Legebiltzarrak eztabaida monografikoa egingo du etzi Next Generation programari buruz eta koalizioak argitasuna eman nahi dio horren kudeaketari Europako funtsek onura soziala ekarriko dutela bermatzeko. Jaurlaritzaren kudeaketa ilun eta eskasa kritikatu du Mikel Oterok.

| 2020-12-14 18:14:00

EH Bilduk hala eskatuta, Legebiltzarrak Europako funtsei buruzko osoko bilkura monografikoa egingo du etzi eta, Mikel Oteroren iritziz, eztabaida horrek “gobernantza marko argi bat” definitzea ahalbidetuko du, pandemiaren ondoren susperraldi ekonomikoa zein eraldaketa teknologiko eta ekologikoa sustatzea xede duen EBren Next Generation programa elkarlanean eta herri gisa bideratzeko. Oterok gogora ekarri duenez, Lakuako Gobernuak hilaren 29an onartuko du Europako funtsen kontura finantzatu nahi dituen proiektuen zerrenda. “Garaiz gaude inbertsio horiek maila instituzional guztietara iritsiko direla bermatzeko eta europar guztien ahalegin publiko mankomunatu horrek guztion onerako onurak ekarriko dituela bermatzeko”.
Europako funtsena “behin bakarrik igarotzen den trena” da eta horrek “arduraz jokatzea eskatzen du”, ohartarazi du EH Bilduko legebiltzarkideak. Horri jarraituz, “benetako gobernantza marko bat” aldarrikatu du, herri honetako sektore politiko, sozial eta ekonomikoen ekarpenei eta eztabaidari irekia, funts horiekin finantzatu beharreko proiektu estrategikoak zehaztearren. Izan ere, “hau ez da gobernu koiuntural batek egin behar duen ariketa bat; luze joko duen prozesua da eta gobernu baten erabakiak gainditzen dituen eztabaida bat da. Herri ariketa bat da eta guztiok hartu behar dugu parte”, epe luzerako begirada zabala eta kolektiboa eskatzen baitu, Urkulluren Gobernuak erakutsi ez duena, hain justu. “Jaurlaritzak asko hitz egiten du auzolanaz, baina oso gutxi praktikatzen du; elkarlaneko gobernantzaz ere hitz egiten du, baina gero elkarlanari uko egiten dio. Guk, adibidez, proposamen ugari helarazi dizkiegu, baina ez dakigu irakurri dituzten ere”.
Oteroren iritziz, Europako funtsen banaketaren eta irizpideen inguruko zalantzak asko diren arren, hori “ez da argi ez jokatzeko aitzakia”. Horixe leporatu dio EAJ-PSE Gobernuari, iluntasunez jokatzea. “Oso argi gutxi egon da prozesu honetan; ez dakigu non eta nola hartzen ari diren erabakiak. Jaurlaritzak ez du gaiaz hitz egin nahi eta oposizioak presionatuta sentitzen den heinean bakarrik hitz egiten du. Kudeaketa oso pobrea eta iluna egin du, eta inprobisazioa izan da nagusi”.
Etzi egitekoa den eztabaida monografikoak, ordea, argitasuna emango dio prozesuari, EAJ molestatzen duela badirudi ere. EH Bilduk 10-15 proposamen aurkeztuko ditu lau helburu nagusirekin: funtsen banaketa gidatu behar duten printzipioak finkatzea, udalek izan behar duten funtzioa nabarmentzea, elkarlaneko gobernantza eredu bati forma ematea eta inbertsio horien onura soziala bermatzea.
 

