Nafarroa

EH Bildu Berriozar, pozik euskara eskakizuna duen deialdi publikoa babesten duen ebazpenarekin

| 2020-08-07 11:19:00

EH Bildu pozik agertu da Berriozarko Udaleko Obra eta Zerbitzuen Buruzagitza lanposturako lehiaketa-oposizioaren deialdiari Navarra Sumako zinegotzi Daniel Cuesta Castañedak jarritako gora jotzeko errekurtsoa gaitzetsi duelako Nafarroako Adiministrazio Auzitegiak, eta "EH Bilduren jarrera babestu" duelako.


 

EH Bilduk hasieratik defendatu duen bezala, ebazpen judizialaren arabera, "egungo plantilla eskubide osoz onartu zen eta P4 (euskara) hizkuntza eskakizuna izateko baldintza legal guztiak betetzen ditu". Ildo horretan, ebazpenak dioenez, "EH Bilduk uneoro defendatu duen bezala, deialdiak ezin du plantillaren hizkuntza-eskakizun desberdina izan, eta, beraz, ezin da errekurritu".


 

Gainera, EH Bilduk nabarmendu duenez, "Berriozarko Udaleko Euskara Sailak txosten bat egin zuen lanpostu horrek euskara derrigorrezkoa izateko arrazoiak azaltzeko eta argudiatzeko". Eta udal taldeak gogorarazi duenez, "txosten hori behin baino gehiagotan igorri egin zaio Navarra Sumari".


 

Halaber, EH Bilduk gogorarazi duenez, "deialdia hainbat aldiz eraman da auzitegietara aurretik, eta kasu guztietan Berriozarko Udalaren aldekoa izan da ebazpena".

 

 

EH Bilduk Espainiako Gobernua eta Udal eta Probintzien Federazioaren arteko akordioa gaitzesten du

| 2020-08-05 10:55:00

EH Bilduk gogor gaitzetsi du Espainiako Gobernuak eta Espainiako Udalerrien eta Probintzien Federazioak atzo lortutako akordioa, tokiko erakundeek euren superabita Estatuari emango diotela dioena, eta erabaki horretan atzera egiteko exijitu du. Tokiko erakundeek "COVID-19ren krisiaren ondorio sozialak arintzera bideratutako politika publikoetarako soberakina eduki ahal izatea" eskatu du; maiatzaren 20an EH Bilduk, PSOEk eta Unidas Podemosek Madrilen sinatutako akordioan jasotzen zen bezala. Horrenbestez, sinatutako akordioa "bete egin behar da, eta ez da bateragarria atzo hartutako erabakiarekin".


 

Alderdi politikoak, gainera, "PPk eta UPNk onartutako Aurrekontuen Egonkortasunerako Legea makillatzeko PSOEk egindako ahalegina" dela uste du, "erabateko zentralizazioa ekarri duena, udalen autonomiaren aurkako erasoa eta zorra ordaintzeari lehentasuna ematea, herritarren beharren gainetik, Espainiako Konstituzioaren 135. artikuluan ezarritako betebeharra". EH Bilduk kritikatu egin du PSOEk Montoro Legea eta Konstituzioaren 135. artikulua indargabetzeko "borondate politikorik ez izatea", “ezta egungo testuinguruan ere, non erakundeek eta udalek, bereziki, behar sozial eta ekonomikoei aurre egiteko baliabide guztiak behar dituzten, kohesio soziala ziurtatzeko, tokiko ehun produktiboa sendotzeko, langabezia murriztuko duen jarduera ekonomikoa sortzeko eta okerren pasatzen ari direnei laguntzeko ". Hori dela eta, "berehala indargabetzeko" eskatu du.


 

Azkenik, EH Bilduren ustez, Espainiako Gobernuak eta FEMPek "gutxietsi egin dituzte Nafarroak toki-araubidean dituen eskumen historikoak, bereziki tokiko ogasunei dagozkienak; izan ere, Nafarroako udalek ez lizkiokete inolaz ere beren superabitak Estatuko Gobernuari utzi beharko". Ildo horretan, alderdi subiranistak ziurtatu du udaletan eta ordezkaritza duen gainerako eremuetan lan eginen duela "udalen autonomia aldarrikatzeko eta subiranotasun ekonomiko osoa lortzeko bidean aurrera egiteko, Nafarroako erakundeek diruzaintzako soberakinak nola eta zertan erabili behar dituzten erabakitzeko".

Agoizko 239 lanpostuak mantentzeko neurriak eskatu dizkio EH Bilduk Gobernuari

| 2020-07-02 12:07:00

EH Bildu Nafarroak Manu Ayerdi Garapen Ekonomikorako kontseilariaren premiazko agerraldia eskatu du, "Agoizko Siemens Gamesa enpresaren deslokalizazioa saihesteko eta, horrela, bertan lan egiten duten 239 pertsonen lanpostuak mantentzeko zer neurri abian jarriko duen” azal dezan.

Agoizko lantegiaren itxieraren bat-bateko albistea "kolpe gogorra izan da enpresako langileentzat bai eta Agoizko bizilagunentzat eta bertako ekonomiarentzat ere". EH Bilduren ustez, "lehentasunezkoa da lantegiko 239 lanpostuak bermatzeko irtenbide bat ematea; izan ere, sektore eolikoan oinarritutako jarduera horrek goranzko joera dauka Nafarroan une honetan".

EH Bilduk gaitzetsi egin du enpresak Agoitzen duen lantegia ixteko erabakia "enpresa bideragarria baita, irabazi handiak baititu, Nafarroan nahiko zigortuta dagoen eremu batean errotuta dago, eta azken urteotan laguntza ekonomiko handiak jaso dituelako Nafarroako Gobernutik".

