Legebiltzarra

Legebiltzarrak bide eman dio ustelkeriaren aurkako bulegoa sortzeari, EH Bilduk proposatu bezala

Proposamenak ustelkeria ikertu eta zigortzeko duen garrantzia azpimarratu du Larraitz Ugartek, eta dei egin die gainontzeko alderdiei tramitazioa ez oztopatzeko, bulegoa 2020an lanean has dadin.

| 2019-10-03 12:02:00

Ustelkeriaren aurkako bulegoaren sorrera gertuago dago gaur, Legebiltzarrak EH Bilduren lege proposamenari bide eman ostean. Albistea benetan pozgarria da koalizioarentzat, Larraitz Ugartek adierazi duenez, “Bulego horrek legez kontrako jarduera ustelak eta praktika desegokiak ikertu, jazarri eta zigortzea ahalbidetuko duelako”. Horren haritik ohartarazi du “Ebrotik gora ere baditugula konpontzeko gauza anitz, hala nola, De Miguel auzia, Osakidetzako Lan Eskaintza Publikoa, Bidegi auzia eta beste hainbat kontu, eta guk beti esan dugu epaitegietatik harago kontrol publiko eta administratiboa ere behar dugula”, Nafarroan dagoeneko duten moduan.
Ugartek azaldu duenez, lege proposamenaren tramitazioa atzeratu da Foru Aldundiek helegitea aurkeztu zutelako Batzorde Arbitralean, eta azken honek jatorrizko proposamena birformulatzera behartu du, aldundiak Bulegoaren kontroletik kanpo uzteko, haiek kontrol mekanismo propioak dituztelako. Hala, Araba, Bizkaia eta Gipuzkoako udalak eta erakunde publiko autonomikoak izango dira Bulegoaren kontrolpean geldituko direnak.
EH Bilduko legebiltzarkideak “oztopo gehiagorik ez jartzeko” eskatu die gainontzeko alderdiei, “ez aldundien bitartez, ez inolako luzapen maniobren bitartez”, eta dei egin die “gaia serio hartzeko, denon ardura delako ustelkeria eta praktika desegokiak amaitzea”. Halaber, tramitazio parlamentarioa azkartzeko eskatu die Bulegoa 2020an, legealdia amaitu aurretik, martxan jarri ahal izateko. “Bulegoa sortzea ezinbestekoa da herritarrentzat, instituzioen izen onarentzat eta higiene demokratikoarentzat”.
Ugartek azpimarratu du ustelkeriaren kontrako bulegoak praktika irregularrak eta ustelak salatzen dituzten pertsonak babestea izango duela helburu, besteak beste. “Gaur gaurkoz ez dago mekanismo egokirik bide judizialetan, norbaitek ustelkeria zantzuak aurkituko balitu, horiek azken bururaino eramateko eta gainera bere anonimatoa ziurtatzeko, denok dakigulako mota honetako praktikak salatzen dituzten pertsonen aurka ere jazarpenak egoten direla eta indefentsioa handia dela. Bulegoa jauzi kualitatibo handia da, beraz”.
 

Lotsagarria da Jaurlaritzak sistematikoki patronalaren interesak babestea, langileen aurka

EH Bilduk Urkulluren zinismoa salatu du. “Kalitatezko enplegua sortu beharra aldarrikatzen du, baina jarraian prekarietatea bultzatzen dutenen alde agertzen da, oraingoan Metaleko greban egin duen bezala”.

| 2019-10-01 14:16:00

EH Bilduk lotsagarritzat jo ditu Urkullu lehendakariak eta Jaurlaritzako bozeramaile Josu Erkorekak Bizkaiko Metaleko osoko grebari buruz egin dituzten balorazio politikoak, “ohi bezala, patronalaren alboan lerrokatu direlako eta haren interesak babesteari ekin diotelako, langileen aurka”. Iker Casanovak salatu duenez, “Urkullu patronalaren bozeramailerik onena bilakatu da beste behin, negoziazio kolektiboan Gobernuak errespetatu eta zaindu behar duen neutraltasun printzipioa goitik behera urratuta”. EH Bilduko legebiltzarkidearen esanetan, “patronalaren eta sindikatuen arteko negoziazioan Jaurlaritzak neutrala izan behar du berez, baina Urkulluren gobernuak, oinarrizko printzipio hori errespetatu beharrean, patronalarekin bat egiten du sistematikoki eta langileen aldarrikapenak mespretxatzen ditu”. Horren ildotik, Casanovak PSEren posizioa ere kritikatu du: “EAJren morroi aritzen da, isilik, agintzen duenari hitzik esan gabe, aulki batzuen truke ezkerreko baloreak alde batera utzita”.
Casanovak Urkulluren diskurtso zinikoa salatu du, “kalitatezko enplegua sortzea ezinbestekoa dela esan eta bost minutura kapaza delako lanpostu duinen alde mobilizatu diren langile eta sindikatuei bizkarra emateko eta prekarietatea bultzatzen duen patronalari bere Gobernuaren babes politiko osoa eskaintzeko. Hitzez, enplegu duina aldarrikatzen du, baina praktikan kontrakoa egiten du, prekarietatea sustatzen dutenen interesak eta mezuak defendatzen dituelako. Horri zinismoa esaten zaio”.
 

