometro. Europako datuak harturik, kalkulatzen da AHTko kilometro batek 25 milioi euroko kostua duela batez beste; 2018an Eibarren zabaldu berri zen ospitaleak 28 milioi euroko kostua izan zuen. Gasteiz eta Iruñea arteko AHTaren lineak duen kostuarekin Eibarkoa bezalako 32 ospitale berri zabal litezke. Koronabirusaren krisiaren harira Eusko Jaurlaritzak hasieran jarritako diru-laguntza 3 milioi eurokoa izan zen autonomoentzat eta 2,5 milioi eurokoa kultura alorreko profesionalentzat; AHTaren 100 eta 83 metroren baliokide dira, hurrenez hurren.

Herri interesaren aurkakoa

AHTa ez da errentagarria ekonomikoki, injustua da sozialki eta ez da jasangarria ekologikoki. Gorago aipatu bezala, Erantzukizun Fiskaleko Agintaritza Independienteak (AIREF) adierazi du AHTaren errentagarritasun ekonomikoa ezer ez eta minimoaren artekoa dela. Proiektua jaio zenetik asko izan gara argi genuenok hori eta behin eta berriz errepikatu dugunok; orain, gainera, Europako Kontu Auzitegiak 2019an egindako auditoriako txostenak gure aldarriak baieztatzen ditu. Jasangarritasunari men egiten dieten alternatibek, trafiko eta bidaiari aurreikuspen baikorregiek eta merkantziak garraiatzeko ezintasunak are zentzugabeagoa bihurtzen dute proiektua. Ez da proiektu gardena izan hasieratik; izan ere, ez da prozesu parte-hartzailerik egon erabakiak hartzeko eta ez dira aintzat hartu eragile eta adituen iritziak. Ondorioz, ez da demokratikoa.

Gizarte eredu desorekaturantz

AHTa adreiluan eta hormigoian oinarritutako iraganeko politika ekonomikoen adierazle da; politika sozialen ordez, zementuaren politikak gustuko izan dituen PNVren ezaugarri ezaguterraza. Politika horiek lurralde antolaketa jakin bat dute xede: metropolizazioa. Hau da, biztanleria, jarduera ekonomikoa eta komunikazio-sareak hiri handietan biltzea, haien tamaina handituz, inguruko lurraldeetan dependentzia harremanak sortuz eta, azken batez, gizarte eredu desorekatu eta injustu bat eraikiz. Tokian tokiko garapena erabat desagerrarazi eta herriak eta eskualdeak garatzea ekiditen du proiektu ereduak; eredu zentralista metropolizatua sustatzen du. Fenomeno hori argi aurreikus daiteke, adibidez, Nafarroan hiriburuetatik kanpo geratzen ziren azken tren geltokien leihatilen itxierarekin; hots, Castejon, Altsasu eta Tafallako leihatilen itxierarekin. Beraz, AHTak tren arruntaren amaiera ekarriko du, horrek dakarren ondorio guztiekin.

Alternatiba

Herritik eta herriarentzat eginiko garraiobidea posible da; borondate politikoa behar da. Trenbide politika berria planifikatzeko premia garbia da. Ekologikoki jasangarria, ekonomikoki errentagarria eta sozialki justua den trena izan behar dugu ipar. Horretarako, ohiko tren sarea hobetu behar da; pertsona, herri, hiri eta industrialde guztiak elkartzen dituena, pertsonak eta merkantziak garraiatzen dituena, zonalde denak komunikatu eta haien independentzia areagotzen duena. Azken batez, lurralde antolaketa orekatu bat eraikiko duena.

Espainiako aurrekontuen harira, hitz bi

AHTaren sustatzaile handienetakoa den PNVk ez du galdu aukera guri Espainiako aurrekontuak onartu izana lau haizeetara leporatzeko, horrekin AHTa babesten ari garelakoan. 

Honaino iritsita, argi dugu inork gutxik jar dezakeela zalantzan AHTa bezalako proiektu zalantzagarri batean dirua xahutzen jarraitzearen aurka gaudela. Europatik hasita eremu akademikoraino jaso dituen kritiken jakitun, eta gero eta herrialde gehiago beraien proiektuak atzeratzen ari diren honetan, dirutza hori beste behar batzuetara bideratu beharrean, Abiadura Handiko Trenaren amaierarik gabeko zuloan botatzea ezin dugu inolaz ere babestu. 

Beste kontu bat da estatuko aurrekontuen harira harturiko erabaki koiunturala. Ultraeskuina puzten ari da, eta eskuineko bloke bat gobernura iristearen arriskua gero eta errealagoa da (horren erakusgarri da ustezko “gobernu progresista” botatzeko sektore batzuen etengabeko saiakera). Tesitura horretan, autonomien estatua bera ere zalantzan jartzen duten indar politikoak gobernura heltzeak herri honentzat suposatuko lukeen atzerapausoaren kontziente izan behar dugu eta, horregatik, nahiz eta gobernu honengatik gehiegi ez espero, une honetan egon daitekeen onena dela uste dugu gure helburuetara begira urratsak ematen jarraitzeko. Are gehiago, jendartea babesteko neurriak txartatu ditugu aurrekontuan. Horrenbestez, aukera leihoa zabalik mantentzeko apustua egin dugu, bere momentuan inbestidura babestu genuen bezala.