EH Bilduren ekimenez, Osakidetzak baliabideak handituko ditu kutsatzeen eremuak identifikatzeko

Rebeka Uberaren iritziz, gaurko akordioa urrats garrantzitsua da, neurri kirurgikoagoak hartzea eta prebentzioa hobetzea ahalbidetuko duelako.

| 2020-12-10 16:10:00

Rebeka Ubera pozik agertu da EAJ, PSE eta Elkarrekin Podemos-IUrekin sinatutako akordioarekin, Legebiltzarrak Jaurlaritzari eskatu baitio koronabirusaren kutsatzeen eremuak eta balizko iturburuak aztertu eta identifikatzeko ikerketa-talde bat aritu dadila Osakidetzan, aztarnariekin batera. EH Bilduko legebiltzarkideak akordioaren garrantzia nabarmendu du, “kutsatzeak non eta nola gertatzen diren argitzeak neurri kirurgikoagoak bideratzen eta prebentzio neurrietan sakontzen lagunduko digulako, bai eta eztabaida antzuak saihesten ere”.
Uberak adierazi duenez, “hori lehentasuna izan da EH Bildurentzat, ikertzea eta bitartekoak jartzea kutsadurak zein esparrutan, non eta nola ematen diren ezagutzeko; badakigu %100 ezagutzea ezinezkoa izango dela, baina gaur egun egiten dena baino gehiago egin daiteke. Izan ere, Ministerioaren txostenetara joaten bagara, EAEren kasuan datu horiek ez dira agertzen eta, beste erkidegoekin alderatuta, ez dakigu non gertatzen diren kutsatzeen %90”.
 

Gasaren aldeko EAJren apustu itsua bateraezina da trantsizio energetikoarekin, salatu du EH Bilduk

Mikel Oterok premiazkotzat jo du SHESA desagertzea inbertsio publikoa %100ean energia berriztagarrietara bideratzeko. “SHESAk diru publikoa xahutu besterik ez du egiten”, ohartarazi du.

| 2020-12-10 14:49:00

EH Bilduk Jaurlaritzari eskatu dio gaur energia berriztagarrien aldeko apustu erabatekoa egin dezala eta, ondorioz, gasa esploratzea eta ustiatzea xede duen SHESA-Euskadiko Hidrokarburoak Baltzua desager dadin behar diren urratsak eman ditzala. Koalizioaren proposamenak, ordea, EAJ eta PSEren ezezkoarekin egin du topo, gobernukideek gasaren aldeko apustuari eutsi baitiote, hori trantsizio energetikoarekin bateraezina bada ere, Mikel Oterok ohartarazi duenez. “Larrialdi klimatiko egoeran gaude eta horrek trantsizio energetiko azkar bat egitera behartzen gaitu, baliabide fosilak kontsumitzetik energia berriztagarriak kontsumitzera igaro behar dugu”. Horren haritik, erantsi du, “Araba, Bizkaia eta Gipuzkoako egoera bereziki dramatikoa da, gure berriztagarrien ekoizpena kontsumitzen dugun energiaren %8 besterik ez delako” eta CO2 isuriak apenas murriztu direlako azken urteotan, Europak jarritako helburuetatik oso urrun.
EAEn “arlo publikotik, EVEren bitartez, ekoizten den elektrizitatearen %97 gasetik dator”, azaldu du EH Bilduko legebiltzarkideak. Datua mahai gainean jarrita, gasaren aldeko apustu itsua egitea egotzi dio EAJri, bai eta tranpa egitea ere, “gasa, petrolioa bera bezala, trantsizio energia dela aitortzeak ez duelako esan nahi gasa diru publikoarekin bultzatu behar dugunik”. Alderantziz, energia arloan inbertsio publiko guztiak berriztagarrietara bideratu behar direla azpimarratu du Oterok, are gehiago kontuan hartzen badugu SHESA diru publikoa xahutu besterik ez dela egiten ari, gasa esploratu eta ustiatzeko haren proiektuen artean bat bera ere ez delako errentagarria. “Azkeneko hamar urteotan SHESAk 80 milioi eurotik gorako zuloa egin die aurrekontu publikoei”.
EH Bilduko legebiltzarkideak SHESAk Gasteizen martxan jarri nahi duen Armentia II proiektua ere aipatu du. “Sekulako akatsa da ikuspuntu guztietatik, ikuspuntu klimatiko, urbanistiko, tekniko, sozial, ekonomiko, juridiko eta politikotik”.
Azkenik, koherentzia eskatu dio PSEri, hemen EAJri men egin eta gasaren aldeko haren apustua hitzik esan gabe babesten ari delako PSOE Madrilen kontrakoa defendatzen ari denean. Izan ere, Klima Aldaketaren Legea bidean dago Kongresuan, “eta bertan hidrokarburoak esploratu edota ustiatzeko debekua ezartzen da, bai eta erregai fosiletan desinbertsio publiko bat egitea ere”.
 

