EH Bilduk proposamena aurkeztu du Jaurlaritzak dekretua alda dezan, “arazo bat sortu duelako inolako arazorik ez zegoen leku batean”.

| 2019-05-07 16:48:00

EH Bilduk legez besteko proposamena aurkeztu du Legebiltzarrean Jaurlaritzari eskatzeko Jendaurreko Ikuskizunen eta Jolas-Jardueren Legearen garapenaren baitan txoko eta elkarte gastronomikoei eta gazteen lokalei ezarri dien debekua bertan behera utz dezala. Izan ere, Lakuak onartu duen dekretuaren arabera, ez gazteen lokalak ez elkarte gastronomikoak ezin dira erabili 01:00etik aurrera, eta horrek, Josu Estarrronak ohartarazi duenez, “sekulako arazoak sortzen dizkio txoko eta lokal horietako milaka erabiltzaileei, ordutegi hori bete ezean, isunak eta salaketa administratiboak jaso ditzaketelako”. Bere hitzetan, “Urkulluren Gobernuak ezarritako debeku horrek ez du ez hankarik ez bururik, arazo bat sortu duelako inolako arazorik ez zegoen leku batean; ez du inolako zentzurik”.
EH Bilduko legebiltzarkideak azaldu duenez, Araba, Bizkaia eta Gipuzkoan 1.500 elkarte gastronomiko baino gehiago daude eta 62.000 gazte inguruk erabiltzen dituzte lonjak aisialdian, Gazteen Euskal Behatokiaren datuen arabera. Gazteen lokalei buruz Arartekoak esana ere ekarri du gogora Estarronak, “Arartekoak berak aitortu duelako errealitate hori positiboa eta baketsua gertatu dela kasurik gehienetan eta, taberna edota diskoteken aldean, gatazka gutxi sortzen dutela eta, beraz, oso mugatua izan behar izan da administrazioen esku-hartzea jarduera hori kontrolatzeko”.
Legebiltzarkidearen iritziz, “Jaurlaritza arazo bat sortzen ari da arazo orokortu bat ez dagoen lekuan, ezin da horrelako debeku orokor bat ezarri gehiengoaren kalterako arazo eta kasu zehatz gutxi batzuengatik”. Hori dela eta, 01:00etik aurrerako debekua bertan behera uzteko eskatzeaz gain, EH Bilduk Lakuari galdegiten dio ordutegiak zehazten dituen erregelamendua adostu dezala Eudelekin, Euskadiko Gazteriaren Kontseiluarekin eta Elkarte Gastronomikoen ordezkariekin, betiere interes ezberdinak uztartuz, segurtasuna bermatuz eta pertsona guztien atseden hartzeko eskubidea errespetatuz.
 

EH Bilduk ekimen legegilea aurkeztu du eutanasia despenalizatu eta arautzeko

Proposatu du Legebiltzarrak legea eramatea Kongresu espainolera eutanasia eta lagundutako suizidioa zigortzen dituen Zigor Kodearen artikulua aldatzeko. Bizitzari amaiera emateko momentuan pertsonaren duintasuna eta haren borondatearen errespetua blindatzea da helburua.

