Unai Fernandez de Betoñok salatu duenez, hainbat enpresa EAJ eta PSErekin dituzten kontaktu politikoez baliatzen dira kontratu publikoak lehiaketarik gabe lortzeko. Kontrol Ekonomikoko Bulegoa independentea denik zalantzan jarri du, bertako zuzendaria EAJko burukidea izan baita.

| 2021-04-12 14:28:00

Unai Fernandez de Betoño legebiltzarkideak Jaurlaritzak esleitzen dituen kontratu txikietan dagoen “intentsitate baxuko bezerokeria” salatu du gaur Legebiltzarrean, hainbat enpresa EAJ eta PSErekin dituzten kontaktu politikoak baliatzen direlako kontratu horiek zuzenean lortzeko, inolako lehiaketa publikorik gabe. Kontratu txikiak dira 40.000 eurora iristen ez direnak, obra-kontratuen kasuan, edo 15.000 eurotik beherakoak direnak, hornidurak edota zerbitzuak kontratatuz gero, eta Gobernuak zuzenean esleitu ditzake, lehiaketa publikorik gabe. Azken datu ofizialen arabera, 2019an Lakuak 3.600 kontratu txiki baino gehiago egin zituen, ia 55 milioi euroko balioarekin. Fernandez de Betoñoren iritziz, “kuantitatiboki kontuan hartzeko moduko kontratuak dira, bai eta kualitatiboki ere, askotan bezerokeriarekin lotuta daudelako”.
EH Bilduko legebiltzarkideak adierazi duenez, kontratu txikien bidez mugitzen diren zenbatekoak ez dira izugarri handiak, “baina bezerokeria sare bat ezkutatzen dute, enpresa batzuk haien kontaktu politikoez nolabait baliatzen baitira lehiaketarik gabeko kontratuak lortzeko”. Esaterako, “Arriola PSEko sailburuaren komunikazio-kontratuen atzean dauden bi enpresek loturak dituzte PSErekin, eta Europako Funtsen zerrenda egiteko hiru kontratu nagusien atzean dauden beste bi enpresek loturak dituzte EAJrekin”.
Horren haritik, Fernandez de Betoñok egiaztatu du “zenbait kontratu txikitan praktika desegokiak jazo direla”, eta batzuk atzera bota behar izan ditu Gobernuko Kontrol Ekonomikoko Bulegoak legeak xedatutakoa urratzeagatik. Gainera, organo horrek duela urtebete kontratu txikien inguruan eman zituen gomendioak ez dira behar bezala betetzen, erantsi du EH Bilduko legebiltzarkideak.
Halaber, Kontrol Ekonomikoko Bulegoak “independentzia osoz” jardun behar duela azpimarratu du Fernandez de Betoñok, baina zalantzan jarri du hori hala denik, bertako zuzendaria, Javier Losa, EAJren Araba Buru Batzarreko kidea izan baita. EH Bilduko ordezkariaren aburuz, bistakoa da hor “interes gatazka argi bat” dagoela eta oso zalantzagarria dela “EAJko goi-kargu ohi batek independentzia guztiz kontrolatu ote dezakeen EAJren jarduera publikoa”.
 

Artistaren Estatutua onartzeko prozesua abian jartzeko EH Bilduren proposamenari ezezkoa eman diote EAJk eta PSEk

Josu Estarronak premiazkotzat jo du sektorearekin adostutako arau-marko bat ezartzea kultura arloko langileei jarduteko baldintza egokiak emateko. Kongresu espainolean onartutako estatutuak ez dio euskal kulturgintzaren errealitateari behar bezala erantzuten.

| 2021-03-25 15:37:00

EH Bilduk hauteskundeetan hartutako konpromisoari heldu eta Artistaren, Sortzailearen eta Kultur Langilearen Euskal Estatutua diseinatu eta onartzeko prozesua abian jartzeko proposamena defendatu du gaur Legebiltzarrean. Ponentzia bat sortzea proposatu du helburu horrekin, formula horrek kulturaren sektoreak prozesu horretan parte hartzea erraztuko bailuke. Koalizioaren proposamena, baina, bertan behera geratu da EAJ eta PSE jauzi kualitatibo hori ematearen kontra agertu direlako.
Josu Estarronak ohartarazi duenez, pandemiak euskal kulturgintzaren prekarietatea areagotu du eta hori, prekarietatea, sektoreak duen egiturazko arazoa dela inoiz baino argiago azaleratu du. Hortaz, azpimarratu du, are beharrezkoagoa da Artistaren Euskal Estatutua onartzea, kultur arloko profesionalek “sorkuntza ahalbidetu eta erraztuko duen arau-marko bat behar dutelako lan-baldintza minimoak ezartzeko, babes soziala emateko araudia egokitzeko, erretiro-prestazioak eta egile-eskubideengatiko diru-sarrerak bateragarri egiteko, fiskalitatea moldatzeko,  finantzazioa errazteko, nazioartekotzeko aukerak areagotzeko edota kontratazioak erregulatzeko”.
“Horietako arau batzuk garatzeko eskumen osorik ez badugu ere, beste asko, gure esku daude”, azaldu du Estarronak, eta, ildo horri jarraituz, gogorarazi du Kongresu espainolean onartutako Artistaren Estatutua, EAEn eragina izango badu ere, motz geratzen dela. Izan ere, ez du euskal ekosistema kulturala aintzat hartzen eta, ondorioz, ez dio behar bezala erantzuten euskal kulturgintzaren errealitateari, hainbat arlotan, zerga politikan, adibidez, EAEk eskumen osoa duelako.
 