Ildo horretan, EH Bildu Nafarroak ekainaren hasieran Foru Lege Proposamena aurkeztu zuen "horrelako enpresa deslokalizazioak saihesteko". Hala, koalizio subiranistak ekimen hori onartzearen "garrantzia eta premia" azpimarratu du; izan ere, "une honetan are garrantzitsuagoa da deslokalizazioei aurre egiteko mekanismo legalak abiaraztea eta, horrela, pertsona askoren lanpostuen galera saihestea".

Halaber, EH Bilduk galdera idatzi bat erregistratu du, "azken hamar urteetan Siemens Gamesa enpresak Agoizko aerosorgailuen pala plantara bideratutako inbertsioengatik jaso dituen laguntzak eta diru-laguntzak" zein "onura fiskalak eta sozietateen gaineko zergaren aitorpenetan aplikatu duen zenbatekoa" ezagutzeko.

Lizarrako Erditze Zerbitzua berriro irekitzeko eskatu du EH Bilduk

| 2020-06-23 13:06:00

EH Bildu Nafarroak Santos Indurain Osasun kontseilariaren agerraldia eskatu du Lizarrako Garcia Orcoyen Ospitaleko Erditze Zerbitzua berriro irekitzeko eskatzeko.

Txomin Gonzalez EH Bilduko foru parlamentariak salatu duenez, "osasun agintaritza Osasun Ministerioan zentralizatzeko erabakiak eraginkortasun gabezia ugari eragin ditu, besteak beste, pandemiari aurre egiteko behar den materialaren erosketen kudeaketa txarra, langileentzako babes ekipoak, maskarak, eskularruak, ekipamendu teknikoa eta arnas aparailuak, horien artean".

Gonzalezek, Nafarroako Parlamentuko Osasun Batzordeko EH Bilduren bozeramaileak, gaitzetsi egin du Osasun Departamentuak "COVID-19ren pandemiari aurre egiteko estrategia eraginkorra mantentzeko ardura bere gain hartu ez izana". "Departamentuak jarraipen akritikoa izan du Ministerioaren erabakiei dagokienez; Nafarroako osasun sistema publikoaren gainkarga bai eta langileen lan baldintza eskasak eta langileen eta gaixoen osasuna bermatuko zuten prebentzio neurrien falta ere eragin zutenak", kritikatu du parlamentariak.

García Orcoyen Ospitaleko Erditze Zerbitzua pandemiaren hasieran itxi zen, COVID-19ren laguntza-zirkuitu babestua bermatzea ezinezkoa zelako. Hala ere, Gonzalezek adierazi duenez, "hilabete batzuk igaro dira, eta uste dugu denbora nahikoa izan dela Erditze Zerbitzua berme guztiekin berriro irekitzeko antolaketa-neurriak hartzeko". "Departamentuak itxiera horri eustea eta Lizarrako Ospitalea Erditze Zerbitzurik gabe modu iraunkorrean uzteko aukerak kezkatzen gaitu", adierazi du.

Ildo horretan, EH Bilduko parlamentariak adierazi duenez, “ez dugu onartuko COVID-19ren pandemia aprobetxatuz, eskualdeko ospitaleetan osasun zerbitzuak murriztu nahi izatea, 2012ko krisian Tuterako eta Lizarrako ospitale-laborategien zentralizazioarekin egiten saiatu ziren bezala". "Hain zuzen, pandemia honetan diagnostiko-testak egin ahal izateko funtsezkoak izan diren laborategien zerbitzuak", gaineratu du Gonzalezek.

EH Bilduk Skolaeren balioa berretsi du, bere ezarpenaren aurkako eraso berriaren ostean

| 2020-06-18 12:56:00

EH Bilduren ustez, Skolae programaren ezarpena baliogabetzen duen epaia, gaur bertan argitaratu dena, " beste oztopo bat da hezkidetzarako bidean". Bakartxo Ruiz koalizio subiranistak Nafarroako Parlamentuan duen bozeramaileak kritikatu egin du "Skolae programak hasieratik pairatu behar izan duen erresistentzia", eta azpimarratu du "kontrako epaia den arren, ez duela programaren edukia baloratzen". Beraz, "Nafarroako Gobernuak ahalik eta lasterren konpondu beharko du ustezko forma akatsa", eskatu du EH Bilduko bozeramaileak.

Ildo horretan, Ruizek Skolaeren balioa goraipatu du, "Nafarroan hezkidetza programa aitzindaria delako eta prestigiozko hainbat errekonozimendu lortu duelako, nazioartean hezkuntza erreferente bihurtuz". Hori dela eta, "EH Bildutik espero dugu Skolaek oztopo berri hau gainditzea, eta bere ezarpena bizkortu eta ikastetxe guztietara zabaltzea, aurreikusita zegoen bezala". "Argi geratu da Skolae oso tresna baliagarria eta eraginkorra dela egun indarrean jarraitzen duten emakumeen eta gizonen arteko ezberdintasunak gainditzeko, eta hezkuntzaren bidez guztiontzako gizarte justuago bat eraikitzeko", adierazi du EH Bilduko bozeramaileak.

ALBISTEAK

Nafarroako EH Bilduko Koordinazio Talderako hautagaitza aurkeztu da

2021-05-28 14:20:00

Miren Zabaleta Nafarroako arduradun politikoarekin batera, Kongresuan aukeratu zena, Unai Lako, Lola Eslava, Haritz Romeo eta Maddi Lasak osatuko lukete lan taldea.