| 2019-05-07 16:46:00

EH Bilduk ekimen legegilea aurkeztu du eutanasia eta suizidio lagundua despenalizatu eta arautzeko, “gizartearen aldetik inoiz baino agerikoagoa delako heriotza ona bermatzeko eskaria eta horrek tokian tokiko instituzioei deitzen die indarrean dauden marko juridikoak aldatzera”, Rebeka Uberak adierazi duenez. Zehazki, koalizioak proposatu du Legebiltzarrak Gorte Nagusien aurreko Ekimen Legegilea onar dezala eutanasia eta suizidio lagundua zigortzen dituen Zigor Kodearen artikulua aldatzeko eta, behin hori Gasteizen onartuta, Legebiltzarrak legea Madrilera, Kongresura, eraman dezala, Kongresua baita Zigor Kodea aldatzeko eskumena duen erakundea. Proposamenaren arabera, legea onartu eta sei hilabeteko epean Gobernu espainolak Eutanasia Arautzeko Lege-Proiektua aurkeztu beharko luke. Uberak azaldu du Legebiltzarrak prozedura bera erabili zuela amiantoaren biktimentzako konpentsazio funtsa sor zedila eskatzeko.
“Gure helburua ¬–azaldu du Uberak– pertsonek heriotza ona ziurtatzeko eskubidea izatea da, kalitatezko bizitza gauzatzeko eskubidea ere duten bezala; hots, euren bizitzari amaiera ematerakoan pertsonek izan behar duten erabakitzeko ahalmena lehenetsi nahi dugu, horrela bueltarik ez duen sufrimenduari, fisiko zein psikologikoari, amaiera ematea ahalbidetzeko. Finean, pertsonaren borondatearen errespetua blindatzea du helburu ekimen legegile honek, pertsonaren eskubideak eta duintasuna bermatuta”.
EH Bilduren ekimenez ere, Legebiltzarrak Heriotza Duinaren Legea –“Estatuan dagoen aurrerakoiena”, Uberaren esanetan– onartu zuen 2016an. “Une hartan legeak eutanasia ere aintzat hartzea proposatu genuen, baina gainerako taldeek ez zuten komenigarritzat jo; gaur, ordea, sentsibilitate sozial eta politikoa ezberdina da eta uste dugu oraingoan adostasuna lor dezakegula. Maribel Tellaetxeren eta Hernandez-Carrasco familiaren kasuek mahai gainean jarri dute berriz eutanasia despenalizatu eta arautu beharra. Ezin dugu onartu ehunka familiak sufritzen jarraitzea edo etorkizunean egoera horretan egotea. Zigor Kodea aldatu behar da herritarren duintasuna bermatzeko eta euren babesgabetasunarekin amaitzeko itzulerarik ez duen sufrimenduaren kontrako borrokan edota, gaixotasun progresibo eta sendaezinen kasuan, mendekotasun egoera batera iristeak dakarren sufrimendu jasanezinari aurre egiteko borrokan. Gaixorik dauden pertsonek eskubidea izan behar dute, euren borondatea errespetatuz eta aholkularitza medikuarekin, alternatiba terapeutiko desberdinetarako sarbidea izateko, euren minari eta sufrimenduari amaiera emateko eta, horrela, heriotza duina bermatzeko”.
Amaitzeko, EH Bilduko legebiltzarkideak gogora ekarri du Europan bertan hainbat estatuk eutanasia zein suizidio lagundua arautu dituztela. “Suitzan, esaterako, suizidio lagundua despenalizaturik dago eta Holanda, Belgika eta Luxenburgon suizidio lagundua ez ezik eutanasia ere despenalizaturik eta arauturik dago. Herri horiek gizartearen eboluzioaren baitan egokitzen joan dira eta pertsonaren borondatea eta autonomia erdigunean jartzen jakin izan dute bizitza eta heriotza duinaren mesedetan; uste dugu hemen ere urrats hori emateko ordua iritsi dela”.
 

Autogintzari buruzko ponentziak sektoreko langileei segurtasuna emateko balio behar du, dio Larrionek

Legebiltzarkideak ponentziaren garrantzia azpimarratu du, sektorearen etorkizuna diseinatu eta bermatzea ahalbidetuko duelako. “Soberan daude erantzun histerikoak beldurra emateko eta boto batzuk lortzeko”.