EAJk eta PSEk Osasun Sailari txertaketa kanpaina azkartzeko eskatzeari uko egin diote

EH Bilduk hala proposatu du, egungo erritmoarekin 2024an lortuko dugulako biztanleriaren %70 inmunizatzea. Rebeka Uberak kritikatu duenez, Osakidetzak 64.000 txerto baino gehiago ditu ipini gabe.

| 2021-03-25 11:57:00

EH Bilduk txertaketa kanpaina azkartzea proposatu du gaur Legebiltzarrean, ahalik eta azkarren ahalik eta txerto gehien jartzea delako bidea talde babesa lehenago lortzeko eta, hala, bizitzak salbatzeko, Rebeka Uberak azpimarratu duenez. EAJk eta PSEk, baina, ez dute beharrezkotzat jo Osasun Sailari eskari hori egitea, nahiz eta, Uberak ohartarazi bezala, egungo erritmoarekin ezinezkoa izango den 2024 baino lehenago biztanleriaren %70 inmunizatzea.
EH Bilduko legebiltzarkideak gogora ekarri du Estatuan EAE txerto gutxien jartzen duen erkidegoa dela eta, hala izanik ere, Jaurlaritzak, azken datu ofizialen arabera, 64.375 txerto gordeta dituela, ipini gabe. Bere iritziz, “ez da ulergarria eta une honetan ez du zentzu handirik txertoak gordetzea, ez behintzat hainbeste gordetzea, orain premiazkoa delako ahalik eta azkarren txertatzea eta lehenengo dosia lehenestea”, bigarrena ere beharrezkoa izango dela ukatu gabe.
Uberaren esanetan, “arazoa ez da bakarrik nahiko genituzkeenak baino txerto gutxiago iristen zaizkigula, arazoa da Gobernuak ez duela gaitasunik iristen zaizkion txertoak azkar jartzeko, planifikazioa falta izan delako eta, horren ordez, inprobisazioa eta iluntasuna nagusitu direlako”. Horrek, erantsi du, “jendearen mesfidantza sortu du, bai eta hasieran ikusi genituen irregulartasunak ere. Kaosa eta deskontrola nagusitu dira txertaketa kanpainan”.
 

EH Bilduk merkataritza elektronikoa eta saltoki handiak gehiago zergapetzea proposatu du, denda txikiekiko lehia justua izan dadin

Iker Casanovak merkataritza txikiaren aldeko estrategiaren baitan kokatu ditu proposamenak. Azaldu duenez, saltoki handiek okupatzen dituzten metro karratuen arabera ordainduko lukete eta, hala, Administrazioak 12 milioi euro inguru jasoko lituzke urtero zerga berri horren bitartez.