EH Bilduk proposatu du Legebiltzarrak Zaldunbordako proiektua bertan behera utz dezatela eskatzea

“Hondarribiko alkateak, EAJkoak, baimendutako proiektua saltoki handiak mugatzeko legearen helburuen aurka doa, interes pribatuen mesedetan”, salatu du Iker Casanovak. “EAJ barruan ere piztu dituen kritika eta tirabirek agerian uzten dute proiektuaren izaera polemikoa eta desegokia”.

| 2019-09-27 14:38:00

EH Bilduk legez besteko proposamena aurkeztu du gaur Legebiltzarrak ofizialki eska dezan Zaldunbordan (Hondarribia) makro-outlet bat eraikitzeko proiektua bertan behera uzteko eta instituzioek bide legal guztiak jorra ditzaten egitasmo hori gelditzeko, besteak beste, “eskualdeko merkataritza txikia desagertzeko bidean kokatuko lukeelako”, Iker Casanovak ohartarazi duenez.
Hondarribiko Udalak –EAJk gehiengo osoa du bertan– 28.000 metro koadroko outlet proiektua abian jartzeko dekretua onartu zuen maiatzaren 26an, hain justu Legebiltzarrak aho batez saltoki handiak mugatzeko legea onartu bezperan. Casanovaren iritziz, “horrek, dekretua presaka eta korrika onartzeak, frogatzen du Hondarribiko Udalak legearen efektu murriztaileak saihestu nahi izan zituela, ondo baino hobeto zekielako behin legea onartuta outlet hori ezinezkoa izango zela; hau da, bere dekretua biharamunean onartu zen legearen helburuen aurka doa, Parlamentuan lortu genuen aho bateko akordio politikoaren kontra. Finean, EAJko alkateak interes ekonomiko pribatuak Legebiltzarraren borondate demokratikoaren gainetik ipini ditu”.
EH Bilduko legebiltzarkideak gogora ekarri duenez, Hondarribian bertan oposizioko talde guztiak proiektuaren kontra agertu dira, makro-outlet horrek eragingo dituen kalteak zuzenean pairatuko dituen ondoko udalerrian, Irunen, alegia, oposizioa erabatekoa da, EAJ barne, eta Gipuzkoako Aldundian ere Sustapen Ekonomikorako diputatu jeltzaleak aitortu du ez duela gustuko proiektua. “Bistakoa da EAJ barruan ere proiektuak kritikak, tirabirak eta desadostasunak sortu dituela, eta horrek argi uzten du proiektua polemikoa ez ezik, desegokia eta kaltegarria ere badela”. Horren haritik, azaldu du Casanovak, “Zaldunbordako egitasmoak trafiko arazoak areagotuko ditu zonaldean, sekulako kolpea izango da eskualdeko merkatari txikientzat eta hiriguneak husteko joera areagotuko du, lurralde antolaketa orekatua eragotziko du eta balio naturalak ere suntsituko ditu”.
 

EH Bilduk eskatuta, Legebiltzarrak merkataritza txikiari bultzada emateko neurriak aztertuko ditu pleno monografiko batean

Iker Casanovak azaldu duenez, “merkataritza sektore estrategikoa da eta merezi duen arreta eman nahi izan diogu eztabaida monografikoa eskatuz”. Politika publikoek ez diote merkataritza txikiari behar duen babesa eman eta, batzuetan, kaltegarriak izan dira.

| 2019-09-26 14:41:00

EH Bilduk proposatuta, Legebiltzarrak pleno oso bat, monografikoa, eskainiko dio urriaren 28an merkataritza txikiari, haren egoera zein den aztertzeko eta nola suspertu erabakitzeko. Iker Casanovak azaldu duenez, “merkataritza txikia egoera larri batean murgildurik dago eta horrek instituzioen aldetik neurriak hartzea eskatzen du; horregatik eskatu dugu saio monografikoa egitea, behar-beharrezkoa delako merkataritzari bultzada ematea. Merkataritzak arreta berezia merezi du, sektore estrategikoa baita kuantitatiboki (Barne Produktu Gordinaren %11 eta 140.000 lanpostu) zein kualitatiboki, bere dimentsio ekonomikoagatik zein bere dimentsio sozialagatik”.
EH Bilduko legebiltzarkideak salatu du “azken urteotan politika publikoek ez diote merkataritza txikiari behar duen babesa eman eta, batzuetan, kaltegarriak izan dira, saltoki handiei lehentasuna eman zaielako, besteak beste”. Hala, 2008tik 2018ra bitartean 1.000 denda baino gehiago itxi dira Araba, Bizkaia eta Gipuzkoan eta milaka lanpostu desagertu dira. Casanovaren esanetan, “bistakoa da, beraz, merkataritza txikiaren egoera larria dela eta lehentasunezko trataera eman behar zaiola, ekonomian pisu handia duelako, baina baita ere balore erantsiak dituelako gizarte osoarentzat: bizitasuna, argitasuna eta segurtasuna dakartza herri eta hirietan, sare sozialak sendotzen ditu eta ezinbestekoak diren produktuen eskuragarritasuna bermatzen du”.
 