| 2019-05-06 15:06:00

EH Bilduk proposatuta, Legebiltzarrak autogintzari buruzko ponentzia sortu du gaur sektorearen etorkizuna aztertu eta bermatzeko behar diren politika publikoak zehazteko. Miren Larrionek, ponentziaren sustatzaile nagusiak, ekimen horren garrantzia azpimarratu du, autogintza funtsezkoa delako euskal industria eta ekonomiarentzat. Azaldu duenez, autogintzak haren etorkizuna bermatzeko hartu behar duen bidea zehaztea ahalbidetuko du ponentziak, eta, horri jarraiki, sektorean aritzen diren milaka langileei segurtasuna emateko ere balio izango du. “Langileei, Gasteizko Mercedesekoei eta gainontzekoei, segurtasuna eman behar diegu, langileek merezi dute guk batera eta serio lan egitea, autogintza mantentzeak berebiziko garrantzia duelako eremu industrialean. Soberan daude, beraz, erantzun histerikoak beldurra emateko eta boto batzuk lortzeko. Horren ordez, instituzio guztietan ekimenak bultzatu behar dira sektorea modernizatzeko eta haren etorkizuna bermatzeko, guztion artean adostuta, horixe baita sektorea bera Europan eskatzen ari dena, trantsizio adostu bat”. Izan ere, mugikortasunaren alorrean paradigma aldaketa baten aurrean gaude eta horrek ondorio ukaezinak izango ditu autogintzan.
Horren haritik, Larrionek azaldu du ponentzian sektoreko enpresek, langileen ordezkariek, arloko adituek eta akademikoek parte hartuko dutela guztien ekarpenekin diagnostiko bat egiteko eta autogintza sendotzeko politika publiko berriak proposatzeko. EH Bilduko legebiltzarkideak aurreratu du proposamen horien artean agertuko dela, zalantza barik, Ikerketa eta Garapenean egiten den inbertsioa handitu beharra, hori ezinbesteko osagaia delako sektorea mantentzeko eta herri aurreratua izateko.
Autogintzak, adierazi du Larrionek, alderdi guztiok erantzukizunez jokatzea merezi eta behar du, eta hori da EH Bilduk egin duena ponentzia martxan jartzean. “Guretzat ez da alternatiba bat jendea beldurtzea eta paralizaturik geratzea edota ostrukarena egin eta ezer ez egitea; guk erantzukizunez jokatu dugu politika industriala bideratzeko, horretan tematu gara eta autogintzari buruzko ponentzia horren emaitza da”.
Larrionekin batera agertu den Iker Casanova legebiltzarkideak nabarmendu duenez, autogintza sektore estrategikoa da euskal industriaren eremuan. Datuek hala erakusten dute: Araban, Bizkaian eta Gipuzkoan 300 enpresa baino gehiago eta 41.000 langile dira sektorean aritzen direnak, autogintza Barne Produktu Gordinaren %25 da eta sektoreari dagokio esportazio guztien heren bat baino gehiago. Casanovaren hitzetan, “euskal ekonomian industria ardatza bada, autogintza industria sektorearen bihotza da eta, beraz, izaera estrategiko argia dauka”.
 

Arzuagak salaketa aurkeztu du Jusapol eta Jucil sindikatuen aurka atentatua, irainak eta mehatxuak egotzita

Polizia-sindikatuetako ordezkariek istiluak eragin zituzten Legebiltzarrean Estatuaren indarkeriaren biktimak aitortzeko legea onartzerakoan.

| 2019-05-02 16:18:00

Julen Arzuagak salaketa aurkeztu du gaur Gasteizko epaitegian pasa den apirilaren 4an Legebiltzarrean, gonbidatu gisa, izan ziren Jusapol eta Jucil sindikatu polizialen ordezkarien aurka, atentatu, irain eta mehatxu delituak egotzita. Osoko Bilkurak Estatu espainolaren indarkeriaren biktimak aitortzeko eta erreparatzeko legea onartu zuen egun hartan eta polizien eta guardia zibilen ordezkariek, PPko legebiltzarkideek bezalaxe, istiluak eragin zituzten Arzuagak, karguan aritzean, legebiltzarkide gisa dagozkion eskubideak eta ardura beteaz, hitza zeukanean. Arzuagaren abokatua beste legebiltzarkide bat da, Jone Goirizelaia, hain zuzen ere.
EH Bilduko legebiltzarkideak salaketan azaldu bezala, Estatuaren biktimei erreparazioa emateko legeaz EH Bilduk egiten duen irakurketa politikoaren nondik norakoak zehazten ari zenean, PPko legebiltzarkideek bere diskurtsoa moztu zuten oihu eta keinu artean eta, gonbidatuen tribunatik, Jusapol eta Jucil sindikatuetako ordezkariek mespretxuzko keinuak eta irainak bota zizkioten. Besteak beste, keinu bat egin zioten, eskuz, pistola bat balute bezala, mehatxu gisa.
Gero, behin eztabaida amaituta eta legea onartuta, Jusapoleko bozeramaile batek indarkeria tresna politiko gisa erabiltzea egotzi zien Arzuagari eta, oro har, EH Bilduri, bai eta ETArekin lotu ere. “Hau da, delitu larri bat, alegia, indarkeria erabiltzea, egotzi zidan eta ETAko kide izatea ere leporatu zidan”, dio legebiltzarkideak salaketan, eta horrek “irain eta mehatxu larrien biktima izatea” ekarri dio sare sozialetan. Hori dela eta, gogorarazi du Arzuagak, Legebiltzarreko Mahaiak adierazpen publikoa egin zuen babesa erakusteko eta mehatxu eta irainak gaitzesteko.
 