| 2021-03-23 13:09:00

Fiskalitate arloan, saltoki handiek eta merkataritza elektronikoak denda txikiek ez dituzten abantailak dituzte, eta horrek merkataritza forma ezberdinen arteko lehia askea eta orekatua faltsutu egiten du, denda txikien kalterako. Gogoeta hori abiapuntu, EH Bilduk bi proposamen aurkeztu ditu gaur Legebiltzarrean injustizia hori neutralizatzeko. Izan ere, Iker Casanovak adierazi duenez, “merkataritza txikiak plus bat ematen dio gizarteari eta, beraz, instituzioetatik babestu behar dugu merkataritza elektronikoarekiko eta saltoki handiekiko lehia justua izan dadin”.
Hori dela eta, koalizioak pasa den legealdian aurkeztu baina tramitatu gabe geratu zen lege proposamena berreskuratu du saltoki handien gaineko zerga berria sortzeko, gune horiek ingurumenean duten inpaktua konpentsatzeko. Casanovak fiskalitate berdearen kontzeptuaren baitan kokatu du ekimena, batetik, halako saltokiek espazio fisiko handia okupatzen dutelako eta, bestetik, auto pribatuaren erabilpena areagotzea dakartelako. Saltoki handien gaineko zerga Nafarroan, Katalunian eta Asturiasen jada existitzen dela aipatu ostean, proposamenaren eduki zehatza azaldu du: saltoki handiek okupatzen duten superfiziearen arabera ordainduko lukete, 15 euro metro karratuko, hain justu. Hala, Araba, Bizkaia eta Gipuzkoan 800.000 metro karratu okupatzen dituztenez, Administrazioak 12 milioi euro inguru jasoko lituzke urtean. EH Bilduko legebiltzarkidearen iritziz, karga fiskal hori ez litzateke gehiegizkoa izango enpresa horientzat, 2020an salmentak %0,4 igo zirelako. Merkataritza txikian, aldiz, %4,9 jaitsi ziren eta enplegua ere galdu zen, lanpostuen %2,3, hain zuzen ere.
Bigarren proposamenak online merkataritzaren gaineko fiskalitatea hobetzea du xede, gehiago zergapetzeko, sektore horretako enpresen etekinen eta ordaintzen dituzten zergen artean desoreka handia dagoelako eta, saltoki handiek bezala, merkataritza elektronikoak ere inpaktua duelako ingurumenean: banaketa prozesuan garraio pribatuaren erabilpena sustatzen du eta gero kudeatu beharreko hiri-hondakinak sortzen ditu. Bada, EH Bilduk Jaurlaritzari eta Foru Aldundiei eskatu die online merkataritzari aplikatzen zaion eredu fiskala aztertu dezatela eta lau hilabeteko epean proposamen bat aurkeztu dezatela sisteman karga berriak txertatzeko.
 

Aldaialde ikastetxea eraikitzeko obrak berehala lizitatzeko eskatu dio EH Bilduk Hezkuntza sailburuari

Maria Garderen iritziz, Jaurlaritzak ez du aitzakiarik lizitazioa atzeratzen jarraitzeko. Gasteizko auzo berrietan oinarrizko azpiegiturak atzeratzen ari dira Hezkuntza Sailaren aurreikuspen eta planifikazio faltagatik, salatu du.

| 2021-03-22 16:58:00

EH Bilduk Aldaialde ikastetxeko obrak, Gasteizko Zabalgana auzoan, berehala lizitatzeko eskatu dio gaur berriz ere Legebiltzarrean Hezkuntza sailburu Jokin Bildarratzi. “Aldaialdeko ikasleek bost urte daramatzate teorian behin-behinekoak izan behar zuten barrakoietan, baina egoera prekario hori betikotzen ari da Jaurlaritzaren aurreikuspen eta planifikazio faltaren ondorioz”, Maria Garde legebiltzarkideak salatu duenez. Gardek azalpenak eskatu dizkio horregatik sailburuari, “oraindik inork ez dakielako zein den haren estrategia korapilo hori askatzeko eta Aldaialde ikastetxe berria behingoz eraikitzeko”.
EH Bilduko ordezkariak premiazkotzat jo du obrak berehala lizitatzea, eta hala eskatu dio Bildarratzi. Gainera, gogora ekarri du koalizioak irtenbidea planteatu ziola Lakuari prozesua azkartzeko. Izan ere, Aldaialde eraiki behar den lursaila AHTren proiektuak baldintzatuta dago, baina, EH Bilduren aburuz, Trenbide Sektoreko Legea baliatu daiteke eskola, interes orokorreko eraikuntza gisa hartuta, eraikitzeko ADIFen baimen berezia lortzeko. Hala ere, EAJk eta PSEk alternatiba hori baztertu zuten eta arazoak konpontzeke darrai. Muinean, kritikatu du Gardek, “Hezkuntza Sailaren aurreikuspen eta planifikazio falta dago; horregatik atzeratzen dira beti oinarrizko azpiegitura eta zerbitzuak Gasteizko auzo berrietan. Zenbat urtez itxaron behar izan zuten Salburuako ikasleek Errekabarri eraikita ikusi arte? Zenbat itxaron beharko dute Salburuan institutu berriaren obrak martxan ikusteko? Eta zenbat Zabalganan Aldaialde eraikita ikusteko? Hezkuntza Sailarentzat Aldaialde lehentasunezkoa baldin bada, ekintzak behar dira, eta momentu honetan horrek lizitazioa egitea esan nahi du”.
 

• «
• 1
• 2
• 3
• 4
• 5
• 6
• 7
• 8
• ...
• 36
• 37
• »