Legebiltzarra

Legebiltzarrak Larrialdi Klimatiko egoera deklaratzea proposatu du EH Bilduk

Mikel Oterok esan duenez, “larrialdi klimatikoa mehatxu nagusienetariko bat bilakatu da gure ongizatearentzat eta horrek politika publikoak egokitzea eskatzen du, klima aldaketaren efektu bortitzenak saihesteko”. Azterketa-batzordea sortzea proposatu du politika publikoak zehazteko.

| 2019-07-02 15:17:00

Europako hainbat parlamentuk eta gobernuk jada egin duten bezala, Gasteizko Legebiltzarrak Araba, Bizkaia eta Gipuzkoan Larrialdi Klimatiko egoera deklaratzea proposatu du gaur EH Bilduk mozio baten bitartez, bai eta adierazpen horretatik eratorri beharko liratekeen politika publikoak zehazten hastea ere, “larrialdi klimatikoa datozen urte eta hamarkadetako agenda baldintzatzera etorri delako eta gure ongizatearentzako mehatxu nagusienetarikoa bilakatu delako, benetako zibilizazio erronka bat”, Mikel Oterok ohartarazi duenez. Hori horrela, erantsi du, “Jaurlaritzak Larrialdi Klimatiko egoera abiapuntu gisa hartu behar du politika publiko guztietan eta bere aurrekontuetan ere halaxe islatu behar du”. Horren haritik, mozioarekin batera, EH Bilduk azterketa-batzorde berezia sortzea proposatu du Legebiltzarrean, “Larrialdi Klimatiko egoerari aurre egiteko beharrezkoak diren politika publikoak zehaztu eta bideratzeko”.
Oterok komunitate zientifikoak azken urteotan eginiko ohartarazpenak gogorarazi ditu: “Aldaketa klimatikoa Berotegi Efektuzko Gasen isuri masibo baten ondorio da eta isuri horien arrazoi nagusia, bakarra ez bada ere, gure metabolismo sozioekonomikoa mantentzeko erretzen ditugun baliabide fosilen erabilpenean datza. Aldaketa klimatikoa, beraz, guk eragiten dugu nagusiki eta, txosten guztien arabera, gero eta argiago dago klima eta energia politiketan eta, ondorioz, gure egunerokotasunean eraldaketa sakona bat, iraultza bat, eman behar dela, baldin eta egoerari aurre egin nahi badiogu eta aldaketa klimatikoaren efektu bortitzenak pairatu nahi ez baditugu”.
Hala ere, orain arte emandako pausoak ez dira nahikoa izan, EAEn ere ez, Berotegi Efektuzko Gasen isurketak ez duelako beherantz egin, gorantz baizik, 20 milioi tonako langa gainditzeraino, 2012az geroztik gertatzen ez zena. Oteroren irudiko, “datu hauek oso kezkagarriak dira, helburua 2050. urterako karbono neutraltasuna lortzea delako eta eszenatoki horretara hurbildu beharrean, urruntzen ari garelako”. Are gehiago, EH Bilduko legebiltzarkideak beharrezkotzat jo du –hala proposatu du bere mozioan– karbonogabetze prozesua 2040era aurreratzea eta horretarako plangintza eta politika publikoak abiatzea dagoeneko. “Ahalik eta azkarren karbono isurietan neutroa izango den Euskal Herri baterantz begira jarri beharrean gaude, eta horretarako ezinbestekoa da eraldaketa azkar eta eraginkorrak egitea, jakinda prozesu horrek gure jendartean inplikazio anitz eta sakonak ekarriko dituela, bai ehun produktiboan, bai mugikortasunean, bai lurralde antolamenduan; horregatik deritzogu pausu azkar eta eraginkorrak ematea ezinbestekoa dela”.
 