Lehiaren Agintaritzak Bizkaian irekitako ikerketak alokairuen prezioak mugatzeko legearen beharra berretsi du

Lehiaren Agintaritza 36 etxe-agentzia ikertzen ari da alokairuen prezioak ezartzeko ados jarri direlako, ustez. EH Bilduren iritziz, kasu horrek alokairuen prezioak legez mugatu beharra azaleratu du, hori baita modurik eraginkorrena praktika mafiosoak eta tentazio espekulatiboak amaitzeko.

| 2020-12-04 14:09:00

Unai Fernandez de Betoñok alokairuen prezioak mugatzeko euskal lege baten beharra aldarrikatu du gaur berriz ere eta gogora ekarri du Legebiltzarrak hemendik gutxira eztabaidatuko duela helburu hori duen EH Bilduren lege proposamena. Izan ere, koalizioak eskatutako agerraldi batean Lehiaren Euskal Agintaritzako zuzendariak azaldu du erakunde hori Bizkaiko 36 etxe-agentzia ikertzen ari dela ustez ados jarri direlako alokairuen prezioak ezartzeko. Fernandez de Betoñoren irudiko, ikerketa horrek alokairuen prezioak legez mugatu beharra agerian uzten du, “etxebizitzaren merkatuan arauak jartzen ez badira, merkatua erregulatzen ez bada, praktika espekulatiboak sortzen direlako, kasu honetan bezala, mafia antolatu baten moduan”.
Hori dela eta, azken hiru urteotan Araba, Gipuzkoa eta Bizkaian alokairuen prezioen igoera izugarria (Gasteizen, esaterako, %16koa) izan dela gogorarazi ostean, EH Bilduko legebiltzarkideak premiazkotzat jo du alokairuaren prezioak legez arautzea, Lehiaren Agintaritza ikertzen ari den “praktika mafiosoei” aurre egiteaz gain. Azaldu duenez, hori da koalizioak aurkeztu duen lege ekimenaren helburua, praktika horiek eta edozein tentazio espekulatibo amaitzeko lege hori eraginkorrena izango delakoan. Ildo horri jarraituz, alokairuen merkatua erregulatzeko instituzioek izan behar duten funtzioa aldarrikatu eta Jaurlaritzaren inakzioa salatu du, bere ustez bereziki larria dena prezioen igoera etengabea ikusita. “Etxebizitza merkantzia baten moduan tratatzen bada, eta hala egiten da askotan, gehiegitan, halako praktika espekulatzaileak agertzea errazagoa da, hemen funtsezko arazoa ez delako etxebizitzaren merkatuan lehia guztiz librea ez izatea; arazo nagusia bestelakoa da: agentzia mordo bat, banku mordo bat, eraikitzaile mordo bat, sustatzaile mordo bat, inbertsio-funts mordo bat negozioa ahalik eta azkarren eta gordinean egiten ari dira eskubide subjektibo batekin, eta hori gertatzen ari den bitartean, Jaurlaritza ez da ia ezer egiten ari”.
 

Nekazaritza eredu industriala saritzen duen egungo diru-laguntza politikaren aurrean, Arabar Errioxako upategi txiki eta familiarrei laguntza berriak ematea proposatu dugu

Itxaso Etxebarriak salatu duenez, azken bost urteetan diru-laguntzetan banatutako 96 milioien %76a bost upategik soilik jaso dute. Kike Fdz. de Pinedo: “Ez da hitzen garaia. Konpromisoak hartzeko eta etorkizunerako estrategia integral bat bultzatzeko garaia da, bai eskualdearentzat, bai bertan bizi direnentzat ere”.