EH Bilduren ekimenez, Legebiltzarrak Aiaraldea suspertzeko neurriak aztertuko ditu ponentzia batean

Eba Blancok talka plan baten beharra dagoela ohartarazi du, eskualdearen krisia eta gainbehera sozioekonomikoa bistakoak direlako.

| 2019-05-02 13:36:00

EH Bilduk proposatuta, Legebiltzarrak ponentzia bat sortuko du Aiaraldean suspertze sozioekonomikoa bultzatzeko, eskualde horrek bereziki pairatu zituelako, lehenago, industria-birmoldaketaren ondorioak eta, gero, azken krisi ekonomikoarenak. Osoko Bilkurak hala onartu du gaur aho batez, Eba Blancoren ekimenari jarraituz. Legebiltzarkide independentistak gogorarazi du azken urteotan enpresa asko desagertu direla Aiaraldean eta horrek ekarri duela bertako langabezia tasa EAEko altuenetariko bat izatea, batez ere emakume eta gazteen artean, lan prekarietatea eta despopulazioa, ahaztu gabe enpresen deslokalizazioaren mehatxua etengabea dela. Aiaraldea honako udalerri hauek osatzen dute: Laudio, Amurrio, Aiara, Artziniega eta Okondok, Araban, eta Urduña, Orozko, Arakaldo eta Arrankudiagak, Bizkaian.
Blanco Aiaraldeko EH Bilduko koordinatzailea da eta nabarmendu du eskualdearen egoera sozioekonomiko larriak neurriak hartzea eskatzen duela ezinbestean; hori dela eta, premiazkotzat jo du ponentzia parlamentarioa sortzea Aiaraldeko eragile sozial, sindikal, ekonomiko, politiko eta instituzionalekin batera, elkarlanean, bertako egoera aztertzeko eta konponbideak planteatzeko, gainbehera sozioekonomikoa iraultzeko. “Derrigorrezkoa da pobreziari, langabeziari, inbertsio faltari, enpresen itxiera eta deslokalizazioari aurre egitea. Aiaraldean berehalako neurriak hartzea ahalbidetuko duen talka plan bat behar dugu lehenik eta behin eta, luzera begira, plan estrategikoa ere behar dugu garai berrietara egokitutako eredu industrial eta ekonomiko baten aldeko apustua egiteko, betiere kontuan hartuta lehenengo eta hirugarren sektoreak”.
Blancok gogora ekarri du “Parlamentuak beste ponentzia bat eratu zuela pasa den legealdian –hori ere EH Bilduk proposatu zuen– Ezkerraldea, Meatzaldea eta Oarsoaldea eskualdeen egoera sozioekonomikoa aztertzeko eta suspertze neurriak proposatzeko, eta emaitzak onak izan ziren”. Bada, “orain Aiaraldeak ere arreta berezia merezi eta behar du Legebiltzar eta Jaurlaritzaren aldetik, bere egoera sozioekonomikoa bereziki larria delako, adierazle ekonomiko nagusiek hala erakusten baitute”.
 

• «
• 1
• 2
• ...
• 41
• 42
• 43
• 44
• 45
• 46
• 47
• 48
• 49
• »