EH Bilduren ustez, oso arriskutsua da Gobernuak eskuin xenofoboarekin aliatzea Diru-sarrerak Bermatzeko Errentaren erreforma onartzeko

Nerea Kortajarena legebiltzarkideak Gobernuari eskatu dio erreforma hau PPrekin adosteko hipotesia guztiz bazter dezala eta serio hel diezaiola eskubide sozialetan, babesean eta gizarte kohesioan sakonduko duen negoziazioari

| 2019-06-26 13:53:00

Nerea Kortajarena legebiltzarkideak gogoratu duenez, duela urtebete  EAJ-PSEk Diru-Sarrerak Bermatzeko Errentaren erreformarako aurkeztutako Lege Proposamena erretiratu behar izan zuen bertan behera gera ez zedin, jakin bazekielako oposizioko taldeek atzera bota behar zutela. EH Bilduk eskua luzatu zion Gobernuari babes sistema hobetzeko, eta hainbat bilera izan ditu Gizarte Politikako Departamentuko ordezkariekin. Zoritxarrez, bilera horietan argi geratu da Jaurlaritzak ez duela inolako borondaterik jatorrizko Lege Proposamenaren elementu nagusiak zuzentzeko, batez ere, kaltegarrienak eta atzerakoienak direnak. “Gure proposamen bat bera ere ez du ontzat hartu Gobernuak”, azpimarratu du Kortajarenak.

Orain, ustekabean, EAJ-PSEk iazko Lege Proposamen berbera ekarriko dute bihar Osoko Bilkurara, eta tramitea aurrera aterako dute PPren babesarekin. “Baldintza honetan, EAJ eta PSEk aurkeztutako lege proposamenaren tramitea onestearen kontra egingo dugu. Oso arriskutsua da irekitzen den bidea. Oso arriskutsua da eskuin xenofoboari, kalkulu elektoralekin gaiaren erabilpen ankerra egin duenarekin bidea egitea”, ohartarazi du EH Bilduko legebiltzarkideak.

Kortajarenak azpimarratu duenez, Hirugarren Sektoreko adituek eta eragile sozial guztiek gaiaren inguruko kontsentsu handia lortu dute, eta DSBEren erreformaren norabidea adierazi dute. Orain, PP aliatu hartuz, “Gobernuak kontsentsu guztiak arrisku bizian jartzen ditu. Ez dago zalantzarik: murrizketak, baldintza gogortzea, kontrola…, hori da PPk eskatzen duena. PPrekin adostuz gero, erreforma atzerakoia izango da”.

Horregatik, Gobernuari eskatu dio “erreforma hau PPrekin adosteko hipotesia guztiz bazter dezala eta serio hel diezaiola eskubide sozialetan, babesean eta gizarte kohesioan sakonduko duen negoziazioari”.

Talde parlamentario guztiek onartu dute eskola jantokietan Lakuaren kudeaketa txarrak kalte ekonomikoa eragin duela

EH Bilduren ustez, “EAJ eta PSEk itxurak egin dituzte, haserrea adieraziz, helburu bakar batekin: arreta desbideratzea eta Hezkuntza Sailaren kontrolik eza ezkutatzea eskola jantokien kontratazioan”.

| 2019-06-24 16:55:00

EH Bilduren iritziz, gaur azpimarratzekoa da talde parlamentario guzti-guztiek, EAJ eta PSE barne, onartu dutela Jaurlaritzaren kudeaketa txarra izan dela eskola jantokien auzian eta kudeaketa txar horrek kalte ekonomikoa eragin duela funts publikoentzat eta, oro har, herritarrentzat. Hori dela eta, Eva Lopez de Arroyabek adierazi duenez, “ulergaitza da EAJ eta PSEren desmarkea eta alderdi horiek bat ez egitea bihar ponentzian onartuko den irizpenarekin”.
EH Bilduko legebiltzarkideak gogora ekarri du bai EAJk, bai PSEk, gaur kontrakoa esan duten arren, Hezkuntza Sailaren kudeaketa txarra aitortu egin dutela, bai eta kalte ekonomikoa ere. Izan ere, euren zuzenketetan argi onartu zuten, hitzez hitz, Hezkuntza Sailean kontrol mekanismo nahikoren erregulazio falta egon dela eta enpresa esleipendunen jokabidearen ondoriozko gainkostuak kalte ekonomikoa eragin zuela funts publikoentzat eta herritarrentzat, Lehiaren Euskal Agintaritzak ebatzi eta zigortu bezala. “Zuzenketetan hala onartu ostean, ez du batere zentzurik orain EAJ eta PSE ponentziaren irizpenaren kontra agertzea, funtsean ondorio nagusi bi horietara iristen delako”.
Hori horrela, Lopez de Arroyabek arreta desbideratzen eta Jaurlaritzaren kudeaketa txarra ezkutatzen saiatzea egotzi die EAJ eta PSEri. “Gaur antzezlana egin dute, kasketa bat, gezurrak eta sasi-gezurrak esaten helburu bakar batekin: arreta desbideratzea eta ezkutatzea eskola jantokien kontratazioan Hezkuntza Sailaren kontrol falta egon dela eta hori oso garesti atera zaiela administrazioari, familiei eta, oro har, gizarte osoari”.