| 2020-12-04 11:08:00

EH Bilduk Arabar Errioxako upategi txikiei eta familiei zuzendutako laguntza berriak bideratzea proposatu du, upategi handiak eta, ondorioz, nekazaritza eredu industriala saritzen dituen egungo diru-laguntza sistemaren kaltetan. EH Bilduk egindako eskaera bati erantzunez Eusko Jaurlaritzak berak emandako datuen arabera, Itxaso Etxebarria legebiltzarkideak adierazi du datuok  "lotsagarriak eta oso kezkagarriak" direla.
Etxebarriak azaldutako datuetan ikus daitekeenez, Arabar Errioxan 250 upategi baino gehiago daude. Upategi bakar batek -Pernod Ricard Winemakers Spain enpresak-, ordea, 48 milioi euro jaso ditu, laguntza guztien erdia. Upategi horrek, Bodegas Faustino S.L, CVNE S.A, Bodegas de los Herederos de Marqués de Riscal eta Araex-ekin batera, 73,1  milioi euro jaso ditu. Hau da, laguntza guztien %76a bost upategi hauen esku geratu dira. Aitzitik, familiako upategi txikiek %4,3a baino ez dute jaso, nahiz eta upategien %75a izan.
Egoera honen aurrean, EH Bilduk uste du laguntzen orientazioa eta helburuak birplanteatu behar direla, administrazioek kolektibo ahulena babesteko, hots, familia-upategiak eta txikienak. Horretarako, bi ekimen defendatuko ditu EH Bilduk. Lehena, diru-laguntzen onuradun diren upategiei erantzukizun soziala bermatzea da. Erantzukizun sozial horrek oinarrizko bi alderdi ekarri behar ditu: batetik, ekoizpen-kostuak estaliko dituen prezio duina bermatzea, eta, bestetik, langileei lan-baldintza duinak bermatzea.
Bigarren ekimenaren helburua upategi txiki eta familiarrei zuzendutako laguntza-lerro berri bat sortzea da, ekoizpenaren kalitatea, ingurumenarekiko konpromisoa, mahatsa Arabako lurraldetik etortzea edo ekoizpen ekologikoa saritzeko.
"Ezinezkoa da milioi gehien jaso dituzten upategietako batzuk mahatsagatik prezio duinak ez eskaintzea, baita ekoizpen kostuen azpitik ere. Gainera, bertako langileek dagoeneko bi urte daramatzate hitzarmenik gabe", zehaztu du Etxebarriak.
"Konpromisoen garaia da"
Bestalde, Kike Fdz. de Pinedo EH Bilduren Arabako Batzar Nagusietako bozeramaileak salatu duenez, Europako Batasunetik heltzen diren upategietako inbertsioetarako laguntzen %7a bakarrik bideratzen da familia-upategi txikietara, hau da, 1.000 euro baino gutxiagoko urteko diru-laguntza Arabar Errioxako upategi txiki bakoitzarentzat. EH Bilduk laguntza horiei buruz egiten duen balorazioa oso kritikoa da, bi arrazoirengatik. Alde batetik, ez dute betetzen Europar Batasunaren beraren helburua -landa-garapena bultzatzea, nekazaritza-errenta hobetzea eta nekazaritzako lehengaiaren balioa handitzea, hau da, mahastia-, eta upategi txiki eta familiarrez ahazten direlako.
Eta EAJren eta PSEren Arabako Foru Gobernuak ere ez du, antza, kontuan hartzen kolektibo hori. Izan ere, osasun-krisi betean, A Planaren laguntza handiena Araex enpresaren ordezkariari eman zaio, Eusko Jaurlaritzaren laguntzen laugarren onuradunik handiena baita: 360.000 euro guztira.
Hala ere, laguntzez haratago, EH Bilduk deitoratu du azken hamarkadetan bultzatutako ereduak baliabide tekniko eta ekonomiko guztiak upategi talde bat bultzatzera bideratu dituela, "onura ekonomikoa eskualdeko hazkunde sozial eta ekonomikoaren aurretik jartzen duena, hau da, gutxien behar duena".
"Ez da hitzaldietarako garaia. Konpromisoetarako garaia da eta etorkizunerako estrategia integral bat bultzatzeko garaia da", ondorioztatu du Fdz. de Pinedok.
 

• «
• 1
• 2
• 3
• 4
• 5
• 6
• 7
• 8
• ...
• 42
• 43
• »