Aurrekontu hauek ez dira gureak, ezta gutxiagorik ere, baina kontuan izan behar dugu Madrileko kongresuan 350 diputatutik soilik 5 izanda ezin ditugula Espainiako aurrekontuak guztiz baldintzatu, eta ardura politikoagatik babesa ematea erabaki du EH Bilduko oinarri zabalak.

 

HAMAR GAI | HAMAIKA BERBA

Oñatiko EH Bildutik 'HAMAR GAI | HAMAIKA BERBA' izeneko hitzaldi zikloa antolatu dugu 2021erako.

| 2021-01-04 12:06:00

Mundua etengabe aldatzen doa, eta egun bizi ditugun erronkak ez dira nolanahikoak. Egunerokotasunaren zurrunbiloak, ordea, momentuan momentukoei erantzutera eta batez ere epe motzeko logikan jokatzera behartzen gaitu. Hala, uste dugu beharrezkoa dela bizi ditugun desafio nagusien inguruan hausnartzeko espazioak sortzea herrian. Hain zuzen, horixe da antolatu dugun hitzaldi zikloaren helburu nagusia: gaur egun munduan ematen ari diren joera nagusien inguruan patxadaz solasean egitea, herritarrekin, eragileekin eta adituekin batera.

Hamar solasaldiz osatuko da zikloa, eta saio bakoitzean gai baten inguruan arituko gara. Gaian aditu diren bi edo hiru hizlarik hartuko dute parte hitzaldi bakoitzean. Jorratuko ditugun gaietako batzuk izango dira: infoxikazioa, fluxu migratorioak, automatizazioa, megahiriak, larrialdi klimatikoa edo genero arrakala. Interes handiko gaiak direla uste dugu, eta gonbidatuko ditugun hizlariak, punta-puntakoak.

Urtarrilean, lehena

Urtarrilean ekingo diogu hitzaldi zikloari. Lehenengoaren izenburua izango da Infoxikazioa: ezagutza eta iritzi publikoaren eraikuntza informazioaren gizartean. Urtarrilaren 13an, asteazkena, egingo da Santa Ana Antzokian, 18:30ean. Ekai Txapartegi, EHUko filosofia irakaslea, informazioaren gizartea deitzen dugun honetan ezagutzaren bueltan sortu den auziari buruz jardungo da. Iraiar Oiarzabal Garako kazetariak berba egingo du hedabideetan ematen den desinformazioaz. Eta Ugo Mayor ikerlariak infoxikazioaren gaia Covid 19aren krisiarekin lotuko du.

Sarrerak aurrez hartzeko aukera

Hitzaldietarako sarrerak aurrez hartzeko aukera izango da Oñatiko Udalaren webgunean eta Txokolateixan. Sarrera doan izango da, baina bizi dugun egoera berezia dela-eta, aurrez hartzea gomendatzen dugu.

Lehenengo hitzaldia: 

INFOXIKAZIOA: EZAGUTZA ETA IRITZI PUBLIKOAREN ERAIKUNTZA INFORMAZIOAREN
GIZARTEAN

  • Urtarrilak 13, 18:30ean
  • Santa Ana Antzokian
  • Hizlariak:
    • Ekai Txapartegi / EHUko filosofia irakaslea
    • Iraia Oiarzabal / Garako kazetaria
    • Ugo Mayor / Ikerlaria

 

ALBISTEAK

Egungo beharretara egokituriko aurrekontuak 2021erako

2021-01-01 12:17:00

Hilabeteetako lanketaren ostean, 2021erako aurrekontuak aurkeztu zituen EH Bilduko gobernu taldeak abenduan.

EH Bilduk Ostalaritzaren Erreskate Plana aurkeztu du, berehalako neurriak hartu ezean, sektorea hondamendira doalako

2020-10-21 19:52:00

Autonomo guztiek jaso ahalko lituzkete laguntzak: 600 eta 1.200 euro artekoak jarduera eteten dutenentzat, 400 eta 800 euro artekoak %25etik gorako galerak dituztenentzat.

Hezkuntza itzulera, segurua eta adostua

2020-09-10 22:08:00

Ikasturte hasiera kaotikoaren aurrean, EH Bildutik itzulera segurua eta pedagogikoki egokia bermatzeko proposamen zehatzak egiten ditugu

Larraitz Ugarte: “Etorkizunari aurre egiteko ez dute balio errezeta zaharrek”

2020-07-04 12:48:00

Larraitz Ugarteri politikaren lehen lerroan egotea egokitu zaio azken urteotan. Abokatu lanbidez, Gipuzkoako Foru Aldundiko bozeramailea izan zen 2011-2015 agintaldian, eta Eusko Legebiltzarreko kide 2016-2020 legegintzaldian. Hain zuzen, azken legealdi horretako balantzea egin dugu berarekin.