EH Bilduren ekimenez, Legebiltzarrak Oinarrizko Lanbide Heziketarako sarbidea erraztea eskatu du

Rebeka Uberak ohartarazi du ehunka gazte hezkuntza sistematik at geratu direla ikasturte honetan, Hezkuntza Sailak araudia oso zorrotz interpretatu duelako. Gaur onartutakoaren arabera, DBHko 2. edo 3. maila egin gabe edo 17 urte baino gehiago edukita ere posible izango da Oinarrizko Lanbide Heziketan sartzea.

| 2019-06-24 16:52:00

EH Bilduren proposamen bati jarraituz, Legebiltzarrak aho batez eskatu dio gaur Hezkuntza Sailari “ahalbidetu dezala pertsona orori, bereziki gazte etorkin eta ezgaitasuna duten pertsonei, Oinarrizko Lanbide Heziketara sarbidea, Derrigorrezko Bigarren Hezkuntzako 2. edo 3. maila egin ez duten arren eta 17 urte baino gehiago dituztenen kasuan ere, horrela Lanbide Heziketako titulazio lortzeko aukera izan dezaten”. Halaber, galdegin dio “azter dezala jatorri desberdinetako 15-21 urteko gazteei zuzendutako Lanbide Heziketarako sarbidea izango den programa baten sorrera”.
Proposamenaren sustatzaileak, Rebeka Uberak, azaldu duenez, “ikasturte honetan ehunka gazte hezkuntza sistematik at geratu dira Hezkuntza Sailak araudiaren interpretazio zorrotza egin duelako”. Arazoa, erantsi du, “bereziki larria izan da gazte etorkinentzat, hezkuntza sisteman sartzeko dituzten arazoak areagotu direlako, 600 gazte baino gehiago sistematik kanpo geratzeraino, aldundien datuen arabera. Ikasturte honetara arte, aldiz, EAEra heltzen ziren adingabe atzerritarrei prestakuntza ematen zitzaien, hezkuntza sistemarako sarbidea bermatuta, baina aurten Jaurlaritzak irizpideak zaildu eta gure hezkuntza sistemak atzera egin du inklusioan eta ekitatean”.
 

Merkataritza Jardueraren Lege berriarekin ezinezkoa izango da saltoki handi gehiago ezartzea, dio EH Bilduk

Iker Casanovak aintzat hartu du saltoki handien ezartzea mugatzeko Legebiltzarrean lortutako aho bateko akordioa. Azpimarratu duenez, “erregulazio berria onuragarria izango da merkataritza txikiarentzat”.