Hezkuntza Sailak bideak bilatu behar ditu Gorenaren epaiari aurre egin eta beka sistema murrizketarik gabe mantentzeko

Auzitegi Gorenaren epaiaren ondorioz, 20.000 ikasle inguruk diru-laguntza txikiagoak jasoko dituzte. Menpekotasunaren beste adibide bat da, agerian uzten duena herri honek tresna propioak, burujabeak, behar dituela bizitzaren arlo guztietan erabaki ahal izateko.

| 2019-09-25 15:27:00

“Espainiako Auzitegi Gorenaren epaia, Jaurlaritzaren beka sistema murrizten duena eta milaka euskal ikasleri sekulako kaltea egiten diena, Urkulluk hainbestetan aldarrikatzen duen autogobernuaren aurkako eraso larria eta zuzena da eta, ondorioz, Legebiltzarrak irmo agertu behar du horren kontra”. Hala adierazi du Rebeka Ubera EH Bilduko legebiltzarkideak, eta salaketa hutsetik harago joateko deia ere egin du. “Ezin gaitezke salaketan geratu, Hezkuntza Sailari eskatu behar zaio Gorenaren epaiari aurre egiteko bideak bila ditzala, haren beka sistema orain arte bezala mantentzeko, laguntzak murriztu gabe”. Hala proposatuko du EH Bilduk mozio baten bitartez, Uberak iragarri duenez.
Auzitegi Gorenaren epaiaren ondorioz, Batxilergo eta Lanbide Heziketako 20.000 ikasle inguruk beka txikiagoak jasoko dituzte aurrerantzean eta, gainera, kaltetuenak diru-sarrera gutxien dituzten familiak izango dira. “Bistakoa da milaka familiaren ekonomian epai horrek izango duen inpaktu negatiboa, baina hori, larria izanik, ez da okerrena, murrizketa horren arrazoia ez delako Jaurlaritzaren ahalmen ekonomiko falta. Jaurlaritzak orain arte ezagutu dugun beka sistemari eusteko behar besteko baliabide ekonomikoak ditu, baina Gorenak ez dio euskal gizartearen mesedetan erabiltzen utzi. Gaia oso larria da, Estatu espainolarekiko menpekotasuna agerian uzten duelako, modurik gordinenean gainera; argi uzten du herri honek tresna propioak, burujabeak, behar dituela arlo guztietan erabakitzeko, arlo guztietan euskal gizarteak behar dituen politikak egin ahal izateko, Madrili dioenari begira egon behar izan gabe. Horrelako kasuek are argiago uzten dute estatus politiko berria behar dugula, hemen horixe dela modu bakarra jendearen beharrei erantzun ahal izango diegula bermatzeko”.
 

ALBISTEAK

Jaurlaritzak inbertsio ekonomikoak areagotuko ditu Aiaraldea suspertzeko, EH Bilduren ekimenez

2021-11-24 11:59:00

Unai Fernandez de Betoño pozik agertu da Aiaraldeko susperraldi sozioekonomikoa bultzatzeko ponentzian lortutako akordioarekin.

EAJk eta PSEk Ingurumen Administrazioari buruzko Legeak udal autonomian duen inpaktua juridikoki aztertzea galarazi dute

2021-11-23 14:21:00

Lakuak Ingurumen Administrazioaren Legea Lurralde Antolamenduarena atzeko atetik aldatzeko baliatu nahi duela ikusirik, EH Bilduk azterketa juridiko bat eskatu du. “Prozedura horrek udal autonomia urratzen du eta, beraz, legezkoa den aztertu behar da nahitaez”. EAJ eta PSE bakarrik geratu dira ezezkoan.

Ulertezina da Jaurlaritzak alokairuen prezioak mugatzeko dituen aukerak erabiltzeari uko egitea

2021-11-18 14:01:00

EH Bilduk berretsi du, alokairuen garestitzeari muga jartzeko, ezinbestekoa dela EAEk berez dituen tresna legalak erabiltzea, Madrilen onartuko den eta eraginkortasun mugatua izango duen Etxebizitza Legearen zain egon beharrean.

EH Bilduk industria eredu berri bat proposatu du sektorea suspertzeko

2021-11-16 14:55:00

Iker Casanovak Industria Garatzeko Plana erretiratzeko eskatu dio Jaurlaritzari “guztiz etsigarria” delako. 67 proposamen aurkeztu ditu industriak ekonomian zeukan pisua berreskuratzeko, Ikerketa eta Garapenean inbertsioa BPGren %3ra igotzeko eta enpresa estrategikoen errotzea bermatzeko.