| 2019-06-21 17:00:00

Iker Casanovak positibotzat jo du Merkataritza Jardueraren Legea aldatzeko Legebiltzarrean lortutako aho bateko akordioa, saltoki handiak ezartzeari eta handitzeari dagokienean, praktikan ezinezko egingo duelako gaur egun Araban (Gorbeia), Bizkaian (Max Center eta Megapark) eta Gipuzkoan (Garbera) existitzen direnak bezalako saltoki handiak irekitzea. Hortaz, EH Bilduko legebiltzarkidearen aburuz, “gaurkoa aurrerapausoa izan da, neutralizatu egin dugulako saltoki handi gehiago ezartzeko arriskua, merkataritza txikiarentzat hain kaltegarria litzatekeena”. Oposizioko taldeek bultzatu dute lege aldaketa hau, azkenean EAJ eta PSErekin ere hitzartuta, eta behin gaurko tramitea pasata, aurreikusita dago datorren osteguneko osoko bilkuran behin betiko onartzea. Hala, legea uztailean sartuko da indarrean eta 2015ean Lurralde Plan Sektoriala bertan behera geratu izanak utzitako hutsune legala beteko du.
Casanovak azaldu duenez, gaurko akordioarekin zorrotz mugatzen da saltoki handiak ezartzeko eta handitzeko aukera. Zehazki, legeak hiru kategoria ezarriko ditu hiri/herrien tamainaren arabera: A kategoria, 30.000 biztanle baino gehiagoko hiriak; B kategoria, 10.000-30.000 biztanle artekoak, eta C kategoria, 10.000 biztanle baino guxiagokoak. Sailkapen horri jarraituz, lege berriaren arabera, hirien kanpoaldean debekaturik egongo da 2.500 metro karratu baino gehiagoko saltokiak irekitzea A kategoriari dagokionez, B kategorian muga 1.800 metro karratukoa izango da eta C kategorian, 700 metrokoa. Salbuespen gisa, baimena emango da saltoki handiagoak irekitzeko, baldin eta merkataritza singularra edo bolumen handikoak badira bakarrik, hala nola, altzariak, autoak edo gasolindegiak. Casanovaren hitzetan, “lege berriak argi utziko du saltoki handi horiek ezinezkoak izango direla janaria eta arropa bezalako eguneroko produktuak saltzeko”.
Hori kanpoaldeari dagokionez; eta saltoki handiak hiriguneetan ezartzeari dagokionez, legeak onartuko duen gehienezko azalera 30.000 metro karratukoa izango da A kategorian, 15.000 B kategorian eta 2.000 C kategorian. Azkenik, gaur egun jada existitzen diren saltokiak handitzeari buruz ere legeak mugak ipiniko ditu: irizpide orokor gisa, handitzea %10ekoa izango da gehien jota, gaur okupatzen duten espazioarekin alderatuta.
Casanovaren iritziz, adostutakoa posible zen legerik onena da, Europar Batasuneko araudia kontuan hartuta merkataritza jarduerari egin dakizkiokeen murrizketa bakarrek interes orokorrari erantzun behar diotelako derrigorrez. Hori dela eta, irizpide horri heldu diogu segurtasun juridiko handia duen lege bat onartzeko, eta akordioa aho batekoa izateak egonkortasuna ere emango dio. Egun garrantzitsua da euskal merkataritzarentzat”.
 

ALBISTEAK

EAJk eta PSEk Pandemiaren aurkako Legea urratu eta Lakuak Legebiltzarrari astero informatzeari uko egin diote

2021-07-06 12:44:00

EAJk eta PSEk sustaturiko legea argia da: Jaurlaritzak astero agertu behar du Parlamentuan pandemiaren inguruko informazioa emateko. EH Bilduk hala egin dezala eskatu du, kutsatzeei buruzko datuak kezkagarriak direlako, baina gobernukideek ezezkoa eman diote, euren legearen eraginkortasuna hutsaren hurrengoa dela agerian utzita.

Administrazioan behin-behinekotasun tasa jaisteko konpromisorik ez izatea egotzi dio EH Bilduk Lakuari

2021-06-25 12:22:00

EAEko Administrazioak Europako behin-behinekotasun tasa altuena du, %40koa, eta EH Bilduk %8ra jaisteko helburua ezarri du. Pazis Garciak enplegua egonkortzeko prozesu malguak abian jartzea proposatu du.

Osoko zuzenketarik gabe, EH Bilduk Jaurlaritzaren ingurumen arloko legeak hobetzeko neurriak proposatu ditu

2021-06-24 15:36:00

Mikel Oterok 147 zuzenketa partzial aurkeztu dizkie Natura Ondarea Kontserbatzeko eta Ingurumen Administrazioaren lege proiektuei.

EH Bilduk trantsizio energetikoaren eta karbonogabetze prozesuaren orientazioa adostu du EAJ eta PSErekin

2021-06-23 13:40:00

Mikel Oterok akordioaren garrantzia azpimarratu du, klima larrialdia adostasun zabalak eskatzen dituen garai honetako erronka nagusietako bat delako. Ponentzia batek herri honetako inteligentzia kolektibo osoa aktibatuko du karbonogabetze prozesuaren ildo estrategikoak zehazteko.